Read Capanahua Zâŋ 4 Bible Online

Zâŋ 4 - Capanahua bible

Zâŋ 4

¹Fariziyɛ̧́ri̧ lá ɓá Zezú niŋ a ɓá njukuri nyá batêm ŋgɛ̧́ ndé Zâŋ.

²(Dáy a gbátké lé, Zezú ka mûn nɛ́, zi ɓá njuku a há̧na nyá batêm nyá, ɓá gunbɛʼɛri pé ɓá njukuri nyá batêm.)

³Nǎŋnɔ́ Zezú uru ka Judé a resé Galilê.

⁴Dáy a ké e tá lá ɓil pû Samarí.

⁵Ké gé ka̧ Sikar pû a há̧na a tísiri a samarí ka e ka gbaŋ wâʼa a Zakob hí̧ Jozɛf gun a mɛ̌y.

⁶A gelké nɔ́, lɔ̂ʼɔmbii a Zakob erú. Sêe e ka lawgel a tûl dá, lé Zezú ta̧ ka séna dáy a gé kaw ka gbaŋ lɔ̂ʼɔmbiiké.

⁷Wûny Samarí a há̧na gí ɗú mbii dáy Zezú sa hí̧ nɛ́ ɓá: «Mɔ́ wá mbii hí̧ mí, a mí nzó.»

⁸(Gunbɛʼɛri kála sé zé lâʼa, a ɓil pû.)

⁹Wûny samarí sa hí̧ Zezú ɓá: « Dáy mɔ̌, mɔ kaw ɓá Juyíf, ná a̧ní rá̧ mɔ e vbí mí, mǐ ka mi ɓá wûny samarí, mbii nzóna lé?» (Ɓayhí̧lé, Juyífri zi láhá̧narí̧ kuu njuku samaríri yá.)

¹⁰Zezú sa hí̧ nɛ́: «Mɔ̌ mí tu hɛ̧ ka Gáŋvbôn hí̧y, rá̧ a mí tu njuku ka vbí mɔ́ mbii nzónay, ɓá mɔ̌ pé e vbí nɛ́ mbiiy a ké hí̧ mɔ́ mbii ka e hí̧ ndísɛ̌ʼɛ.»

¹¹Wûny rá̧y fere a sa hí̧ nɛ́: «Gáŋnjuku lɔ̂ʼɔmbii ɗiɗí, dáy mɔ zi tí ka hɛ̧ ɗú mbii yá. Mɔ e niŋ a̧ní rá̧ a ziŋ mbii a ndísɛ̌ʼɛ nɔ́ lé?

¹²Zîi a ɓurú Zakob hí̧ rú lɔ̂ʼɔmbii nɛ́, mɛ̌ ka mûn nɛ́ ké nzó mbiiké, gun a mɛ̌ri̧ rá̧ hɛ̧hɔ́la a mɛ̌ri̧ nzó mbiiké kɔ́. Dáy, mɔ kɛrɛ ɓá mɔ ndé Zakob ka hɔ̧́na lé?»

¹³Zezú sa hí̧ nɛ́: «Njuku too ka nzó mbii nɛ́y, ké e lá kpɔʼɔmbii ɓáy,

¹⁴dáy a njuku ka e nzó mbii ka mi e hí̧ nɛ́y, kpɔʼɔmbii tí í nɛ́ mbaa. Dáy, mbii ka mi e hí̧ nɛ́y, e ná hí̧ nɛ́ ɓá lɔ̂ʼɔmbii ka e hí̧ nɛ́ káwa a ndísɛ̌ʼɛ dát.»

¹⁵Wûny rá̧y sa: «Gáŋnjuku, mɔ́ hí̧ mí mbiiké nɔ́, a mí tí ná lá kpɔʼɔmbii, a gí ɗú mbii a gelé ɓáy.»

¹⁶Zezú sa hí̧ nɛ́: «Mɔ́ sé ɗí wɔ̧rɔ̧́ a mɔ̌, a regí gelé.»

¹⁷Wûny rá̧y resa: «Mi zi tí ka wɔ̧rɔ̧́ nyá.» Dáy Zezú sa: «Gbátɓay pé mɔ sa ɓá mɔ zi tí ka wɔ̧rɔ̧́ nyáy.

¹⁸Ɓayhí̧lé, mɔ nyá wɔ̧rɔ̧́ bɔʼɔ ndíɓí dá, dáy njuku a ŋgɛŋnɛ́ ka mɔ kaw kuu mɛ̌y, zi tí ɓá wɔ̧rɔ̧́ a mɔ̌ nyá. Mɔ sa gbátɓay.»

¹⁹Nǎŋnɔ́, wûny rá̧y sa: «Gáŋmbây, mi kó ɓá mɔ ɓá porofɛ́t!

²⁰Zîi a ɓurú samaríri, hɔ̧́ Gáŋvbôn ka tûl kon nɛ́, dáy a wǎy Juyífri, i sa ɓá: “Gel hɔ̧́ Gáŋvbôn lé e ɓá a Zerúzalɛ̂m sá̧.”»

²¹Zezú sa hí̧ nɛ́: «Mɔ́ lá mí, nâm mí gíw, ka zi tí ɓá a tûl kon nɛ́ malé ka Zerúzalɛ̂m, pé i e sé hɔ̧́ Bâa mbaa.

²²A wǎyri, njuku samaríri, i hɔ̧́ Gáŋvbôn táŋ tu nɛ́, a ɓurú Juyífri, rú hɔ̧́ nɛ́ a tu nɛ́, ɓayhí̧lé pɛ̧́na gí a gel a Juyífri.

²³Nâmké mí gíw, dáy nâmké ka̧ dá, ka gbát njuku hɔ̧́hɛ̧ri̧, e hɔ̧́ Bâa ka ŋgboro a Têm rá̧ ka ŋgboro a gbátɓay. Ɓayhí̧lé mára̧ njuku hɔ̧́hɛ̧ nɔ́rí̧ pé Bâa a mǐ ziy.

²⁴Gáŋvbôn ɓá Têm, dáy belɓá njukuri ka hɔ̧́ nɛ́y, kú hɔ̧́ nɛ́ ka ŋgboro a Têm rá̧ ka gbátɓay.»

²⁵Wûny rá̧y sa hí̧ nɛ́: «Mi tu ɓá Kiris e gína. Gelka ké mí gíy, ké e sa táŋa ɓay too hí̧ rú.»

²⁶Zezú sa hí̧ nɛ́: «Ɓá mǐ, pé kaw saɓay hí̧ mɔ́ nɛ́y.»

²⁷A goló gunbɔʼɔ a Zezúri regí a kaw yér, ɓay ka kú kó nɛ́ kaw saɓay kuu wûnynjukuy. Dáy njuku a há̧na a bazeŋ a kuriri ka vbí nɛ́ ɓay ɓá: «A̧hí̧ mɔ́ zi kuu mɛ̌y?» Malé: «Ɓayhí̧ mɔ́ kaw sa kuu mɛ̌y lé, zi tí yá?»

²⁸Dáy wûny rá̧y pɔŋ íri mbii a mɛ̌ si, a rekála sé ɓil pû, a sa hí̧ njukuri:

²⁹«Í gí kó, njuku a há̧na ka saɓay a hɛ̧ ka mi niŋ too. Zi tí ɓá Kiris yá lé?»

³⁰Dáy njukuri tɛ̧́ a ɓil pû a gí ziŋ Zezú.

³¹A ɓil sɛl a sêeké nɔ́, gunbɛʼɛri vú hí̧ nɛ́ ɓá ké sɔ̧́lâʼa a sa: «Gáŋnjuku, mɔ́ sɔ̧́lâʼa!»

³²Dáy Zezú sa hí̧ kuriri: «Mi e sɔ̧́lâʼa ka i zi tu yáy.»

³³Dáy gunbɛʼɛri vbí há̧narí̧ a sa: «Malé njuku a há̧na gí ɓá lâʼa hí̧ nɛ́ lé?»

³⁴Zezú sa hí̧ kuriri ɓá: «lâʼa a mǐ ɓá niŋ hɛ̧ zína a njuku ka pé mí gíy, a mí ɔrɔ nzáʼapéna a mɛ̌.

³⁵Wǎyri, i sa ka mûn a wǎyri ɓá: “Zi fêw nɛŋ ɓay a kú lú hɛ̧pay.” Dáy mǐ, mi sa hí̧ wǎyri, í ɛ̧rɛ̧ hɛ̧pay nɛ́ ɓá béláké, hɛ̧payké kpáʼa dá a ná ɗɛ́ŋ ɓay a kú lú rá!

³⁶Njuku ka lú hɛ̧payké ziŋ kpáʼandɔ̂ʼɔ péna a mɛ̌ dá, ké mára̧ hɛ̧pay ɓay a káwa a ndísɛ̌ʼɛ dát. Nǎŋnɔ́ njuku ka rú rá̧ njuku ka lú hɛ̧pay e rí mûn a kuriri mbêw.

³⁷Ɓayhí̧lé katína galaɓay há̧na sa: “Njuku rú hɛ̧pay ɓórí, dáy njuku ka lú hɛ̧payké ɓórí.”

³⁸Mi pé wǎyri sé lú hɛ̧pay a ɓil wâʼa ka i zi niŋ péna karú yáy. Njuku a fékéri niŋ péna karú, dáy wǎyri, i gí ri ɓil péna a kuriri.»

³⁹Dawá njukuri a ɓil pû samarí láɓulaw hí̧ Zezú, ɓayhí̧lé, wûny nɔ́ sa hí̧ kuriri ɓá: «Ké sa hí̧ mí, hɛ̧ too ka mi niŋ.»

⁴⁰Ɓaykénɔ́, pé njuku Samaríri gí gɔ́ŋ Zezú ɓá ké kaw kuu kuriri. Dáy Zezú rekaw kuu kuriri nâm sére.

⁴¹Njuku samaríri ɓá ŋgɛ̧́náké láɓulaw hí̧ Zezú sé tûl ɓay a ké sá ka nzɛ́ʼɛy,

⁴²dáy a sa hí̧ wûny rá̧y ɓá: «Tí ɓá ɓay tûl ɓay ka mɔ sa hí̧ rú, pé rú láɓulaw yá, rú láɓulaw ɓayhí̧lé, rú láɓay a ké sá a súkú a ɓurú, a tu ɓá ké ɓá gbát njuku pɛ̧́ njuku a tísiriri!»

⁴³Fal niŋ nâm sére kuu kuririy, Zezú kála sé ɓil kaw a Galilê.

⁴⁴Ké sa ka mûn nɛ́ ɓá: «Porofɛ́t a há̧na a kú hɔ̧́ nɛ́ ka tísiri a mɛ̌ zi tí yá.»

⁴⁵Gelka ké gé ka̧ Galilê, njuku a ɓil káwakéri, gé nyá nɛ́ ɓá béláké, ɓayhí̧lé kuriri kɔ́ kú sé Zerúzalɛ̂m, a ɓil nâm Pâk, dáy a gé kó hɛ̧ri̧ too ka Zezú niŋ ka sêeké.

⁴⁶Nǎŋnɔ́ Zezú regí Kanaa a ɓil kaw a Galilê, gelka ké fere mbii tɛ̧́ vôn. Dáy Gáŋnjuku a njukupéna a mbây a há̧na erú, gun a mɛ̌ e ka záŋmá a Kapɛrnahûm.

⁴⁷Gelka ké lá ɓá Zezú uru ka Judé a ka̧ Galilê, ké sé ziŋ nɛ́ a vú hí̧ nɛ́ ɓá ké sé Kapɛrnahûm sé ŋgɛ́rɛ gun a mɛ̌, ka erú ka záŋmá ŋgɛ́rɛ mambáy.

⁴⁸Dáy Zezú sa hí̧ nɛ́ ɓá: «I zi ma láɓulaw yá dát, ka wǎyri mí zi kó hɛ̧sáʼamari̧ rá̧ hɛ̧ yérkéri yáy.»

⁴⁹Dáy njukupéna ráy fere a sa hí̧ nɛ́ ɓá: «Gáŋnjuku, mɔ́ gí gel ní, ka gun a mǐ pa̧n hú yá ɓáy.»

⁵⁰Zezú fere a sa hí̧ nɛ́: «Mɔ́ resé pû, gun a mɔ̌ ziŋ ŋgɛ́rɛ dá.» Njuku ráy láɓulaw sé tûl ɓay ka Zezú say, a rekála.

⁵¹Gelka ké kaw resé pûy, njukupéna a mɛ̌ri̧ gí ziŋ nɛ́y, a sa hí̧ nɛ́ ɓá: «Gun a mɔ̌ e ka nûn!»

⁵²Ké vbí kuriri ɓá, a ɓil sɛl a sêe daw a̧ní rá̧ gun a mǐ ziŋ ŋgɛ́rɛ lé, dáy kú sa: «A lewra, a ɓil sɛl a sêe mbêw a fal sêe ɓaraŋgaŋ, pé mûn nɛ́ pɔŋ záŋay.»

⁵³Dáy bâa a gun tu ɓá, a ɓil sɛl a sêeké nɔ́, ka Zezú kaw saɓay hí̧ nɛ́ ɓá: «Gun a mɔ̌ ziŋ ŋgɛ́rɛ dá.» Nǎŋnɔ́, mɛ̌ kuu î̧n a mɛ̌ri̧ too, kú láɓulaw hí̧ Zezú.

⁵⁴Ná ɓá hɛ̧sáʼama a séreké ka Zezú niŋ a fal réna a mɛ̌ a Judé ka tísiri a Galilê.