Read Capanahua Zâŋ 5 Bible Online

Zâŋ 5 - Capanahua bible

Zâŋ 5

¹Falké le, Zezú uru a sé Zerúzalɛ̂m sé gel mára̧ a Juyífri.

²Dáy a Zerúzalɛ̂m, ka gbaŋ nzáʼa ndol a Mbóléri, gun fâ̧w a há̧na erú rá̧ bɔʼɔ bóró ndíɓí erú a kú ɗí ka nzáʼa Hebiré ɓá Betɛsda.

³Ka bɔʼɔ bóróké nɔ́rí̧, njuku záŋmári̧ ɓá ŋgɛ̧́náké nárú̧: Râ̧wri̧, njuku bɔʼɔ belyári rá̧ njukuri ka mûn a kuriri húy.[Kú zoko láŋa a mbii.

⁴Ɓayhí̧lé aŋnze a há̧na kaw ɗere dát gí ɓil fâ̧wké, ka gí laŋ mbii, lé njuku záŋmá ka tí ɗere ɗambɛl sé ɓil mbiiké, a fal láŋa mbiiké nɔ́ ɗɛ́ŋ, ziŋ ŋgɛ́rɛ a záŋmá a sí̧ lé too a ké erúy.]

⁵A gelké nɔ́, njuku a há̧na erú, ka e a záŋmá mbimbɔ̂m bonsáy a zíndɔ̂ʼɔsére dáy.

⁶Gelka, Zezú kó nɛ́ ná tísiriy, ka a tu ɓá záŋmá a mɛ̌ ɗiɓaŋ dáy, ké vbí nɛ́ ɓá: «Mɔ zi ɓay a ziŋ ŋgɛ́rɛ lé?»

⁷Njuku záŋmá fere a sa hí̧ nɛ́: «Gáŋnjuku, mi zi tí ka njuku ɓá mí vbú ɓil fâ̧w ka mbii kaw láŋa nyá. Gelka, mí zi ɓay a mi ɗéré sé le, njuku a féké tí ɗere ɗambɛl hí̧ mí dá.»

⁸Dáy Zezú sa hí̧ nɛ́: «Mɔ́ uru, a mɔ́ mbí hîi a mɔ́, a séséna.»

⁹Núnmbɛ̧́nɛ́, njuku ráy ziŋ ŋgɛ́rɛ, a uru a mbí hîi a mɛ̌, a tí séséna.

¹⁰Sêeké nɔ́ ɓá nâm ɔʼɔ a Juyífri, dáy mbây a Juyífri sa hí̧ njuku ráy ka ziŋ ŋgɛ́rɛ ɓá: Sénɛ́ ɓá sêe ɔʼɔ, sáŋna zi hí̧ mɔ́ ŋgboro ɓá mɔ́ hol hîi a mɔ̌ nyá.

¹¹Ké fere a sa hí̧ kuriri ɓá: «Njuku ka ŋgɛ́rɛ mí sa hí̧ mí ɓá: Mí mbí hîi a mǐ, a mí séséna.»

¹²Dáy kú vbí nɛ́ ɓá: Njuku así̧ sa hí̧ mɔ̌ ɓá, mɔ́ mbí hîi a mɔ̌, ka séséna lé?

¹³Dáy njuku ka ziŋ ŋgɛ́rɛ zi tu ɓá njuku a sí̧ lé yá. Ɓayhí̧lé, Zezú ɓɔ́l a ɓil a njukuri ka e a gelké.

¹⁴Falké Zezú resé ziŋ njuku ráy a ɓil vûn gɔ́ŋ Gáŋvbôn, a sa hí̧ nɛ́ ɓá: Mɔ ziŋ ŋgɛ́rɛ a ŋgɛŋnɛ́ dá, mɔ́ niŋ ɓékéhɛ̧ mbaa, ɓay a hɛ̧ a féké ké tí ná ziŋ mɔ́ ndé a nɛ́ ɓáy.

¹⁵Njuku ráy rekála, a sé sa hí̧ mbây a Juyífri ɓá Zezú pé ŋgɛ́rɛ nɛ́y.

¹⁶Ɓaykénɔ́ pé Juyífri ɛ́ ŋgboro ɓay a í Zezú, ɓay ka ké niŋ hɛ̧ké a sêe ɔʼɔy.

¹⁷Dáy Zezú, fere a sa hí̧ kuriri ɓá: «Bâa a mǐ kaw niŋ péna dát, nǎŋnɔ́ mǐ kɔ́, mi kaw niŋ péna.»

¹⁸Ɓay a tûl ɓay nɔ́, mbây a Juyífri ɛ́ ŋgboro í Zezú, tí ɓá ɓay a ké niŋ péna a sêe ɔʼɔ yá, ɓá ɓay ka ké ɗí Gáŋvbôn ɓá Bâa a mɛ̌y, ka reɓá mûn nɛ́ lé Gáŋvbôn.

¹⁹Zezú rembí ɓay a sa: «Katína mi kaw sa hí̧ wǎyri gbátɓay: Gun, ma niŋ hɛ̧ há̧na ka tûlé yá, ké niŋ ɓá hɛ̧ri̧ a ké kó Bâa a mɛ̌ niŋ. Hɛ̧ri̧ too ka Bâa a mɛ̌ niŋ, Gun niŋ ɓá báŋké kɔ́.

²⁰Ɓayhí̧lé, Bâa zi Gun, a tɔ́ʼɔ nɛ́ hɛ̧ri̧ too a ké niŋ. Dáy Bâa e tɔ́ʼɔ nɛ́ hɛ̧ niŋa a hɔ̧́náké ka ndé a nɛ́rí̧, ɓay a í kaw yér sé tûlké.

²¹Ɓá báŋké nɔ́ ka Bâa toma hûlri, ka hí̧ kuriri ndísɛ̌ʼɛy, nǎŋnɔ́ kɔ́, Gun hí̧ ndísɛ̌ʼɛ hí̧ njuku a ké ziy.

²²Bâa zi walɓay ka̧n tûl a njuku a há̧na nyá, dáy ké hí̧ kpɔ́ŋa walɓay too hí̧ Gun,

²³rá̧lǒo njukuri too kú hɔ̧́ Gun ɓá báŋké a kú hɔ̧́ Bâa kɔ́y. Njuku ka zi hɔ̧́ Gun nyáy, zi hɔ̧́ Bâa ka pé nɛ́ gí yá.

²⁴Katína, mi sa hí̧ wǎyri gbátɓay: Njuku ka láɓay a mǐ, ka láɓulaw hí̧ njuku ka pé mí gíy, e ziŋ káwa a ndísɛ̌ʼɛ dát. Kú tí walɓay ŋgbá nɛ́ mbaa, nǎŋnɔ́ ké tá a ɓil hûl sé ɓil káwa a ndísɛ̌ʼɛ dá.

²⁵Katína, mi sa hí̧ wǎyri gbátɓay: Nâmké e gína, dáy nâmké ka̧ dá, ka hûlri e lá kɔ́ŋ a Gun a Gáŋvbôn rá̧ njukuri ka e lá kɔ́ŋké, e ziŋ káwa a ndísɛ̌ʼɛ.

²⁶Ɓayhí̧lé ɓá báŋké ka Bâa erú ka ndísɛ̌ʼɛ a gé léy, nǎŋnɔ́ pé ké hí̧ Gun kɔ́ ndísɛ̌ʼɛ a gé léy.

²⁷Dáy Bâa hí̧ Gun kpɔ́ŋa walɓay kɔ̧ tûl a njuku, ɓayhí̧lé ké ɓá Gun a njuku.

²⁸Í kaw yér sé tûlké yá, ɓayhí̧lé nâmké e gína, hûlri too ka e a ɓil lɔ̂ʼɔpâl, e lá kɔ́ŋɛ́,

²⁹a toma, a njukuri ka niŋ bélahɛ̧, e toma ɓay a ziŋ ndísɛ̌ʼɛ, dáy a njukuri ka niŋ a ɓékéhɛ̧y, e toma ɓay a tá sé mbɛl walɓay.

³⁰Mi zi niŋ hɛ̧ há̧na ka tûl ní nyá, mi walɓay sé tûl hɛ̧ ka Gáŋvbôn sa hí̧ mí, dáy walɓay a mǐ, ná ɓá ndáráké, ɓayhí̧lé mi zi ɛ́ hɛ̧ ka mi ziy yá, mi ɛ́ ɓá hɛ̧ ka njuku ka pé mí gí ziy.»

³¹«Mí ɓá mǐ, pé sa ɓay a mǐ ka mûn ní, ɓay a mǐké, zi tí ka nɛ́rɛ̧ nyá.

³²Dáy njuku a há̧na erú, a kaw saɓay a mǐ, dáy mi tu ɓá, ɓay ka ké sa sé tûl ní ɓá gbátɓay.

³³I pé njukuri sé gel a Zâŋ dáy, ké saɓay hɛ̧ a ké kó, ka a lá sé tûl a gbátɓay ɓá táŋáké.

³⁴Mi zi zoko ɓá, njuku ké sa hɛ̧ a ké kó ka a lá sé tûl ní nyá, dáy mi saɓayké nɔ́ ɓay a i ziŋ pɛ̧́na.

³⁵Zâŋ kaw ɓá báŋa lámbe a kú ɓá hɔrɛ ka̧nrú̧ ɓay a ké táŋgel, dáy i zibɔʼɔké, a ri mûn a wǎyri nâm kpay a ɓil geltáŋaké.

³⁶Dáy a mǐ, mi erú ka njuku ka hɔ̧́ ndé Zâŋ, a kaw saɓay a mǐ, ɓayhí̧lé péna ka Bâa hí̧ mí, ɓá mí niŋ, pénáké nɔ́ saɓay a mǐ, a tɔ́ʼɔ ɓá katína ɓá Bâa pé, pé mí gíy.

³⁷Bâa ka pé mí gíy, saɓay a mǐ kɔ́. Dáy, i zi lá kɔ́ŋɛ́ bɔʼɔ mbêw yá, a zi kó nûn nɛ́ bɔʼɔ mbêw yá.

³⁸I zi koro ɓay a mɛ̌ ka̧n law a wǎyri yá, ɓayhí̧lé i zi láɓulaw hí̧ njuku a ké pé nɛ́ gíy yá.

³⁹I kɛ̧́ hɛ̧ ka ɗé ka̧n ɓil Mbété a Gáŋvbôn, ɓayhí̧lé i kɛrɛ ɓá, i e ziŋ káwa a ndísɛ̌ʼɛ a ɓilké. A zi tu ɓá, ɓá hɛ̧ ɗéna nɔ́rí̧ pé kaw saɓay a mǐ nyá.

⁴⁰Dáy i zi ɓay a gí gel ní, a i gí ziŋ gbát ndísɛ̌ʼɛ yá!»

⁴¹«Mi zi ɛ́ ɗéla ka gí a gel a njukuri yá.

⁴²Dáy mi tu wǎyri, mi tu ɓá i zi tí ka zína a Gáŋvbôn ka law a wǎyri yá.

⁴³Mi gí ka rɛŋ a Bâa a mǐ, i zi nyá mí nyá. Nǎŋnɔ́ njuku a féké mí gí ka rɛŋɛ́y, i e nyá nɛ́.

⁴⁴Dáy a̧ní rá̧, i erú ka láɓulaw lé, wǎyri ka ɛ́ ɓá hɔ̧́na a bazeŋ a wǎyri, ka zi ɛ́ hɔ̧́na ka gí a gel a Gáŋvbôn mbêw yáŋ nyáy?

⁴⁵I zi ná kɛrɛ ɓá mǐ, mí e walɓay ka̧n tûl a wǎyri a mbɛl a Bâa a mǐ, njuku ka e walɓay ka̧n tûl wǎyri, pé ɓá Mɔyíze ka i ɓá kɛrɛ a wǎyri ka̧n tûléy.

⁴⁶Dáy wǎyri mí láɓulaw katína hí̧ Mɔyíze, í e láɓulaw hí̧ mí kɔ́, ɓayhí̧lé ké ɗé a saɓay a kó mǐ.

⁴⁷Dáy ka i zi láɓulaw sé tûl hɛ̧ a ké ɗé yáy, e niŋ a̧ní rá̧ i láɓulaw sé tûl ɓay a mǐri̧ lé?»