Read Capanahua Zâŋ 6 Bible Online

Zâŋ 6 - Capanahua bible

Zâŋ 6

¹A falké, Zezú he sé helkála mbii a Galilê (ka kú ɗí ɓá Tiberiyád kɔ́y).

²Njukuri ɓá ŋgɛ̧́náké tɔ́ŋ nɛ́, ɓayhí̧lé kú kó hɛ̧sáʼamari̧ a ké niŋ, ka a ŋgɛ́rɛ njuku záŋmári̧.

³Zezú sé he tûl kɔ̂l a kawrú kuu gunbɛʼɛri.

⁵Zezú ɛ̧rɛ̧ gel, lé ké kó njukuri a kaw gí gé lé dáy, a sa hí̧ Filíp: «A gel a sí̧ a gelé, ná e zé lâʼa, ɓay a hí̧ njuku nɛ́rí̧ too, kú sɔ̧́ lé?»

⁶(Zezú sa nǎŋnɔ́ ɓay a lélaw a Filíp, ɓayhí̧lé ké tu hɛ̧ a ké e niŋáké dá.)

⁷Filíp fere a sa hí̧ nɛ́: «Mí ɓá Lari sáki ísɔ́t sére, pé ná zé biré rúy kɔ́, zi ma hí̧ njukuri too ka e a gelé nɛ́, ɓay a kú ziŋ kpay a sɔ̧́ nyá.»

⁸Gunbɛʼɛ a há̧na, rɛŋɛ́ ɓá Anderé, nyîn a Píyɛ́r sa hí̧ nɛ́:

⁹«Kaban njuku a há̧na a gelé erú ka biré ndíɓí rá̧ gun nzwîy sére, dáy a nɔ́ e ma a̧ní ɓay a hí̧ njukuri ka ŋgɛ̧́ nɛ́ lé?»

¹⁰Zezú sa ɓá: «Í sa kú kaw tísiri too.» A gelké kpâari erú dáy kú kaw tûlké, bon a wɔ̧rɔ̧́njukuri too ɓá kumrá̧ké ndíɓí.

¹¹Zezú mbí biré rá̧ nzwîy a zi awá hí̧ Gáŋvbôn, a wal hí̧ njukuri ka kaw tísiriy, ɓá báŋké a kú ziy.

¹²Gelka kú sɔ̧́ ka a mbá dáy, Zezú sa hí̧ gunbɛʼɛri: «Í fá̧ gázínáké, a há̧na ké zi ná ɓɔ́l.»

¹³Biré ndíɓí yáŋ ka njukuri sɔ̧́y, kú fá̧ gázínáké mbá tol bôo a sére.

¹⁴Njukuri ka kó hɛ̧sáʼama nɔ́ ka Zezú niŋ, sa ɓá: Njuku nɛ́, ɓá gbát porofɛ́t ka e gí tísiri.

¹⁵Dáy Zezú tu ɓá, kú e gí mbí nɛ́ a ŋgɛ́rɛ, ɓay a ɓá nɛ́ ná mbây, dáy a uru a rekála hɛʼɛ sé tûl kɔ̂l.

¹⁶Gelka bɔʼɔ lêw niŋ dáy, gunbɔʼɔ a Zezúri ɗere sé gbaŋ fâ̧w.

¹⁷Kú ri ɓil kumbôn ɓay he mbii a resé Kapɛrnahûm. Gel yírí dá, dáy Zezú pa̧n regí ziŋ kuriri yá ɓáy.

¹⁸Gáŋ kúna tí kúna, ka ŋgɛ́rɛ a laŋ mbii.

¹⁹Gunbɛʼɛri here kumbôn zaa niŋ ínáké ndíɓí dá, lé kú kó Zezú séséna a tûl mbii gí ɓá ŋgboro a kumbôn a kuriri dáy wɔ́w ŋgbá kuriri.

²⁰Zezú sa hí̧ kuriri: «Ɓá mǐ, í ŋgú wɔ́w yá.»

²¹Gunbɛʼɛri zi ɓá kú mbí nɛ́ he ɓil kumbôn, lé kumbôn ka̧ nzáʼa héna dá.

²²Típélé a féké, njukuri ka e ka helkála mbii a ŋgboro sá̧y, kó ɓá kumbôn ɓá mbêw yáŋ pé erú ka golóy, kú tu ɓá táŋáké ɓá Zezú zi he kumbônké kuu gunbɛʼɛri yá, ɓá kuriri hɛʼɛ a kuriri pé kálay.

²³Nǎŋnɔ́ kumbôn a fékéri uru ka Tiberiyád gí ka̧ gbaŋ gel a kú sɔ̧́ biré, ka fal ka Gáŋmbây zi awá hí̧ Gáŋvbôn.

²⁴Gelka, njukuri kó ɓá Zezú malé gunbɛʼɛri zi tí gelké mbaay, kú he ɓil kumbôn nɔ́rí̧ a kála sé ɛ́ nɛ́ a Kapɛrnahûm.

²⁵Gelka njukuri gé ziŋ Zezú a hélkála mbii sá̧y, kú vbí nɛ́ ɓá: «Gáŋnjuku, a sêe sí̧ rá̧ mɔ ka̧ gelé lé?»

²⁶Dáy Zezú fere a sa hí̧ kuriri: «Katína, mi sa hí̧ wǎyri gbátɓay: I ɛ́ mí, tí ɓá ɓay ka i tu táŋa a hɛ̧sáʼamari̧ ka mí niŋ nyá, i ɛ́ mí ɓay ka i sɔ̧́ biré a ɓil a wǎyri mbáy.

²⁷Í zi ná niŋ péna, ɓay a lâʼa ka e ɓewa baa, dáy í niŋ péna, ɓá ɓay a lâʼa ka tí ɓewa yá, ka e hí̧ káwa a ndísɛ̌ʼɛ dát, ka Gun a njuku e hí̧ wǎyri; ɓayhí̧lé ɓá mɛ̌ pé Bâa, Gáŋvbôn ɓá ŋgána a mɛ̌ ka̧n tûlé.»

²⁸Dáy, kú vbí nɛ́ ɓá: A̧hí̧ rú e niŋáké ɓay a niŋ hɛ̧ri̧ ka Gáŋvbôn ziy lé?

²⁹Zezú resa hí̧ kuriri ɓá: Hɛ̧ ka Gáŋvbôn ziy, ɓá i láɓulaw hí̧ njuku a ké pé nɛ́ gíy.

³⁰Dáy kú revbí nɛ́ ɓá: «hɛ̧sáʼama hí̧, mɔ e niŋáké a rú kó a láɓulaw hí̧ mɔ́ malé a̧hí̧ mɔ e niŋáké lé?

³¹Zîi a ɓurú sɔ̧́ mân[2] a ɓil lawkɔ́r, ɓá báŋké ka ɗé ka̧n ɓil Mbété a Gáŋvbôn ɓá: “Ké hí̧ kuriri biré ka gí a nûnalê ɓá kú sɔ̧́.”»

³²Zezú resa hí̧ kuriri ɓá: «Katína mi sa hí̧ wǎyri ɓá gbátɓay: Tí ɓá Mɔyíze pé hí̧ wǎyri biré a nûnalê yá, ɓá Bâa a mǐ, pé hí̧ wǎyri gbát biré a nûnalê.

³³Ɓayhí̧lé, biré ka Gáŋvbôn hí̧, ɓá njuku ka ɗéré a nûnalê, ka a gí hí̧ káwa a ndísɛ̌ʼɛ hí̧ njuku a tísiriri.»

³⁴Dáy kú resa hí̧ nɛ́ ɓá: «Gáŋnjuku, mɔ́ hí̧ rú biréké nɔ́ dát.»

³⁵Zezú sa hí̧ kuriri: «Mi ɓá biré ka hí̧ ndísɛ̌ʼɛ. Njuku ka gí gél ní, tí lá nzala bɔʼɔ mbêw yá rá̧ njuku ka láɓulaw hí̧ mí, tí lá kpɔʼɔmbii bɔʼɔ mbêw yá.

³⁶Mi tí sa hí̧ wǎyri, i kó mí dáy, a zi láɓulaw hí̧ mí nyá.

³⁷Njuku too, ka Bâa hí̧ mí, e gí gél ní, dáy mi tí ní njuku ka gí gél ní kɔ̧ kála bɔʼɔ mbêw yá.

³⁸Ɓayhí̧lé, mi zi ɗere gí a nûnalê ɓay a mí niŋ hɛ̧ ka mi zi yá, dáy ɓá, ɓay a mí niŋ hɛ̧ ka njuku ka pé mi gí ziy.

³⁹Nǎŋnɔ́ hɛ̧ ka njuku ka pé mí ziy, ɓá mí tí ná ɓá njuku mbêw ɓɔ́l a ɓil a njukuri a ké hí̧ mí, dáy mí toma kuriri ka hûl a sêe kɔ́rɔ́ké.

⁴⁰Hɛ̧ ka Bâa a mǐ ziy ɓá njuku too ka kó Gun a njuku, ka a láɓulaw hí̧ nɛ́y, ké ziŋ káwa a ndísɛ̌ʼɛ dát, a mí toma nɛ́ ka hûl a sêe kɔ́rɔ́ké.»

⁴¹Juyífri ŋgɔ̧rɔ̧ ɓay sé tûl a Zezú, ɓay a ké sa ɓá: «Mi kaw ɓá biré ka ɗere a nûnalê.»

⁴²Dáy a kú sa: «Tí ɓá Zezú gun a Jozɛf yá lé? Rú tu bâa rá̧ mâa a mɛ̌ ɓá táŋáké. E niŋ a̧ní rá̧ ŋgɛŋnɛ́, ké e sa ɓá, ké ɗere a nûnalê lé?»

⁴³Dáy Zezú sa hí̧ kuriri: «Í pɔŋ ŋgɔ̧rɔ̧ ɓay, a bazeŋ a wǎyri.

⁴⁴Njuku a há̧na mbêw, zi ma gí gél ní nyá ka mí zi tí ɓá, Bâa a mǐ pé tɔ́ʼɔ nɛ́ ŋgboro yáy, rá̧ mí toma nɛ́ ka hûl a sêe kɔ́rɔ́ké.

⁴⁵Porofɛ́tri ɗé ɓá: “Gáŋvbôn e tɔ́ʼɔ kuriri hɛ̧ri̧ too. Rá̧ njuku too ka lá nzáʼa a Bâa, ka a nyá hɛ̧tɔ́ʼɔ a mɛ̌, e gí gél ní.”

⁴⁶Njuku a há̧na ka kó Bâa bɔʼɔ mbêw zi tí yá, ɓá njuku ka tɛ̧́ ka gel a Gáŋvbôn, ɓá mɛ̌ nɔ́ hɛʼɛ pé kó Bâa.

⁴⁷Katína, mi sa hí̧ wǎyri ɓá gbátɓay, njuku ka láɓulaw hí̧ mí, e ziŋ káwa a ndísɛ̌ʼɛ dát.

⁴⁸Mi kaw ɓá biré ka hí̧ ndísɛ̌ʼɛ.

⁴⁹Zîi a wǎyri sɔ̧́ mân ka lawkɔ́r, a falké kú ziŋ hûl.

⁵⁰Dáy a gelé, ɓá biré ka ndére gí a nûnalê, njuku, ka sɔ̧́ biréké, tí ziŋ hûl yá.

⁵¹Mi kaw ɓá biré a ndísɛ̌ʼɛ ka ɗere a nûnalê. Njuku ka sɔ̧́ biréké, e kaw ka ndísɛ̌ʼɛ dát. Dáy biré ka mi e hí̧naké, ɓá hay mûn ní, pé mi e hí̧naké ɓay a káwa ndísɛ̌ʼɛ a njuku a tísiri.»

⁵²A tûl ɓayké nɔ́, Juyífri many há̧narí̧ ŋgɛ́rɛ mambá a vbí ɓá: «A̧ní rá̧ njuku nɛ́ e hí̧ nárí̧ hay mûn nɛ́, ɓay a ná sɔ̧́y lé?»

⁵³Dáy Zezú sa: «Katína, mi sa hí̧ wǎyri gbátɓay, njuku mi zi sɔ̧́ hay mûn a Gun a njuku, a zi nzó sêm mûn nɛ́ nyáy, ké tí e ka gbát káwa a ndísɛ̌ʼɛ yá.

⁵⁴Njuku ka sɔ̧́ hay mûn ní, ka a nzó sêm mûn ní, e ziŋ káwa a ndísɛ̌ʼɛ dát, dalé mi e toma nɛ́ ka hûl a sêe kɔ́rɔ́ké.

⁵⁵Ɓayhí̧lé, hay mûn ní ɓá gbát lâʼa a béláké, sêm mûn ní ɓá gbát hɛ̧ nzóna a béláké.

⁵⁶Dáy njuku ka sɔ̧́ hay mûn ní, ka a nzó sêm mûn ní, e kaw mbêw kuu mǐ, a mǐ, mi kaw mbêw kuu mɛ̌.

⁵⁷Ɓá báŋké ka Bâa ka kaw a ndísɛ̌ʼɛ pé mí, ka mǐ, mi ziŋ káwa a ndísɛ̌ʼɛ ka ŋgboro a mɛ̌y, nǎŋnɔ́, njuku ka sɔ̧́ hay mûn ní, e ziŋ káwa a ndísɛ̌ʼɛ ka ŋgboro a mǐ.

⁵⁸Dáy a gelé, ɓá biré ka ndére a nûnalê. Ké zi ná ɓá báŋa a zîi a wǎyri ka sɔ̧́ mân, ka a rezíŋ hûl ka falké yá. Nǎŋnɔ́, njuku ka sɔ̧́ biré nɛ́y, e kaw ka ndísɛ̌ʼɛ dát.»

⁵⁹Zezú saɓay nɔ́, a ké kaw tɔ́ʼɔhɛ̧ a ɓil vûn gɔ́ŋ Gáŋvbôn a Kapɛrnahûm.

⁶⁰Gunbɔʼɔ a Zezúri ɓá ŋgɛ̧́náké, ka fal láɓay nɔ́, sa: «Ɓayké ŋgɛ́rɛ mambá, a gé e lá nɛ́ lé?»

⁶¹Zezú tu ɓá gunbɛʼɛri kaw ŋgɔ̧rɔ̧ ɓay sé tûlké, dáy a sa hí̧ kuriri ɓá: «Ɓayké sé law a wǎyri lé?

⁶²A̧hí̧ e tána, ka wǎyri mí kó Gun a njuku mí rehe sé gel a ké tí erúy le?

⁶³Ɓá Têm a Gáŋvbôn, pé hí̧ káwa a ndísɛ̌ʼɛ, kpɔ́ŋa a njuku hɛʼɛ zi ma niŋ hɛ̧ há̧na nyá. Ɓayri ka mi sa hí̧ wǎyri, ɓá Têm rá̧ káwa ndísɛ̌ʼɛ.

⁶⁴Dáy njuku a fékéri a bazeŋ a wǎyri zi láɓulaw yá.» (Ɓayhí̧lé Zezú tí tu, a títáʼaké, a gé zi láɓulaw yáy, a tu a gé e zé nɛ́y.)

⁶⁵Ké resa ɓáy ɓá: «Í kó, ɓaykénɔ́ pé mi sa hí̧ wǎyri ɓá, njuku zi ma gí gél ní nyá, ka mí zi tí ɓá Bâa a mǐ, pé tɔ́ʼɔ nɛ́ ŋgboroké yáy.»

⁶⁶Tí a sêeké nɔ́, gunbɛʼɛri ɓá ŋgɛ̧́náké reka mûn a kuriri sé fal, a pɔŋ há̧ra̧ kuu mɛ̌.

⁶⁷Dáy Zezú revbí gunbɛʼɛri ka bôo a sére ɓá: «A wǎyri, i zi ɓay a kála kɔ́ lé?»

⁶⁸Nǎŋnɔ́ Simɔŋ Píyɛ́r zi nzɛ́ʼɛ a sa: «Gáŋmbây, a gé rú e sé gé lé lé? Mɔ e ka ɓayri ka hí̧ káwa ndísɛ̌ʼɛ dát.

⁶⁹Dáy rú láɓulaw rú, a tu ɓá: Mɔ́ ɓá Kiris, njuku a táŋáké ka Gáŋvbôn pé gíy.»

⁷⁰Zezú resa hí̧ kuriri ɓá: «Tí ɓá mǐ pé ten wǎyri bôo a sére nɛ́ yá lé? Dáy mbêw a bazeŋ a wǎyri ɓá Zábolo!»

⁷¹Ké kaw saɓay a Judas Ɛskariyót, gun a Simɔŋ. Ɓayhí̧lé ɓá Judas, mɛ̌ a bazeŋ a gunbɛʼɛri bôo a sére nɔ́, pé e zé nɛ́y.