Read Capanahua Péna a Apotereri 1 Bible Online

Péna a Apotereri 1 - Capanahua bible

Péna a Apotereri 1

¹Gáŋnjuku Teyofîl, A ɓil titíla Mbété a mǐ, mi saɓay sé tûl hɛ̧ri̧ too ka Zezú niŋ rá̧ hɛ̧ri̧ a ké tɔ́ʼɔ ka títáʼaké,

²ka̧ sêe, a ké he sé nûnalê. Rá̧ ké he sé nûnalê, ké hí̧ nzáʼa nzɛ́rɛ ka ŋgboro a kpɔ́ŋa a Têm Pukí hí̧ njukuri a ké lú kuriri ɓá apotereri.

³Nâm bonɛŋ ka fal hûl a mɛ̌, Zezú tɔ́ʼɔ mûn nɛ́ a ŋgboro a fékéri ɓórí ɓórí hí̧ kuriri, ɓá ké kaw ka ndísɛ̌ʼɛ, a sa hí̧ kuriri ɓay ka kó Pû a Gáŋvbôn.

⁴Sêe a há̧na, a ké kaw sɔ̧́lâʼa kuu kuriri, ké hí̧ nzáʼa nzɛ́rɛ hí̧ kuriri ɓá: «Í zi ná sé ɗí ka Zerúzalɛ̂m. I zoko hɛ̧ ka Gáŋvbôn ŋgá̧nzáʼa ɓay niŋáké, hɛ̧hí̧na ka mi tí saɓayké hí̧ wǎyri.

⁵Ɓayhí̧lé, Zâŋ ɓá njukuri nyá batêm ka ŋgboro a mbii, dáy a wǎyri, a ɓil nâm kpay nɛ́, Gáŋvbôn e hí̧ wǎyri batêm a Têm Pukí.»

⁶Apotereri ka mára̧ gí gbaŋ a Zezú, vbí nɛ́ ɓá: «Gáŋmbây, ɓá ŋgɛŋnɛ́ pé mɔ e reɓá mbây a tísiri a Izirayɛ́l ka̧n gelké lé?»

⁷Zezú zi a sa ɓá: «Zi kó wǎyri ɓay i tu nâmké malé sêeké ka hɛ̧kéri e ka̧nay nyá, ɓayhí̧lé Bâa a mǐ tí ŋgbá nâmké ka̧n dá, ka ŋgboro a kpɔ́ŋa a mɛ̌.»

⁸Dáy, i e ziŋ kpɔ́ŋa, ka Têm Pukí e ɗere kɔ̧ tûl a wǎyri. Falké, i e kaw ɓá njukuri ka e saɓay a mǐ, a Zerúzalɛ̂m, a Judé too rá̧ tísiri a Samarí sé ka̧ kɔ́rɔ́ a tísiri too.

⁹Fal sa nǎŋnɔ́, Zezú uru a he sé nûnalê. Gelka apotere a mɛ̌ri̧ ew kaw ɛ̧rɛ̧ nɛ́y, ké ri ɓil ɗaʼama a mbɔ̂m, dáy kú zi kó nɛ́ mbaa.

¹⁰Kú ew a kaw ɓá ɛ̧rɛ̧ gel gé ɓá nûnalê, núnmbɛ̧́nɛ́ njukuri sére, ri lâʼa a Pukí, tɛ̧́ gí ew ka gbaŋa a kuriri,

¹¹a sa hí̧ kuriri ɓá: «Wǎyri njuku Galilêri, ɓayhí̧rá̧, i kaw ɓá ɛ̧rɛ̧ gel gé ɓá nûnalê lé? Ɓá Zezú, pé Gáŋvbôn lú nɛ́ a bazeŋ a wǎyri, ɓay a sé nûnalê. Ké e regí ɓá báŋké nɔ́, ka i kó nɛ́ he sé nûnalê.»

¹²Falké, apotereri ɗere ka tûl kon, a kú ɗí ɓá kon dii Oliviyé, a resé Zerúzalɛ̂m. Gelké zi ɗí kuu Zerúzalɛ̂m yá, ɗínáké, ɓá ínáké ísɔ́t mbêw.

¹³Gelka kú gé ka̧ Zerúzalɛ̂m dáy, kú he sé ɓil vûn a sâa, ka gel nâm a kuriri dát, ɓá Píyɛ́r, Zâŋ, Ják rá̧ Anderé, Filíp rá̧ Toma, Bartelemí rá̧ Matiye, Ják gun a Alfé, Simɔŋ a kú ɗí ɓá njuku pû rá̧ Jude gun a Ják.

¹⁴Kuriri too kú láhá̧narí̧, a mára̧ há̧narí̧ dát kaw mbêw ɓay a gɔ́ŋ Gáŋvbôn, kuu wûnynjukuri rá̧ Marí mâa a Zezú rá̧ nyîn nɛ́rí̧.

¹⁵Nâm kpay a falké, njuku láɓulawri mára̧ há̧narí̧, bon a kuriri zaa ké ka̧ ísɔ́t mbêw ka bôo a sére. Dáy Píyɛ́r uru a bazeŋ kuriri a sa hí̧ kuriri:

¹⁶«Nyîn nírí̧, belɓá ké niŋ, hɛ̧ ka Têm Pukí tí sa a ɓil Mbété ka ŋgboro a nzáʼa a Davít sé tûl a Judas, ka tɛ̧́ njuku tɔ́ʼɔ ŋgboro hí̧ njukuri ka ŋgbá Zezú.

¹⁷A tu ɓá Judas kaw ɓá mbêw a bazeŋ a manárí̧, ka ziŋ niŋ nzáʼapéna kuu manárí̧ kɔ́. (

¹⁸Njuku nɔ́ zé wâʼa ka lari sêm a kú hí̧ nɛ́. Ké lé ka tûlé, ɓilé té, ka̧ra̧ ɓilé tɛ̧́ kɔ̧ kála.

¹⁹Njuku a tísiri a Zerúzalɛ̂mri̧ too láɓayké. Ɓaykénɔ́ pé kú hí̧ rɛŋ a wâʼaké ɓá: “Halkédama”, zi ɓay sa ɓá: “Wâʼa sêm.”)

²⁰Dáy hɛ̧ ka ɗé ka̧n ɓil mbété a Si̧ŋri̧ sa ɓá: Gel nâm a mɛ̌, ké tɛ̧́ tâ̧w pólé, njuku a há̧na mbêw, tí ná gelké yá. Kú ɗé a féké ɓáy ɓá: Njuku a féké ké nyá gel péna a mɛ̌.[1]

²¹Nǎŋnɔ́, belɓá a bazeŋ a njukuri ka tɔ́ŋ nárí̧ sêe too, ka Zezú e kuu manárí̧,

²²tí a sêe ka Zâŋ Batís ɓá nɛ́ nyá batêm, sé ka̧ sêe a ké uru a bazeŋ a manárí̧ ka a he sé nûnalê, njuku mbêw, ké gí ziŋ nárí̧ ɓay a saɓay a toma a hûl a mɛ̌.»

²³A goló, kú ten njukuri sére: Jozɛf a kú ɗí ɓá Barsabás, rɛŋɛ́ a féké kɔ́ ɓá Jistís, rá̧ Matíyás.

²⁴Dáy njuku láɓulawri gɔ́ŋ Gáŋvbôn ɓá: «Gáŋmbây, mɔ tu law a njukuri too, mɔ́ tɔ́ʼɔ rú njuku mbêw ka mɔ ten a bazeŋ a njuku sére nɛ́rí̧,

²⁵ɓay a ké kaw ɓá apotere, a gel nzáʼapéna ka Judas pɔŋ, ka a sé gel káwa ka ɓá a mɛ̌y.»

²⁶Falké, kú ɓú ɓele, dáy ɓele gí ten Matíyás, a ri bazeŋ a apotereri ka bôo a mbêw.