Read Capanahua Péna a Apotereri 11 Bible Online

Péna a Apotereri 11 - Capanahua bible

Péna a Apotereri 11

¹Apotereri rá̧ njuku láɓulawri ka e ka Judé lá ɓá, njukuri ka zi tí ɓá Juyífri yáy, nyá ɓay a Gáŋvbôn kɔ́.

²Gelka Píyɛ́r regí Zerúzalɛ̂m, gun láɓulawri ka ɓá Juyífri[12], gí deɓay ka̧n nzáʼa Píyɛ́r.

³Dáy, a sa: «Mɔ sé ri vûn a njukuri ka zi ndá ganzá yáy, a sɔ̧́lâʼa mbêw kuu kuriri!»

⁴Dáy Píyɛ́r, tí sa hí̧ kuriri hɛ̧ri̧ too ka tá, ka ŋgboroké, tí ka tí taʼaké, a sa hí̧ kuriri ɓá:

⁵«Mi e a ɓil pû Zopé, a kaw gɔ́ŋ Gáŋvbôn. Dáy, mi kó hɛ̧ a há̧na a ɓil lɔ́la, ɗere a nûnalê gí ɓá gél ní, a ɛ́ŋ ɓá gáŋ hîi, a kú ŋgá̧nzáʼaké nɛŋ too, a gí ka̧ mbɛl ní.

⁶Dáy, mi ɛ̧rɛ̧ ɓil hîiké ɓá táŋáké, a kó hɛ̧ ka erú ɓá, hɛ̧hɔ́lari, nâny a kpâari, sâ̧ny kóró a tûl ɓilri rá̧ ndoyri.

⁷Mi láɓay, ka njuku sa ɓá: “Píyɛ́r, mɔ́ uru, a mɔ́ í, a sɔ̧́!” »

⁸Mi zi nzɛ́ʼɛ a sa: «Mi zi yá Gáŋmbây! Mi zi sɔ̧́hɛ̧ a kú de malé hɛ̧ a belyáké bɔʼɔ mbêw yá.»

⁹Mi relá ɓáy a bɔʼɔ séreké ɓá: «Hɛ̧ ka Gáŋvbôn kó ɓá hɛ̧ a táŋáké, mɔ́ zi ná kó ɓá hɛ̧ a belyáké!

¹⁰Hɛ̧ké niŋ nǎŋnɔ́ bɔʼɔké sáy, falké lé, hɛ̧ké rehe sé nûnalê.

¹¹Núnmbɛ̧́nɛ́ nɔ́, njukuri sáy gí ka̧ nzáʼa vûn ka mi nárú̧y. Kú pé kuriri gí a Sezaré, gí ɗí mí.

¹²Têm Pukí tí sa hí̧ mí, ɓá mí sé kuu kuriri, a mí zi ná many, dáy nyîn nírí̧ zêe, ka gí kuu mǐ nɛ́y, ɗa mí sé Sezaré. Rú gé ka̧ Sezaré, a gé ri ɓil vûn a Kɔrney too.

¹³Kɔrney, gé sa hí̧ rú báŋké a ké kó aŋnze a Gáŋvbôn, a ɓil vûn a mɛ̌, ka sa hí̧ nɛ́ ɓá: Mɔ́ pé njukuri sé Zopé, sé ɗí Símɔŋ Píyɛ́r.

¹⁴Ké e gí sa hí̧ mɔ́, ɓay ka e pɛ̧́ mɔ́, mɔ̌ rá̧ î̧n a mɔ̌ri̧ too.

¹⁵Gelka, mi tí saɓay, Têm Pukí ɗere kɔ̧ tûl a kuriri, ɓá báŋké a ké ɗere kɔ̧ tûl a manárí̧ kɔ́, ka títáʼaké.

¹⁶Nǎŋnɔ́, mi kɛrɛ ɓay ka Gáŋmbây sáy: “Zâŋ ɓá njukuri nyá batêm a mbii, dáy a wǎyri, i ziŋ nyá batêm a Têm Pukí.”

¹⁷Nǎŋnɔ́, Gáŋvbôn hí̧ kuriri hɛ̧hí̧na a mbêwké ɓá báŋké ka ná ziŋ ka sêe ka ná láɓulaw hí̧ Gáŋmbây Zezú Kiris. Dáy a mǐ, mi ɓá gé rá, a many Gáŋvbôn lé?»

¹⁸Fal láɓay nɔ́, kú kaw yím, a reɗel Gáŋvbôn, a sa: «Katína, Gáŋvbôn hí̧ njukuri ka zi tí ɓá Juyífri yáy, ŋgboro fere kaw a kuriri, ɓay a ziŋ gbát káwa a ndísɛ̌ʼɛ.»

¹⁹Tɔ́ʼɔsêe ka ka̧ a ɓil nâm a kú í Etíyɛ́n, niŋ njukuri ka láɓulaw ɓɛrɛ mbêw mbêw too. Njuku a há̧narí̧ ŋgú sé ka̧ Fenisí, Sípɛrɛ rá̧ Aŋtiyós, dáy kú tɔ́ʼɔ Bélaɓay a Gáŋmbây hí̧ ɓá Juyífri.

²⁰Njuku láɓulaw a há̧narí̧ ka ɓá njuku a tísiri a Sípɛ́rɛ rá̧ Sirɛn, uru a sé Aŋtiyós, ka sé tɔ́ʼɔ Bélaɓay a Gáŋmbây Zezú hí̧ Juyífri, rá̧ njukuri ka zi tí ɓá Juyífri yáy kɔ́.

²¹Kpɔ́ŋa a Gáŋmbây e kuu kuriri, ɓayhí̧lé njukuri ɓá ŋgɛ̧́náké láɓulaw, a fere law a kuriri hí̧ Gáŋmbây Zezú.

²²Ɓaykénɔ́, gelka mára̧ a gun láɓulaw a Zerúzalɛ̂mri̧ láɓayké, kú pé Barnabas sé Aŋtiyós.

²³Barnabas gé ka̧ Aŋtiyós, a gé kó béla ka Gáŋvbôn tɔ́ʼɔ hí̧ gun láɓulawri. Ké ri mûn nɛ́, a hí̧ kuriri nzáʼa nzɛ́rɛ ɓá, kú kaw law mbêw kuu Gáŋmbây.

²⁴Barnabas kaw ɓá béla njuku, ké mbá ka Têm Pukí rá̧ láɓulaw. Nǎŋnɔ́ njukuri ɓá ŋgɛ̧́náké ziŋ láɓulaw hí̧ Gáŋmbây Zezú Kiris.

²⁵Barnabas retá sé Társe, ɓay a sé ɛ́ Sôl.

²⁶Gelka, ké gé ziŋ Sôl, ké ɗa nɛ́ gí Aŋtiyós. Kú gí niŋ mbimbɔ̂m mbêw kuu Egilize a Aŋtiyós. Kú tɔ́ʼɔɓay a Gáŋvbôn hí̧ njukuri ɓá ŋgɛ̧́náké. Ɓá ka Aŋtiyós, pé ɗambɛlké kú tí ɗí gun láɓulawri ɓá Kɛrɛtiyɛn[13].

²⁷A ɓil nâmké nɔ́, porofɛ́t a há̧narí̧ uru ka Zerúzalɛ̂m gí Aŋtiyós.

²⁸Dáy, njuku mbêw a bazeŋ a kuriri, rɛŋɛ́ ɓá Agabús, uru a sa ka ŋgboro a Têm Pukí ɓá, nâm tɛ̧́w lé, nzala e ŋgbá tísiri too. (Hɛ̧ké niŋ a ɓil nâm ka Kolode, kaw ɓá mbây lúkí a tísiri a Rɔm.)

²⁹Nǎŋnɔ́ gun láɓulawri too ŋgá̧nzáʼa ɓá kú e hí̧ndɔ̂ʼɔ, njuku mbêw mbêw too, ké hí̧ ma ŋgɛ́rɛ a mɛ̌, ɓay kú pé hí̧ gun láɓulawri ka e ka tísiri a Judé.

³⁰Dáy kú mára̧ hɛ̧ké, a pé hí̧ Barnabas rá̧ Sôl, ɓá kú sé ɓá hí̧ gáŋnjuku péna a Egilizeri ka Judé.