Read Capanahua Péna a Apotereri 12 Bible Online

Péna a Apotereri 12 - Capanahua bible

Péna a Apotereri 12

¹A ɓil nâmké nɔ́, mbây Herod, tí ɓá gun láɓulaw a há̧narí̧ tɔ́ʼɔsêe.

²Ké ŋgbá Ják nyîn a Zâŋ, a í nɛ́ ka gá̧má.

³Gelka ké kó ɓá hɛ̧ké ri law a Juyífri, ké ŋgbá Píyɛ́r, (a sêe záymûn a biré táŋ haw.)

⁴Nǎŋnɔ́, Herod ŋgbá Píyɛ́r ka ɓá nɛ́ vbú vûn sɛl, ka mára̧ ŋgawbéreri bôo a zêe, ka wal kuriri kɔ̧ gelké nɛŋ, ɓá kú koro Píyɛ́r. Ɓayhí̧lé, ké kɛrɛ walɓay kɔ̧ tûl a Píyɛ́r, a ɓil a dawá, a fal Pâk.

⁵Dáy Píyɛ́r e a ɓil vûn sɛl, mára̧ a gun láɓulawri kaw gɔ́ŋ Gáŋvbôn ka ŋgɛ́rɛ ɓay a mɛ̌.

⁶Ka sû̧ŋ, a típéléké lé, Herod e walɓay kɔ̧ tûl a Píyɛ́r a ɓil dawáy, kú ŋgá̧ Píyɛ́r ka sɛl wɛ̧̂ɛ, a ɓá nɛ́ ná bazeŋ a ŋgawbéreri sére. Ŋgawbére a fékéri kaw koro nzáʼaŋgboro a kála.

⁷Núnmbɛ̧́nɛ́, aŋnze a Gáŋvbôn gí ka̧, hɔrɛ táŋgel a ɓil vûn sɛl. Dáy, aŋnze gí ɗa Píyɛ́r, a toma nɛ́, a sa: «Mɔ́ uru ɓá gánáké!» Nǎŋnɔ́, sɛl wɛ̧̂ɛ to ka ndɔ̂ʼɛ.

⁸Falké, aŋnze sa hí̧ Píyɛ́r: «Mɔ́ ŋgá̧ tûl laa a mɔ́ ndáʼa sábɔ̂ʼɔ a mɔ̌.» Píyɛ́r niŋ ɓá báŋké a ké sáy. Dáy aŋnze, sa hí̧ nɛ́ ɓáy: «Mɔ́ ri gáŋ laa a mɔ̌, a tɔ́ŋ mǐ.»

⁹Píyɛ́r tɛ̧́ a ɓil vûn sɛl, a tɔ́ŋ aŋnze. Ké zi kɛrɛ ɓá hɛ̧ ka aŋnze niŋ ɓá gbát hɛ̧ nyá, ké kɛrɛ ɓá lɔ́la.

¹⁰Kú gí tá gel koro hɛ̧ a ɗambɛlké, a gí tá ɓala a séreké, a gí ka̧ nzáʼaŋgboro ka ɓá wɛ̧̂ɛ, ka kí gé ɓá ɓil pûy. Nzáʼaŋgboroké gí ŋgburu hɛʼɛ, dáy kú tɛ̧́, a ka̧ tûl gáŋ ŋgboro, a goló aŋnze gí pɔŋ nɛ́.

¹¹Píyɛ́r gí tu hɛ̧ ka tay dá, a sa: «Ŋgɛŋnɛ́, mi kó ɓá katína, Gáŋmbây pé aŋnze a mɛ̌, gí ten mí a ɓil ndɔ̂ʼɔ a mbây Herod rá̧ ɓil ɓékéhɛ̧ri̧ ka gáŋnjuku a Juyífri kɛrɛ sé tûl ní.»

¹²Gelka, Píyɛ́r lá ɓilké dáy, ké kála sé ɓil vûn a Marí, mâa a Zâŋ Márke, ka gun láɓulawri ɓá ŋgɛ̧́náké mára̧ erú, a kaw gɔ́ŋ Gáŋvbôn.

¹³Píyɛ́r gé ka̧, a gé haŋ nzáʼaŋgboro, dáy wûnypéna a há̧na, ka rɛŋɛ́ ɓá Rode gí ɓay a gí ŋgburu nzáʼaŋgboro.

¹⁴Gelka, ké gé lá kɔ́ŋ a Píyɛ́r, ké reka mûnrína a pɔŋ ŋgburu nzáʼaŋgboro, a ŋgú sé sa hí̧ njuku a ǎ̧wrí̧ ɓá, Píyɛ́r e ka Nzáʼaŋgboro.

¹⁵Dáy, kú sa hí̧ nɛ́: «Mɔ ɓá dɔ̂ʼɔ lé!» Ké sa, ɓá mɛ̌ katína. Kú sa hí̧ nɛ́: «Há̧na ɓá aŋnze a mɛ̌ lé!»

¹⁶Dáy, Píyɛ́r reháŋ nzáʼaŋgboro ɓáy, nǎŋnɔ́, kú gé ŋgburu nzáʼaŋgboro, a kó ɓá Píyɛ́r a kaw yér.

¹⁷Píyɛ́r niŋ ndɔ̂ʼɔ hí̧ kuriri ɓá kú kaw ták, dáy a tí sa hí̧ kuriri, hɛ̧ ka Gáŋmbây niŋ, ka a ten nɛ́ a ɓil vûn sɛl. Falké, ké sa hí̧ kuriri ɓá kú sa hí̧ Ják rá̧ gun láɓulaw a fékéri, dáy a tɛ̧́, a kála sé gel a féké.

¹⁸A, gel gí táŋ dáy, ŋgawbéreri kaw ka mûn tɔ́na, a vbí há̧narí̧ a sa: «A̧hí̧ ziŋ Píyɛ́r lé?»

¹⁹Herod ɓá njukuri ɛ́ Píyɛ́r lá gélri too, a zi ziŋ nɛ́ nyá. Ké ɗí ŋgawbéreri ka koro nɛ́, a vbí kuriri ɓay, dáy a hí̧nzáʼa ɓá kú í kuriri. Falké, Herod uru a Judé, a sé ná Sezaré nâm kpay.

²⁰Herod e ka hɛ́rɛ mambá ziŋ njuku a tísiri a Tíriri, rá̧ Sídɔŋri̧. Njuku pû nɔ́rí̧ láhá̧narí̧, dáy a hí̧ lari hí̧ Bilazitús, ka ɓá njuku ɓil vûn a mbây, ɓay a ké sé ŋgú há̧ra̧ hí̧ Herod, a gel a kuriri. Ɓayhí̧lé lâʼa sɔ̧́na a kuriri, njuku a Tíriri rá̧ Sidɔ̂ŋrí̧ too, gí ka tísiri a Herod.

²¹Dáy, kú ŋgbá nâm mbêw, sêeké nɔ́, Herod ri laa mbây a mɛ̌, a kaw tûl gelkáwa a mɛ̌, dáy a saɓay hí̧ njukuri.

²²Njukuri zibɔʼɔ ɓay a mɛ̌, a vbá̧nzáʼa, a sa: «Tí ɓá kɔ́ŋ a njuku yá, ɓá kɔ́ŋ a vbôn!»

²³Núnmbɛ̧́nɛ́ nɔ́, aŋnze a Gáŋvbôn vbá̧ Herod, ɓayhí̧lé ké zi hí̧ ɗéla hí̧ Gáŋvbôn nyá. Kayri lâʼa ka̧ra̧ ɓilé, dáy ké hú.

²⁴Nǎŋnɔ́, ɓay a Gáŋvbôn wal magél too.

²⁵Gelka Barnabas rá̧ Sôl ɔrɔ nzáʼapéna a kuriri, a ɓil mára̧ a gun láɓulaw a Zerúzalɛ̂mri̧, kú rekála, a ɗa Zâŋ Márke kɔ́ kála rú.