Read Capanahua Péna a Apotereri 15 Bible Online

Péna a Apotereri 15 - Capanahua bible

Péna a Apotereri 15

¹Njuku a há̧narí̧ uru a Judé a gí Aŋtiyós, a gí tɔ́ʼɔ hí̧ gun láɓulawri a Aŋtiyósri ɓá, kú ndá ganzá ɓá báŋké ka sáŋna a Mɔyíze sáy, tí yá lé, kú zi ma pɛ̧́na nyá.

²Dáy, Pôl rá̧ Barnabas, zi kaw law mbêw kuu kuriri yá, dáy, a kú táhá̧na ɓá ŋgɛ́rɛ́ké a bazeŋ a kuriri. Nǎŋnɔ́, kú ŋgá̧nzáʼa ɓá, Pôl kuu Barnabas rá̧ njuku láɓulaw a há̧narí̧ ka Aŋtiyós, kú sé Zerúzalɛ̂m a gé ziŋ apotereri, rá̧ gáŋnjuku pénari̧ a kú saɓayké.

³Falké, mára̧ njuku láɓulawri ka Aŋtiyós, hí̧ndɔ̂ʼɔ hí̧ kuriri ɓay a sé gɔ́rɔ́ké, dáy a pé Pôl rá̧ Barnabas. Kú mbí ŋgboro a tá lá Fenisí rá̧ Samarí, nǎŋnɔ́, kú ziŋ sa báŋké, ka njukuri ka zi tí ɓá Juyíf yáy, fere law a kuriri hí̧ Gáŋmbây. Ɓayké nɔ́, hí̧ lawrína ɓá ŋgɛ̧́náké hí̧ njuku láɓulaw a Fenisíri rá̧ Samaríri too.

⁴Gelka Pôl rá̧ Barnabas, gé ka̧ Zerúzalɛ̂m, mára̧ njuku láɓulawri kuu Apotereri rá̧ gáŋnjuku pénari̧ too, gé nyá kuriri ka law mbêw. Dáy, kú gé sa hɛ̧ri̧ too, ka Gáŋvbôn niŋ ka ŋgboro a kuriri.

⁵Dáy, Fariziyɛ̧́ a há̧narí̧, ka láɓulaw, sa ɓá: «Belɓá, njukuri ka zi tí ɓá Juyífri yáy, ka a láɓulaw, kú ndá ganzá, a kú tɔ́ŋ sáŋna a Mɔyíze.»

⁶Apotereri kuu gáŋnjuku pénari̧ mára̧ há̧narí̧, ɓay kó ɓil ɓayké.

⁷Kú many há̧narí̧ ɓá ŋgɛ́ráké, dáy falké Píyɛ́r mbí ɓay, a sa: «Í lá, i tu ɓá táŋáké ɓá Gáŋvbôn, ten mí a bazeŋ a wǎyri, ɓay a mí tɔ́ʼɔ Bélaɓay a Zezú hí̧ njukuri ka zi tí ɓá Juyífri yáy, rá̧ kú lá a láɓulaw.

⁸Gáŋvbôn ka tu law a njukuri, tɔ́ʼɔ ɓá ké nyá kuriri ka ŋgboro a Têm Pukí a mɛ̌, a ké hí̧ kuriri, ɓá báŋké a ké hí̧ nárí̧.

⁹Gáŋvbôn, zi wal ɓil káwa a manárí̧ kuu kuriri yá. Ké vbá̧buma ɓéké hí̧ kuriri, ɓayhí̧lé kú láɓulaw.

¹⁰Dáy, a ŋgɛŋnɛ́, ɓayhí̧ ná zi ɓay a lélaw a Gáŋvbôn, ka ŋgboro a ɓá hóla a zínáké ka̧n tûl a njuku láɓulawri, hóla, ka zîi a manárí̧, malé manárí̧ zi ma hólaké yáy.

¹¹Ná kɛrɛ ɓá, ná ziŋ pɛ̧́na ka ŋgboro a béla a Gáŋmbây Zezú Kiris, ɓá báŋa kuriri kɔ́.»

¹²Njukuri ka mára̧ gí too, kaw yím a lá ɓá Pôl rá̧ Barnabas, ka sa ɓay a hɛ̧sáʼamari̧ rá̧ hɛ̧ a yérkéri, ka Gáŋvbôn niŋ ka ŋgboro a kuriri, a bazeŋ a njukuri ka zi tí ɓá Juyífri yáy.

¹³Gelka kú ɔrɔ saɓay, Ják mbí ɓay a sa: «Nyîn nírí̧, i lá mí!

¹⁴Simɔŋ, tí saɓay hí̧ nárí̧ a gé lé ɓá, Gáŋvbôn a títáʼaké, tí mɔny njuku a há̧narí̧ ka bazeŋ a njukuri ka zi tí ɓá Juyífri yáy, ɓay a ten kuriri, a kú kaw ɓá njukuri a mɛ̌ri̧.

¹⁵Nǎŋnɔ́, ɓay a porofɛ́tri sé marú̧, ɓayhí̧lé Mbété a Gáŋvbôn sa ɓá:

¹⁶“Gáŋmbây sa: A falké, mi e regí, ɓay a mɔny pû mbây a Davít, ka gbɛʼɛrɛ. Mi e mɔny gél a ɓewaké nɔ́, a remɔny nɛ́ ɓá a ndáráké.

¹⁷A goló njuku a tísiriri too e ɛ́ Gáŋmbây. Katína, njuku nzáʼaɓayri too, ka mi ɗí kuriri ɓay a kú kaw ɓá njuku a mǐri̧. Ɓá ɓay ka Gáŋmbây sáy,

¹⁸ka a tí tɔ́ʼɔ nzáʼapénaké í̧ŋásá̧y.”

¹⁹Ɓaykénɔ́, Ják saɓay ɓáy ɓá: Ná zi ná kí tûl a njukuri, ka zi tí ɓá Juyífri yá, ka a fere káwa a kuriri gí gél a Gáŋvbôn.

²⁰Dáy, hɛ̧ ka ná e niŋáké ɓá, ná ɗé mbété hí̧ kuriri a sa: I zi ná sɔ̧́ hay a kú niŋ hɛ̧púna rú̧ hí̧ vbônri̧, í niŋ dala yá, a í zi ná sɔ̧́ hay sâ̧ny a hûlké, a í zi ná nzó sêm.

²¹Ɓayhí̧lé, tí ka í̧ŋásá̧, njukuri tɔ́ʼɔɓay sáŋna a Mɔyíze a ɓil pûri mbêw mbêw too, a kú kɛ̧́ sáŋnaké a ɓil vûn gɔ́ŋ Gáŋvbôn a Juyífri, sêe ɔʼɔ dát.»

²²Dáy, apotereri, gáŋnjuku pénari̧ rá̧ mára̧ njuku láɓulawri too láhá̧narí̧ ɓá, kú ten njuku a há̧narí̧, a ɓil a kuriri, a kú pé kuriri sé Aŋtiyós kuu Pôl rá̧ Barnabas. Dáy, kú ten Jude, a kú ɗí nɛ́ ɓá Barsabás rá̧ Silás, njukuri a kú hɛʼɛ kuriri mambá a ɓil mára̧ a njuku láɓulawri.

²³Dáy a hí̧ kuriri mbété a kú ɗé ɓá: «Nyîn a wǎyri ka ɓá apotereri rá̧ gáŋnjuku tûl pénari̧ ka Zerúzalɛ̂m, nam wǎyri, njuku láɓulawri too, a zi tí ɓá Juyífri yáy, ka e a Aŋtiyós, Sírí rá̧ Silisí.

²⁴Rú lá ɓá: Njukuri uru a gel a ɓurú, a gé saɓay kí tûlri hí̧ wǎyri. Law a wǎyri, ké zi ná lú sé tûlké, tí ɓá ɓurú pé, pé kuriri yá.

²⁵Ɓaykénɔ́, pé rú mára̧ nzáʼa ɓurú too mbêw, pé a ten mbaŋa a ɓurú, pé a pé kuriri kuu Pôl rá̧ Barnabas géy,

²⁶kuriri, ka zaa kú ziŋ hûl, ɓay tûl rɛŋ a Gáŋmbây Zezú Kiris.

²⁷Rú pé Jude rá̧ Silás, ɓay kú gé sa ka nzáʼa a kuriri hí̧ wǎyri kɔ́, hɛ̧ ka rú ɗé ka̧n ɓil mbété nɛ́y.

²⁸Ɓayhí̧lé, Têm Pukí rá̧ ɓurú kɔ́, rú zi ɓá, rú ŋgá̧ hóla a féké hol wǎyri yá, ké ɔ ɓá péna nɛ́, ka rú zi ɓá i tɔ́ŋ rúy:

²⁹I zi ná sɔ̧́ hay, a kú niŋ hɛ̧púna rú̧ hí̧ vbônri̧, í zi ná sɔ̧́ hay a sêmké, malé hay sâ̧ny a kú zi vbé yáy, í zi ná niŋ dala. Wǎyri mí tɔ́ŋ nǎŋnɔ́, i niŋ hɛ̧ a béláké. Rú nam wǎyri too ka rɛŋ a Gáŋmbây a manárí̧ Zezú!»

³⁰Dáy, a kú pɔŋ Pôl, Barnabas, Jude rá̧ Silás, kála sé Aŋtiyós. Gelka kú gé ká̧y, kú gé mára̧ njuku láɓulawri too, a ɓá mbétéké hí̧ kuriri.

³¹Kú gé kɛ̧́ mbétéké, njukuri too mbá a lawrína, ɓayhí̧lé ɓayké hí̧ kuriri ŋgɛ́rɛ.

³²Nǎŋnɔ́, Jude rá̧ Silás kuriri ka kaw ɓá porofɛ́t, gé hí̧ kuriri nzáʼa nzɛ́rɛ ɓá ŋgɛ̧́náké, ɓay a hí̧ kuriri ŋgɛ́rɛ a kú ew kpú a ɓil láɓulaw a kuriri.

³³Jude rá̧ Silás, gé kaw nâm kpay kuu kuriri, falké, njuku láɓulaw a Aŋtiyósri gé vbara kuriri ka̧n ŋgboro, ɓay a kú rekála sé Zerúzalɛ̂m, gelka kú pé kuriri. [

³⁴Dáy, Silás ŋgá̧nzáʼa ɓá ké kaw kuu kuriri.]

³⁵Dáy Pôl rá̧ Barnabas kaw Aŋtiyós. Kuu njuku a fékéri ɓá ŋgɛ̧́náké, kú tɔ́ʼɔhɛ̧ a saɓay a Gáŋmbây hí̧ njukuri.

³⁶Falké nâm kpay, Pôl sa hí̧ Barnabas: «Ná resé kó gun láɓulawri a ɓil pûri ka ná tɔ́ʼɔɓay a Gáŋmbây hí̧ kuriri. Ɓay a kó a̧ní, kú kaw a ɓil láɓulaw a kuriri lé.»

³⁷Dáy Barnabas, zi ɓay a ɗá Zâŋ Márke sé kuriri,

³⁸Dáy Pôl zibɔʼɔké yá. Ɓayhí̧lé Zâŋ Márke gé pɔŋ kuriri a Pamfílí, a zi ɗa kuriri sé nzáʼapéna kuriri mbaa.

³⁹Dáy kú táhá̧narí̧ ŋgɛ́rɛ mambá ɓayké, a wal há̧narí̧. Barnabas ɗa Zâŋ Márke sé kuu mɛ̌, ka he batô a kála sé Sípɛrɛ,

⁴⁰Nǎŋnɔ́ Pôl ten Silás, a fal ka gun láɓulawri gɔ́ŋ Gáŋvbôn hí̧ kuriri dáy, ka uru a kála.

⁴¹Kú tá lá tísiri a Sírí rá̧ Silisí, a tɔ́ʼɔɓay, a hí̧ ŋgɛ́rɛ hí̧ Egilizeri.