Read Capanahua Péna a Apotereri 17 Bible Online

Péna a Apotereri 17 - Capanahua bible

Péna a Apotereri 17

¹Pôl rá̧ Silás tá lá Amfipolîs rá̧ Apoliní a ka̧ Tesaloník, a Juyífri erú ka vûn gɔ́ŋ Gáŋvbôn a kuriri ka sá̧y.

²Ka ɓá báŋ péna niŋa mɛ̌ dát dáy, Pôl sé ri ɓil vûn gɔ́ŋ Gáŋvbôn a Juyífri. A ɓil nâm ɔʼɔ sáy tɔ́ŋ mbɛ̧́nɛ̧, ké many hána kuu njukuri a ké ziŋ kuriri a golóy sé tûl hɛ̧ ka ɗé ka̧n ɓil Mbété a Gáŋvbônri̧.

³Ké ten táŋáké, a tɔ́ʼɔ hí̧ kuriri ɓá báŋké ka Mbété nɔ́rí̧ sáy, ɓá Mɛsí e tɔ́ʼɔsêe, a toma ka hûl. Ké sa hí̧ kuriri ɓá: «Ɓá Zezú nɔ́, ka mi kaw saɓay a mɛ̌ hí̧ wǎyri nɛ́y, pé ɓá Mɛsí.»

⁴Ɓaykénɔ́ ri law a Juyíf a há̧narí̧, dáy kú uru a tɔ́ŋ Pôl rá̧ Silás, rá̧ njuku a fékéri ka zi tí ɓá Juyífri yá, ka e ka wɔ́w a Gáŋvbôn rá̧ wûny rɛŋ ɗínari̧ kɔ́ ɓá ŋgɛ̧́náké, tɔ́ŋ kuriri.

⁵Nǎŋnɔ́, Juyíf a há̧narí̧ mbá ka sɛ́rɛ, dáy a kú mára̧ gun kaban njukuri ka zi tí ka tûl yáy, a kaw lá tûl ŋgboroy, nǎŋnɔ́, kú tí dɔʼɔlɔ njukuri, a niŋ hɛ̧ táŋ ŋgboroké lá ɓil pû. Kú gí ka̧ pû a Zasɔŋ a ɓew hɛ̧ri̧, a ɛ́ Pôl rá̧ Silás, ɓay a ŋgbá kuriri sé mbɛl a njukuri.

⁶Dáy, a kú ziŋ kuriri yá, a kú ŋgbá Zasɔŋ rá̧ njuku láɓulaw a há̧narí̧, a ɓá kuriri sé mbɛl a njuku walɓay a pûri. Kú gé vbá̧nzáʼa kɔ̧ tûl a kuriri a sa ɓá: «Njuku nɛ́rí̧, kí tûl a njukuri lá gélri too ka tísiri, dáy a ŋgɛŋnɛ́, kú gí e ka gelé dá!

⁷Zasɔŋ nyá kuriri ná gé lé! Njuku nɔ́rí̧ too, zi niŋ hɛ̧ri̧ ka sáŋna a mbây lúkí ziy yá. Ɓayhí̧lé kú sa ɓá, mbây a féké erú, rɛŋɛ́ ɓá Zezú.»

⁸Ɓayké nɔ́, lú law a njukuri rá̧ gáŋnjuku pûri.

⁹Zasɔŋ rá̧ njuku láɓulaw a fékéri, pû lari ɓá ŋgɛ̧́náké rá̧ pé gáŋnjuku walɓayri pɔŋ kuriri.

¹⁰Gelka sû̧ŋ niŋ dáy, njuku láɓulawri ɓá Pôl rá̧ Silás kála sé pû Béré. Ka kú gé ká̧y, kú tá sé vûn gɔ́ŋ Gáŋvbôn a Juyífri.

¹¹Nûn a njuku pûkéri ŋgburu ndé njuku a Tesaloníkri. Kú nyá ɓay a Gáŋvbôn ka lawrína. Sêe too, kú kaw kɛ̧́ a ɛ̧ ɓil ɓay ka ɗé ka̧n ɓil Mbété a Gáŋvbôn, ɓay a kú kó ɓá, ɓay ka Pôl tɔ́ʼɔy, sé ma gelké lé.

¹²Njukuri ɓá ŋgɛ̧́náké a bazeŋ a kuriri láɓulaw. A ɓil a njukuri ka zi tí ɓá Juyífri yáy, wûny rɛŋ ɗína a há̧narí̧ erú, rá̧ wɔ̧rɔ̧́njukuri ɓá ŋgɛ̧́náké kɔ́ a láɓulaw.

¹³Dáy, gelka Juyíf a Tesaloníkri, lá ɓá Pôl kaw tɔ́ʼɔɓay a Gáŋvbôn ka Béré, kú uru a gí, a tí gí niŋ hɛ̧ táŋ ŋgboroké, a uru hɛ́rɛ a njukuri.

¹⁴A Núnmbɛ̧́nɛ́ a goló, gun láɓulawri ɓá Pôl kála sé ŋgboro a mbii lúkí, dáy Silás rá̧ Timoté, kuriri kú rekaw ɓil pû Béré.

¹⁵Njukuri ka ɗá Pôl sé kuu mɛ̌ sé ka̧ tísiri a Atɛn. Falké kú resé Béré, a nzáʼapéna a Pôl, sé hí̧ Silás rá̧ Timoté ɓá kú gé ziŋ nɛ́ ɓá gánáké.

¹⁶Gelka Pôl kaw zoko Silás rá̧ Timoté ka Atɛn, ké mbá ka lawyíra sé tûl pûké, ɓayhí̧lé pûké mbá ɓá vbônri̧.

¹⁷Ké sé ɓil vûn gɔ́ŋ Gáŋvbôn a many há̧narí̧ kuu Juyífri rá̧ njukuri ka zi tí ɓá Juyífri yá, ka a hɛʼɛ Gáŋvbôn. A gel káwa dawá, nâm too, kú many há̧narí̧ kuu njukuri a ké gé ziŋ kuriri.

¹⁸Njuku a hɛ̧túna Epikiriyɛ̧ rá̧ Stoyiziyɛ̧ a há̧narí̧ saɓay kuu Pôl. Njuku a há̧narí̧ vbí ɓá: «A̧hí̧ bâa ɓala nɛ́ zi ɓay a sanáké lé?» Njuku a fékéri sa ɓá: «ɛ́ŋ ɓá ké kaw saɓay a vbôn tísiri a fékéri», a kaw zoko ɓá Pôl ké saɓay a Zezú rá̧ ɓay a toma a hûl[18].

¹⁹Dáy, a kú ɗa nɛ́, a ɓá nɛ́ sé kuu kuriri, sé mbɛl mára̧ a gáŋnjukuri, a kú ɗí ɓá: Mára̧ a Areyopaze[19], dáy a kú sa hí̧ nɛ́ ɓá: «Ŋgboro erú ɓá rú tuhɛ̧ a ŋgɛŋké, ka mɔ kaw tɔ́ʼɔké lé?

²⁰Mɔ kaw sa hí̧ rú, hɛ̧ a tísiri a fékéri, dáy, rú zi ɓay a tu hɛ̧ ka hɛ̧ké zi ɓay a sanáké.» (

²¹Ɓayhí̧lé njuku a Atɛnri̧ too rá̧ gɔ́rɔ́ri too, ka e a Atɛn, kaw ɓá saɓay malé láɓay a hɛ̧ a ŋgɛŋkéri.)

²²Dáy Pôl, uru a ɓil mára̧ké, a tí saɓay: «Njuku Atɛnri̧, mi kó ɓá, i kaw ɓá njukuri ka ɗél vbônri̧ mambáy, ka ŋgboro hɛ̧ri̧ too.

²³Ɓayhí̧lé, ka mi há̧ra̧ ɓil pû a wǎyri, mi kó hɛ̧ ɗéla a wǎyri ka i mbó ka̧n. Mi kó nzáʼaká̧na púhɛ̧ a há̧na, a kú ɗé hɛ̧ ka̧nrú̧y ɓá: “Hi̧ vbôn a há̧na ka njuku zi tu yáy.” Katína! Hɛ̧ ka i ɗél táŋ túnáké, pé mi gí sa táŋáké hí̧ wǎyriy.

²⁴Gáŋvbôn ka mɔny tísiri rá̧ hɛ̧ri̧ too ka e a ɓilké, mɛ̌ pé ɓá Gáŋmbây a tísiri rá̧ nûnalêy. Ké zi ná ɓil vûnri̧ ka ndɔ̂ʼɔ njukuri záy yá.

²⁵Ké zi zoko ɓá njukuri kú niŋ hɛ̧ há̧na hí̧ nɛ́ nyá, ɓayhí̧lé, ɓá mɛ̌ pé hí̧ njukuri too, káwa a ndísɛ̌ʼɛ, nyína rá̧ gárá hɛ̧ri̧ too.

²⁶Ké tí a tûl a njuku mbêw, pé a mɔny njukuri too, ka kaw magélri too ka tísiri. Ké ŋgbá fêw kây rá̧ zâl too hí̧ kuriri, a kúŋ kɔ́rɔ́ pûri too, ka njukuri e kawrúy.

²⁷Gáŋvbôn niŋ hɛ̧ nɔ́rí̧ too, ɓay njukuri kú ɛ́ nɛ́. Ziŋ nɛ́, mí lá tapát rá̧ kɔ́, kóyálé kú e ziŋ nɛ́. Katína lé, Gáŋvbôn zi kaw ɗí ka njuku a há̧na mbêw a bazeŋ a manárí̧ nyá.

²⁸Ɓá báŋké a kú sa: “Ɓá ka ŋgboro a mɛ̌ pé ná e ka ndísɛ̌ʼɛ, pé ná sésénay, pé ná kaw.” Ɓá báŋké ka njuku si̧ŋɓay[20] a há̧narí̧ a bazeŋ a wǎyri ɗé kɔ́ ɓá: “Rú kaw ɓá gun a mɛ̌ri̧ kɔ́.”

²⁹Nǎŋnɔ́ dáy, ka ná kaw ɓá gun a Gáŋvbôn, sa a goló ɓá, ná zi ná kɛrɛ ɓá Gáŋvbôn ɛ́ŋ hɛ̧ri̧ ka ɓá: vbí̧rí̧lari, lari, malé saw, ka njukuri mbó a ŋgboro a hɛ̧túna rá̧ kɛrɛ a kuriri.

³⁰A tu ɓá, Gáŋvbôn zi ɛ̧rɛ̧ káwa a tâ̧wké ka njukuri zi tuhɛ̧ nyáy nyá. Dáy a ŋgɛŋnɛ́, ké ɗí njukuri too, lágelri too, ɓá kú fere káwa a kuriri.

³¹Ɓayhí̧lé Gáŋvbôn tí ŋgbá nâm, a ké e walɓay kɔ̧ tûl a njukuri too ka tísiri ɓá ndáráké ka ŋgboro a njuku a ké ten. Ké tɔ́ʼɔ hí̧ njukuri, ka ŋgboro a toma nɛ́ a bazeŋ a hûlri.»

³²Gelka kú lá Pôl saɓay a toma a hûlri, njuku a há̧narí̧ sáʼa nɛ́, a fékéri sa ɓá: «Rú e lá mɔ́, sé tûl ɓayké nɔ́ a sêe a féké!»

³³Nǎŋnɔ́, Pôl pɔŋ kuriri, a kála.

³⁴A ɓilké nɔ́ too, njuku a há̧narí̧ tɔ́ŋ nɛ́, a láɓulaw: A Bazeŋ a kuriri, Denís erú, ké kaw ɓá njuku mbêw a bazeŋ a mára̧ a gáŋnjuku a Areyopazeri, wûny há̧na rɛŋɛ́ ɓá Damarís rá̧ njuku a fékéri ɓáy kɔ́.