Read Capanahua Péna a Apotereri 18 Bible Online

Péna a Apotereri 18 - Capanahua bible

Péna a Apotereri 18

¹Falké nɔ́, Pôl uru a Atɛn a sé Kɔrɛŋte.

²A goló, ké gé ziŋ Juyíf há̧na, rɛŋɛ́ ɓá Akilás, ké kaw ɓá njuku a ɓil kaw a Pɔ̂ŋ. Gína a mɛ̌ a Itali a ŋgɛŋ kuu wûny a mɛ̌ Pirisîl, ɓayhí̧lé mbây lúkí a Rɔm, Kolode, hí̧nzáʼa ɓá Juyífri too ka e a Rɔm, kú tɛ̧́ ka pûké. Dáy, Pôl sé ziŋ kuriri.

³A kú niŋ ɓá péna a mbêwkéy, Pôl sé ná kuu kuriri, ɓay a kú ma niŋ pénáké. Kú kaw ɓá njuku zá gbáʼari.

⁴Nâm ɔʼɔ dát lé, Pôl sé many há̧narí̧ a ɓil vûn gɔ́ŋ Gáŋvbôn kuu Juyífri rá̧ njukuri ka zi tí ɓá Juyífri yáy. Ké kaw ɛ̧ ŋgboro, ɓay a ké ɓá kuriri láɓulaw hí̧ Zezú.

⁵Gelka Silás rá̧ Timoté uru ka Maseduwa̧n gí ká̧y, Pôl, mbí mûn nɛ́ ka̧n ɓá tɔ́ʼɔɓay a Gáŋvbôn, ké sa a mbɛl a Juyífri ɓá, Zezú pé ɓá Kiris.

⁶Dáy Juyífri, kpútûl kuu mɛ̌, a fára nɛ́, nǎŋnɔ́ Pôl haŋ sôm a siri laa a mɛ̌ kɔ̧ tûl a kuriri, a sa hí̧ kuriri ɓá: «Wǎyri mí ɓɔ́l, kó ɓá wǎyri, zi kó mǐ mbaa. Tí a ŋgɛŋnɛ́, mí e fere sé gel a njukuri ka zi tí ɓá Juyífri yáy.»

⁷Dáy, a ké kála a goló, a sé gel a njuku a há̧na, ka zi tí ɓá Juyíf yá, a kú ɗí nɛ́ ɓá Titiyûs Zustus, ka ɓá njuku ka e ka wɔ́w a Gáŋvbôn kɔ́y, vûn a mɛ̌, ná ɗɛ́ŋ kuu vûn gɔ́ŋ Gáŋvbôn a Juyífri.

⁸Kírípús, ka ɓá gáŋnjuku vûn gɔ́ŋ Gáŋvbôn, láɓulaw hí̧ Gáŋmbây rá̧ î̧n a mɛ̌ri̧ too. Njuku Kɔrɛŋtiyɛ̧́ri̧ ɓá ŋgɛ̧́náké ka tûl láɓay a Pôl, ziŋ láɓulaw, a nyá batêm.

⁹Sû̧ŋ a há̧na, Gáŋmbây gí ri Pôl a lɔ́la, a sa hí̧ nɛ́ ɓá: «Mɔ́ ŋgú wɔ́w yá, mɔ saɓayké gé ɓá mbɛl, mɔ́ ná tu nzáʼa,

¹⁰ɓayhí̧lé mí e kuu mɔ̌, njuku a há̧na mbêw, ka e ɓá mɔ́ tɔ́ʼɔsêe, zi tí yá. Ɓayhí̧lé, mi erú ka njuku a mǐri̧, ɓá ŋgɛ̧́náké a ɓil pû nɛ́.»

¹¹Pôl kaw Kɔrɛŋte mbimbɔ̂m mbêw, ka fêw zêe, a tɔ́ʼɔɓay a Gáŋvbôn hí̧ njukuri too.

¹²A ɓil nâm ka Galiyoŋ, gí kaw ɓá mbây tûlkaw a Rɔmɛri̧, a tísiri a Akayí, Juyífri too zi ɓay a Pôl yá, dáy a ŋgbá nɛ́ sé vûn walɓay,

¹³a sa: «Njuku nɛ́, ɛ́ ŋgboro ɓá njukuri ɓá kú ɗél Gáŋvbôn, ka ŋgboro a féké ka sáŋna zi hí̧ ŋgboro hí̧ nárí̧ ɓá ná niŋ nyáy!»

¹⁴Gelka Pôl mbí ɓay, ɓay a sanáké, lé Galiyoŋ sa hí̧ Juyífri ɓá: «Mí ɓá ɓékéhɛ̧ malé hɛ̧ a ŋgɛ́rɛ́kéy, mi e ɓá tûl ní ka̧nrú̧ ɓay a lá wǎyri, wǎy Juyífri.

¹⁵Dáy, ka ɓá ɓay hɛ̧ ka kó tɔ́ʼɔɓay sé tu tɛ̧́rɛ̧́ɓay, tûl rɛŋ rá̧ sáŋna a wǎyri, kó wǎyri, mí tí ɓá tûl ní ri ɓil ɓayké yá!»

¹⁶Dáy, a ní kuriri a vûn walɓayké.

¹⁷Nǎŋnɔ́ kuriri too gí ŋgbá Sostɛ́n, gáŋnjuku vûn a gɔ́ŋ Gáŋvbôn, a tí vbá̧ nɛ́, a mbɛl vûn walɓay nɔ́. Dáy Galiyoŋ zi kél kuriri yá.

¹⁸Pôl rekaw a falké ɗiɓaŋ ka Kɔrɛŋte. Falké, ké pɔŋ kuriri a mbí batô, a kála sé Sírí kuu Pirisîl rá̧ Akilás. Dáy ɗambɛl rá̧ ɓáy, ké kpô tûlé ka tísiri a Saŋkeré, ɓayhí̧lé ké hí̧nzáʼa hí̧ Gáŋvbôn[21].

¹⁹Kú gé ka̧ Efɛze, a goló, Pôl gé pɔŋ Pirisîl rá̧ Akilás, a kála sé vûn gɔ́ŋ Gáŋvbôn a Juyífri, a sá̧, ké many há̧narí̧ kuu kuriri.

²⁰Kú vbí nɛ́ ɓá ké kaw kpay kuu kuriri, dáy, Pôl zi zibɔʼɔké yá.

²¹Ké uru a pɔŋ kuriri, a kaw kála a sa hí̧ kuriri ɓá: «Mi e regí sêe a féké ka Gáŋvbôn mi zibɔʼɔké.» Dáy, a uru ka Efɛze, a he batô, a kála.

²²Fal ka Pôl gé ka̧ Sezaré, ké tí sé Zerúzalɛ̂m rá̧ ɓáy, ɓay a sé nâm mára̧ a gun láɓulawri. Falké, ké reɗere sé Aŋtiyós, ka tísiri a Sírí.

²³Ké gé kaw goló nâm tɛ̧́w dáy a rekála. Ké sé a tá lá tísiri a Galátí rá̧ Firizí, ka hí̧ ŋgɛ́rɛ hí̧ gun láɓulawri too.

²⁴Juyíf a há̧na rɛŋɛ́ ɓá Apoló, pû mɛ̌ ɓá Alekzaŋndiri, ké gí ka̧ ɓil pû a Efɛze. Ké kaw ɓá njuku ka tu saɓay, a tu Mbété a Gáŋvbônri̧ ɓá béláké.

²⁵Kú tɔ́ʼɔ nɛ́ hɛ̧ ka kó ŋgboro a Gáŋmbây, ké e ka gamûn mambá, a ɓil pénáké. Ké tɔ́ʼɔɓay a Zezú ɓá báŋké nɔ́, ka ŋgboroké. Dáy, ké tu ɓá ɓay a batêm a Zâŋ[22] mbɛ́ŋ.

²⁶Ké tɔ́ʼɔɓay a Gáŋvbôn a ɓil vûn gɔ́ŋ Gáŋvbôn a Juyífri táŋ wɔ́w. Gelka, Pirisîl rá̧ Akilás lá tɔ́ʼɔɓay a mɛ̌, kú gé ɗa nɛ́ gí gel a kuriri, a gí tɔ́ʼɔ hí̧ nɛ́ ɓá táŋáké ŋgboro a Gáŋvbôn.

²⁷Falké, Apoló zi ɓay a sé Akayí, dáy gun láɓulawri kpúmûn nɛ́, a ɗé mbété hí̧ gun láɓulawri a ɓil kawké sá̧, ɓá kú nyá nɛ́ ɓá béláké. Gelka, ké gé ka̧ gel a kuriri, ké gé hí̧ndɔ̂ʼɔ mambá hí̧ njukuri ka láɓulaw hí̧ Zezú ka ŋgboro a béla a Gáŋvbôn.

²⁸Nǎŋnɔ́, ké tu nzáʼa a Juyífri a ɓil a dawá, ka tɔ́ʼɔ ka ŋgboro a hɛ̧ ka ɗé ka̧n ɓil Mbété a Gáŋvbôn ɓá táŋáké ɓá Zezú, ɓá Kiris.