Read Capanahua Péna a Apotereri 20 Bible Online

Péna a Apotereri 20 - Capanahua bible

Péna a Apotereri 20

¹Fal ka ɓayké ɔ dáy, Pôl mára̧ gun láɓulawri too ka hí̧ kuriri nzáʼa nzɛ́rɛ, a vbara kuriri a mbí ŋgboro Maseduwa̧n.

²Ké sé lá ɓil kawké, a hí̧ nzáʼa nzɛ́rɛ ɓá ŋgɛ̧́náké hí̧ gun láɓulawri, dáy a rembí ŋgboro a kála sé pû Girɛ́s.

³A goló, Pôl gé kawrú fêw sáy. Gelka, ké zi ɓay a ké mbí batô a kála sé Sírí, ké lá ɓá, Juyífri láhá̧narí̧ ɓay a niŋ nɛ́ hɛ̧ a belyáké. Dáy, ké pɔŋ tá ka ŋgboroké, a refére tá lá Maseduwa̧n.

⁴Sopater, gun a Pirús, ka ɓá gun pû Béréy, sé kuu mɛ̌, Aristark rá̧ Sekundus a tísiri a Tesaloník rá̧ Gayus a pû Dɛrbe rá̧ Timoté rá̧ Tisík kuu Tirofim ka ɓá gun pû a tísiri Azíri.

⁵Kuriri kú sé ɗambɛl a gé zoko rú ka Torowás,

⁶Dáy ɓurú, a fal záymûn a biré táŋ haw, rú mbí batô a mbí ŋgboro a Filípí. Nâm ndíɓí ka falké, rú gé ziŋ kuriri ka Torowás, a gé ná goló nâm zíndɔ̂ʼɔsáy.

⁷Nâm ɔ a bɔʼɔlêw,[24] rú mára̧ há̧narí̧, ɓay a sɔ̧́lâʼa law mbêw, dáy Pôl mbí ɓay a mbɛl a njuku láɓulawri, ɓayhí̧lé típélé a féké lé, ké e kálay. Ké kɔʼɔ ɓay ka̧ lawgel a sû̧ŋ.

⁸Kú ɓá hɔrɛ ka̧n lamberi ɓá ŋgɛ̧́náké, ɓay a táŋ ɓil vûn, ka rú erú ka sâay.

⁹Gun kaban njuku a há̧na, rɛŋɛ́ ɓá Etiké, ké kaw nzáʼa túlûm a vûn ka sâa. Gelka Pôl kɔʼɔ ɓay gé ɓá mbɛl, Etiké duku nâm a tá nâm, dáy a lé ka tûl vûn a sáyké a sâa gí tísiri. Gelka, kú ɗere gí gbaŋ nɛ́, rú gí ziŋ nɛ́, ké hú dá.

¹⁰Dáy, Pôl ɗere a gí huku tûlé, a mbí nɛ́ ka̧n ɓil ndɔ̂ʼɛ, a sa: «Law a wǎyri ké zi ná lú, ké e ka nûn!»

¹¹Gelka, Pôl rehe sé sâay, ké gé haw biré, a sɔ̧́. Falké, ké saɓay ɓáy ka̧ gél a pélé. Ka sêe kaw tɛ̧́na, ké uru, a kála.

¹²Falké nɔ́, kú ɓá gun kaban ráy, resé gé lé, ka nûn, ná ɓá gáŋ hɛ̧ kpúmûn hí̧ njukuri too.

¹³Rú sé ɗambɛl, a gé mbí batô ka e ɓá rú sé ka̧ Asós, rá̧ rú gé mbí Pôl ka̧nrú̧. Ɓá nǎŋnɔ́ pé ké ziy, ɓayhí̧lé, ké zi ɓay a ké sé ka ŋgboro sé ziŋ ɓurú ka sá̧.

¹⁴Gelka, ké gé ziŋ ɓurú ka Asós, rú gé mbí nɛ́ ka̧n ɓil batô, ɓay a sé pû Mitílɛ́n.

¹⁵A goló, rú tá ka batô, a gé ka̧ Kiyó a típélé a féké. Nâm a féké, rú uru a gé ka̧ Samos, a típélé a tɔ́ŋ rú̧ké rú gé ka̧ Milɛ́.

¹⁶Pôl zi ɓay a ké ew ka Efɛze yá, ɓayhí̧lé ké zi ɓay a ké ɗiɓaŋ ka tísiri a Azí yá. Ké zi ɓá ké sé ɓá gánáké, a gé ka̧ Zerúzalɛ̂m, a sêe záymûn a Paŋtekót ka ŋgboro mí erúy.

¹⁷A Milɛ́, Pôl pé njukuri sé ɗí gáŋnjuku pénari̧ a ɓil Egilizeri ka Efɛze.

¹⁸Gelka, kú gí ka̧ gé léy, ké sa hí̧ kuriri ɓá: «I tu ɓá táŋáké, káwa a mǐ dát a bazeŋ a wǎyri, tí a titíla nâm, ka mi ka̧ ɓil kaw a Azí.

¹⁹Mi niŋ péna a Gáŋmbây táŋ hɔ̧́tûl, a ɓil vúna, a ɓil tɔ́ʼɔsêeri, a mi ziŋ a ŋgboro a láhá̧na a Juyíf a há̧narí̧.

²⁰I tu ɓá táŋáké, mi zi mú wǎyri hɛ̧ há̧na mbêw yá, hɛ̧ ka ɓá hɛ̧ nɛ́rɛ̧ wǎyri: Mi sa a tɔ́ʼɔ hí̧ wǎyri too, a ɓil a dawá rá̧ a ɓil vûn a wǎyri.

²¹Mi ɗí Juyífri rá̧ njukuri ka zi tí ɓá Juyífri yáy, ɓá kú fere law a kuriri hí̧ Gáŋvbôn, a kú láɓulaw hí̧ Gáŋmbây Zezú Kiris.

²²Dáy ŋgɛŋnɛ́, Têm Pukí sɔʼɔrɔ mí, ɓá mí sé Zerúzalɛ̂m. Mi zi tu hɛ̧ ka e gé ziŋ mí ka sá̧ nyá.

²³Dáy mi tu hɛ̧ mbêw, Têm Pukí sa hí̧ mí ɓá, a ɓil pûri mbêw mbêw too, vûn sɛl rá̧ tɔ́ʼɔsêeri mí zoko mí.

²⁴Dáy, mi kó ndísɛ̌ʼɛ a mǐ nɛ́rɛ̧ké zi tí ka nûn ní nyá. Hɛ̧ ka e ka nɛ́rɛ̧, ɓá mí sé ka̧ kɔ́rɔ́ nzáʼapéna a mǐ, a mí ɔrɔ péna ka Gáŋmbây Zezú hí̧ mí: Ɓá mí sa Bélaɓay a béla a Gáŋvbôn hí̧ njukuri.»

²⁵Dáy a ŋgɛŋnɛ́ mi tu ɓá, i tí kó nûn ní mbaa, wǎyri, ka mí há̧ra̧ bazeŋ a wǎyri, ka a tɔ́ʼɔ Bélaɓay a Pû a Gáŋvbôn hí̧ wǎyri.

²⁶Ɓaykénɔ́, pé mí sa hí̧ wǎyri ka sénɛ́, njuku a há̧na a bazeŋ a wǎyri mí ɓɔ́l lé, Gáŋvbôn tí vbí sêm mûn nɛ́ a ɓil ndɔ̂ʼɔ ní nyá.

²⁷Ɓayhí̧lé mi tɔ́ʼɔ hí̧ wǎyri hɛ̧ too ka Gáŋvbôn mɔny, a zi mú hɛ̧ a há̧na mbêw hí̧ wǎyri yá.

²⁸I koro tûl a wǎyri rá̧ mára̧ a njukuri ka Têm Pukí, ɓá hí̧ wǎyri ɓá i koro kuriri[25]. I koro mára̧ a gun láɓulawri ɓá béláké, ka Gáŋvbôn zé kuriri ka hûl a Gun a mɛ̌ ka mûn nɛ́.

²⁹Mí tu ɓá táŋáké, ka fal kála mǐ, ɓéké njukuri ɓá báŋa ɓaʼalari e gí ri bazeŋ a wǎyri, a zi pɔŋ mára̧ a njukuri mbêw yá.

³⁰Nǎŋnɔ́ kɔ́, a bazeŋ a wǎyri, njuku a há̧narí̧ e uru a kúŋɓay, ɓay a rɔ́ʼɔ gun láɓulawri ɓá ŋgɛ̧́náké, tɔ́ŋ kuriri.

³¹I kó ɓá béláké, a i kɛrɛ, a ɓil mbimbɔ̂m sáy, sû̧ŋ ka sêe, mi zi ná nâm nyá, a ɓil vúna, ɓay a mí hí̧ wǎyri mbêw mbêw too nzáʼa nzɛ́rɛ.

³²«Dáy a ŋgɛŋnɛ́, mi pɔŋ wǎyri ka̧n ɓil ndɔ̂ʼɔ a Gáŋvbôn, rá̧ ɓil béla a ɓay a mɛ̌. Ké erú ka kpɔ́ŋa, ɓay a mɔny wǎyri hɔ̧́ a ɓil láɓulaw. Ka ŋgboro a béla mɛ̌, ké e hí̧ wǎyri béla too, a ké mɔny zoko njuku a mɛ̌ri̧ too.

³³Mi zi ɛ́ lari malé vbí̧rí̧lari malé gárí a njuku a há̧na nyá.

³⁴I tu ɓá táŋáké, ɓá mi kaw niŋ péna ka ndɔ̂ʼɔ ní, ɓay a hɛ̧ ka e mbá mí, rá̧ ɓay a njukuri ka sé kuu mǐ.

³⁵Mi tɔ́ʼɔ hí̧ wǎyri a ɓil hɛ̧ too, ɓá belɓá njuku ké niŋ péna ka ndɔ̂ʼɛ nǎŋnɔ́ rá̧, ké ma ziŋ hí̧ndɔ̂ʼɔ hí̧ njukuri ka hɛ̧ri̧ mbá kuriri, a ɓil kɛrɛ ɓay ka Gáŋmbây Zezú sa ka mûn nɛ́ ɓá: “Mûnrína erú mambá a ɓil hí̧ hɛ̧, ndé nyá hɛ̧.”»

³⁶Gelka Pôl ɔrɔ saɓay, ké huku siri, a gɔ́ŋ Gáŋvbôn kuu kuriri too.

³⁷Falké, kuriri too, kú lé ɓil ndɔ̂ʼɔ a Pôl ɓay a vbara nɛ́, a si̧ŋ nɛ́, ka vúna.

³⁸Law a kuriri too yírí, ɓay hɛ̧ ka Pôl sa hí̧ kuriri ɓá: «I tí kó nûn ní mbaa. Dáy, a kú ɗa nɛ́, sé gbaŋ mbii ɓay a ké gé he batô.»