Read Capanahua Péna a Apotereri 23 Bible Online

Péna a Apotereri 23 - Capanahua bible

Péna a Apotereri 23

¹Pôl e a Zerúzalɛ̂m, kú ɗa nɛ́ gí ew mbɛl a gáŋnjuku walɓayri, dáy ké mbí nûn nɛ́, a ɛ̧rɛ̧ kuriri a sa: «Nyîn nírí̧, a law a táŋáké, pé mi niŋ péna a Gáŋvbôn gí ka̧ sénɛ́.»

²Dáy, gáŋnjuku nzáʼaká̧na Ananínya, sa hí̧ njukuri ka ew ka gbaŋa Pôl ɓá kú vbá̧ nzɛ́ʼɛ.

³Dáy, Pôl sa hí̧ nɛ́: «Ɓá mɔ̌ pé Gáŋvbôn e vbá̧náké, mára̧ gekén a pukáké[29]! Mɔ kaw, ɓay a walɓay ka̧n tûl ní ɓá báŋké ka sáŋna vbíy, a mɔ many sáŋna, a sa kú vbá̧ mí!»

⁴Njukuri, a kaw ɗɛ́ŋ kuu Pôl, sa hí̧ nɛ́: «Mɔ fára gáŋnjuku nzáʼaká̧na a Gáŋvbôn!»

⁵Dáy Pôl zi nzáʼa a kuriri a sa: «Nyîn nírí̧, mi zi tu ɓá, ké kaw ɓá gáŋnjuku nzáʼaká̧na nyá. Katína, kú ɗé ka̧n ɓil Mbété a Gáŋvbôn ɓá: Mɔ́ sa ɓékéɓay sé tûl a mbây a njuku a mɔ̌ri̧ nyá!»

⁶Pôl tu ɓá, a bazeŋ a gáŋnjuku walɓayri, a há̧narí̧ ɓá Sadusiyɛ̧ri̧, rá̧ a fékéri ɓá Fariziyɛ̧́ri̧, ɓaykénɔ́, ké vbá̧nzáʼa ɓá gbénáké a sa: «Nyîn nírí̧, mi ɓá Fariziyɛ̧́, gun a Fariziyɛ̧́. Ɓay hɛ̧ ka mi mbílaw ní sé tûl ɓay a toma hûl, pé kú ɓá mí gí ew mbɛl walɓay nɛ́.»

⁷Gelka, Pôl saɓay nǎŋnɔ́, Fariziyɛ̧́ri̧ kuu Sadusiyɛ̧ri̧ tí many há̧narí̧, a goló ɗéma ná a bazeŋ a njukuri ka mára̧y. (

⁸Ɓayhí̧lé Sadusiyɛ̧ri̧ sa ɓá toma hûlri zi tí yá, aŋnzeri rá̧ têmri̧ zi tí yá, Fariziyɛ̧́ri̧, kuriri, kú sa ɓá hɛ̧ nɔ́rí̧ too erú.)

⁹Njukuri too tí vbá̧nzáʼa, ɓálari ŋgɛ̧́ gé ɓá mbɛl, dáy gáŋnjuku tɔ́ʼɔ sáŋna a há̧narí̧, ka ɓá Fariziyɛ̧́ri̧, uru a saɓay ka ŋgɛ́rɛ ɓá: «Rú zi kó ɓékéhɛ̧ a njuku nɛ́ niŋ nyá, há̧na, aŋnze a há̧na malé têm a há̧na pé saɓay hí̧ nɛ́ lé!»

¹⁰Gelka, gáŋnjuku a ŋgawbéreri kó ɓayké gé ɓá mbɛl, ké ŋgú wɔ́w ɓá kú ná niŋ nǎŋ a í Pôl, dáy a sa hí̧ ŋgawbéreri ɓá: I ɗere, a i ɓá Pôl tɛ̧́ a ɓil a njukuri, a i ɓá nɛ́ sé ɓil ŋgɛ́rɛ gáŋ vûn.

¹¹Sû̧ŋ a féké, Gáŋmbây tɔ́ʼɔ mûn nɛ́ hí̧ Pôl a ɓil lɔ́la, a sa hí̧ nɛ́: «Mɔ́ ŋgbá ɓá kpúnáké, ɓá báŋa nɔ́, ka mɔ saɓay a mǐ a gelé a Zerúzalɛ̂m, belɓá, mɔ́ sé saɓay a mǐ kɔ́ ka Rɔm.»

¹²Típélé a féké, Juyíf a há̧narí̧ mára̧ a láhá̧na ɓá múnáké, a háhɛ̧, a sa: Ɓurú mí zi í Pôl yáy, rú tí sɔ̧́lâʼa, a tí nzó mbii yá.

¹³Njukuri ka láhá̧narí̧ ka a háhɛ̧, kú ndé njukuri bon nɛŋ.

¹⁴Kú sé ziŋ gáŋnjuku nzáʼaká̧nari̧, rá̧ gáŋnjuku pûri, a sa hí̧ kuriri: «Rú háhɛ̧ a mbɛl a njukuri, ɓá rú mí zi í Pôl yáy, rú tí sɔ̧́lâʼa, a tí nzó mbii yá.

¹⁵Dáy, ŋgɛŋnɛ́, rú zi ɓá a bazeŋ a wǎyri, a njuku walɓayri, í vbí gáŋnjuku ŋgawbére a Rɔmɛri̧, ɓá ké ɓá Pôl gí mbɛl a wǎyri. Í tɔ́ʼɔ ɓá, í zi ɓay a kó ɓil ɓay a mɛ̌ ɓá táŋáké. A ɓurú, rú e kaw ɗɛ́ŋ ɓay a í nɛ́, gelka kú e ɗa nɛ́ ɓay a gí mbɛl a wǎyri.»

¹⁶Dáy, gun nǎa a Pôl, gun a mánǎa a mɛ̌, láɓayké a uru sé ziŋ Pôl, a ɓil ŋgɛ́rɛ gáŋ vûn, a gé saɓayké hí̧ Pôl.

¹⁷Dáy, Pôl ɗí gáŋnjuku a ŋgawbéreri mbêw, a sa hí̧ nɛ́: «Mɔ́ ɗa kaban njuku nɛ́ sé gel a gáŋnjuku a ŋgawbéreri, ké e ka ɓay, ɓay a sa hí̧ nɛ́.»

¹⁸Nǎŋnɔ́, ké ɗa kaban njuku ráy, sé gel a gáŋnjuku a ŋgawbéreri, a gé sa: «Njuku vûn sɛl Pôl, ɗí mí, a sa ɓá mí ɗa kaban njuku nɛ́ gí goló, ké e ka ɓay, a ké e sa hí̧ mɔ́y.»

¹⁹Gáŋnjuku a ŋgawbéreri gí ŋgbá ndɔ̂ʼɛ a ɗa nɛ́ sé falgel, dáy a vbí nɛ́: «Ɓayhí̧, mɔ́ zi ɓay a mɔ́ sa hí̧ mí lé?»

²⁰Kaban njuku ráy, zi a sa: «Gáŋnjuku walɓayri, láhá̧na ɓay a vbí mɔ́, ɓá mɔ́ ɓá Pôl gí vûn walɓay a típélé, ɓay a kú ɛ́ ɓil ɓay a mɛ̌ ɓá táŋáké.

²¹Dáy, mɔ́ ná zibɔʼɔké! Ɓayhí̧lé gbaŋa njukuri bon nɛŋ, ka zi ɓay a mú ŋgboro, dáy a háhɛ̧ a mbɛl a njukuri, ɓá kú tí sɔ̧́lâʼa, a tí nzó mbii yá, a kú mí zi í Pôl yáy. Ŋgɛŋnɛ́, kú kaw ɗɛ́ŋ, a zoko ɓá zibɔʼɔ ɓay a mɔ̌.»

²²Dáy, gáŋnjuku a ŋgawbéreri sa hí̧ kaban njuku ráy, ɓá ké zi ná sa hí̧ njuku a féké ɓáy, a ké sa hí̧ nɛ́. Dáy a pɔŋ nɛ́ kála.

²³Falké gáŋnjuku a ŋgawbéreri, ɗí mbây a ŋgawbéreri sére, a sa hí̧ kuriri: «I mára̧ ŋgawbéreri ísɔ́t sére rá̧ njuku dônri̧ bon zíndɔ̂ʼɔsáy rá̧ ŋgawbéreri ísɔ́t sére ka e ka gó a kuriri. A i kaw ɗɛ́ŋ ɓay a sé Sezaré, a sɛl a sêe zíndɔ̂ʼɔmbêw a haŋa sû̧ŋ.

²⁴I mɔny dônri̧ kɔ̧, ɓay a ɗa Pôl, ɓá béláké sé gel a mbây tûlkaw Felíkse.»

²⁵Falké, ké ɗé mbété nɛ́:

²⁶«Mǐ Kolode Lisiyás, mi nam mɔ́, mɔ̌ gáŋnjuku, mbây tûlkaw Felíkse.

²⁷Juyífri ŋgbá njuku nɛ́, ka mi pé nɛ́ gé goló nɛ́y, a zi ɓay a í nɛ́. Gelka mi lá ɓá ké kaw ɓá gun pû a Rɔm: Mǐ kuu ŋgawbére a mǐri̧, rú gé ten nɛ́.

²⁸Dáy, ɓay a tu ɓayhí̧rá̧, Juyífri zi ɓay a í nɛ́ lé, mi ɗa nɛ́ gí mbɛl a gáŋnjuku walɓay a kuriri.

²⁹Mi gí lá ɓá kú niŋ ɓay kuu Pôl, ɓay a tûl sáŋna a kuriri. Dáy rú zi ziŋ hɛ̧ há̧na mbêw, ka Pôl niŋ, ka ma ɓay a ké ziŋ hûl malé ɓay a ɓá nɛ́ ka̧n vûn sɛl yá.

³⁰Falké lé, kú gí sa hí̧ mí ɓá Juyíf a há̧narí̧, láhá̧narí̧ ɓay a í nɛ́, ɓaykénɔ́, pé mi pé nɛ́ ɓá gánáké gé golóy. Dáy a sa hí̧ njukuri ka deɓay ka̧n nzɛ́ʼɛ, ɓá kú gé kalmany a mɛ̌ a goló sá̧.»

³¹Ŋgawbéreri niŋ hɛ̧ ka gáŋnjuku a kuriri sa hí̧ kuriri, a ɗa Pôl ka haŋa sû̧ŋ, a ɓá nɛ́ sé gel a Aŋtipâs.

³²Típéléké, ŋgawbéreri ka sé ka bɔʼɔ, rekála sé gel péna kuriri, a pɔŋ njuku dônri̧ ɗa Pôl kála rú.

³³Gelka kú gé ka̧ Sezaré, kú gé hí̧ mbétéké hí̧ mbây tûlkaw Felíkse, a gé ɓá Pôl tɔ́ʼɔ nɛ́.

³⁴Mbây tûlkaw gé kɛ̧́ mbétéké a vbí Pôl ɓá ké ɓá gun ɓil kaw a sí̧ lé? Pôl zi a sa: A ɓil kaw a Silisí,

³⁵dáy, ké sa hí̧ Pôl: «Mi e lá mɔ́, ka sêe ka njukuri ka deɓay ka̧n nzáʼa e gínay.» Dáy, a hí̧nzáʼa ɓá kú ɓá Pôl sé ɓil gáŋ vûn a mbây tûlkaw, a kú koro nɛ́.