Read Capanahua Péna a Apotereri 27 Bible Online

Péna a Apotereri 27 - Capanahua bible

Péna a Apotereri 27

¹Gelka kú ŋgá̧nzáʼa too, ɓay a rú he batô a sé Itali, kú ɓá Pôl rá̧ njuku vûn sɛl a há̧narí̧ kɔ̧ ɓil ndɔ̂ʼɔ a mbây a ŋgawbére, a kú ɗí nɛ́ ɓá Juliyús. Ké kaw ɓá gáŋnjuku a mára̧ a ŋgawbére a Rɔmɛri̧, a kú ɗí ɓá «mára̧ a ŋgawbére a mbây a lúkí Sezar.»

²Rú he batô ka gí a pû a Adamít, ka e sé gé ɓá ŋgboro a ɓil kaw a Azí, dáy a rú kála. Aristark, gun pû a Maseduwa̧n ka tísiri a Tesaloník erú kuu ɓurú.

³Típéléké rú gé ka̧ Sidɔ̂ŋ. Mbây a ŋgawbére Juliyús, ka koro Pôl ɓá béláké, hí̧ ŋgboro hí̧ Pôl ɓá ké sé kó mbáŋa a mɛ̌ri̧, há̧na ké e gé ziŋ hɛ̧ri̧ a ké ziy.

⁴Falké, ka rú tá kála a golóy, rú tá a fɔ́ŋ lá gbaŋ tûlkɔ̂ɔ a Sípɛrɛ a kúna zi ŋgɛ̧́ nyáy, ɓayhí̧lé gáŋ kúna gí ka ŋgboro a mbɛl a sɔʼɔrɔ rú gé ɓá fal.

⁵Rú tá mbii lúkí ka e ɗɛ́ŋ kuu Silisí rá̧ Pamfílí, nǎŋnɔ́ rú gé ka̧ Mira a tísiri a Lisí.

⁶A goló, mbây a ŋgawbére gé ziŋ batô ka gí a tísiri Alekzaŋndiri ka e sé gé ɓá Italiy, dáy a gé ɓá rú he rú.

⁷Nâmri̧ ɓá a ŋgɛ̧́náké, batô ŋgú zaŋ zaŋ ka̧rú, a rú ɓá pɔ̧́nɔ́, rá̧ pé a ka̧ nzáʼa pû Kinide. Dáy a kúna de rú tá lá ŋgboroké, nǎŋnɔ́, rú rembí ŋgboro pû Salmon ka e a kɔ́rɔ́ tûlkɔ̂ɔ, ɓay tɛ̧́ ka ŋgboro a zabaw a tûlkɔ̂ɔ a Kɛrɛt.

⁸Rú fɔ́ŋ gbaŋ tûlkɔ̂ɔké ɓá pɔ̧́nɔ́ rá̧ pé a ka̧ gel a kú ɗí ɓá Béla gel ewá batô, ka gbaŋ pû a Lazé.

⁹Rú niŋ nâmri̧ ɓá ŋgɛ̧́náké ka tûl sénaké dá, ré ná ŋgɛ́rɛ mambá hí̧ rú, ɓay a rú ta̧m sénaké a batô sé mbɛl. Ɓayhí̧lé nâm sáŋhɛ̧[30] tá dá. Ɓaykénɔ́ pé Pôl vbara njuku niŋ péna ɓil batôri ɓá:

¹⁰«Mbaŋa a mǐri̧, mi kó ɓá, séna a manárí̧ nɛ́ ŋgbɔ́rɔ mambá: Batô rá̧ hólari a ɓilké e ɓewa, rá̧ manárí̧ kɔ́, kóyá lé, ná e ziŋ hûl.»

¹¹Dáy, mbây a ŋgawbére zi láɓay a Pôl yá, a lá ɓá ɓay a gáŋnjuku ŋgú batô rá̧ njuku batô.

¹²A féké ɓáy, gel ewá a batôké zi belɓá kú ewrú a ɓil fêw gelvónari̧ yá. Ɓaykénɔ́, pé dawá a njukuri too zi ɓá, kú tá a goló: kú zi ɓá ŋgboro mí erú lé, kú sé ka Fenisí, gel ewá a batô a Kɛrɛt, ka kí gé ɓá ŋgboro a zabaw, ríŋa sêe rá̧ ŋgboro a féké kɔ́ kí gé ɓá ŋgboro a mbóra, a ríŋa sêe. A goló, pé kú zi ɓá, fêw gelvónari̧ ké tá ɓurú ka sá̧y.

¹³Kúna há̧na uru a ŋgboro a zabaw a kú gí, dáy njukuri a ɓil batô kɛrɛ ɓá, hɛ̧ a kú ziy e niŋa. Nǎŋnɔ́, a kú gbaŋ gáŋ wɛ̧̂ɛ ka ŋgbá batô ka̧n ɓilké, dáy rú uru a sé ɗɛ́ŋ lá gbaŋ tûlkɔ̂ɔ a Kɛrɛt.

¹⁴Zaa kpay lé, gáŋ kúna a há̧na, a kú ɗí ɓá: «kúna a ŋgboro a mbóra a tɛ̧́na sêe», ɗere gí ka ŋgboro a tûlkɔ̂ɔ.

¹⁵Kúnáké gí sɔʼɔrɔ batô, batô ma ew kuu kúna mbaa, nǎŋnɔ́ rú pɔŋ kúna kɔʼɔ rú.

¹⁶A ɓá rú tá lá ŋgboro a zabaw a gbaŋ gun tûlkɔ̂ɔ a há̧na, ka rɛŋké ɓá Kawda. Nǎŋnɔ́ rú, rú ɓá pɔ̧́nɔ́ rá̧ pé a ŋgbá gun kumbôn pɛ̧́hɛ̧.

¹⁷Njuku niŋ pénari̧ a ɓil batô kɔʼɔ gun kumbônké gí ɓil batô, dáy a kú gí ŋgá̧ gun kumbônké ka sɛl a ɓá ki ɗɔ́ŋ batô. Nǎŋnɔ́ a kú ŋgú wɔ́w, ɓá kú zi ná sé ri ɓil sikɔʼɛrɛ a ŋgboro Libí, a kú mbí gáŋ wɛ̧̂ɛ vbú ɓil batô, a pɔŋ kúna kɔʼɔ kuriri.

¹⁸Gáŋ kúnáké zi pɔŋ rú yá, típélé a féké, njukuri tí fa̧ hólari a ɓil batô kɔ̧ mbii,

¹⁹dáy, nâm a tɔŋrú̧ké, kú tí fa̧ hóla péna a ɓil batô a ndɔ̂ʼɔ kuriri kɔ̧ mbii.

²⁰Nâmri̧ ɓá ŋgɛ̧́náké, ná zi kósêe malé rôori yá. Gáŋ kúnáké, zi pɔŋ kú ka ŋgɛ́rɛ yá, nǎŋnɔ́ rú zi kɛrɛ ɓay a pɛ̧́na mbaa.

²¹Njukuri ka e a ɓil batô, zi ɓay a sɔ̧́lâʼa yá, niŋ nâm ŋgɛ̧́ mambá, dáy Pôl uru a mbɛl a njukuri too, a sa: «Mbaŋa a mǐri̧, wǎyri mí lá nzáʼa ní, ka ná zi kála ka Kɛrɛt yáy, ná zi lé ɓil gáŋ kúna nɛ́ nyá, rá̧ i fá̧ hóla a wǎyri kɔ̧ kpâa yá.

²²Dáy a ŋgɛŋnɛ́ mi sa hí̧ wǎyri, í zi ná ŋgú wɔ́w, ɓayhí̧lé njuku a há̧na mbêw, tí ziŋ hûl yá, ɓá batô hɛʼɛ pé e ɓeway.

²³Ɓayhí̧lé Sû̧ŋa nɛ́, aŋnze a Gáŋvbôn a mǐ, Gáŋvbôn nɔ́, ka mi kaw niŋ péna a mɛ̌, gí ri mí a ɓil lɔ́la,

²⁴a sa hí̧ mí ɓá: “Pôl, mɔ́ ná ŋgú wɔ́w! Belɓá, mɔ ew mbɛl a mbây a lúkí Sezar ka Rɔm, dáy Gáŋvbôn a ɓil béla a mɛ̌, e koro mɔ́ kuu njukuri too ka e ɓil batô nɛ́ kuu mɔ̌y.”

²⁵Ɓaykénɔ́, í kpúmûn a wǎyri, mbaŋa a mǐri̧! Ɓayhí̧lé, mi láɓulaw hí̧ Gáŋvbôn: Ké e niŋáké ɓá báŋké nɔ́ a ké sáy.

²⁶Dáy, kúna e kɔʼɔ manárí̧ sé gbaŋ tûlkɔ̂ɔ a há̧na.»

²⁷Niŋ sû̧ŋ bôo a nɛŋ dá, ka gáŋ kúna ɓá ɓurú há̧ra̧ tûl mbii lúkí a Medíteranɛ́. Gé ɓá lawgel a sû̧ŋ, njukupéna a ɓil batôri kɛrɛ ɓá, ná kaw ta̧m sé gbaŋ kuŋna a há̧na.

²⁸Dáy, a kú mbí hɛ̧ léhɛ̧, a tí lé ɗína a mbii ɓay a kó ɗínáké, dáy a ziŋ ɗínáké niŋ bɔʼɔ bonsáy a zêe. Kú sé ɓá ɗínáké kpay ɓáy, a gé lé, a ziŋ ɗína mbiiké, niŋ bɔʼɔ bonsére a zíndɔ̂ʼɔsáy.

²⁹Kú ŋgú wɔ́w ɓá gáŋ kúna, ná sɔʼɔrɔ batô a manárí̧ sé si gáŋ sawri dáy, a kú ɗere gáŋ wɛ̧̂ɛ nɛŋ ka sɛl kɔ̧ mbii a ŋgboro a fal, dáy batô gé ew, nǎŋnɔ́, rú ŋgá̧law a kaw zoko ɓá tɛ̧́na sêe.

³⁰A rú kaw zokáy, njukupéna a ɓil batôri ɛ́ ŋgboro ŋgú a pɛ̧́ mûn a kuriri, dáy a sɛl gun kumbôn a kú ŋgá̧ ka̧n batô, a ɗere nɛ́ vbú mbii, kú kúŋɓay a sa ɓá, kú zi ɓay a ɗére gáŋ wɛ̧̂ɛ kɔ̧ mbii, a ŋgboro a mbɛl a batô.

³¹Dáy, Pôl sa hí̧ mbây a ŋgawbére rá̧ ŋgawbéreri ɓá: «Njuku nɛ́rí̧ mi zi kaw ɓil batô yáy, i zi pɛ̧́na nyá.»

³²A goló, ŋgawbéreri gé kúŋ sɛlri ka ŋgá̧ gun kumbônké, a pɔŋ gun kumbônké tá mbii.

³³Ɗambɛl rá̧ gelké táŋ, Pôl sa hí̧ njukuri too ɓá kú sɔ̧́lâʼa, a sa ɓá: «Í kó, sénɛ́, nâm bôo a nɛŋ dá, a i zoko, ka a zi sɔ̧́lâʼa a há̧na nyáy.

³⁴Mi vbí wǎyri, í sɔ̧́lâʼa, ɓayhí̧lé lâʼaké e ka nɛ́rɛ̧ mambá ɓay a pɛ̧́na a wǎyri. Njuku a há̧na mbêw, tí ɓɔ́l tâny tûlé mbêw yá.»

³⁵Fal saɓay nɔ́, Pôl mbí biré, a zi awá hí̧ Gáŋvbôn a mbɛl a njukuri too, dáy a haw ɓilké, a tí sɔ̧́naké.

³⁶A goló mûn a njukuri too kpú, dáy kú tí sɔ̧́lâʼa kɔ́.

³⁷Njukuri too ka e a ɓil batô, bon a ɓurú ísɔ́t sére ka bonzíndɔ̂ʼɔsáy a zêe.

³⁸Fal ka njukuri sɔ̧́lâʼa ma kuriri dáy, kú fá̧ gázín sôm buléri a fere kɔ̧ mbii, ɓay a ké tí ná zi batô.

³⁹Gelka gel táŋ dáy, njukupénari̧ a ɓil batô zi tu gel ka kú erú mbaa, dáy a kú kó ɓá nzáʼa gel ka sikɔʼɛrɛ mára̧ mbárú, a zi ɓá, ŋgboro mi erú lé, kú ɓá batô sé ka̧rú̧.

⁴⁰Ɓaykénɔ́ pé kú sɛl gáŋ wɛ̧̂ɛri̧ too vbú mbii, a kú sɛ́l, sɛl ka ŋgbá dii ŋgú batô. Falké, kú ŋgá̧ gáŋ gári ka̧n mbɛl a batô a kúna ké ma kɔʼɔ batô, nǎŋnɔ́, kú mbí ŋgboro nzáʼa kuŋnaké.

⁴¹Dáy ɗambɛl rá̧ kú gé ka̧ nzáʼa kuŋna, kú gé ri ɓil sikɔʼɛrɛ ɓá ŋgɛ̧́náké, a goló batô gé goro rú. Tûl batô gé riŋ ɓil sikɔʼɛrɛ a zi laŋ mbaa, taʼaké a fal, nyɛw mbii gí a ŋgɛ́rɛ, a tí haw diikéri mbêw mbêw.

⁴²Ŋgawbéreri zi ɓay a kú í njuku vûn sɛlri, ɓay a njuku a há̧na, ké zi ná lé mbii a ú kála.

⁴³Dáy, mbây a ŋgawbére a Rɔmɛri̧, ka zi ɓay a pɛ̧́ Pôl, de kuriri niŋ hɛ̧ a kú ziy. Nǎŋnɔ́, ké hí̧nzáʼa hí̧ njukuri ka tu ú mbii, ɓá kú tí zɔ lé mbii ɗambɛl, a kú ú sé tûlkala.

⁴⁴Njuku a fékéri, kú tɔ́ŋ kuriri ka ŋgbá dii malé háwa dii batô. Nǎŋnɔ́, pé ɓurú too, rú tɛ̧́ sé tûlkala, hɛ̧ a há̧na mbêw ka niŋ ɓurú zi tí yá.