Read Capanahua Péna a Apotereri 3 Bible Online

Péna a Apotereri 3 - Capanahua bible

Péna a Apotereri 3

¹Nâm a há̧na, Píyɛ́r rá̧ Zâŋ sé vûn a Gáŋvbôn, ɓay a sé gɔ́ŋ Gáŋvbôn a sɛl sêe sáy a bɔʼɔlêw.

²A nzáʼaŋgboro ri vûn a Gáŋvbôn, a kú ɗí ɓá «Béla nzáʼaŋgboro», njuku a há̧na a kú mbuŋ nɛ́ ɓá kpɛrɛy, erú. Sêe too njuku a mɛ̌ri̧, ɗa nɛ́ gí kaw nzáʼaŋgboroké dát, ɓay a ké gɔ́ŋ hɛ̧ a gel a njukuri, ka gí ri vûn a Gáŋvbôn.

³Ké kó Píyɛ́r rá̧ Zâŋ, ka gí ɓay a, gí ri vûn a Gáŋvbôn, dáy a gɔ́ŋ kuriri lari.

⁴Nǎŋnɔ́ Píyɛ́r rá̧ Zâŋ ɛ̧rɛ̧ nɛ́, dáy Píyɛ́r sa hí̧ nɛ́: «Mɔ́ ɛ̧rɛ̧ rú.»

⁵Njuku ráy, mbí nûn ka ɛ̧rɛ̧ kuriri, ka zoko ɓá, ké e ziŋ hɛ̧ há̧na a gel a kuriri lé.

⁶Dáy, Píyɛ́r sa hí̧ nɛ́: «Mi zi tí ka lari malé vbí̧rí̧lari a há̧na nyá, hɛ̧ ka mi erúy, mi e hí̧ mɔ́: Ka rɛŋ a Zezú Kiris a Nazarɛ́t, mɔ́ uru, a mɔ́ séséna!»

⁷Dáy ka ŋgbá nɛ́ ka ndɔ̂ʼɔ lâʼa, a ɓá nɛ́ uru. A goló bɛʼɛ rá̧ ɗoʼolo bɛʼɛ, rekpú ɓá béláké;

⁸Nǎŋnɔ́, ké uru bɔʼɔ mbêw, ka ew tûl bɛʼɛ a tí séséna. Ké ri ɓil vûn a Gáŋvbôn, kuu Píyɛ́r rá̧ Zâŋ, a séséna, a zɔ, a ɗél Gáŋvbôn.

⁹Njukuri too kó nɛ́ séséna, a ɗél Gáŋvbôn.

¹⁰A tu ɓá táŋáké, ɓá mɛ̌, ka kaw béla nzáʼaŋgboro ri vûn a Gáŋvbôn, ɓay a gɔ́ŋ hɛ̧y, dáy a kú kaw yér, a zi tu ɓay sána nyá, ɓay tûl hɛ̧sáʼama nɔ́.

¹¹A njuku ráy, zi wal há̧na kuu Píyɛ́r rá̧ Zâŋ nyáy, njukuri too kaw yér, a ŋgú tɔ́ŋ kuriri sé ka̧ bɔʼɔ vûn a pénáké, a kú ɗí ɓá: «Bɔʼɔ vûn a Salomoŋ.»

¹²Gelka Píyɛ́r kó nǎŋnɔ́, ké sa hí̧ kuriri ɓá: «Wǎyri njuku Izirayɛ́lri, ɓayhí̧, i kaw yér lé? Ɓayhí̧, i ɛ̧rɛ̧ ɓurú ɛ́ŋ báŋa rú ŋgɛ́rɛ njuku nɔ́ ka ŋgboro a kpɔ́ŋa a ɓurú lé? Malé ka ŋgboro a mbí mûn a ɓurú hí̧ Gáŋvbôn, pé rú niŋ njuku nɛ́ séséna lé?»

¹³Ɓá Gáŋvbôn a Abaraham, a Izák rá̧ a Zakob, Gáŋvbôn a zîi a manárí̧, ka hɔ̧́ njukupéna a mɛ̌ Zezú, ka i ŋgbá nɛ́, ka a sáŋ nɛ́ a mbɛl a Pilát, ka zi ɓay a pɔŋ nɛ́.

¹⁴I sáŋ, mɛ̌ njuku a táŋáké, njuku a ndáráké, nǎŋnɔ́, i vbí Pilát ɓá ké pɔŋ njuku a í hûl hí̧ wǎyri.

¹⁵Dáy, i niŋ kú í njuku ka kaw ɓá bákáwa ndísɛ̌ʼɛ. Nǎŋnɔ́ Gáŋvbôn toma nɛ́ a bazeŋ a hûlri, rú kó a nûn a ɓurú.

¹⁶Ka ŋgboro a kpɔ́ŋa a rɛŋ a Zezú, rá̧ ka ŋgboro a láɓulaw hí̧ nɛ́, pé hí̧ ŋgɛ́rɛ hí̧ njuku nɛ́, ka wǎyri too, i kó, a tu nɛ́ ɓá táŋáké. Ɓá láɓulaw hí̧ Zezú, pé hí̧ njuku nɛ́ ziŋ ŋgɛ́rɛ ɓá béláké, ka i kó too a ŋgɛŋnɛ́ nɛ́y.

¹⁷«Dáy ŋgɛŋnɛ́ nyîn nírí̧, mi tu ɓá, i niŋ hɛ̧ nɔ́rí̧ too hí̧ Zezú, wǎyri rá̧ mbây a wǎyri, ɓayhí̧lé, i zi tu yá.

¹⁸Dáy, Gáŋvbôn, niŋ hɛ̧ a ké tí ŋgá̧nzáʼa ɗambɛl, ka a sa ka ŋgboro a porofɛ́tri too í̧ŋásá̧, ɓá Mɛsí e tɔ́ʼɔsêe.

¹⁹Nǎŋnɔ́ í fere káwa a wǎyri, a í regí gel a Gáŋvbôn, ɓay a ké lú ɓéké a wǎyri.

²⁰Rá̧lǒo, Gáŋmbây ké hí̧ wǎyri nâm ɔʼɔ, a ké pé Zezú, Mɛsí a ké tí lú nɛ́ ɗambɛl, ɓay a wǎyri.

²¹Dáy a ŋgɛŋnɛ́, belɓá Zezú Kiris ké kaw nûnalê, ka̧ sêe ka Gáŋvbôn e mɔny hɛ̧ri̧ too tɛ̧́ hɛ̧ a fékéké, ɓá báŋké nɔ́ a ké tí ŋgá̧nzáʼa ɗambɛl ka a sa ka ŋgboro a porofɛ́t a mɛ̌ri̧.

²²Ɓayhí̧lé Mɔyíze sa ɓá: “Gáŋmbây, Gáŋvbôn a wǎyri e pé njuku mbêw, a ɓil nyîn a wǎyri ɓá porofɛ́t, ɓá báŋa a mǐ, i láɓay too, a ké e sa hí̧ wǎyri.

²³Dáy njuku too, ka zi lá nɛ́ nyáy, Gáŋvbôn e lú kuriri tɛ̧́ a ɓil a njuku a mɛ̌ri̧, kú e ziŋ hûl.”

²⁴Nǎŋnɔ́ porofɛ́tri too, ka tí saɓay, tí a tûl a Samuwɛl rá̧ njuku a ǎ̧wrí̧ ka gí a fɛlɛ tooy, saɓay a nâm nɛ́rí̧y.

²⁵Hí̧nzáʼa, ka Gáŋvbôn hí̧ ka ŋgboro a porofɛ́t a mɛ̌ri̧, ɓá ɓay a wǎyri, rá̧ ŋgá̧nzáʼa ka Gáŋvbôn ŋgá̧ kuu zîi a wǎyri ka a sa hí̧ Abaraham ɓá: “Mǐ e ɗí béla kɔ̧ tûl a njuku a tísiriri too, ka ŋgboro a gun ɓilóri.”

²⁶Nǎŋnɔ́, Gáŋvbôn tí pé njukupéna a mɛ̌ gí hí̧ wǎyri ɗambɛl, ɓay a ɗí béla kɔ̧ tûl a wǎyri, a fere káwa niŋ ɓékéhɛ̧ri̧ a wǎyri mbêw mbêw too a bazeŋ a wǎyri.»