Read Capanahua Péna a Apotereri 6 Bible Online

Péna a Apotereri 6 - Capanahua bible

Péna a Apotereri 6

¹A ɓil nâmké nɔ́, bon a njuku láɓulawri ŋgɛ̧́ gé ɓá mbɛl, dáy njuku láɓulaw ka Juyífri, ka sa ɓá nzáʼa girɛ́k, vúmûn a kuriri ziŋ Juyífri ka sa ɓá nzáʼa Hebiré, ɓá: Wûnysêeri[6] a kuriri, zi ziŋ lâʼa ɓá báŋké yá, sêe too a kú wal lâʼay.

²Nǎŋnɔ́, apotere bôo a sére nɔ́rí̧, mára̧ njuku láɓulawri too, dáy a sa hí̧ kuriri ɓá: «Zi belɓá rú pɔŋ tɔ́ʼɔɓay a Gáŋvbôn, ɓay a niŋ péna wal lâʼa yá.

³Ɓaykénɔ́, nyîn a manárí̧, i ten wɔ̧rɔ̧́njukuri zíndɔ̂ʼɔsáy a bazeŋ a wǎyri, ka ɓá njukuri ka bɔʼɔséna a kuriri belbélay, a kú mbá ka Têm Pukí, ka ɓá njuku a rɔ̧́nakéri, a rú ɓá kuriri niŋ nzáʼapénaké.

⁴A ɓurú lé, rú e kaw ɓá ɓil gɔ́ŋ Gáŋvbôn, rá̧ tɔ́ʼɔɓay a mɛ̌.»

⁵Njukuri too zibɔʼɔ ɓayké. Kú lú Etíyɛ́n, ka mbá ka láɓulaw rá̧ Têm Pukí, kuu Filíp, Porokɔr, Nikanɔ̂r, Timɔ̂ŋ, Parmɛnás rá̧ Nikolá, ka ɓá njuku a tísiri a Aŋtiyós, ka ɗambɛlké, ké e a ɓil mára̧ a Juyífri[7].

⁶Dáy, a kú ɓá kuriri gí mbɛl a apotereri, nǎŋnɔ́, kú gɔ́ŋ Gáŋvbôn ka ɓá ndɔ̂ʼɔ kɔ̧ tûl a kuriri.

⁷Ɓay a Gáŋvbôn, wal gé ɓá mbɛl, bon a njuku láɓulawri, ŋgɛ̧́ gé ɓá mbɛl ka tísiri a Zerúzalɛ̂m. Njuku nzáʼaká̧nari̧, ɓá a ŋgɛ̧́náké láɓulaw hí̧ Zezú.

⁸Etíyɛ́n mbá ka kpɔ́ŋa ka ŋgboro a béla law a Gáŋvbôn, ka niŋ hɛ̧ a yérkéri rá̧ gáŋ hɛ̧sáʼamari̧ a bazeŋ a njukuri.

⁹Njuku a há̧narí̧ tí manyɓay kuu Etíyɛ́n: Kú kaw ɓá njuku vûn mára̧ a Juyífri a kú ɗí ɓá: «Mára̧ a njukuri ka tɛ̧́ a ɓil koy.» Njuku a há̧narí̧ a ɓil mára̧ké, kaw ɓá Juyíf a tísiri a Sirɛnri̧, tísiri a Alekzaŋndiri Njuku a fékéri ɓá Juyíf a tísiri a Silisíri rá̧ tísiri a Azíri, kuriri too, kú tí manyɓay kuu Etíyɛ́n.

¹⁰Dáy, kú zi ma ndé Etíyɛ́n ka ɓay yá, ɓayhí̧lé, ké saɓay ka ŋgboro a rɔ̧́na ka Têm Pukí hí̧ nɛ́.

¹¹Ɓaykénɔ́, kú hí̧ lari hí̧ njukuri, ɓay a kú kúŋɓay ɓá: «Ɓurú lá nɛ́, saɓay a belyáké sé tûl a Mɔyíze rá̧ Gáŋvbôn!»

¹²Nǎŋnɔ́, pé kú uru hɛ́rɛ a njukuri, gáŋnjuku pûri rá̧ njuku tɔ́ʼɔ sáŋnari̧. Dáy, kú sé ziŋ Etíyɛ́n, a gé ŋgbá nɛ́, ka ɓá nɛ́ sé mbɛl a gáŋnjuku walɓayri.

¹³Kú ɓá njukuri gí, ɓá kú gí kúŋɓay a sa ɓá: «Njuku nɛ́ zi pɔŋ sa ɓéké ɓay, sé tûl vûn a Gáŋvbôn rá̧ sáŋna a Mɔyíze yá!

¹⁴Rú lá nɛ́ sa ɓá Zezú a Nazarɛ́t, e gbɛʼɛrɛ vûn a Gáŋvbôn, a fere péna niŋ a manárí̧ ka Mɔyíze tɔ́ʼɔ nárí̧.»

¹⁵Njukuri too, ka e a ɓil vûn walɓay, ɓá nûn a kuriri gé ɓá tûl a Etíyɛ́n, dáy a kú kó nûn nɛ́ ná ɓá báŋa nûn a aŋnze.