Read Capanahua Rɔmɛri̧ 12 Bible Online

Rɔmɛri̧ 12 - Capanahua bible

Rɔmɛri̧ 12

¹Nyîn nírí̧, mí sa hí̧ wǎyri, ka ŋgboro a béla a Gáŋvbôn ɓá: I mbí mûn a wǎyri, ɓá báŋa hɛ̧púna a ndísɛ̌ʼɛ, hɛ̧púna a táŋáké, ka rí Gáŋvbôn. Ɓá a nɔ́, pé ɓá ŋgboro ɗél Gáŋvbôn a béláké, ɓá báŋké a ké ziy.

²I zi ná ɓá mûn a wǎyri lé bɔʼɔséna a njuku a tísiriri, i pɔŋ Gáŋvbôn ké fere káwa a wǎyri, a ké hí̧ wǎyri hɛ̧túna a ŋgɛŋké. A goló, i tu wal ɓil hɛ̧ ka Gáŋvbôn ziy: Ɓá hɛ̧ ka bel, ɓá hɛ̧ ka ri nɛ́y rá̧ ɓá hɛ̧ a béláké.

³Ka ŋgboro béla ka Gáŋvbôn hí̧ míy, mi sa hí̧ wǎyri mbêw mbêw too ɓá: I zi ná kó mûn a wǎyri ka nɛ́rɛ̧ mambá. Belɓá a gé lé too, ké erú ka kɛrɛ a béláké, ka ŋgboro a láɓulaw ka Gáŋvbôn hí̧ nɛ́.

⁴Ɓayhí̧lé, ɓá báŋké nɔ́ ka ná erú ka lal mûn ɓórí ɓórí a ɓil mûn mbêw, ka lalké too erú ka péna niŋa a mɛ̌,

⁵ɓá mbêwké kɔ́, manárí̧ ka ná ŋgɛ̧́ nɛ́y, ná kaw ɓá mûn mbêw, a ɓil mára̧ mbêw kuu Kiris, nǎŋnɔ́ ná kaw too ɓá lal mûn a há̧narí̧ mbêw mbêw too.

⁶Gáŋvbôn, hí̧ nárí̧ ndɔ̂ʼɔ péna ɓórí ɓórí ɓǎŋ baa, ɓay a ná niŋ péna a mɛ̌. Dáy njuku mí ziŋ ndɔ̂ʼɔ péna saɓay ɓá báŋa a porofɛ́t lé, ké saɓayké, ka ŋgboro a láɓulaw.

⁷Ka njuku ka ziŋ ndɔ̂ʼɔ péna ɓay a niŋ pénay, ké ŋgbá péna mɛ̌ ka law mbêw. Ka njuku, ka ziŋ ndɔ̂ʼɔ péna ɓay a tɔ́ʼɔhɛ̧, ké kaw ɓil tɔ́ʼɔhɛ̧ a mɛ̌ ka law mbêw.

⁸Ka njuku, ka ziŋ ndɔ̂ʼɔ péna saɓay kpúmûn a njukuriy, ké niŋ pénáké. Ka njuku ka Gáŋvbôn hí̧ nɛ́ law hí̧ hɛ̧y, ké hí̧ táŋ kɛ̧́náké. Ka njuku ka ziŋ ndɔ̂ʼɔ péna tɔ́ʼɔ ŋgboro hí̧ njukuri, ké tɔ́ʼɔ ka ŋgɛ́rɛ a mɛ̌ too. Ka njuku ka ziŋ law hí̧ndɔ̂ʼɔ hí̧ njukusêeri, ké niŋ ka lawrína.

⁹Zína a wǎyri ké ná ɓá a táŋáké. Í fɔny ɓékéhɛ̧, a i ew kpú a ɓil niŋ béla.

¹⁰Í zi há̧narí̧ ka law mbêw, ɓá báŋa nyînrí̧ ka zi há̧narí̧. Í mbí mûn a wǎyri a ɓil hɛʼɛ há̧narí̧ a bazeŋ a wǎyri.

¹¹Í niŋ péna ka ŋgɛ́rɛ a wǎyri too, táŋ zɔɔ. Í niŋ pénáké hí̧ Gáŋmbây ka law wǎyri too.

¹²Í kaw ka mûnrína, ɓay tûl kɛrɛ a wǎyri, a í ikilaw a wǎyri a ɓil tɔ́ʼɔsêe, a í ew kpú a ɓil gɔ́ŋ Gáŋvbôn dát.

¹³Í hí̧ndɔ̂ʼɔ hí̧ nyîn a wǎyri, ka hɛ̧ mí mbá kuriri. A í nyá njukuri, ka gí gel a wǎyri ka lawrína.

¹⁴Í ɗí béla a Gáŋvbôn kɔ̧ tûl a njukuri ka ɓá wǎyri tɔ́ʼɔsêey. Í ɗí béla kɔ̧ tûl a kuriri, a í zi ná háhɛ̧ kɔ̧ tûl a kuriri.

¹⁵Í ri mûn a wǎyri kuu njukuri ka e a ɓil sáʼay, a í vú kuu njukuri ka e a ɓil vúna.

¹⁶Í erú ka kɛrɛ a mbêwké a bazeŋ a wǎyri. Í zi ná hɔ̧́ mûn a wǎyri. Í mbí mûn a wǎyri, ɓá báŋa njuku a tɛ̧́wké, a í zi ná kó ɓá i rɔ̧́ mambá.

¹⁷Í zi ná rerú a ɓéké hí̧ njuku ka niŋ ɓéké hí̧ wǎyri. Í ɛ́ ŋgboro niŋ béla dát a mbɛl a njukuri too.

¹⁸Ŋgboro mí erú dát hí̧ wǎyri, rá̧ mí ná ɓá a ɓil zína a wǎyri lé, i ɛ́ káwa a vónáké kuu njukuri too.

¹⁹Mbáŋa a mǐri̧, i ná káŋ mûn a wǎyri ka mûn a wǎyri, i pɔŋ hɛ́rɛ a Gáŋvbôn, ké niŋ péna a mɛ̌. Ɓá báŋké ka ɗé ka̧n ɓil Mbété ɓá: «Mǐ, pé ɓá njuku káŋ hɛ̧! Mǐ pé e rerú ka kpáʼandɔʼɔ péna a njuku mbêw mbêw too, hí̧ nɛ́y,» nǎŋ pé Gáŋmbây sáy.

²⁰Dáy ké resa kɔ́ ɓá: «Nzala, mí í njuku ŋgá̧na a mɔ̌ lé, mɔ́ hí̧ nɛ́ lâʼa. Kpɔʼɔmbii, mí sé nɛ́ lé, mɔ́ hí̧ nɛ́ mbii nzóna. Ɓayhí̧lé, a ɓil niŋ nǎŋnɔ́, e ná ɓá báŋa, mɔ́ kaw mára̧ hɛʼɛrɛ hɔrɛ a záŋáké kɔ̧ tûlé.»

²¹Mɔ́ zi ná pɔŋ ɓékéhɛ̧, ké ndé tûló. Belɓá mɔ́ ndé ɓékéhɛ̧ ka ŋgboro a niŋ béla.