Read Capanahua Rɔmɛri̧ 13 Bible Online

Rɔmɛri̧ 13 - Capanahua bible

Rɔmɛri̧ 13

¹Njuku too, kú lá nzáʼa hí̧ lásarari, a kú ɓá kuriri kaw. Ɓayhí̧lé, kpɔ́ŋa too gí ka gel a Gáŋvbôn, dáy kpɔ́ŋári̧ too ka erú, ɓá Gáŋvbôn pé ɓá ka̧n.

²Ɓaykénɔ́, pé njuku mí kpútûl kuu lásarari lé, ké kpútûl ziŋ hɛ̧ ka Gáŋvbôn mɔny. Dáy njukuri ka kpútûl kuu lásarari, e kɔʼɔ walɓay a Gáŋvbôn gí tûl a kuriri.

³Tí ɓá njukuri ka niŋ hɛ̧ béláké, pé ŋgú wɔ́w a njuku walɓayri yá, ɓá njukuri ka niŋ hɛ̧ a belyáké. Dáy, mɔ́ zi ŋgú wɔ́w a lásarari yá lé? Nǎŋnɔ́ lé, mɔ́ niŋ hɛ̧ a béláké dalé mɔ e ziŋ ɗéla a kuriri.

⁴Ɓayhí̧lé njuku walɓayri, ɓá njukupéna a Gáŋvbôn, ɓay tûl béla a mɔ̌. Dáy, mɔ̌ mí niŋ hɛ̧ a belyáké lé, mɔ́ ŋgú wɔ́w! Ɓayhí̧lé tí ɓá ɓǎŋ pé kú erú ka kpɔ́ŋa ɓay kú ɓá njukuri tɔ́ʼɔsêey yá, kú kaw ɓá njukupéna a Gáŋvbôn, ɓay a káŋ njuku rá̧ ɓay a tɔ́ʼɔ hɛ́rɛ a Gáŋvbôn kɔ́ tûl a njukuri, ka niŋ belyáy.

⁵Ɓaykénɔ́ pé belɓá, njuku ké lá nzáʼa a lásarari, tí ɓá ɓay a ŋgú hɛ́rɛ a Gáŋvbôn mbɛ́ŋ nyá, ɓá ɓay a tûl kɛrɛ a law a manárí̧.

⁶Ɓaykénɔ́ kɔ́, pé i pû lambôri. Ɓayhí̧lé lásarari too, ɓá njukupéna a Gáŋvbôn, ɓay a niŋ pénáké too ka ŋgboroké ɓá béláké.

⁷Í niŋ hí̧ njukuri too, hɛ̧ ka ɓá hɛ̧ niŋa hí̧ kuriri. Í pú lambô hí̧ njukuri ka i e pú lambô hí̧ kuriri, a lari tûl hɛ̧ sɔ́ʼɔri too, hí̧ njukuri ka i e hí̧ kuriri. Í tɔ́ʼɔ hɛʼɛ hɛ̧ hí̧ njukuri ka i e hɛʼɛ kuriri, a i hɔ̧́ njukuri, ka i e hɔ̧́ kuriri.

⁸Í zi ná e ka túna a njuku a há̧na mbêw ka tûl a wǎyri, mí tí ɓá zína a bazeŋ a wǎyri yáy. Ɓayhí̧lé, njuku ka zi mbɛ́ŋnɛ́, ké tɔ́ŋ sáŋna a Gáŋvbôn.

⁹Katína, nzáʼapéna a sáŋna sa ɓá: «Mɔ́ niŋ dala yá, mɔ́ í hûl yá, mɔ́ ríw yá, mɔ́ ɓá law ka̧n tûl hɛ̧ a njuku yá», rá̧ sáŋna a fékéri too mára̧ a ɓil sáŋna nɛ́ mbêw: «Mɔ zi mbɔ́ŋnɔ́, ɓá báŋké ka mɔ́ zi mûn nɔ́y!»

¹⁰Njuku ka erú ka zínay, zi niŋ ɓéké a há̧na mbêw hí̧ mbɛ́ŋnɛ́ nyá. Nǎŋnɔ́, zína ɓá niŋ hɛ̧ too ka nzáʼapéna a sáŋna vbíy.

¹¹E ka nɛ́rɛ̧ mambá, ɓay a i tu nâm ka i e a ɓilké a ŋgɛŋnɛ́y: nâm ka e a ɓilkéy, ɓá sɛl a sêe ka belɓá i toma ka nâm! Ɓayhí̧lé, sêe ka ná láɓulaw hí̧ Kiris, pɛ̧́na e ɓá ɗínáké ɓáy, dáy ŋgɛŋnɛ́, ké gí ɗɛ́ŋ kuu manárí̧ dá.

¹²Sû̧ŋ sé ɗí dá, zaa gelé gel ké táŋ, ná pɔŋ péna a belyákéri ka niŋ ɓá ɓil tirí̧may, a ná fa̧ hɛ̧bére a geltáŋari̧.

¹³Ná sé bɔʼɔséna a law mbêw ɓá báŋa bɔʼɔséna a ɓil geltáŋay. Ná koro tûl a manárí̧ ka sɔ̧́lâʼa táŋ ŋgboroké rá̧ távôn, niŋ dala rá̧ káwa táŋ ŋgboroké, ɛ́ ɓayri rá̧ káwa sɛ́rɛ.

¹⁴Dáy, í mbí Gáŋmbây Zezú Kiris, a í ri ka̧n mûn a wǎyri, ɓá báŋa gári, a í zi ná tɔ́ŋ ɓá kɛrɛ a hay mûn, ɓay a niŋ hɛ̧ a ké ziy.