Read Capanahua Rɔmɛri̧ 15 Bible Online

Rɔmɛri̧ 15 - Capanahua bible

Rɔmɛri̧ 15

¹Manárí̧ ka e ka ŋgɛ́rɛ a ɓil láɓulaw, belɓá ná mbí ka̧n law a manárí̧, káwa a njuku a ǎ̧yrí̧ ka zi tí ka ŋgɛ́rɛ yáy. Ná zi ná ɛ́ ɓá hɛ̧ ka ná ziy mbɛ́ŋ.

²Belɓá njuku too a bazeŋ a manárí̧, ké ɛ́ ŋgboro niŋ hɛ̧ ka e hí̧ sáʼa hí̧ mbɛ́ŋnɛ́, ɓay a kú ziŋ hɔ̧́ a ɓil láɓulaw.

³Katína lé, Kiris zi gí ɛ́ ɓá hɛ̧ a ké ziy yá, dáy ɓá báŋké ka ɗé ka̧n ɓil Mbétéy: «Fara a njukuri ka fara mɔ́y, refére kɔ̧ tûl ní.»

⁴Dáy hɛ̧ too, ka ɗé ka̧n ɓil Mbété ɗambɛl, ɗé ɓay a tɔ́ʼɔ nárí̧ ŋgboro rá̧ ka ŋgboro a ikilaw rá̧ kpúmûn a ké hí̧ nárí̧, ná ziŋ mbílaw.

⁵Gáŋvbôn ka hí̧ ikilaw rá̧ kpúmûn, ké hí̧ wǎyri káwa láhá̧na a bazeŋ a wǎyri, ka ŋgboro a tɔ́ŋ bɔʼɔséna a Zezú Kiris,

⁶rá̧lǒo, wǎyri too mbêw, a ɓil mára̧ kɔ́ŋ mbêw, i hí̧ hɔ̧́na hí̧ Gáŋvbôn, Bâa a Gáŋmbây a manárí̧ Zezú Kiris.

⁷I nyá há̧narí̧ ɓá báŋké ka Kiris nyá wǎyri, ɓay a hɔ̧́na a Gáŋvbôn.

⁸Katína, mi sa hí̧ wǎyri, Kiris tɛ̧́ njukupéna a Juyífri, ɓay a tɔ́ʼɔ law mbêw a Gáŋvbôn, sé tûl hí̧nzáʼa a mɛ̌, a ké hí̧ zîi a kuriri.

⁹Kiris gí kɔ́, ɓay a njukuri ka zi tí ɓá Juyífri yáy, ɓay a kú hí̧ hɔ̧́na hí̧ Gáŋvbôn, ɓay tûl a bélalaw a mɛ̌, ɓá báŋké ka ɗé ka̧n ɓil Mbété ɓá: «Ɓaykénɔ́, pé mi e ɗél mɔ́, a bazeŋ a nzáʼaɓay a fékéri, mi e ɗí si̧ŋ ɓay tûl hɔ̧́na a rɛŋɔ́.»

¹⁰Mbété sa ɓáy ɓá: «Nzáʼaɓayri too, i ri mûn a wǎyri, kuu njuku a Gáŋvbônri̧!»

¹¹Ké sa ɓáy ɓá: «I hɔ̧́ Gáŋmbây, wǎyri njuku nzáʼaɓay a fékéri too. I ɗél hɔ̧́na a mɛ̌, wǎyri too!»

¹²Porofɛ́t Ezayí kɔ́ sa ɓá: «Gun sɛl î̧n a Jesé a há̧na e gína, ké uru ɓay nyá mbây ka tûl a njuku a nzáʼaɓay a fékéri too, nǎŋnɔ́, kú e ɓá kɛrɛ a kuriri too, sé tûlé.»

¹³Gáŋvbôn, ka hí̧ mbílaw, ké ɓá sáʼa mbá law a wǎyri rá̧ a vónáké, ka ŋgboro a láɓulaw a wǎyri, ɓay i mbá a mbílaw, ka ŋgboro a kpɔ́ŋa a Têm Pukí.

¹⁴Nyîn nírí̧, mi tu ɓá i mbá ka law béla rá̧ hɛ̧túna too, i marú̧ ɓay a i hí̧ há̧narí̧ nzáʼa nzɛ́rɛ a bazeŋ a wǎyri.

¹⁵Dáy mi ɗé hí̧ wǎyri, a saɓay a fékéri ŋgɛ́rɛ mambá a ɓil mbété a gel a fékéri, ɓay a toʼoro wǎyri sé tûl hɛ̧ ka, i tí tuy dá. Mi ɗé nǎŋ, ɓay tûl béla a Gáŋvbôn ka hí̧ míy,

¹⁶ɓay a kaw ɓá njukupéna a Zezú Kiris, hí̧ njukuri ka zi tí ɓá Juyífri yáy. Ké ɓá mí kaw ɓórí ɓay a niŋ péna tɔ́ʼɔ Bélaɓay a Gáŋvbôn rá̧lǒo njukuri ka zi tí ɓá Juyífri yáy, kú tɛ̧́ hɛ̧púna a béláké ka ri Gáŋvbôn, ka ziŋ kaw ɓá táŋáké a ŋgboro a Têm Pukí.

¹⁷Nǎŋnɔ́, mi e ka ŋgboro ɗél mûn ní, a ɓil káwa mbêw kuu Zezú Kiris, ɓay hɛ̧ ka kó péna a Gáŋvbôn.

¹⁸Katína, mí zi tí ka ɓay sána nyá, mí zi tí ɓá hɛ̧ ka Kiris niŋ ka ŋgboro a mǐ, ɓay a ɓá njukuri, ka zi tí ɓá Juyífri yáy, a kú lá nzáʼa hí̧ Gáŋvbôn. Ké niŋ ka ŋgboro a ɓayri rá̧ pénari̧,

¹⁹ka ŋgboro a kpɔ́ŋa a hɛ̧sáʼamari̧ rá̧ hɛ̧ a yérkéri rá̧ ka ŋgboro a kpɔ́ŋa a Têm a Gáŋvbôn. Nǎŋnɔ́, pé mi ziŋ tɔ́ʼɔ Bélaɓay a Kiris lá gelri too, tí a Zerúzalɛ̂m, sé ka̧ tísiri a Ilirí.

²⁰Dáy mi tɔ́ʼɔ Bélaɓay a mi ɔ ɓá gel a kú pa̧n a tɔ́ʼɔ Bélaɓay a Kiris karú yá ɓáy, ɓayhí̧lé mi zi ɓá, mi sé zá vûn a mǐ ka̧n tûl ndálvûn a njuku a féké ka niŋ nyá.

²¹Nǎŋnɔ́, mi niŋ péna a mǐ, ɓá báŋké ka Mbété sa ɓá: «Njukuri, a kú tí saɓay a mɛ̌ hí̧ kuriri bɔʼɔ mbêw yáy, e kɔ́ nɛ́, rá̧ njukuri, ka zi láɓay a mɛ̌ bɔʼɔ mbêw yáy, e lánáké.»

²²Ɓá hɛ̧ nɔ́rí̧, pé ŋgá̧ ŋgboro hí̧ mí dát, ɓay a mi gé gel a wǎyri.

²³Dáy a ŋgɛŋnɛ́, mi ɔrɔ péna mǐ, a ɓil kaw a gelé dá. Mbimbɔ̂m ŋgɛ̧́ dá, ka mi zi ɓay a sé kó wǎyri,

²⁴dáy mi zi ɓá gelka mǐ, mí kaw sé Espany lé, mi tá lá gel a wǎyri. Ɓayhí̧lé, mi zi ɓay a kó wǎyri ka mǐ, mí kaw tánáy, a mi ziŋ hí̧ndɔ̂ʼɔ a wǎyri ɓay a sé pûké, a fal káwa nâm kpay kuu wǎyri.

²⁵Dáy a ŋgɛŋnɛ́, mi kaw sé Zerúzalɛ̂m, ɓay a niŋ péna hí̧ gun láɓulawri ka sá̧.

²⁶Ɓayhí̧lé gun láɓulawri ka e ka Maseduwa̧n rá̧ tísiri a Akayí, ŋgá̧nzáʼa, a mára̧ hɛ̧ri̧ hí̧ mí, ɓay a gun láɓulawri ka e a ɓil fóya ka Zerúzalɛ̂m.

²⁷Kú ŋgá̧nzáʼa a kuriri ka mûn a kuriri, katína lé, ná ɓá báŋa túna ka tûl a kuriri. Ɓayhí̧lé Juyífri ka láɓulaw, wal hɛ̧zíŋa a Têm Pukí a kuriri kuu njukuri ka zi tí ɓá Juyífri yáy, dáy belɓá njukuri ka zi tí ɓá Juyífri yáy, kú hí̧ hɛ̧ a ndɔ̂ʼɔ a kuriri, hí̧ Juyífri ka e ka Zerúzalɛ̂m.

²⁸Nǎŋnɔ́ mǐ, mi gé ɔrɔ pénáké, a mí ɔrɔ hí̧ hɛ̧kéri a kú mára̧ hí̧ kuriri dáy, mi e sé Espany, a tá lá gel a wǎyri.

²⁹Mi tu ɓá táŋáké, ka mi e gé gel a wǎyri, ɓá béla a Kiris ɓá ŋgɛ̧́náké, pé mi e gérúy.

³⁰Hɛ̧ ka mi vbí wǎyri, nyîn nírí̧, ka ŋgboro Gáŋmbây Zezú Kiris rá̧ ka ŋgboro a zína ka Têm Pukí: I rúbére kuu mǐ, a ɓil gɔ́ŋ Gáŋvbôn ɓay a mǐ.

³¹Ɓay a Gáŋvbôn ké koro mí a ɓil ndɔ̂ʼɔ a njukuri ka zi láɓulaw yá ka tísiri a Judé, rá̧ hí̧ndɔ̂ʼɔ nɛ́ ka mi hol ɓay a sé Zerúzalêm, njuku láɓulawri kú gé nyá ka lawrína.

³²Nǎŋnɔ́, mi e gé ka̧ gel a wǎyri a law sáʼa ka Gáŋvbôn mi zibɔʼɔkéy, a gé kaw kuu wǎyri kpay, ɓay a ɔʼɔ mûn ní rá̧ a tá.

³³Gáŋvbôn a vónáké, ké kaw kuu wǎyri too! Amɛn!