Read Capanahua Rɔmɛri̧ 16 Bible Online

Rɔmɛri̧ 16 - Capanahua bible

Rɔmɛri̧ 16

¹Mi pé Foyebe, mánǎa a manárí̧ hí̧ wǎyri, ka kaw ɓá wûnypéna a ɓil Egilize a Saŋkeré.

²I nyá nɛ́ ka rɛŋ a Gáŋmbây ɓá báŋké ka ma niŋa a bazeŋ a gun a láɓulawri. A i hí̧ nɛ́ hɛ̧ a ndɔ̂ʼɔ a wǎyri, a ɓil hɛ̧ too ka mbá nɛ́, a ké zi ɓayké a gel a wǎyri. Ɓayhí̧lé, mɛ̌ ka mûn nɛ́, ké hí̧ndɔ̂ʼɔ hí̧ njukuri mambá, a hí̧ ndɔ̂ʼɔ hí̧ mǐ ka mûn ní kɔ́.

³I nam Pirisîl rá̧ Akilás, mbáŋa péna a mǐri̧, a ɓil péna a Gáŋmbây Zezú Kiris.

⁴Kú ɓá mûn a kuriri vbú hûl, ɓay a kú pɛ̧́ mǐ. Tí ɓá mǐ hɛʼɛ ní pé zi awá hí̧ kuriri yá, Egilize a njukuri ka zi tí ɓá Juyífri yáy too, zi awá hí̧ kuriri.

⁵I nam Egilize ka mára̧ a ɓil vûn a kuriri kɔ́. I nam, mbáŋa mǐ Epayinete, ké kaw ɓá titíla njuku ka láɓulaw hí̧ Kiris ka tísiri a Azí.

⁶I nam Marí, ka niŋ péna mambá, ɓay a wǎyriy.

⁷I nam Aŋndoronikús rá̧ Juniyás, kú kaw ɓá î̧n a mǐri̧, rú ná vûn sɛl mbêw. Kú ɓá njukuri a kú hɛʼɛ kuriri mambá a bazeŋ a apotereri, kú tí láɓulaw hí̧ Kiris ɗambɛl hí̧ mí.

⁸I nam Ampiliyátús, ka mi zi mambá ka ŋgboro a Gáŋmbây.

⁹I nam Irbêŋ, mbáŋa péna a mǐ, a ɓil péna a Kiris rá̧ Estakís mbáŋa mǐ.

¹⁰I nam Apelɛ́s, ka tɔ́ʼɔ péna láɓulaw a mɛ̌ hí̧ Kiris. I nam njuku a vûn a Aristobulri.

¹¹I nam ɛrodiyɔ̂ŋ, î̧n a mǐ. I nam njuku vûn a Narsísri, ka láɓulaw hí̧ Gáŋmbây.

¹²I nam Tirifɛn rá̧ Tirifos, ka niŋ péna a Gáŋmbây, kuu pɛrside ka mi zi mambáy, mɛ̌ kɔ́, ké niŋ péna a Gáŋmbây mambá.

¹³I nam Rufús, njuku péna, ka Gáŋmbây ten rá̧ mâa a mɛ̌, ka kaw ɓá báŋa mâa a mǐ kɔ́y.

¹⁴I nam Asiŋkirite, Fegɔŋ, Hɛrmɛ́s, patorobás, Hɛrmás rá̧ nyîn nírí̧ too, ka e kuu kuriri.

¹⁵I nam Filologe rá̧ Juli, Néré rá̧ mánǎa a mɛ̌. I nam Olimpas rá̧ gun láɓulawri too, ka e kuu kuriri.

¹⁶I nam a i sí̧ŋ há̧narí̧ mbêw mbêw ɓá báŋa nyînrí̧, ka rɛŋ a Zezú Kiris. Egilize a Kirisri too, nam wǎyri.

¹⁷Nyîn nírí̧, mi kaw sáy hí̧ wǎyri, i koro tûl a wǎyri ɓá béláké, kuu njukuri, ka ɓá ɗéma ka̧n bazeŋ a njukuri, ka a niŋ gun láɓulawri ɓɔ́l ŋgboro, a ɓil many hɛ̧tɔ́ʼɔ ka i ziŋ. I ɗí kuu kuriri,

¹⁸ɓayhí̧lé, mára̧ njuku nɔ́rí̧, zi niŋ péna hí̧ Kiris Gáŋmbây a manárí̧ nyá, kú niŋ péna ɓá ɓay a ɓil a kuriri! Kú rɔ́ʼɔ njukuri ka zi tuhɛ̧ nyáy, ka ŋgboro a béla ɓay a kuriri rá̧ nzáʼa pá̧na a kuriri.

¹⁹Dáy a wǎyri, njukuri too, tu lá nzáʼa a wǎyri hí̧ Gáŋmbây. Mí ri mûn ní ɓay tûl a wǎyri, dáy mi zi ɓá, i mbá ka rɔ̧́na, ɓay a niŋ hɛ̧ a béláké, rá̧ ka káwa a táŋáké, ɓay a í zi ná niŋ hɛ̧ a belyáké.

²⁰Gáŋvbôn a vónáké, zaa gelé ké e ndɛʼɛrɛ Sata̧n ka̧n ɓil bɔʼɔ a wǎyri. Béla a Gáŋmbây a manárí̧ Zezú, ké kaw kuu wǎyri!

²¹Timoté, mbáŋa péna a mǐ, nam wǎyri, nǎŋnɔ́ kɔ́ Lisiyús, Zasóŋ rá̧ Sozipatɛ́r, î̧n a mǐri̧, nam wǎyri kɔ́.

²²Mi nam wǎyri ka rɛŋ a Gáŋmbây, mǐ Tɛrtiyus, ka ɗé mbété nɛ́.

²³Gayus, ka nyá mǐ ná gé lé, nam wǎyri. Ɓá a ɓil vûn a mɛ̌, pé Egilize too mára̧y. Eráste, njuku ŋgbá lari a pû kɔ́, nam wǎyri rá̧ Kartús, nyîn a manárí̧. [

²⁴Béla a Gáŋmbây a manárí̧ Zezú Kiris, ké kaw kuu wǎyri too! Amɛn!]

²⁵Ná hí̧ hɔ̧́na hí̧ Gáŋvbôn, ɓayhí̧lé mɛ̌, pé e kpúmûn a wǎyri a ɓil láɓulaw, ka ŋgboro a Bélaɓay ka mi tɔ́ʼɔ, tɔ́ʼɔɓay a Zezú Kiris, ka ŋgboro a ten táŋa a hɛ̧ a múnáké a Gáŋvbôn, a ké koro ɓá múnáké í̧ŋásá̧y mbii ka mbii,

²⁶dáy a ŋgɛŋnɛ́, táŋáké tɛ̧́ ka̧n kála hí̧ njukuri too ka ŋgboro a mbété a porofɛ́tri ka ɗéy, ɓá báŋké ka Gáŋvbôn a wɔmké hí̧nzáʼa, rá̧lǒo njuku a tísiriri too, kú láɓulaw hí̧ nɛ́ a lá nɛ́.

²⁷Hɔ̧́na ké hí̧ Gáŋvbôn, mɛ̌ hɛʼɛ ka kaw ɓá rɔ̧́na mbii ka mbii, ka ŋgboro a Zezú Kiris! Amɛn!