Read Capanahua Rɔmɛri̧ 2 Bible Online

Rɔmɛri̧ 2 - Capanahua bible

Rɔmɛri̧ 2

¹Mɔ̌, mɔ́ ɓá gé, mɔ̌ ka walɓay kɔ̧ tûl a njuku a ǎ̧wrí̧, Gáŋvbôn tí pɔŋ mɔ́ nyá. Ɓayhí̧lé, gelka mɔ́ walɓay kɔ̧ tûl a njuku a ǎ̧wrí̧, ka a niŋ hɛ̧ ɓá báŋa kuriri kɔ́y, mɔ́ walɓay ŋgá̧ mûn nɔ́ ka mûn nɔ́.

²Ɓayhí̧lé ná tu ɓá, Gáŋvbôn walɓay kɔ̧ tûl a njukuri ka niŋ mára̧ péna nǎŋnɔ́y ka ŋgboro a gbátɓay.

³Dáy, mɔ kɛrɛ ɓá, mɔ e tɛ̧́ a ɓil walɓay a Gáŋvbôn, mɔ̌ ka walɓay kɔ̧ tûl a njuku a ǎ̧wrí̧, sé tûl péna ka mɔ̌ ka mûn nɔ́, mɔ kaw niŋáké kɔ́y lé?

⁴Malé, mɔ kaw yáw gáŋ béla a Gáŋvbôn, ikilaw a mɛ̌ rá̧ lawbéla a mɛ̌ lé? A zi tu ɓá béla a Gáŋvbôn, zi ɓá mɔ fere bɔʼɔséna a mɔ̌ nyá lé?

⁵Dáy mɔ zi ɓay a lánáké yá, a zi fere bɔʼɔséna a mɔ̌ nyá. Ɓaykénɔ́, mɔ kaw ɗí gáŋ hɛ́rɛ gí tûló, a nâm ka Gáŋvbôn e tɔ́ʼɔ hɛ́rɛ a mɛ̌ rá̧ walɓay a ndáráké a mɛ̌.

⁶Sêeké nɔ́, Gáŋvbôn e walɓay hí̧ njuku mbêw mbêw too, sé tûl péna niŋa a mɛ̌.

⁷Ké e hí̧ ndísɛ̌ʼɛ ka tí ɔna nyá, hí̧ njukuri ka mbí mûn a kuriri, ka a niŋ béla dát, ka ɛ́ hɔ̧́na, ɗéla rá̧ ndísɛ̌ʼɛ ka ma hûl yáy.

⁸Dáy, ké e tɔ́ʼɔ hɛ́rɛ rá̧ haŋfá̧na a mɛ̌, hí̧ njuku kpútûl kuu mɛ̌ri̧ rá̧ njukuri ka kaw ɓá njuku ŋgá̧na a gbátɓay, ka a tɔ́ŋ ɓéké.

⁹Tɔ́ʼɔsêe rá̧ wɔ́w e ŋgbá njukuri too ka niŋ ɓéké, Juyífri tí ɗambɛl rá̧ njukuri ka zi tí ɓá Juyífri yáy, tɔ́ŋ rú̧.

¹⁰Dáy, njukuri too ka niŋ bélay, ké e hí̧ kuriri hɔ̧́na, ɗéla rá̧ a vónáké, hí̧ Juyífri tí ɗambɛl rá̧ njukuri ka zi tí ɓá Juyífri yáy, tɔ́ŋ rú̧.

¹¹Ɓayhí̧lé, a mbɛl a Gáŋvbôn, njuku too mambɛ̧́nɛ́.

¹²Njukuri too ka niŋ ɓéké táŋ tu sáŋna a Mɔyíze, e ziŋ hûl táŋ sáŋna, a njukuri too, ka niŋ ɓéké a ɓil tu sáŋnay, kú e walɓay kɔ̧ tûl a kuriri ka ŋgboro sáŋnaké.

¹³Ɓayhí̧lé, njuku a ndárákéri a mbɛl a Gáŋvbôn zi tí ɓá njukuri ka kaw ɓá láɓay a sáŋna mbɛ́ŋ nyá, ɓá njukuri ka ŋgbá ɓayké ka a niŋ pénáké, pé kaw ɓá njuku a ndárákéri.

¹⁴Gelka njukuri ka zi tí ɓá Juyífri yáy, ka zi tí ka sáŋna nyá, niŋ hɛ̧ ka sáŋna vbíy, kú tɔ́ʼɔ ɓá kuriri ka zi tí ka sáŋna nyáy, kú kaw ɓá sáŋna a mûn a kuriri.

¹⁵Nǎŋnɔ́, kú tɔ́ʼɔ ɓá, péna a sáŋna ɗé ka̧n ɓil law a kuriri. Law a kuriri kɔ́, kaw sa hí̧ kuriri nǎŋ, nǎŋnɔ́ kɛrɛ a kuriri sêe a há̧na lé, kaw reɓay ka̧n nzáʼa a kuriri, sêe a féké lé, kaw nyá tûl a kuriri.

¹⁶A nɔ́ ɓá hɛ̧ ka e ka̧na, a sêe ka Gáŋvbôn e walɓay ka ŋgboro a Zezú Kiris, kɔ̧ tûl hɛ̧ a múnáké too a ɓil káwa a njukuri, ɓá báŋké ka Bélaɓay ka mi tɔ́ʼɔ hí̧ wǎyri say.

¹⁷Dáy a mɔ̌, mɔ mbí rɛŋ a Juyíf ka̧n tûló, a mbí sáŋna a Mɔyíze ka̧n tûló, a ri mûn nɔ́, ɓay tûl a Gáŋvbôn a mɔ̌,

¹⁸mɔ́ tu hɛ̧ ka Gáŋvbôn zi rá̧ hɛ̧ ka sáŋna tɔ́ʼɔ hí̧ mɔ́, ɓá mɔ́ mbí hɛ̧ a béláké.

¹⁹Mɔ̌, ka mbí mûn nɔ́, ɓá njuku tɔ́ʼɔ ŋgboro hí̧ râ̧wri̧, geltáŋa a njukuri ka e ɓil tirí̧may,

²⁰ka mbí mûn nɔ́ ɓá njuku tɔ́ʼɔhɛ̧ hí̧ njukuri ka zi tuhɛ̧ nyáy, mɔ̌, bákáwa a gun a léléri, ɓayhí̧lé mɔ́ tu ɓá táŋáké ɓá a ɓil sáŋna, béla a hɛ̧túna rá̧ gbátɓay erú.

²¹Nǎŋnɔ́ dáy, mɔ̌, ka tɔ́ʼɔhɛ̧ hí̧ njuku a ǎ̧wrí̧, ɓayhí̧rá̧ mɔ zi tɔ́ʼɔ mûn nɔ́ hɛ̧ nyáy lé? Mɔ tɔ́ʼɔ ɓá njuku ké ríw yá, dáy a ríw!

²²Mɔ̌, ka de ɓá njuku ké niŋ dala yá, a niŋ dala! Mɔ̌, ka fɔny ŋgálá, ɓayhí̧rá̧ mɔ́ sé ríw hɛ̧ri̧ a ɓil vûn ŋgáláké lé?

²³Mɔ erú ka mûnrína, ɓay ka mɔ erú ka sáŋna, dáy, a zi hɛʼɛ Gáŋvbôn ka ŋgboro a niŋ hɛ̧ ka sáŋnaké vbíy yá.

²⁴Katína, ɓá báŋké ka ɗé ka̧n ɓil Mbété ɓá: «Ɓay tûl a wǎyri, pé njukuri ka zi tí ɓá Juyífri yáy, fára Gáŋvbôn.»

²⁵Katína, mɔ̌ mí niŋ hɛ̧ ka sáŋna ziy, ndá ganzá a mɔ̌ erú ka nɛ́rɛ̧. Dáy, mɔ̌ mí zi niŋ hɛ̧ ka sáŋna ziy nyáy, tɔ́ʼɔ ɓá mɔ zi ndá ganzá bɔʼɔ mbêw yá.

²⁶Dáy, njuku ka zi ndá ganzá yá, mí tɔ́ŋ hɛ̧ ka sáŋna ziy, Gáŋvbôn, tí kó nɛ́ ɓá báŋa njuku ka ndá ganzá yáy lé?

²⁷Njuku ka zi ndá ganzá a ɓil hay mûn nɛ́ nyáy, ka a tɔ́ŋ hɛ̧ ka sáŋna ziy, e walɓay kɔ̧ tûló, mɔ̌ ka zi tɔ́ŋ sáŋna nyá, ka erú ka sáŋna ɗénáké, ka a ndá ganzáy!

²⁸Katína lé, gbát Juyíf zi tí ɓá njuku a kú kó nɛ́, ka e ka pélé nɔʼɔ ganzá ka mûn nɛ́ nyá.

²⁹Gbát a Juyíf, ɓá ɓil law a njuku, ɓá njuku ka ziŋ ndá ganzá a ɓil lawɛ́, ka ŋgboro a Têm a Gáŋvbôn, a tí ɓá ka ŋgboro a sáŋna a kú ɗé yá. Gbát a Juyífké, zi ziŋ ɗéla a mɛ̌ ka gel a njukuri yá, ɗéla a mɛ̌ gí ka gel a Gáŋvbôn.