Read Capanahua Rɔmɛri̧ 3 Bible Online

Rɔmɛri̧ 3 - Capanahua bible

Rɔmɛri̧ 3

¹A̧hí̧ ɓá nɛ́rɛ̧ kaw ɓá Juyíf lé? Malé nɛ́rɛ̧ ndá ganzá ɓayhí̧ lé?

²Katína, nɛ́rɛ̧ké erú ɓá hɔ̧́náké a ɓilké nɔ́ too. A títáʼaké, ɓá Juyífri pé Gáŋvbôn hí̧nzáʼa hí̧ kuriri.

³Katína, njuku a há̧narí̧ a bazeŋ a kuriri mí zi láɓulaw yá, a̧hí̧ láɓulaw yá a kuriri e de law mbêw a Gáŋvbôn lé?

⁴Ma niŋa nyá! Belɓá ná tu ɓá Gáŋvbôn sa gbátɓay, dáy njukuri kaw ɓá njuku kúŋɓayri, ɓá báŋké ka ɗé ka̧n ɓil Mbété ɓá: «Belɓá kú tu mɔ́, ɓá njuku a ndáráké a ɓil ɓay sána a mɔ̌, a mɔ́ ziŋ ndéna, a kú mí ɓá mɔ ew mbɛl walɓay.»

⁵Dáy, ɓéké ka ná niŋ, mí tɔ́ʼɔ káwa a ndáráké a Gáŋvbôn gé ɓá mbɛl, ná e sa ɓá hí̧ lé? Gáŋvbôn zi tí ɓá njuku a ndáráké yá, a ké mí vbá̧ manárí̧ a ɓil hɛ́rɛ a mɛ̌ lé? (Mi sa ɓá báŋa sána a njukuri.)

⁶Tí nǎŋnɔ́ nyá! Ɓayhí̧lé Gáŋvbôn mí zi tí ɓá njuku a ndáráké yáy, a̧ní rá̧, ké e walɓay kɔ̧ tûl a njuku a tísiriri lé?

⁷Dáy, kúŋɓay a mǐ, mí tɔ́ʼɔ gbátɓay a Gáŋvbôn ɓá táŋáké, a tɔ́ʼɔ hɔ̧́na a mɛ̌y, ɓayhí̧rá̧, njukuri e walɓay kɔ̧ tûl ní ɓá mi kaw ɓá ɓéké njuku lé?

⁸Mí ɓá nǎŋ, ɓayhí̧rá̧ ná zi sa ɓá: «Ná niŋ ɓéké, ɓay a ná ziŋ béla yáy lé»? Njuku a fékéri ɓay a ɓew ɓay a mǐ, sa ɓá, mǐ pé saɓay nɔ́rí̧. Njuku nɔ́rí̧, Gáŋvbôn e walɓay ŋgbá kuriri, ɓayhí̧lé kú marú̧.

⁹Mí ɓá nǎŋ, manárí̧ Juyífri, ná ndé njuku a fékéri ka a̧hí̧ lé? Tí yá! Mi tí tɔ́ʼɔ ɓá Juyífri rá̧ njukuri ka zi tí ɓá Juyífri yáy too, e ka bɔʼɔ kpɔ́ŋa a ɓékéhɛ̧.

¹⁰Ná kɛ̧́ a ɓil Mbété ɓá: «Njuku a ndáráké zi tí yá, tí mbêw yá!

¹¹Njuku ka tuhɛ̧ mbêw zi tí yá, njuku ɛ́ Gáŋvbôn mbêw zi tí yá!

¹²Kuriri too, kú pɔŋ tɔ́ŋ ŋgboro a béláké, a ɓɔ́l ŋgboro kuriri too. Njuku niŋ hɛ̧ a béláké zi tí yá, tí mbêw yá!

¹³Ŋgboro kɔ́ŋ a kuriri, ɛ́ŋ ɓá lɔ̂ʼɔpâl a ŋgbúráké. Ndísɛl a kuriri sa ɓá ɓay rɔ́ʼɔ njukuri. Nzáʼa a kuriri tɛ̧́ ɓá pɔ̂m sôy.

¹⁴Nzáʼa a kuriri mbá ɓá ɓékéɓayri rá̧ ɓay sélaw.

¹⁵Bɔʼɔ kuriri ga, a í hûl.

¹⁶Hɛ̧ɓewa rá̧ ɓékéhɛ̧ri̧ too, e ka gel too a kú tá rúy,

¹⁷Kú zi tu ŋgboro a vónáké bɔʼɔ mbêw yá.

¹⁸Wɔ́w a Gáŋvbôn zi tí law a kuriri bɔʼɔ mbêw yá.»

¹⁹Dáy ná tu ɓá, hɛ̧ too ka sáŋna sáy, ké sa hí̧ njukuri ka tɔ́ŋ sáŋna rá̧ nzáʼa njukuri too ké tu, a njuku a tísiri too, kú tu ɓá kú kaw ɓá ɓéké njuku a mbɛl a Gáŋvbôn.

²⁰Ɓayhí̧lé, njuku a há̧na mbêw ka e kaw ɓá njuku a ndáráké a mbɛl a Gáŋvbôn, ka ŋgboro a tɔ́ŋ sáŋna zi tí yá. Ɓayhí̧lé, sáŋna hí̧ nárí̧ ɓá ŋgboro tu ɓékéhɛ̧ ɓǎŋ.

²¹Dáy a ŋgɛŋnɛ́, Gáŋvbôn tɔ́ʼɔ nárí̧ ŋgboro a ké ɓá nárí̧ tɛ̧́ njuku a ndárákéri a mbɛlɛ́, táŋ sáŋna. Mbété a sáŋnari̧ rá̧ Mbété a porofɛ́tri tí saɓayké kɔ́:

²²Gáŋvbôn, ɓá njukuri tɛ̧́ njuku a ndárákéri a mbɛlɛ́, ka ŋgboro a láɓulaw hí̧ Zezú Kiris, ké niŋ nǎŋ hí̧ njukuri too ka láɓulaw hí̧ Kiris. Ɓayhí̧lé, Gáŋvbôn kó njukuri too mambɛ̧́nɛ́ ka nûn nɛ́.

²³Njukuri too niŋ ɓéké, nǎŋnɔ́ Gáŋvbôn de kuriri kó hɔ̧́na a mɛ̌.

²⁴Dáy Gáŋvbôn, a ɓil lawbéla mɛ̌, ɓá kuriri tɛ̧́ njuku a ndárákéri baa, ka ŋgboro a Zezú Kiris ka ten kuriri a ɓil ɓékéhɛ̧.

²⁵Ɓá mɛ̌ Zezú pé Gáŋvbôn mbí nɛ́, a hí̧ ɓá hɛ̧púna rá̧lǒo ka ŋgboro a hûl a mɛ̌, ké ziŋ vbá̧buma a ɓékéhɛ̧ a njukuri ka láɓulaw hí̧ nɛ́y. Nǎŋnɔ́ pé Gáŋvbôn tɔ́ʼɔ nárí̧ káwa a ndáráké a mɛ̌, ɓayhí̧lé ké zi niŋ ɓéké ziŋ njukuri ka niŋ ɓéké ɗambɛl, a ɓil nâm ikilaw a mɛ̌ nyá.

²⁶Dáy a ŋgɛŋnɛ́, Gáŋvbôn tɔ́ʼɔ nárí̧ káwa a ndáráké a mɛ̌, a kó njukuri ɓá ndáráké a mbɛlɛ́ ka ŋgboro a láɓulaw hí̧ Zezú.

²⁷Dáy, ŋgboro erú ɓáy, ɓay a njuku ké si kɔ́ŋɛ́ lé? Ŋgboro zi tí yá! Ɓayhí̧lé hɛ̧ ka Gáŋvbôn ziy, zi tí ɓá tɔ́ŋ sáŋna nyá, ɓá láɓulaw mbêw yáŋ.

²⁸Ɓayhí̧lé, ná tu ɓá njuku ziŋ káwa a ndáráké a mbɛl a Gáŋvbôn, ka ŋgboro a láɓulaw a mɛ̌, a tí ɓá ka ŋgboro a tɔ́ŋ hɛ̧ ka sáŋna vbí yá.

²⁹Malé, Gáŋvbôn, kaw ɓá Gáŋvbôn a Juyífri mbêw yáŋ, a tí ɓá Gáŋvbôn a njuku a fékéri yá lé? Katína, ké kaw ɓá Gáŋvbôn a njuku a fékéri kɔ́,

³⁰ɓayhí̧lé Gáŋvbôn, ɓá mbêw yáŋ. Ɓá mɛ̌ pé e ɓá Juyífri kaw ɓá ndáráké a mbɛlɛ́, ka ŋgboro a láɓulaw rá̧ njukuri ka zi tí ɓá Juyífri yáy kɔ́, kaw ɓá ndáráké a mbɛlɛ́, ka ŋgboro a láɓulaw.

³¹Dáy, zi ɓay a sa ɓá, ka ŋgboro a láɓulaw, ná lú nɛ́rɛ̧ a sáŋna gefal lé? Háy, ná zi lú yá, ná hí̧ sáŋna gbát nɛ́rɛ̧ a mɛ̌ too.