Read Capanahua Rɔmɛri̧ 7 Bible Online

Rɔmɛri̧ 7 - Capanahua bible

Rɔmɛri̧ 7

¹Nyîn nírí̧, i zi tu ɓá, mi kaw saɓay hí̧ wǎyri, wǎyri njukuri ka tu sáŋnay nyá lé? Ɓá kpɔ́ŋa a Sáŋna e ka tûl a njuku dát, a ké mí kaw ka nûn nyá lé?

²Ɓá báŋké kɔ́, wûnynjuku ka nyá wɔ̧rɔ̧́, sáŋna ŋgá̧ nɛ́ kuu wɔ̧rɔ̧́ a mɛ̌, nâm too ka wɔ̧rɔ̧́ a mɛ̌ kaw ka nûn ɓáy. Dáy, nâm ka wɔ̧rɔ̧́ a mɛ̌ mí ziŋ hûl dáy, sáŋna ka ŋgá̧ nɛ́ kuu wɔ̧rɔ̧́ a mɛ̌, sɛl dá.

³Zi ɓay a sa ɓá, ka wɔ̧rɔ̧́ a mɛ̌ pa̧n ka nûn ɓáy, ké tɛ̧́ rá̧ a nyá wɔ̧rɔ̧́ a féké lé, ké niŋ dala. Dáy, wɔ̧rɔ̧́ a mɛ̌, mí ziŋ hûl, sáŋna ka ŋgá̧ nɛ́ kuu wɔ̧rɔ̧́ a mɛ̌ zi tí ka tûlé mbaa, ké mí zi nyá wɔ̧rɔ̧́ a féké, ké nyá, a goló ké zi niŋ dala yá.

⁴Ná ɓá mbêwké hí̧ wǎyri kɔ́ nyîn nírí̧, i ziŋ hûl a ɓil mára̧ a wǎyri mbêw kuu mûn a Kiris ka tûl dii vbatay, ɓay hɛ̧ ka kó sáŋnay, ɓay i kaw a ŋgɛŋnɛ́ ɓá ɓala a njuku a féké, zi ɓay a sa ɓá, njuku ka uru ka hûl, Zezú Kiris, rá̧ ná ma niŋ péna a béláké ka ri Gáŋvbôn.

⁵Ɓayhí̧lé, gelka ná kaw ka ŋgboro a hay mûn ɓáy, zi hɛ̧ a belyáké ka sáŋna ɓá ka̧n law a manárí̧, kaw niŋ péna a ɓil mûn a manárí̧, ɓay a hí̧ léna, ka ɓá nárí̧ sé hûl.

⁶Dáy, ná ziŋ tɛ̧́na a ɓil sáŋna dá, ɓayhí̧lé ná ziŋ hûl ɓay tûl a sáŋna nɔ́ ka ŋgbá nárí̧ ɓá koyri dá. Ŋgɛŋnɛ́ ná ziŋ ŋgboro a ŋgɛŋké ɓay a niŋ péna hí̧ Gáŋvbôn, ka bɔʼɔ kpɔ́ŋa a Têm Pukí, a tí ɓá, ka bɔʼɔ kpɔ́ŋa a sáŋna a ɗénáké mbaa.

⁷A̧hí̧ ná e sanáké lé? Ɓá sáŋna ɓá ɓéké lé? Bɔʼɔ mbêw yá! Ka ŋgboro a sáŋna, pé mi tu ɓéké. Ɓayhí̧lé, mi zi tu ɓá, ɓá law ka̧n tûl hɛ̧, zi belyá, ka sáŋna mí zi sa ɓá: «Mɔ́ zi ná ɓá law ka̧n tûl hɛ̧ nyáy!»

⁸Nǎŋnɔ́, ɓéké ziŋ ŋgboro ka sáŋna hí̧ nɛ́y, ɓay a ké ɓá ka̧n law ní, ŋgboro ɓá law ka̧n tûl hɛ̧ too. Ɓayhí̧lé, sáŋna mí zi tí yáy, ɓéké ɓá hɛ̧ ka hú dáy.

⁹Í̧ŋásá̧, ka sáŋna zi tí yá ɓáy, mi kaw ka ndísɛ̌ʼɛ. Dáy gelka sáŋna gíy, ɓéké retoma ka hûl,

¹⁰mǐ, mi rezíŋ hûl. Nǎŋnɔ́ a kó ná mǐ, sáŋna ka e ɓá njuku sé káwa a ndísɛ̌ʼɛ, reɓá njuku sé hûl.

¹¹Ɓayhí̧lé, ɓéké ziŋ ŋgboro a rɔ́ʼɔ mí, ka ŋgboro a sáŋna, dáy ka ŋgboro a sáŋnaké, ké hí̧ mí hûl.

¹²Nǎŋnɔ́ sáŋna ɓá hɛ̧ a táŋáké, nzáʼapéna too ɓá táŋáké, ndáráké, a belbéla.

¹³Dáy, hɛ̧ ka belbélay, retɛ̧ hɛ̧ ka e hí̧ hûl hí̧ mí lé? Bɔʼɔ mbêw yá! Ɓá ɓéké, ɓay a ké tɔ́ʼɔ káwa ɓéké a mɛ̌, pé a hí̧ mí hûl ka ŋgboro a hɛ̧ a béláké. Nǎŋnɔ́, ka ŋgboro a nzáʼapéna, ɓéké tɔ́ʼɔ mûn nɛ́ a ɓil ŋgɛ́rɛ ɓéké a mɛ̌ too.

¹⁴Katína, ná tu ɓá sáŋna gí ka ŋgboro a Têm Pukí, dáy mǐ, mi kaw ɓá njuku ka e a ɓil hay mûn, a kú zé ɓá koy hí̧ ɓéké.

¹⁵Mi zi tu hɛ̧ ka mi kaw niŋáké yá. Ɓayhí̧lé, mi zi niŋ hɛ̧ ka mi zi ɓay a niŋáké yá, mi niŋ ɓá hɛ̧ ka mi zi yáy.

¹⁶Dáy mǐ, mí niŋ ɓá hɛ̧ ka mi zi yáy, mi tu a goló ɓá sáŋna ɓá béla hɛ̧.

¹⁷Dáy, tɔ́ʼɔ ɓá tí ɓá mǐ, pé niŋ nǎŋ nyá, ɓá ɓéké, ka e ka mûn ní.

¹⁸Ɓayhí̧lé, mi tu ɓá bélahɛ̧ zi kaw gí ní nyá, zi ɓay sa ɓá, a ɓil hay mûn ní. Katína, mi e ka zína niŋ bélahɛ̧, dáy ŋgɛ́rɛ niŋáké zi tí hí̧ mí nyá.

¹⁹Ɓayhí̧lé, mi zi niŋ bélahɛ̧ ka mi zi yá, ɓá ɓékéhɛ̧, ka mi zi yáy, pé mi niŋ.

²⁰Mǐ, mí niŋ hɛ̧ ka mi zi yáy, tɔ́ʼɔ ɓá, tí ɓá mǐ pé niŋ hɛ̧ké mbaa, ɓá ɓéké ka e a ɓil hay mûn ní.

²¹Nǎŋnɔ́ mi ziŋ sáŋna nɛ́ ka sa ɓá: Gelka mi zi ɓay a niŋ bélahɛ̧y, mi kó ɓá hɛ̧ belyáké, pé mi kaw niŋáké.

²²A ɓil law ní, mi e ka mûnrína sé tûl sáŋna a Gáŋvbôn.

²³Dáy, mi ziŋ a mûn ní, sáŋna a féké ɓáy, ka kaw rúbére kuu sáŋna a Gáŋvbôn ka mi ziy. Sáŋnaké reɓá mí kaw ɓá koy a sáŋna a ɓéké, ka e ka mûn ní.

²⁴Lelêe ka ná hí̧ mí! A gé, e ten mi a ɓil mûn nɛ́ ka ɓá mi gé ɓá hûl lé?

²⁵Dáy ɗéla ké hí̧ Gáŋvbôn, ka ŋgboro a Zezú Kiris Gáŋmbây a manárí̧! Nǎŋnɔ́ dáy, ka ŋgboro zína a mǐ, mi kaw ɓá koy a sáŋna a Gáŋvbôn, dáy, ka ŋgboro a hay mûn, mi kaw ɓá koy a sáŋna a ɓéké.