Read Capanahua Rɔmɛri̧ 8 Bible Online

Rɔmɛri̧ 8 - Capanahua bible

Rɔmɛri̧ 8

¹Ŋgɛŋnɛ́, walɓay a Gáŋvbôn zi tí tûl a njukuri ka e mbêw kuu Zezú Kiris mbaa.

²Ɓayhí̧lé, sáŋna a Têm Pukí ka hí̧ ndísɛ̌ʼɛ ka ŋgboro a Zezú Kiris, ten mi a ɓil sáŋna a ɓéké rá̧ hûl dá.

³Hɛ̧ ka ŋgɛ́rɛ mambá hí̧ sáŋna a Mɔyíze, ɓayhí̧lé hay mûn ŋgá̧ ŋgboro niŋ hɛ̧ hí̧ nɛ́. Dáy Gáŋvbôn, ɓay a lú ɓéké, walɓay ŋgbá ɓéké a ɓil hay mûn, a pé ɓay tûl a ɓéké, Gun ɓilé gí tísiri, a ɓil hay mûn, mambɛ̧́nɛ́ kuu ɓéké njuku.

⁴Gáŋvbôn niŋ nǎŋnɔ́, ɓay ná ziŋ káwa a ndáráké ka sáŋna vbí, manárí̧ ka zi séséna ka ŋgboro hay mûn mbaa, dáy ka a séséna ka ŋgboro a Têm Pukí.

⁵Katína, njukuri ka kaw ka ŋgboro a hay mûn, ɛ́ ŋgboro niŋ hɛ̧ ka hay mûn ziy. Dáy njukuri ka kaw ka ŋgboro a Têm Pukí, ɛ́ ŋgboro niŋ hɛ̧ ka Têm Pukí ziy.

⁶Dáy tɔ́ŋ niŋ hɛ̧ ka hay mûn ziy, ɓá njuku sé hûl. Nǎŋnɔ́, tɔ́ŋ niŋ hɛ̧ ka Têm Pukí ziy, ɓá njuku sé káwa ndísɛ̌ʼɛ rá̧ káwa a vónáké.

⁷Njukuri ka niŋ ɓá péna a hay mûn a kuriri, kaw ɓá njuku ŋgá̧na a Gáŋvbônri̧, ɓayhí̧lé kú zi tɔ́ŋ sáŋna a Gáŋvbôn nyá, a zi marú̧ nyá.

⁸Njukuri ka tɔ́ŋ ɓá péna a hay mûn a kuriri, zi ma niŋ hɛ̧ ka ri Gáŋvbôn nyá.

⁹Dáy a wǎyri, i zi kaw ka ŋgboro a hay mûn mbaa, i kaw ka ŋgboro a Têm Pukí, ɓayhí̧lé, Têm a Gáŋvbôn kaw kuu wǎyri. Dáy njuku, mí zi tí ka Têm a Kiris yáy, ké zi tí ɓá njuku a Kiris yá.

¹⁰Rá̧ Kiris mí e kuu wǎyri, katína, tɔ́ʼɔ ɓá mûn a wǎyri hú ɓay a ɓéké dá, dáy Têm e ka ndísɛ̌ʼɛ ka mûn a wǎyri, ɓayhí̧lé, i ziŋ káwa ndáráké a mbɛl a Gáŋvbôn.

¹¹Dáy Têm a njuku, ka toma Zezú a bazeŋ a hûlri, mí e ka mûn a wǎyri, tɔ́ʼɔ ɓá Gáŋvbôn ka toma Kiris a bazeŋ a hûlri, e hí̧ mûn a wǎyri ka húy, ndísɛ̌ʼɛ ka ŋgboro a Têm Pukí a mɛ̌, ka e ka mûn a wǎyri.

¹²Nǎŋnɔ́ dáy, nyîn nírí̧, ná erú ka túna a tûl nárí̧ ɓay a púnáké, dáy zi tí ɓá sé ŋgboro a hay mûn rá̧lǒo ná ziŋ káwa ka ŋgboro a zína mɛ̌ nyá.

¹³Wǎyri, mí kaw ka ŋgboro a hay mûn, i e ziŋ hûl. Dáy, wǎyri mí í péna niŋa a hay mûn ka ŋgboro Têm Pukíy, i e ziŋ káwa ndísɛ̌ʼɛ.

¹⁴Ɓayhí̧lé njukuri too ka Têm a Gáŋvbôn tɔ́ʼɔ kuriri ŋgboroy, kaw ɓá gun a Gáŋvbôn.

¹⁵Dáy, Têm ka i ziŋ, zi tí ɓá têm ka ɓá wǎyri tɛ̧́ koy, ka ɓá wǎyri mbá ka wɔ́w yá, ɓá Têm Pukí ka ɓá wǎyri tɛ̧́ gun a Gáŋvbôn, ka a hí̧ wǎyri ŋgboro vbá̧nzáʼa ɓá: «Aba, Bâa a mǐ!»

¹⁶Têm a Gáŋvbôn ka mûn nɛ́, kaw sa hí̧ têm mûn a manárí̧, ɓá ná kaw ɓá gun a Gáŋvbôn.

¹⁷Dáy ná kaw ɓá gun a Gáŋvbôn lé, tɔ́ʼɔ ɓá, ná kaw ɓá gun nyandal a hɛ̧zíŋa mɛ̌: nyandal a Gáŋvbôn rá̧ nyandal kuu Kiris kɔ́, ɓayhí̧lé, manárí̧ mí tɔ́ʼɔsêe kuu Kiris, ná e kaw kuu mɛ̌ kɔ́ a ɓil hɔ̧́na.

¹⁸Mi kɛrɛ ɓá tɔ́ʼɔsêe a manárí̧ a ŋgɛŋnɛ́, ná zi ma ɓá léhá̧na kuu hɔ̧́na a Gáŋvbôn, ka e gína, a ké e tɔ́ʼɔ nárí̧ nyá.

¹⁹Nǎŋnɔ́, hɛ̧ri̧ ka Gáŋvbôn mɔny too, zoko, a erú ka nzala kó nâm ka Gáŋvbôn e tɔ́ʼɔ gun a mɛ̌ri̧.

²⁰Ɓayhí̧lé, hɛ̧ri̧ ka Gáŋvbôn mɔny too, e ka bɔʼɔ a ŋgɛ́rɛ a hɛ̧ri̧, ka zi ma ɓá njuku sé gel a há̧na nyáy. Tí ɓá ka zína a kuriri yá, ɓá ka zína a Gáŋvbôn. A ɓilké nɔ́ too, mbílaw erú;

²¹ɓayhí̧lé, hɛ̧ri̧ ka Gáŋvbôn mɔny too e ziŋ tɛ̧́na a sêe a há̧na, ka bɔʼɔ ŋgɛ́rɛ a hɛ̧ri̧ ka ɓew kuriri, ka a ŋgbá kuriri ɓá koy, ɓay a ziŋ káwa a ɓil tɛ̧́na a hɔ̧́náké a gun a Gáŋvbônri̧.

²²Ná tu ɓá táŋáké, hɛ̧ri̧ ka Gáŋvbôn mɔny too, kaw vúmûn, a kaw tɔ́ʼɔsêe a ŋgɛŋnɛ́, ɓá báŋa wûnynjuku ka kaw mbuŋay.

²³Dáy, tí ɓá hɛ̧ri̧ ka Gáŋvbôn mɔny mbêw yáŋ yá, manárí̧ kɔ́, ka ziŋ Têm Pukí ɓá báŋa hɛ̧hí̧na mbêw a bazeŋ a hɛ̧hí̧nari̧ ka Gáŋvbôn hí̧nzáʼay, ná ka vúna a ɓil law manárí̧, a kaw zoko nâm ka Gáŋvbôn e ten nárí̧ wɔm, ɓay a ɓá nárí̧ tɛ̧́ gun a mɛ̌y.

²⁴Katína ɓá ka ŋgboro a mbílaw mbêw yáŋ, pé ná tu ɓá, ná pɛ̧́ dá, ɓayhí̧lé, manárí̧ mí kó hɛ̧ ka ná mbílaw a manárí̧ sé tûlké dáy, zi tí ɓá mbílaw mbaa. A gé e mbílaw sé tûl hɛ̧ a ké kó dáy lé?

²⁵Dáy, ná mbílaw sé tûl hɛ̧ ka ná zi kó yá ɓáy lé, ná zoko a ɓil ikilaw.

²⁶Ɓá mbêwké, Têm Pukí kɔ́ gí hí̧ndɔ̂ʼɔ hí̧ nárí̧, ɓayhí̧lé ná zi tu a̧hí̧ ɓá hɛ̧ a béláké, ka ná e vbínáké a ɓil gɔ́ŋhɛ̧ a manárí̧ nyá. Dáy, Têm Pukí ka mûn nɛ́, kaw vbí Gáŋvbôn a gel a manárí̧, ka ŋgboro a ɓay ka nzáʼa manárí̧ zi sa yáy.

²⁷Nǎŋnɔ́, Gáŋvbôn ka tu hɛ̧ ka e ɓil law, tu hɛ̧ ka Têm Pukí zi ɓay a vbí nɛ́y. Ɓayhí̧lé, Têm Pukí gɔ́ŋhɛ̧ ɓay tûl a njuku a láɓulawri, ɓá báŋké ka Gáŋvbôn ziy.

²⁸Ná tu ɓá, hɛ̧ri̧ too ka niŋ, niŋ ɓay tûl béla a njukuri ka zi Gáŋvbôn, njukuri a ké ɗí kuriri, ka ŋgboro a hɛ̧ a ké tí mɔny a ɓil lawɛ́.

²⁹Ɓayhí̧lé, Gáŋvbôn tí ten kuriri, a tí mɔny kuriri ɗambɛl ɓay a ké ɓá kuriri tɛ̧́ ɛ́ŋ Gun a mɛ̌ Zezú, rá̧ Gun mɛ̌, ké kaw ɓá mbɔŋɔ gun a ɓil gun a mɛ̌ri̧ ɓá ŋgɛ̧́náké.

³⁰Njukuri ka Gáŋvbôn tí ɓá kuriri kaw ɓórí ɗambɛl, ké ɗí kuriri kɔ́, ka njukuri a ké ɗí kuriri, ké ɓá kuriri tɛ̧́ njuku a ndárákéri a mbɛlɛ́, nǎŋnɔ́, njukuri a ké ɓá kuriri tɛ̧́ njuku a ndárákéri, ké hí̧ kuriri kɔ́ hɔ̧́na a mɛ̌.

³¹A̧hí̧ ná e sanáké ɓáy lé? Gáŋvbôn, mí e kuu manárí̧, a gé e kaw ɓá njuku ŋgá̧na a manárí̧ lé?

³²Mɛ̌, ka zi pɔŋ Gun ɓilé yá, dáy ka a ɓá nɛ́ tɔ́ʼɔsêe ɓay tûl a manárí̧ too. E ná a̧ní rá̧, ké tí hí̧ nárí̧ hɛ̧ too kuu Gun ná mɛ̌ baa nyá lé?

³³A gé, e reɓay ka̧n nzáʼa njukuri ka Gáŋvbôn ten kuriri lé? Ɓayhí̧lé, ɓá Gáŋvbôn, pé sa kú zi niŋ ɓéké yá!

³⁴A gé, e ɓá ɓay ŋgbá kuriri lé? Njuku a há̧na mbêw zi tí yá! Ɓayhí̧lé, Zezú Kiris pé ɓá njuku ka ziŋ hûl, falké ké toma ka hûl, a kaw a ndɔ̂ʼɔ lâʼa a Gáŋvbôn, a kaw gɔ́ŋ Gáŋvbôn ɓay a manárí̧.

³⁵A gé ma ɓay a wal manárí̧ kuu zína a Kiris lé? Ɓá káwa sêe rá̧ lawyíra malé, ɓá tɔ́ʼɔsêe rá̧ nzala malé, ɓá fóya malé, hûl rá̧ gá̧má lé?

³⁶Ɓá báŋké ka ɗé ka̧n ɓil Mbété ɓá: «Ɓay tûló, pé rú kaw ɗɛ́ŋ kuu hûl sêe too, Kú kó rú ɓá báŋa a mbóléri, a kú ŋgbá kuriri sé vbénáy.»

³⁷Dáy, a ɓilké nɔ́ too, rú ndé ka ŋgɛ́rɛ, ka ŋgboro a njuku ka zi nárí̧.

³⁸Ɓayhí̧lé, mi tu ɓá, hɛ̧ a há̧na mbêw zi ma wal manárí̧ kuu zína a Gáŋvbôn nyá: Ɓá hûl malé ndísɛ̌ʼɛ lé? Aŋnzeri malé kpɔ́ŋa a fékéri a nûnalê lé? Sêe a ŋgɛŋnɛ́ malé sêe a pélé lé?

³⁹Gáŋa a nûnalê malé ɗína a tísiri lé? Hɛ̧ a há̧na mbêw, zi ma wal nárí̧ kuu zína a Gáŋvbôn, ka tɔ́ʼɔ nárí̧ ka ŋgboro a Zezú Kiris, Gáŋmbây a manárí̧ nyá.