Read Capanahua 1Kɔrɛŋtiyɛ̧́ri̧ 1 Bible Online

1Kɔrɛŋtiyɛ̧́ri̧ 1 - Capanahua bible

1Kɔrɛŋtiyɛ̧́ri̧ 1

¹Mǐ Pôl, ka Gáŋvbôn ɗí mi ka ŋgboro a zína a mɛ̌, ɓay a mi kaw ɓá apotere a Zezú Kiris, rá̧ Sostɛ́n nyîn a manárí̧.

²Rú ɗé mbété nɛ́ hí̧ Egilize a Gáŋvbônri̧ ka e a tísiri a Kɔrɛŋte, rá̧ njukuri ka Gáŋvbôn ɗí kuriri, ɓay a kú kaw ɓá ɓay a mɛ̌ ka ŋgboro a láɓulaw hí̧ Zezú Kiris, rá̧ njukuri too ka e a gélri too, ka ɗí rɛŋ a Gáŋmbây Zezú Kiris, Gáŋmbây a kuriri rá̧ Gáŋmbây a manárí̧:

³Bâa, Gáŋvbôn a manárí̧ rá̧ Gáŋmbây Zezú Kiris, kú hí̧ wǎyri béla rá̧ a vónáké.

⁴Mi zi awá dát hí̧ Gáŋvbôn ɓay tûl a wǎyri, sé tûl béla a mɛ̌ a ké hí̧ wǎyri ka ŋgboro a Zezú Kiris.

⁵Katína, ka ŋgboro a káwa mbêw kuu Kiris, Gáŋvbôn hí̧ wǎyri hɛ̧zíŋa too, ka kó ŋgboro a ɓay rá̧ ŋgboro a hɛ̧túnari̧ too.

⁶Ɓayhí̧lé, ɓay a kú sa hí̧ wǎyri sé tûl a Kiris, ew kpú a bazeŋ a wǎyri.

⁷Nǎŋnɔ́, hɛ̧hí̧na a Gáŋvbôn a há̧na, ka zi hí̧ wǎyri zi tí yá, wǎyri ka zoko réna a Gáŋmbây Zezú Kiris.

⁸Ɓá mɛ̌ Gáŋvbôn pé e hí̧ wǎyri ŋgɛ́rɛ ka̧ kɔ́rɔ́ké, ɓay a kú ná ziŋ ɓékéhɛ̧ a há̧na, a tûl a wǎyri, ka sêe gína a Zezú Kiris.

⁹Gáŋvbôn ka mûn nɛ́, ka ɗí wǎyri, ɓay a i kaw mbêw kuu Gun a mɛ̌ Zezú Kiris Gáŋmbây a manárí̧: Ké kaw law mbêw sé tûl hí̧nzáʼa mɛ̌.

¹⁰Mi vú hí̧ wǎyri, nyîn nírí̧, ka rɛŋ a Gáŋmbây Zezú Kiris, i láhá̧narí̧, ka ɗéma ké zi ná niŋ a bazeŋ a wǎyri. I kaw law mbêw a ɓil kɛrɛ a wǎyri rá̧ ɛ̧rɛ̧ gel a wǎyri.

¹¹Ɓayhí̧lé nyîn nírí̧, njuku ɓil vûn a Kolowéri gí sa hí̧ mí ɓá, péna sɛ́rɛ e a bazeŋ a wǎyri mambá.

¹²I kó hɛ̧ ka mi zi ɓay a sanáké ɓá: A bazeŋ a wǎyri, njuku a há̧narí̧ sa ɓá: «Mǐ, mi ɓá njuku a Pôl,» njuku a féké sa ɓá: «Mǐ, mi ɓá njuku a Apoló;» njuku a féké ɓay sa ɓá: «Mǐ, mi ɓá njuku a Píyɛ́r;» rá̧ a féké ɓáy sa ɓá: «Mǐ, mi ɓá njuku a Kiris.»

¹³Dáy, a kɛrɛ a wǎyri wá, Kiris wal mûn nɛ́ lé? Ɓá Pôl, pé hú ka̧n tûl dii vbatay ɓay tûl a wǎyri lé? Malé, i nyá batêm ka rɛŋ a Pôl lé?

¹⁴Mi zi awá hí̧ Gáŋvbôn, ɓayhí̧lé mi zi ɓá njuku a há̧na mbêw, a ɓil a wǎyri nyá batêm nyá, ɔ ɓá Kírípús rá̧ Gayus.

¹⁵Nǎŋnɔ́, njuku a há̧na zi ma sa ɓá, i nyá batêm ka rɛŋ ní nyá.

¹⁶Katína, a féké ɓáy, mi ɓá Stefanas rá̧ î̧n a mɛ̌ri̧ nyá batêm, falké, mi zi tu a géri ɓáy, mi ɓá kuriri nyá batêm nyá.

¹⁷Ɓayhí̧lé, Kiris zi pé mí ɓá mí sé ɓá njukuri nyá batêm nyá. Ké pé mí ɓá mí sé tɔ́ʼɔ Bélaɓay a mɛ̌, táŋ saɓay ka ŋgboro a hɛ̧túna a njuku, rá̧lǒo kpɔ́ŋa a tûl dii vbatay a Kiris, ké zi ná retɛ̧ hɛ̧ a ɓǎŋké.

¹⁸Ɓayhí̧lé, tɔ́ʼɔɓay a hûl a Kiris ka tûl dii vbatay ná ɓá hɛ̧dɔ̂ʼɔ hí̧ njukuri ka e tûl ŋgboro ɓɔ́lay, dáy a manárí̧ ka e tûl ŋgboro pɛ̧́nay, ná kó kpɔ́ŋa a Gáŋvbôn a ɓilké.

¹⁹Ɓayhí̧lé kú ɗé a ɓil Mbété ɓá: «Mi gbɛʼɛrɛ rɔ̧́na a njuku rɔ̧́nari̧, mi e sáŋ hɛ̧túna a njuku hɛ̧túnari̧.»

²⁰Dáy a̧hí̧, njuku rɔ̧́nari̧ malé njuku hɛ̧túnari̧, malé njuku manyɓay a tísiri a ŋgɛŋnɛ́ nɛ́rí̧, e sanáké lé? Gáŋvbôn tɔ́ʼɔ ɓá rɔ̧́na a tísiri nɛ́, ná ɓá hɛ̧dɔ̂ʼɔ.

²¹Ɓayhí̧lé, njuku a tísiriri a rɔ̧́na a kuriri too, zi tu Gáŋvbôn a gel a ké tɔ́ʼɔ rɔ̧́na a mɛ̌ nyá. Ɓaykénɔ́ pé ri Gáŋvbôn ɓá ké pɛ̧́ njukuri ka láɓulaw, ka ŋgboro a tɔ́ʼɔɓay dii vbatay ka ná ɓá báŋa hɛ̧dɔ̂ʼɔy.

²²Juyífri vbí hɛ̧sáʼamari̧, Girɛ́kri ɛ́ ɓá rɔ̧́na.

²³Dáy a ɓurú, rú tɔ́ʼɔɓay a Kiris, a kú ɓara nɛ́ ka̧n tûl dii vbatay. Ná ɓá hɛ̧ ka Juyífri zi, zibɔʼɔké yáy, a ná ɓá hɛ̧dɔ̂ʼɔ hí̧ njukuri ka zi tí ɓá Juyífri yáy.

²⁴Dáy, a njukuri ka Gáŋvbôn ɗí kuriri, Juyífri malé njukuri ka zi tí ɓá Juyífri yáy, Kiris kaw ɓá kpɔ́ŋa rá̧ rɔ̧́na a Gáŋvbôn.

²⁵Ɓayhí̧lé hɛ̧ ka njukuri kó ɓá hɛ̧dɔ̂ʼɔ a gel a Gáŋvbôn, ndé rɔ̧́na a njukuri, rá̧ hɛ̧ ka njuku kó ɓá zi tí ka ŋgɛ́rɛ a gel a Gáŋvbôn yáy, ndé ŋgɛ́rɛ a njukuri.

²⁶Nyîn nírí̧, i kó káwa a wǎyri, wǎyri ka i ziŋ ɗína a Gáŋvbôn, a bazeŋ a wǎyri njuku rɔ̧́nari̧ zi ŋgɛ̧́ nyá, njuku e ka kpɔ́ŋári̧ zi ŋgɛ̧́ nyá, njukuri ka kaw ɓá gáŋnjuku zi ŋgɛ̧́ nyá.

²⁷Dáy, Gáŋvbôn ten hɛ̧ ka njuku a tísiriri kó ɓá hɛ̧dɔ̂ʼɔ ka nûn a kuriri, ɓay a ɓá sɔ̧rɔ̧ ka̧n nûn a njuku rɔ̧́nari̧, ké ten hɛ̧ ka ɓá hɛ̧ a koʼoraké ka tísiri, ɓay a ɓá sɔ̧rɔ̧ ka̧n nûn a njuku ŋgɛ́rɛri.

²⁸Gáŋvbôn ten hɛ̧ a baaké a tísiri, ka njukuri yáw, malé hɛ̧ ka zi tí ka nɛ́rɛ̧ nyá ka nûn a njuku a tísiri, ɓay a ɓew hɛ̧ ka njukuri kó ka nɛ́rɛ̧y.

²⁹Nǎŋnɔ́, njuku a há̧na mbêw ka tísiri, ka e niŋ wélé a mbɛl a Gáŋvbôn zi tí yá.

³⁰Dáy Gáŋvbôn mára̧ wǎyri mbêw kuu Zezú Kiris, nǎŋnɔ́, ké ɓá Kiris kaw ɓá rɔ̧́na a manárí̧: Ɓá Kiris pé ɓá manárí̧ tɛ̧́ njuku a ndárákéri a mbɛl a Gáŋvbôn, pé a hí̧ ŋgboro hí̧ nárí̧ ɓá ná kaw ɓay a Gáŋvbôn, pé a ten nárí̧ a ɓil ɓéké.

³¹Ɓá báŋké nɔ́, a kú ɗéy: «Njuku mí zi ɓay a niŋ wélé lé, ké niŋ a ɓil rɛŋ a Gáŋmbây.»