Read Capanahua 1Kɔrɛŋtiyɛ̧́ri̧ 10 Bible Online

1Kɔrɛŋtiyɛ̧́ri̧ 10 - Capanahua bible

1Kɔrɛŋtiyɛ̧́ri̧ 10

¹Nyîn nírí̧, mi zi ɓá í kɛrɛ hɛ̧ ka ziŋ zîi a manárí̧, a ɓil nâm a Mɔyíze. Kuriri too, kú séséna ka bɔʼɔ ɗaʼama a mbɔ̂m, ka tá ɓil mbii lúkí a sɛ́ŋɛ́.

²Kú nyá batêm a ɓil ɗaʼama a mbɔ̂m, rá̧ ɓil mbii lúkí, kuriri too kuu Mɔyíze.

³Kuriri too, kú sɔ̧́lâʼa a Têm Pukí mbêw,

⁴kú nzó hɛ̧ nzóna a Têm Pukí mbêw. Ɓayhí̧lé kú nzó mbii ka tɛ̧́, a ɓil gáŋ saw a Têm Pukí, ka sé kuu kuriri, dáy gáŋ sawké nɔ́, ɓá Kiris.

⁵A tu ɓá, a bazeŋ a kuriri nɔ́, njukuri ɓá ŋgɛ̧́náké, zi niŋ hɛ̧ ka hí̧ sáʼa hí̧ Gáŋvbôn nyá, ɓaykénɔ́ pé kú ziŋ hûl a ɓil lawkɔr.

⁶Dáy hɛ̧ nɔ́rí̧ tá, ɓay tɔ́ʼɔ nárí̧ ŋgboro, ɓay ná zi ná e ka ɓéké kɛrɛ ɓá báŋa a zîi a manárí̧.

⁷Ná zi ná tɔ́ŋ vbônri̧, ɓá báŋké ka njuku a há̧narí̧ a bazeŋ a kuriri niŋ. Ɓá báŋké a kú ɗé ɓá: «Njukuri kaw sɔ̧́lâʼa, a nzó, falké kú uru ɓay a nzé ŋgbɔ́ŋɔ.»

⁸Ná zi ná mbí mûn a manárí̧, ka̧n ɓil niŋ dala ɓá báŋké ka njuku a há̧narí̧ a bazeŋ a kuriri niŋ, ka bon a njukuri kumrá̧ké bonsére a sáy ziŋ hûl a ɓil nâm a mbêwké.

⁹Ná lé Kiris yá, ɓá báŋké ka njuku a há̧narí̧ a bazeŋ a kuriri niŋ, ka sôy núŋ kuriri, a kú ziŋ hûl.

¹⁰Í vúmûn a wǎyri yá, ɓá báŋké ka njuku a há̧narí̧ a bazeŋ a kuriri niŋ, ka aŋnze a hûl í kuriri.

¹¹Ɓékéhɛ̧ nɔ́rí̧ too, ka ka̧ zîi a manárí̧, ɓá ɓay a tɔ́ʼɔ ŋgboro hí̧ njuku a fékéri. Kú ɗé ka̧n, ɓay a vbara nárí̧, manárí̧ ka e ɗɛ́ŋ ka kɔ́rɔ́ nâm.

¹²Ɓaykénɔ́, pé njuku mí kó ɓá ké ew sâa lé, ké kó rá, ɓay a ké zi ná lé.

¹³Hɛ̧ lélaw a há̧na ka ziŋ wǎyri, ka zi tí ɓá ka ŋgboro a njuku yáy, zi tí yá. Gáŋvbôn kaw law mbêw, ké tí pɔŋ ŋgboro a hɛ̧ lélawké ké ndé ŋgɛ́rɛ a wǎyri yá. Dáy a ɓil lélaw, Gáŋvbôn e hí̧ wǎyri ŋgɛ́rɛ, ɓay a i ew ɓá kpúnáké rá̧ ŋgboro tɛ̧́ ɓilké.

¹⁴Ɓaykénɔ́ pé nyîn nírí̧ ka mi zi mambáy, í zi ná niŋ law mbêw kuu vbônri̧.

¹⁵Mi saɓay hí̧ wǎyri, ɓá báŋa a njuku hɛ̧túnari̧. I kó ɓil ɓay ka mi sa hí̧ wǎyri ka mûn a wǎyri.

¹⁶Í kɛrɛ yoŋ béla ka ná ɗí béla a Gáŋvbôn kɔ̧rú̧y: Gelka ná nzó hɛ̧ ka e a ɓilké, zi ɓá nárí̧ niŋ law mbêw kuu sêm mûn a Kiris yá lé? Rá̧ biré, ka ná haw ɓilké: Gelka ná sɔ̧́y, zi ɓá nárí̧ niŋ law mbêw kuu mûn a Kiris yá lé?

¹⁷Biré ɓá mbêw yáŋ, a ɓil ŋgɛ̧́na a manárí̧ too, ná kaw ɓá mûn mbêw, ɓayhí̧lé, manárí̧ too ná sɔ̧́ biré a mbêwké.

¹⁸I kó gun Izirayɛ́lri, njukuri ka sɔ̧́ hay a kú niŋ hɛ̧púna rú̧ ka nzáʼaká̧na, kú zi niŋ law mbêw kuu nzáʼaká̧na̧ké yá lé?

¹⁹A̧hí̧, mi zi ɓay a sanáké lé? Hay a kú niŋ hɛ̧púna rú̧ hí̧ vbônri̧, e ka nɛ́rɛ̧ lé? Malé vbônri̧ ɓá hɛ̧ a há̧na lé?

²⁰Mbêw yá! Dáy, mi sa ɓá, hɛ̧púna ka njukuri niŋ, kú niŋ hí̧ têm ɓékéri, a tí ɓá hí̧ Gáŋvbôn nyá. Ɓaykénɔ́, pé mi zi ɓá, í niŋ law mbêw kuu têm ɓékéri yá.

²¹I zi ma nzó a ɓil yoŋ a Gáŋmbây, rá̧ a ɓil yoŋ a têm ɓékéri kɔ́ yá. I zi ma sɔ̧́lâʼa ka tûl tay a Gáŋmbây, rá̧ tûl tay a têm ɓékéri yá.

²²Malé ná zi ɓay a uru sɛ́rɛ a Gáŋmbây lé? Ná kɛrɛ ɓá, ná ŋgɛ́rɛ ndé nɛ́ lé?

²³Njuku a há̧narí̧, kaw sanáké ɓá: Mi erú ka ŋgboro niŋ hɛ̧ too ka mi ziy. Katína, dáy tí ɓá hɛ̧ too, pé ɓá hɛ̧ a béláké yá. «Ŋgboro erú too» dáy, tí ɓá hɛ̧ too, pé hí̧ ŋgɛ́rɛ hí̧ mára̧ a gun láɓulawri yá.

²⁴Njuku ké zi ná ɛ́ béla ɓá ɓay a mɛ̌, dáy ké ɛ́ ɓá ɓay a njuku a ǎ̧wrí̧.

²⁵I erú ka ŋgboro sɔ̧́ hɛ̧ri̧ too, a kú kuma ka gélkuma hɛ̧y, táŋ vbí ɓay sé tûlké, ɓay a law a wǎyri ké zi ná lú sé tûlké.

²⁶Ɓayhí̧lé, ɓá báŋké a kú ɗéy: «tísiri rá̧ hɛ̧ri̧ too ka e a ɓilké, ɓá ɓala a Gáŋmbây.»

²⁷Njuku a há̧na ka zi láɓulaw yá, mí ɗí wǎyri ɓay a í sé sɔ̧́lâʼa a gé, rá̧ wǎyri mí zibɔʼɔ séna lé, i gé sɔ̧́lâʼa too a ké e hí̧ wǎyri, táŋ vbí ɓay, ɓay a law a wǎyri, ké zi ná lú wǎyri.

²⁸Dáy, njuku a há̧na mí tí sa hí̧ wǎyri, ɓá hay nɛ́, ɓá hay a kú niŋ hɛ̧púna rú̧ hí̧ vbônri̧ lé, í zi ná sɔ̧́ hayké, ɓay tûl ɓay nɔ́, ɓay a law a wǎyri ké zi ná lú wǎyri.

²⁹Mi zi saɓay sé tûl law lúna a wǎyri yá, dáy ɓay tûl law lúna a njuku a ǎ̧wrí̧. «Dáy Ɓayhí̧rá̧, law a njuku a fékéri e walɓay sé tûl hɛ̧ niŋa mǐ lé?

³⁰Mǐ, mí ɗí béla a Gáŋvbôn kɔ̧ tûlké rá̧ pé a sɔ̧́lâʼakéy, ɓayhí̧rá̧ njuku e deɓay ka̧n tûl ní, ɓay tûl lâʼa, ka mi zi awá hí̧ Gáŋvbôn ɓaykéy lé?»

³¹Nǎŋnɔ́, wǎyri mí sɔ̧́lâʼa, malé wǎyri mí nzó, malé wǎyri mí niŋ hɛ̧ a fékéri too, i niŋ too, ɓay a í hí̧ hɔ̧́na hí̧ Gáŋvbôn.

³²Í zi ná niŋ rá̧ bɔʼɔséna a wǎyri, ké ɓá njuku a há̧na ka ɓá Juyíf, malé tí ɓá Juyíf yáy malé Egilize a Gáŋvbôn, ké lé ɓil ɓéké.

³³Í sé bɔʼɔséna ɓá báŋa mǐ: Mi ɛ́ ŋgboro niŋ béla hí̧ njukuri too, a ɓil péna a mǐ. Mi zi ɛ́ niŋ béla ɓá ɓala mǐ nyá, mi ɛ́ béla a njukuri too, ɓay a kú ziŋ pɛ̧́na.