Read Capanahua 1Kɔrɛŋtiyɛ̧́ri̧ 11 Bible Online

1Kɔrɛŋtiyɛ̧́ri̧ 11 - Capanahua bible

1Kɔrɛŋtiyɛ̧́ri̧ 11

¹I tɔ́ŋ bɔʼɔséna a mǐ, ɓá báŋké ka mǐ, mi tɔ́ŋ bɔʼɔséna a Kiris.

²Mi ɗél wǎyri, ɓayhí̧lé i kaw kɛrɛ mí sêe too, a zi yɛʼɛrɛ nzáʼa nzɛ́rɛ a mǐ, ka mi sa hí̧ wǎyri yá.

³Dáy, hɛ̧ ka mi zi ɓá i tu ɓá: Kiris, ɓá mbây a wɔ̧rɔ̧́njuku too, nǎŋnɔ́ wɔ̧rɔ̧́njuku ɓá mbây a wûnynjuku too, a Gáŋvbôn ɓá mbây a Kiris.

⁴Dáy wɔ̧rɔ̧́njuku mí ku tûlé a ɓil mára̧, a ké kaw gɔ́ŋ Gáŋvbôn, malé ké kaw saɓay ka Gáŋvbôn sa hí̧ nɛ́y, ké zi hɛʼɛ mbây a mɛ̌ ka ɓá Kiris yá.

⁵Dáy, a wûnynjuku ka gɔ́ŋ Gáŋvbôn, malé kaw saɓay ka Gáŋvbôn sa hí̧ nɛ́y, táŋ ŋgá̧ tûléy, zi hɛʼɛ mbây a mɛ̌ ka ɓá wɔ̧rɔ̧́ a mɛ̌ nyá, ké kaw ɛ́ŋ báŋa wûnynjuku ka kpó tûlé.

⁶Wûnynjuku, mí zi ŋgá̧ tûlé yá lé, ké kúŋ tâny tûlé! Dáy ka ná ɓá hɛ̧ sɔ̧rɔ̧ hí̧ wûnynjuku ɓá ké kpó tûlé malé ké kúŋ tâny tûlé! Nǎŋnɔ́, belɓá ké ŋgá̧ tûléy.

⁷Wɔ̧rɔ̧́njuku, zi tí ka ŋgboro ŋgá̧ tûlé yá, ɓayhí̧lé ké nyá gel a Gáŋvbôn, a kaw ɓá hɔ̧́na a Gáŋvbôn. Dáy a wûnynjuku, ké kaw ɓá hɔ̧́na a wɔ̧rɔ̧́njuku;

⁸Katína, Gáŋvbôn zi mɔny wɔ̧rɔ̧́njuku ka ŋgboro a wûnynjuku yá, ɓá wûnynjuku pé Gáŋvbôn mɔny ka ŋgboro a wɔ̧rɔ̧́njuku.

⁹Nǎŋnɔ́, Gáŋvbôn zi mɔny wɔ̧rɔ̧́njuku ɓay a wûnynjuku yá, ɓá wûnynjuku, pé Gáŋvbôn mɔny ɓay a wɔ̧rɔ̧́njuku.

¹⁰Ɓaykénɔ́, ɓay tûl a aŋnzeri, wûnynjuku, ké e ka ŋgána ka tûlé ka tɔ́ʼɔ nzáʼapéna a mɛ̌ri̧.

¹¹Dáy, a ɓil káwa a manárí̧ kuu Gáŋmbây, wûnynjuku zi kaw táŋ wɔ̧rɔ̧́njuku yá, wɔ̧rɔ̧́njuku zi kaw táŋ wûnynjuku yá.

¹²Ɓá báŋké, a kú mɔny wûnynjuku ka ŋgboro a wɔ̧rɔ̧́njukuy, nǎŋnɔ́ kɔ́, wɔ̧rɔ̧́njuku ziŋ mbuŋa ka ŋgboro a wûnynjuku, dáy too gí ka ŋgboro a Gáŋvbôn.

¹³I wal ɓilké ka mûn a wǎyri, belbéla ɓá wûnynjuku ké gɔ́ŋ Gáŋvbôn táŋ ŋgá̧ tûlé a ɓil mára̧ lé?

¹⁴I zi tu ɓá, a ɓil káwa a manárí̧, ná ɓá hɛ̧ sɔ̧rɔ̧ ɓá wɔ̧rɔ̧́njuku ké pɔŋ tâny tûlé ɓá pénáké yá lé?

¹⁵A tu ɓá ná ɓá ɗéla hí̧ wûnynjuku, ɓá ké pɔŋ tâny tûlé ɓá pénáké. Ɓayhí̧lé Gáŋvbôn hí̧ tâny tûl a pénáké hí̧ wûnynjuku, ɓá báŋa laa guku tûl.

¹⁶Njuku mí zi ɓay a manyɓay sé tûlké lé, ké tu ɓá, tí ɓá péna niŋa a manárí̧ malé péna niŋa a Egilize a Gáŋvbônri̧ nyá!

¹⁷Mí zi saɓay nɛ́ hí̧ wǎyri, tí ɓá ɓay a mí ɗél wǎyri yá, ɓayhí̧lé, mára̧ a wǎyri niŋ ɓéké hí̧ wǎyri ŋgɛ̧́ ndé béla.

¹⁸Mi lá ɓá, i mára̧ há̧narí̧ lé, ɗéma e a bazeŋ a wǎyri, nǎŋnɔ́ mi láɓulaw sé tûl ɓay a fékéri, dáy zi tí ɓá too yá.

¹⁹Belɓá ɗéma ké ná a bazeŋ a wǎyri, rá̧ kú ma tu a bazeŋ a wǎyri, njukuri ka kaw law mbêw kuu Gáŋmbây.

²⁰Gelka i mára̧ há̧narí̧ lé, zi tí ɓá ɓay a sɔ̧́lâʼa a Gáŋmbây pé i mára̧ nyá;

²¹Ɓayhí̧lé, i kaw nzáʼa lâʼa lé, njuku too, tɔ́ mûn nɛ́, a mbí lâʼa a mɛ̌ si mbɛlɛ́, njuku a fékéri mí kaw ka nzalay, njuku a fékéri mí távôn.

²²Dáy, i zi tí ka vûn a wǎyri ɓá i sɔ̧́lâʼa, a nzó karú yá lé? Malé, i ka yáw Egilize a Gáŋvbôn lé, malé i zi ɓay a niŋ ka sɔ̧rɔ̧ ké ŋgbá njukuri ka zi tí ka hɛ̧ nyá lé? A̧hí̧, i zi ɓá mi sa hí̧ wǎyri lé? I kɛrɛ ɓá, mi e ɗél wǎyri lé? Háy! Ka ŋgboro a pénáké nɔ́, mi ma ɗél wǎyri bɔʼɔ mbêw yá!

²³Katína, hɛ̧tɔ́ʼɔ ka mi ziŋ a gel a Gáŋmbây, ka a tɔ́ʼɔ hí̧ wǎyri ɓá: Gáŋmbây Zezú, ka sû̧ŋ a kú e ŋgbá nɛ́ hí̧ njuku ŋgá̧nari̧, mbí biré,

²⁴fal zi awá hí̧ Gáŋvbôn, ké haw ɓilké a sa: «Hɛ̧ nɛ́ ɓá mûn ní, ɓá ɓala a wǎyri. Í niŋ nǎŋnɔ́ ɓay a í kɛrɛ mí.»

²⁵Ɓá mbêwké kɔ́, ké mbí yoŋ ka fal sɔ̧́lâʼa, a sa: «Yoŋ nɛ́ ɓá ŋgá̧nzáʼa a fékéké a Gáŋvbôn, ka ŋgboro a sêm mûn ní. Nâm too, ka i e nzónáké, í niŋ ɓay a í kɛrɛ mí.»

²⁶Katína, sêe too ka i e sɔ̧́ biré nɛ́, ka a nzó a ɓil yoŋ nɛ́, i kaw saɓay a hûl a Gáŋmbây, ka̧ sêe a ké e regíy.

²⁷Ɓaykénɔ́, pé njuku ka sɔ̧́ biré a Gáŋmbây, malé ka nzó a ɓil yoŋ nɛ́ táŋ ŋgborokéy, ké niŋ ɓéké sé tûl mûn rá̧ sêm a Gáŋmbây Zezú.

²⁸Belɓá njuku too, ké kó bɔʼɔséna a mɛ̌ ka mûn nɛ́ ɓá béláké, rá̧ ké sɔ̧́ biréké, ka nzó a ɓil yoŋké.

²⁹Ɓayhí̧lé, njuku ka sɔ̧́ biréké, ka nzó a ɓil yoŋké, táŋ kó káwa a mɛ̌ kuu Gáŋmbây, e kɔʼɔ walɓay a Gáŋvbôn gí tûlé.

³⁰Ɓaykénɔ́, pé njukuri ɓá ŋgɛ̧́náké a bazeŋ a wǎyri kaw ɓá záŋmá, njuku a há̧narí̧ ziŋ kpɛrɛ, a fékéri ɓá ŋgɛ̧́náké ziŋ hûl.

³¹Ná walɓay ka mûn a manárí̧ kɔ̧ tûl a manárí̧ lé, Gáŋvbôn tí walɓay kɔ̧ tûl a manárí̧ nyá.

³²Dáy Gáŋmbây walɓay kɔ̧ tûl a manárí̧ a nzɛ́rɛ nárí̧, ɓay a Gáŋvbôn, ké zi ná walɓay ŋgbá nárí̧ kuu njuku a tísiriri.

³³Nǎŋnɔ́, nyîn a mǐri̧, wǎyri mí mára̧, ɓay a sɔ̧́lâʼa a Gáŋmbây lé, i zoko há̧narí̧.

³⁴Njuku, mí lá nzala lé, ké sɔ̧́lâʼa ka nzáʼaŋgboro a mɛ̌, rá̧ wǎyri mí mára̧ lé, í zi ná kɔʼɔ walɓay a Gáŋvbôn gí tûl a wǎyri. Ɓay ka kó vbí ɓay a fékéri, mi e rerú hí̧ wǎyri gelka mǐ, mí ká̧y.