Read Capanahua 1Kɔrɛŋtiyɛ̧́ri̧ 12 Bible Online

1Kɔrɛŋtiyɛ̧́ri̧ 12 - Capanahua bible

1Kɔrɛŋtiyɛ̧́ri̧ 12

¹Nyîn nírí̧, ɓay ka kó hɛ̧hí̧na a Têm Pukí, mi zi ɓá i tu gbátɓay sé tûlké.

²I tu ɓá táŋáké, ka i pa̧n láɓulaw hí̧ Gáŋmbây nyá ɓáy, kú há wǎyri ka ŋgɛ́rɛ sé pú vbônri̧ ka zi saɓay yáy.

³Ɓaykénɔ́, pé mi saɓay hí̧ wǎyri: Njuku a há̧na ma saɓay ka ŋgboro a Têm a Gáŋvbôn, a háhɛ̧ ka̧n tûl a Zezú yá, malé njuku a há̧na, ma sa ɓá: «Zezú ɓá Gáŋmbây!» A mí zi tí ɓá ka ŋgboro a Têm Pukí yáy.

⁴Katína, hɛ̧hí̧na a Têm Pukíri ná ɓórí ɓórí, dáy ɓá Têm Pukí a mbêwké nɔ́ pé hí̧.

⁵Ŋgboro niŋ péna erú ɓá ŋgɛ̧́náké, dáy ɓá Gáŋmbây a mbêwké nɔ́, pé ná niŋ hí̧ nɛ́y.

⁶Pénari̧ erú ɓórí ɓórí, dáy ɓá Gáŋvbôn a mbêwké nɔ́, pé hí̧ pénáké too hí̧ njukuri too.

⁷Nǎŋnɔ́, Têm Pukí tɔ́ʼɔ mûn nɛ́ ka ŋgboro a hɛ̧hí̧na a mɛ̌ hí̧ njuku mbêw mbêw too, ɓay a béla a njukuri too.

⁸Têm Pukí hí̧ njuku a há̧na ŋgboro ɓay rɔ̧́na, Têm Pukí a mbêwké nɔ́, hí̧ njuku a féké, ŋgboro ɓay hɛ̧túna.

⁹Têm Pukí a mbêwké nɔ́ hɛʼɛ, hí̧ njuku a féké, ŋgboro láɓulaw, a njuku a féké, kpɔ́ŋa ŋgɛ́rɛ njuku záŋmári̧.

¹⁰Têm Pukí hí̧ njuku a féké, kpɔ́ŋa niŋ hɛ̧sáʼamari̧, a njuku a féké hɛ̧túna saɓay ka Gáŋvbôn sa hí̧ nɛ́y, a njuku a féké ɓáy, hɛ̧túna wal ɓil têm a bélaké rá̧ a belyákéri. A njuku a fékéri, Têm Pukí hí̧ kuriri ŋgboro sa nzáʼaɓayri ɓórí ɓórí, a njuku a féké, ké hí̧ ŋgboro rerú ɓil ɓaykéri.

¹¹Dáy, ɓá Têm Pukí a mbêwké nɔ́ hɛʼɛ, pé niŋ hɛ̧ nɔ́rí̧ too. Ké hí̧ hɛ̧hí̧na a mɛ̌ hí̧ njukuri too, ɓá báŋké a ké ziy.

¹²Katína, Kiris ɛ́ŋ ɓá báŋa mûn mbêw ka pâmndɔ̂ʼɔkéri vbá ɓá ŋgɛ̧́náké. Vbánáké nɔ́rí̧ ka ŋgɛ̧́ nɔ́ too, ɓá mûn mbêw yáŋ.

¹³Dáy manárí̧ too, Juyífri, rá̧ njukuri ka zi tí ɓá Juyífri yáy, koyri malé njukuri ka zi tí ɓá koyri yáy, ná nyá batêm ɓay a mára̧ mûn mbêw ka ŋgboro Têm Pukí a mbêwké nɔ́. Nǎŋnɔ́ ná nzó manárí̧ too a ɓil Têm Pukí a mbêwké nɔ́ hɛʼɛ.

¹⁴Nǎŋnɔ́, mûn zi tí ka pâmndɔ̂ʼɔ mbêw yáŋ nyá, vbánáké erú ŋgɛ̧́ mambá.

¹⁵Dáy bɔʼɔ mí sa ɓá: «Mǐ, mi zi tí ɓá ndɔ̂ʼɔ yá, nǎŋnɔ́, mi zi tí a ɓil mûn nyá», a nɔ́, pé e tɔ́ʼɔ ɓá ké zi tí a ɓil mûn mbaa lé?

¹⁶A súkú mí sa ɓá: «Ka mi zi tí ɓá nûn nyá, mi zi tí a ɓil mûn nyá.» A nɔ́, pé e tɔ́ʼɔ ɓá ké zi tí a ɓil mûn mbaa lé?

¹⁷Dáy, mí ɓá mûn too pé ɓá nûn mbɛ́ŋ, ké e láɓay a̧ní lé? Malé, mûn too ɓá súkú mbɛ́ŋ, ké e nyá ba̧ny a̧ní lé?

¹⁸Nǎŋnɔ́, Gáŋvbôn ɓá pâmndɔ̂ʼɔ ka̧n mûn too, ɓá báŋké a ké ziy.

¹⁹Dáy pâmndɔ̂ʼɔ mûn too, mí ɓá mbêw yáŋ, kú tí saɓay a mûn nyá.

²⁰A gbátké lé, pâmndɔ̂ʼɔ a mûn erú ɓá ŋgɛ̧́náké, dáy mûn ɓá mbêw yáŋ.

²¹Nûn, zi ma sa hí̧ ndɔ̂ʼɔ ɓá: «Mi zi ɓay a mɔ̌ nyá!» Tûl, zi ma sa hí̧ bɔʼɔ ɓá: «Mǐ zi ɓay a wǎyri yá!»

²²Nǎŋnɔ́, pâmndɔ̂ʼɔ a ɓil mûn ka njuku kó ɛ́ŋ báŋa nɛ́rɛ̧́ké zi tí yáy, erú ka nɛ́rɛ̧ ɓá ŋgɛ̧́náké.

²³A pâmndɔ̂ʼɔ a ǎ̧yrí̧, ka ná kɔ́ ɓá zi tí ka nɛ́rɛ̧ nyáy, ná koro kuriri ɓá béláké ndé ɓala a ǎ̧wrí̧, a ǎ̧yrí̧ ka ná erú ka sɔ̧rɔ̧ saɓayké, ná hí̧ nɛ́rɛ̧ hí̧ kuriri mambá,

²⁴a tu ɓá, pâmndɔ̂ʼɔ a fékéri ka erú ka nɛ́rɛ̧ mambá, zi ziŋ nɛ́rɛ̧ nǎŋ nyá. Nǎŋnɔ́, Gáŋvbôn mɔny mûn too, ka hí̧ nɛ́rɛ̧ hí̧ gel a ǎ̧y ka ná kó zi ma nûn nyá.

²⁵Nǎŋ, ɗéma zi tí a ɓil mûn nyá, pâmndɔ̂ʼɔ ka mûn too kaw ɛ̧rɛ̧ há̧narí̧ mbêw mbêw too.

²⁶Pâmndɔ̂ʼɔ ka mûn mbêw tɔ́ʼɔsêe lé, gázínákéri too tɔ́ʼɔsêe kuu mɛ̌. Pâmndɔ̂ʼɔ ka mûn mbêw, ziŋ hɔ̧́na lé, gázínákéri too rí mûn a kuriri kuu mɛ̌.

²⁷Dáy a wǎyri, i ɓá mûn a Kiris, njuku mbêw mbêw too a bazeŋ a wǎyri, ɓá pâmndɔ̂ʼɔ a mûnké.

²⁸Ɓá báŋké nɔ́ a ɓil Egilize, Gáŋvbôn tí ɓá ɗambɛl, apotereri, a séreké ɓá porofɛ́tri, rá̧ a sáyké ɓá njuku tɔ́ʼɔhɛ̧ri̧. Falké, njuku niŋ hɛ̧sáʼamari̧, njukuri ka erú ka kpɔ́ŋa ŋgɛ́rɛ njuku záŋmári̧, njukuri ka erú ka law hí̧ndɔ̂ʼɔ hí̧ njukuri, malé gáŋnjuku tɔ́ʼɔ ŋgboro hí̧ njukuri, malé njukuri ka ziŋ kpɔ́ŋa sa nzáʼaɓay a fékéri.

²⁹Tí ɓá njukuri too pé kaw ɓá apotereri yá, malé porofɛ́tri yá, malé njuku tɔ́ʼɔhɛ̧ri̧ yá. Tí ɓá njukuri too, pé erú ka kpɔ́ŋa niŋ hɛ̧sáʼamari̧ nyá,

³⁰malé kpɔ́ŋa ŋgɛ́rɛ njuku záŋmári̧ nyá, malé kpɔ́ŋa sa nzáʼaɓayri ɓórí ɓórí, malé kpɔ́ŋa rerú ka fal nzáʼaɓaykéri yá.

³¹Nǎŋnɔ́, i ɛ́ hɛ̧hí̧na ka erú ka nɛ́rɛ̧ mambáy! Dáy a ŋgɛŋnɛ́, mi e tɔ́ʼɔ wǎyri ŋgboro ka ndé ka hɔ̧́ná tooy.