Read Capanahua 1Kɔrɛŋtiyɛ̧́ri̧ 14 Bible Online

1Kɔrɛŋtiyɛ̧́ri̧ 14 - Capanahua bible

1Kɔrɛŋtiyɛ̧́ri̧ 14

¹Dáy í ɛ́ ɗambɛl too zína. I ɛ́ hɛ̧hí̧na a Têm Pukí kɔ́, tapátké, sa gelnzáʼa a Gáŋvbôn.

²Njuku mí saɓay ka nzáʼaɓay a fékéri, ké zi saɓay hí̧ njukuri yá, dáy ké saɓay hí̧ Gáŋvbôn, ɓayhí̧lé njukuri lá ɓil ɓay a mɛ̌ nyá, ka ŋgboro kpɔ́ŋa a Têm Pukí, pé ké saɓay a gbátɓay a hɛ̧ a múnákéri.

³Dáy, njuku mí sa gelnzáʼa a Gáŋvbôn, ké sa hí̧ njukuri, ɓay a kú hɔ̧́ a ɓil láɓulaw, ɓay a kpúmûn rá̧ ɓáy volaw a kuriri.

⁴A njuku, ka sa nzáʼaɓay a fékéri, nɛ́rɛ̧ ɓá tûlé hɛʼɛ, dáy njuku ka sa gelnzáʼa a Gáŋvbôn, ké hí̧ ŋgɛ́rɛ hí̧ Egilize too.

⁵Mi zi ɓá wǎyri too, í saɓay ka nzáʼaɓayri ɓórí ɓórí, dáy mi zi ndé ɓá, í sa gelnzáʼa a Gáŋvbôn. Ɓayhí̧lé njuku ka sa gelnzáʼa a Gáŋvbôn, erú ka nɛ́rɛ̧ ndé njuku ka sa nzáʼaɓayri ɓórí ɓórí, mi tí yá lé, njuku a féké, ké rerú ka ɓayké, ka nzáʼaɓay a féké ka Egilize too e lá ɓilké, ka e hí̧ kuriri ŋgɛ́rɛ a ɓil láɓulaw.

⁶Nǎŋnɔ́, nyîn nírí̧, mi vbí wǎyri: Mǐ, mí gé gel a wǎyri, a gé saɓay hí̧ wǎyri ka nzáʼaɓay a fékéri, a̧hí̧ ɓá nɛ́rɛ̧ a mǐ ka gel a wǎyri lé? Ka ɓay a mǐ, mí zi ten táŋa a hɛ̧ ka e gína nyá, mi zi hí̧ hɛ̧túna nyá, mí zi tí ɓá gelnzáʼa a Gáŋvbôn nyá malé hɛ̧tɔ́ʼɔ yáy, nɛ́rɛ̧ké ɓá hí̧ lé?

⁷Ná mbí gala a hɛ̧ri̧, ɓá báŋa tɛ̧́w malé nzáŋá a kú haŋ. Kɔ́ŋké, mí zi tɛ̧́ ɓá béláké yáy, í niŋ a̧ní rá̧ a tu kɔ́ŋ si̧ŋké lé?

⁸Malé, njuku ul tɛ̧̂w bére, mí zi ul tɛ̧́ ɓá táŋáké yáy, e niŋ a̧ní rá̧, njukuri e tu ɓá, ul tɛ̧̂w mɔny mûn ɓay a sé bére lé?

⁹Wǎyri kɔ́, wǎyri mí sa nzáʼaɓay a féké ka njukuri zi lá yáy, e niŋ a̧ní rá̧, kú e lá ɓil ɓay ka i kaw sanáké lé? Ɓay a wǎyri e tá ɓá báŋa kúna.

¹⁰Nzáʼaɓayri erú ɓórí ɓórí ka tísiri, nǎŋnɔ́ ɓaykéri too, erú ka tɛ̧́rɛ̧́ ɓayké.

¹¹Mǐ, mí zi lá nzáʼaɓayké yáy, njuku ka saɓayké, mi kaw ɓá gɔ́rɔ́ ka nûn nɛ́, mɛ̌ kɔ́, ké kaw ɓá gɔ́rɔ́ ka nûn ní.

¹²Nǎŋnɔ́ wǎyri kɔ́, ka i kaw ɛ́ a ŋgɛ́rɛ hɛ̧hí̧na a Têm Pukí, í ɛ́ hɛ̧hí̧na ka e hí̧ hɔ̧́na hí̧ Egilize.

¹³Ɓaykénɔ́, pé njuku ka sa nzáʼaɓay a féké, ka njukuri zi lá yáy, belɓá ké gɔ́ŋ Gáŋvbôn, ɓáy ké hí̧ nɛ́ kpɔ́ŋa rerú ka ɓayké ɓá táŋáké, ka nzáʼaɓay ka njukuri láy.

¹⁴Ɓayhí̧lé, mi gɔ́ŋ Gáŋvbôn ka nzáʼaɓay a féké ka njukuri zi lá yáy lé, têm a mǐ e a ɓil gɔ́ŋ Gáŋvbôn, dáy hɛ̧túna a mǐ, zi niŋ péna nyá.

¹⁵Nǎŋnɔ́ dáy, a̧hí̧ mi e niŋáké lé? Mi e gɔ́ŋ Gáŋvbôn ka têm a mǐ, dáy, mi e gɔ́ŋ nɛ́ ka hɛ̧túna a mǐ kɔ́. Mi e ɗí si̧ŋ ka têm a mǐ, dáy, mi e ɗí si̧ŋ ka hɛ̧túna a mǐ kɔ́.

¹⁶Ɓayhí̧lé, mɔ̌, mí zi awá hí̧ Gáŋvbôn ka têm a mɔ̌y, njuku a baaké ka gí kaw ɓil mára̧ kuu mɔ̌, ka a zi lá yáy, e zibɔʼɔké «Amɛn» a ɓil zi awá a mɔ̌ a̧ní lé ?

¹⁷Katína, zi awá a mɔ̌ hí̧ Gáŋvbôn, mí bel a̧ní tooy, zi hí̧ nɛ́rɛ̧ hí̧ njuku a ǎ̧wrí̧ yá.

¹⁸Mi zi awá hí̧ Gáŋvbôn, ɓayhí̧lé mi sa nzáʼaɓay a fékéri ndé wǎyri too.

¹⁹Dáy, a ɓil mára̧ a Egilize, mi zi ɓá mi sa tɛ̧́rɛ̧́ɓay ndíɓí, ka njukuri e lánáké, ɓay a tɔ́ʼɔhɛ̧ hí̧ njukuri, ka tûl sa tɛ̧́rɛ̧́ɓay kúmrá̧ké bôo, ka nzáʼaɓay a féké ka njukuri zi lá yáy.

²⁰Nyîn nírí̧, í zi ná kɛrɛ hɛ̧ ɓá báŋa gun a léléri. A hɛ̧ ka kó ɓékéhɛ̧ lé, í kaw ɓá báŋa gun a léléri ka zi tu ɓéké yáy, dáy a ɓil hɛ̧ niŋa a wǎyri lé, i kaw ɓá njuku a hɔ̧́nákéri.

²¹Kú ɗé a ɓil sáŋna a Mɔyíze ɓá: «Gáŋmbây sa ɓá: Ka ŋgboro a njuku nzáʼaɓay a fékéri, pé mi e saɓay hí̧ njuku a nɛ́rí̧, mi e saɓay hí̧ kuriri ka nzáʼa a gɔ́rɔ́ri. A ɓilké nɔ́ too, kú tí zi láɓay a mǐ nyá.»

²²Nǎŋnɔ́, sa nzáʼaɓay, ná ɓá ŋgána hí̧ njukuri ka zi láɓulaw yáy, a zi tí ɓá ɓay a njukuri ka láɓulaw yá. Dáy, sa gelnzáʼa a Gáŋvbôn, ná ɓá ŋgána hí̧ njuku láɓulawri, a zi tí ɓá ɓay a njukuri ka zi láɓulaw yáy yá.

²³Ná mbí galahɛ̧, ɓá báŋa nɛ́ Egilize too mára̧ há̧narí̧, rá̧ njukuri too, tí saɓay ka nzáʼaɓay a fékéri, rá̧ njuku a baakéri malé njukuri ka zi láɓulaw yáy, mí ri gé ziŋ wǎyri, kú zi kɛrɛ ɓá i kaw ɓá dɔ̂ʼɔri nyá lé?

²⁴Dáy njukuri too, mí sa gelnzáʼa a Gáŋvbôn, rá̧ njukuri ka zi láɓulaw yá, malé njuku a baakéri ka gí ɓá ɓay a lánáké, mí gí ri ziŋ wǎyri, kú e láɓayké, a tu ɓéké a kuriri. Nǎŋnɔ́, ɓay a kú lá tooy e walɓay kɔ̧ tûl a kuriri,

²⁵kɛrɛ a múnáké a ɓil law a kuriri e tɛ̧́ kɔ̧ kála. A goló kú e huku siri, a hɔ̧́ Gáŋvbôn, a sa: «Katína, Gáŋvbôn e a bazeŋ a wǎyri!»

²⁶Nyîn nírí̧, a̧hí̧ mi e sanáké, ɓay kɔ́rɔ́ ɓay a mǐ lé? Gelka i mára̧ há̧narí̧ ɓay a gɔ́ŋ Gáŋvbôn, njuku a há̧na a bazeŋ wǎyri, ké ɗí si̧ŋ, njuku a féké ké tɔ́ʼɔhɛ̧, njuku a féké ka erú ka ɓay ten táŋa a hɛ̧y, njuku a féké, ké sa nzáʼaɓay a fékéri malé a njuku a féké ɓáy ka ma rerú ka ɓayké. Belɓá hɛ̧ too, ké tá ka ŋgboroké, ɓay a niŋ rá̧ Egilize ké hɔ̧́ a ɓil láɓulaw.

²⁷Njuku saɓay a nzáʼaɓay a fékéri erú lé, njukuri sére, malé sáy a bazeŋ a kuriri kú saɓay, a njuku a féké, ké rerú a ɓayké, a nzáʼaɓay a njukuri láy.

²⁸Rá̧ njuku rerú ka ɓayké mi zi tí yá lé, belɓá kú kaw ták, a njuku too ké sa ka lawɛ́ hí̧ mûn nɛ́ rá̧ Gáŋvbôn.

²⁹A porofɛ́tri lé, njukuri sére, malé sáy kú saɓay, a gázína njukuri kú kaw, a wal ɓil ɓayké a kú sáy.

³⁰Rá̧ Gáŋvbôn mí tɔ́ʼɔ táŋa hɛ̧ a múnáké a mɛ̌ hí̧ njuku a há̧na lé, belɓá njuku ka kaw saɓay, ké pɔŋ nzɛ́ʼɛ.

³¹Ɓayhí̧lé wǎyri too, i ma sa gelnzáʼa a Gáŋvbôn, dáy belɓá i sa tɔ́ŋ há̧narí̧ rá̧ njukuri, kú ziŋ hɛ̧túna, rá̧ kpúmûn a ɓil ɓay a Gáŋvbôn.

³²Têm a porofɛ́tri lá nzáʼa a porofɛ́tri.

³³Ɓayhí̧lé Gáŋvbôn, zi tí ɓá Gáŋvbôn ka niŋ hɛ̧ táŋ ŋgboroké yá, ké kaw ɓá Gáŋvbôn vónáké. Ɓá báŋké, ka niŋ a ɓil mára̧ a njuku a Gáŋvbônri̧ tooy.

³⁴Belɓá wûnynjukuri, kú kaw ták, a lá ɓáy, a ɓil mára̧ a njuku a Gáŋvbônri̧. Kú zi tí ka ŋgboro saɓay yá. Ɓá báŋké ka sáŋna a Gáŋvbôn sáy, kú pɔtûl a kuriri.

³⁵Kú mí zi ɓay a lá táŋa ɓáy há̧na lé, kú vbí wɔ̧rɔ̧́ a kuriri ka vûn. Ɓayhí̧lé zi belyá ɓay a wûnynjuku, ké saɓay a ɓil mára̧ a njuku a Gáŋvbônri̧.

³⁶I kɛrɛ ɓá ɓay a Gáŋvbôn tɛ̧́ ka gel a wǎyri lé? Malé, ɓá wǎyri hɛʼɛ a wǎyri pé nyá ɓayké lé?

³⁷Njuku mí kɛrɛ ɓá ké kaw ɓá porofɛ́t a Gáŋvbôn, malé ké e ka Têm a Gáŋvbôn lé, belɓá ké tu ɓá, ɓay nɛ́ ka mi ɗé hí̧ wǎyri, ɓá sáŋna a Gáŋmbây.

³⁸Dáy, njuku mí zi tu ɓayké yáy, tɔ́ʼɔ ɓá Gáŋvbôn, zi tu nɛ́ nyá kɔ́.

³⁹Nǎŋnɔ́, nyîn nírí̧, í ɛ́ ŋgboro saɓay ɓá báŋa a porofɛ́tri, a í zi ná de njuku saɓay ka nzáʼaɓay a fékéri.

⁴⁰Dáy, belɓá hɛ̧ too ké niŋ ka ŋgboroké ɓá béláké.