Read Capanahua 1Kɔrɛŋtiyɛ̧́ri̧ 16 Bible Online

1Kɔrɛŋtiyɛ̧́ri̧ 16 - Capanahua bible

1Kɔrɛŋtiyɛ̧́ri̧ 16

¹Ɓay ka kó hɛ̧ mára̧ ɓay a hí̧ndɔ̂ʼɔ hí̧ njuku láɓulaw a Zerúzalɛ̂mri̧: Í niŋ ɓá báŋké, ka mi tɔ́ʼɔ hí̧ Egilize a Galáteri.

²A sêe dimásí dát lé, njuku mbêw mbêw too a bazeŋ a wǎyri, ké mɔny hɛ̧hí̧na a mɛ̌ ka̧n ɓórí ɓá báŋké a ké may, a í zi ná zoko ɓá géna a mǐ rá̧, a i tí mára̧ hɛ̧.

³Gelka mǐ, mí gé ká̧y, mi e pé njukuri ka i ten kuriri, a hí̧ kuriri mbété ɓay a kú ɓá hɛ̧hí̧na a wǎyri sé Zerúzalɛ̂m,

⁴Mi ná ɓá mí sé kɔ́y, rú e sé mbêw.

⁵Mi gé gel a wǎyri, a fal ka mǐ, mí tá sé Maseduwa̧n, ɓayhí̧lé, mi zi ɓá mí tá lá Maseduwa̧n.

⁶Há̧na, mi e gé kaw ziŋ wǎyri nâm kpay, kɔ́yálé fêw lekétel e tána, nǎŋnɔ́ i e hí̧ndɔ̂ʼɔ hí̧ mí ɓay a mi tá sé gel gɔrɔ a féké too ka mi e sénay.

⁷Ɓayhí̧lé, mi zi ɓá, mi gé kó wǎyri ɓǎŋ ka tá yá. Mi zi ɓá mi gé kaw kuu wǎyri kpay, a Gáŋmbây mí zibɔʼɔké.

⁸Dáy, mi zi ɓá mi gé kaw Efɛze, ka̧ nâm Paŋtekót.

⁹Ɓayhí̧lé mi ziŋ ŋgboro ɓá hɔ̧́náké ɓay a niŋ péna ka e hí̧ lénáké ɓá ŋgɛ̧́náké dáy njuku ŋgá̧nari̧ kɔ́ ŋgɛ̧́ mambá.

¹⁰Timoté mí gé ka̧ lé, í nyá nɛ́ ɓá béláké, a í niŋ rá̧ ké kaw táŋ wɔ́w a bazeŋ a wǎyri. Ɓayhí̧lé, ké kaw niŋ péna a Gáŋmbây ɓá báŋa a mǐ kɔ́.

¹¹Njuku a há̧na ké zi ná yáw nɛ́, í hí̧ndɔ̂ʼɔ hí̧ nɛ́ rá̧lǒo ké regí ɓá béláké gí ziŋ mí. Ɓayhí̧lé, mǐ kuu nyîn nírí̧ rú kaw zoko nɛ́.

¹²A nyîn a manárí̧ Apoló, mi kaw sa hí̧ nɛ́ dát, ɓá ké gé gel a wǎyri kuu nyîn a maná a fékéri, dáy ké zi ɓay a gé sá̧ a ŋgɛŋnɛ́ nyá ɓáy. Gelka, ké mí ziŋ ŋgboroy, Ké e géna.

¹³Í ná nâm nyá, a í kaw kpú a ɓil láɓulaw, í ŋgá̧law a wǎyri, a í ew ɓá kpúnáké.

¹⁴Í niŋ hɛ̧ too, ka law zína.

¹⁵I tu Stefanas rá̧ î̧n a mɛ̌ri̧: I tu ka tísiri a Akayí, kú kaw ɓá titíla njukuri ka láɓulaw, pé a rembí mûn a kuriri ɓay a niŋ péna a hí̧ndɔ̂ʼɔ hí̧ njuku láɓulaw a fékéri. Dáy mi vbí wǎyri, nyîn nírí̧:

¹⁶Í hɛʼɛ mára̧ njuku nɔ́rí̧, rá̧ njukuri too, ka niŋ péna a Gáŋvbôn ka law mbêw ɓá báŋa kuriri.

¹⁷Mi kaw ka law sáʼa ɓay tûl gína a Stefanas, Fɔrtúnatús rá̧ Akayíkús. Kú hí̧ mí hɛ̧ri̧ ka mbá mí, ɓay ka i zi tí ka gelé yáy,

¹⁸katína, kú volaw ní ɓá báŋké nɔ́, a kú niŋ ziŋ wǎyri. Í tu ɗél mára̧ njuku nɔ́rí̧!

¹⁹Egilize a tísiri a Azíri nam wǎyri too. Akilás rá̧ Pirisîl wûny a mɛ̌, rá̧ njuku láɓulawri too ka mára̧ a ɓil vûn a kuriri, nam wǎyri ka rɛŋ a Gáŋmbây.

²⁰Nyîn nírí̧ too ka e a geléy, nam wǎyri. Í sí̧ŋ há̧narí̧ a nam há̧narí̧ too ɓá báŋa nyînrí̧ ka rɛŋ a Gáŋmbây.

²¹Mǐ Pôl, ka ndɔ̂ʼɔ ní pé ɗé hɛ̧nama nɛ́y.

²²Njuku mí zi Gáŋmbây yá lé, hɛ̧hána a Gáŋvbôn, ké kɔ̧ tûlé! Maranáta[4].

²³Béla a Gáŋmbây Zezú, ké kaw kuu wǎyri!

²⁴Mi zi wǎyri too a ɓil káwa mbêw kuu Kiris.