Read Capanahua 1Kɔrɛŋtiyɛ̧́ri̧ 2 Bible Online

1Kɔrɛŋtiyɛ̧́ri̧ 2 - Capanahua bible

1Kɔrɛŋtiyɛ̧́ri̧ 2

¹Sêe ka mi gé gel a wǎyri nyîn nírí̧, ɓay a ten hí̧ wǎyri táŋa hɛ̧ a múnáké a Gáŋvbôn ka hí̧ mí, mi zi mbí nzáʼaɓay ka ndé ka hɔ̧́na malé hɛ̧túna há̧na ɓórí nyá.

²Ɓayhí̧lé a ɓil nâm ka mi niŋ a bazeŋ a wǎyri, mi zi ɛ́ ŋgboro tu hɛ̧ a féké ɓórí yá, ɓá Zezú Kiris, Zezú Kiris mbêw yáŋ, a kú ɓara nɛ́ ka̧n tûl dii vbatay.

³Ɓaykénɔ́, pé mi gé tɔ́ʼɔ mûn ní a mbɛlɛ́ a wǎyri táŋ ŋgɛ́rɛ, a ɓil wɔ́w rá̧ mûn tɔ́na;

⁴Hɛ̧tɔ́ʼɔ a mǐ, rá̧ tɔ́ʼɔɓay a mǐ, zi kó hɛ̧ ka gí ka ŋgboro a rɔ̧́na a njukuri yá, dáy ɓá kpɔ́ŋa a Têm a Gáŋvbôn pé tɔ́ʼɔ ŋgɛ́rɛ a ɓayké.

⁵Nǎŋnɔ́, láɓulaw a wǎyri zi ew tûl rɔ̧́na a njukuri yá, ké ew ɓá tûl kpɔ́ŋa a Gáŋvbôn.

⁶A ɓilké nɔ́ too, rú tɔ́ʼɔ rɔ̧́na hí̧ njukuri ka kpáʼa a ɓil Têm Pukí. Dáy rɔ̧́náké, zi tí ɓá rɔ̧́na a tísiri nɛ́ nyá, malé rɔ̧́na a mbâyri a kaw tûl a njuku a tísiriri, ka zoko ɓewa yá.

⁷Mi tɔ́ʼɔ rɔ̧́na a múnáké a Gáŋvbôn, a ké ɓá mú njukuri. Rɔ̧́naké, Gáŋvbôn tí ten ɗambɛl ɓay a manárí̧ rá̧ pé a mɔny tísiri, ɓay a ná ziŋ hɔ̧́na a mɛ̌.

⁸Mbây a há̧na mbêw a bazeŋ a mbâyri ka tísiri nɛ́, ka tu rɔ̧́náké zi tí yá, ɓayhí̧lé, kú mí tu rɔ̧́náké, kú zi ma ɓara ka̧n tûl dii vbatay Gáŋmbây a hɔ̧́ná nyá.

⁹Dáy, ɓá báŋké a kú ɗé ɓá: «Hɛ̧ ka nûn a njuku zi kó malé súkú a njuku zi lá bɔʼɔ mbêw yáy, Hɛ̧ ka njuku a há̧na zi kɛrɛ ka lawɛ́ bɔʼɔ mbêw yáy, pé Gáŋvbôn mɔny, ɓay a njukuri a ké zi kuriri.»

¹⁰Dáy, ɓá ɓay a manárí̧ pé Gáŋvbôn ten táŋa a hɛ̧ a múnáké nɔ́, ka ŋgboro a Têm Pukí a mɛ̌. Ɓayhí̧lé Têm Pukí tu hɛ̧ too, hɛ̧ ka ɓá hɛ̧ a múnáké a ɓil law a Gáŋvbôn.

¹¹A gé tu hɛ̧ a múnáké a ɓil law a njukuy? Njuku túnáké mbêw zi tí yá, ɓá têm mûn nɛ́ mbêw yáŋ. Mambɛ̧́nɛ́ kuu hɛ̧ a múnáké a Gáŋvbôn, ɓá Têm a Gáŋvbôn mbêw yáŋ, pé tu kɛrɛ a Gáŋvbôn.

¹²Manárí̧, ná zi ziŋ Têm ka gí ka tísiri nɛ́ nyá, ná ziŋ Têm ka gí a gel a Gáŋvbôn, rá̧ ná ma tu hɛ̧hí̧na too ka Gáŋvbôn hí̧ nárí̧.

¹³Dáy ná zi saɓayké ka ŋgboro a rɔ̧́na ka gí a gel a njukuri yá, ná saɓayké ka rɔ̧́na ka gí a ŋgboro a Têm a Gáŋvbôn. Nǎŋnɔ́, pé ná ten táŋa gbátɓay a Têm Pukí hí̧ njukuri ka e ka Têm Pukíké ka mûn a kuriri.

¹⁴Dáy njuku ka ŋgboro a hay mûn mbêw yáŋ, ma zibɔʼɔ gbátɓay ka gí ka ŋgboro a Têm a Gáŋvbôn nyá, ná ɓá hɛ̧dɔ̂ʼɔ ka nûn nɛ́, ké zi ma lá ɓilké yá, ɓayhí̧lé ka ŋgboro a Têm a Gáŋvbôn mbêw yáŋ, pé njuku ma wal ɓilké.

¹⁵Njuku ka e ka Têm a Gáŋvbôn, ma walɓay sé tûl hɛ̧ri̧ too, njuku a há̧na ma walɓay ŋgbá nɛ́ nyá.

¹⁶Ɓayhí̧lé, kú ɗé ɓá: «A gé tu kɛrɛ a Gáŋmbây lé? A gé ma hí̧ nɛ́ nzáʼa nzɛ́rɛ lé?» Dáy a manárí̧, ná erú ka kɛrɛ a Kiris.