Read Capanahua 1Kɔrɛŋtiyɛ̧́ri̧ 3 Bible Online

1Kɔrɛŋtiyɛ̧́ri̧ 3 - Capanahua bible

1Kɔrɛŋtiyɛ̧́ri̧ 3

¹Katína nyîn nírí̧, mi zi ziŋ saɓay hí̧ wǎyri ɓá báŋa a njukuri ka erú ka Têm a Gáŋvbôn nyá: Dáy mi saɓay hí̧ wǎyri, ɓá báŋa a njuku a tísiriri, ɓá báŋa gun a léléri a ɓil láɓulaw.

²Mi hí̧ wǎyri pâm, a zi tí ɓá lâʼa a kpúnáké yá, ɓayhí̧lé i zi marú̧ nyá. Nǎŋnɔ́ ŋgɛŋnɛ́ kɔ́, i zi marú̧ yá ɓáy,

³ɓayhí̧lé, i e a ɓil káwa a ŋgboro a hay mûn ɓáy. Gelka, kú kaw kó lé kpere rá̧ péna sɛ́rɛ a bazeŋ a wǎyri, zi tɔ́ʼɔ ɓá káwa a hay mûn pɔ̧́nɔ́ nyá lé? Zi tɔ́ʼɔ ɓá sé bɔʼɔséna a njuku a tísiriri pɔ̧́nɔ́ nyá lé?

⁴Gelka njuku a há̧narí̧ a bazeŋ a wǎyri sa ɓá: «Ɓurú, rú ɓá njuku a Pôl», njuku a fékéri sa ɓá: «Ɓurú, rú ɓá njuku a Apoló», zi tí ɓá sé bɔʼɔséna a njuku a tísiriri pɔ̧́nɔ́ nyá lé?

⁵Dáy a gé ɓá Apoló? A gé ɓá Pôl? Rú too, rú kaw ɓá njukupéna a Gáŋvbôn baa, ka ŋgboro a péna a ɓurú, pé i ziŋ láɓulaw. Njuku mbêw mbêw too a bazeŋ a ɓurú niŋ ɓá péna ka Gáŋmbây hí̧ nɛ́ ɓá ké niŋ.

⁶Mǐ, mi rú, Apoló gí ɓá mbii kɔ̧rú̧, dáy ɓá Gáŋvbôn pé niŋ hɔ̧́.

⁷Nǎŋnɔ́, njuku ka rú rá̧ njuku ka ɓá mbii kɔ̧rú̧y, zi tí ka nɛ́rɛ̧ nyá, ɓá Gáŋvbôn ka niŋ hɔ̧́y, pé erú ka nɛ́rɛ̧.

⁸Njuku ka rú, rá̧ njuku ka ɓá mbii kɔ̧rú̧y, njuku tá mbɛ́ŋnɛ́ zi tí yá. Dáy Gáŋvbôn e hí̧ njuku mbêw mbêw too, kpáʼandɔ̂ʼɔ péna a mɛ̌ sé tûl péna niŋ a mɛ̌.

⁹Ɓayhí̧lé, ná niŋ péna mbêw kuu Gáŋvbôn, a wǎyri, i kaw ɓá wâʼa a Gáŋvbôn. I kaw ɓá vûn a Gáŋvbôn kɔ́.

¹⁰Ka ŋgboro a hɛ̧hí̧na a Gáŋvbôn ka hí̧ mí, mi niŋ péna ɓá báŋa a gbát njukupéna mbó vûn, a laɓa ndálvûnkéri ɓá béláké. Ŋgɛŋnɛ́, njuku a féké gí mbó gekén ka̧n tûlké. Dáy, belɓá njuku mbêw mbêw too, ké ŋgbá tûlé ɓá béláké sé tûl báŋ mbónáké.

¹¹Ɓayhí̧lé ndálvûnké erú dá, ɓá Zezú Kiris ka mûn nɛ́, njuku a há̧na zi ma gí laɓa ndálvûn a féké mbaa.

¹²Njuku a há̧narí̧ e gí mbó vûnké, ka vbí̧rí̧lari, ka lari, ka béla sawri, njuku a fékéri e gí niŋ ka dii, ka nzára, ka hoy.

¹³Dáy péna a njuku mbêw mbêw too e tɔ́ʼɔ mûn nɛ́ ɓá táŋáké ka sêe walɓay. Ɓayhí̧lé sêeké nɔ́ e tɔ́ʼɔ mûn nɛ́ ka hɔrɛ, hɔrɛ e lé péna njuku mbêw mbêw too, ɓay a tɔ́ʼɔ nɛ́rɛ̧ké.

¹⁴Njuku, ka zá vûn a mɛ̌, ka hɔrɛ zi rɛŋ rú yáy, e ziŋ kpáʼandɔ̂ʼɔ péna a mɛ̌.

¹⁵A njuku ka vûn a mɛ̌ rɛ́ŋ, tí ziŋ kpáʼandɔ̂ʼɔ péna a mɛ̌ nyá, mɛ̌ ké e pɛ̧́na, dáy e ná ɓá báŋa njuku ka ziŋ pɛ̧́na tá lá ɓil gáŋ hɔrɛ.

¹⁶I zi tu ɓá, i ɓá vûn a Gáŋvbôn rá̧ Têm a Gáŋvbôn e ka mûn a wǎyri nyá lé?

¹⁷Dáy njuku mí gbɛʼɛrɛ vûn a Gáŋvbôn, Gáŋvbôn e gbɛʼɛrɛ nɛ́ kɔ́. Ɓayhí̧lé vûn a Gáŋvbôn, ɓá vûn a táŋáké, dáy vûnké ɓá wǎyri.

¹⁸Njuku a há̧na, ké zi ná rɔ́ʼɔ tûlé: Njuku mí kɛrɛ a bazeŋ a wǎyri ɓá ké kaw ɓá njuku rɔ̧́na ka ŋgboro a kóna njuku lé, ké tɛ̧́ dɔ̂ʼɔ rá̧ ké retɛ̧ gbát njuku a rɔ̧́náké.

¹⁹Ɓayhí̧lé rɔ̧́na a tísiri, ná ɓá hɛ̧dɔ̂ʼɔ ka nûn a Gáŋvbôn. Katína, kú ɗé ɓá: «Gáŋvbôn ŋgbá njuku rɔ̧́na a tísiriri a ɓil rii rɔ̧́na a kuriri.»

²⁰Ké sa ɓáy ɓá: «Gáŋmbây tu kɛrɛ a njuku rɔ̧́nari̧, ké tu ɓá rɔ̧́náké zi tí ka nɛ́rɛ̧ nyá.»

²¹Nǎŋnɔ́, njuku a há̧na mbêw, ké zi ná ɓá mûnrína a mɛ̌ ka̧n tûl a njukuri, ɓayhí̧lé hɛ̧ too ɓá ɓala a wǎyri.

²²Pôl, Apoló, malé Píyɛ́r, tísiri, ndísɛ̌ʼɛ, hûl, nâm a sénɛ́ malé nâm a pélé too, ɓá ɓala a wǎyri.

²³Dáy a wǎyri, i kaw ɓá ɓala a Kiris, Kiris kaw ɓá ɓala a Gáŋvbôn.