Read Capanahua 1Kɔrɛŋtiyɛ̧́ri̧ 4 Bible Online

1Kɔrɛŋtiyɛ̧́ri̧ 4 - Capanahua bible

1Kɔrɛŋtiyɛ̧́ri̧ 4

¹Nǎŋnɔ́, belɓá kú kó nárí̧, ɓá njukupéna a Kiris, ɓá báŋa njukuri ka ziŋ péna ɓay tɔ́ʼɔ táŋa a hɛ̧ a múnákéri a Gáŋvbôn.

²Dáy hɛ̧ a kú vbí njuku, ka e tûl pénay, ɓá ké niŋ pénáké ka law mbêw.

³A mǐ lé, zi tí ka nɛ́rɛ̧ hí̧ mí nyá, ka wǎyri mí walɓay kɔ̧ tûl ní malé a gel a njuku walɓay a njukuri. Mǐ, mi zi walɓay kɔ̧ tûl ní, ka mûn ní nyá.

⁴Katína, law ní zi lú mí nyá, dáy tí ɓá a nɔ́ pé tɔ́ʼɔ ɓá mi kaw ɓá njuku a ndáráké yá, njuku ka e walɓay a mǐ, ɓá Gáŋmbây.

⁵Ɓaykénɔ́, pé í zi ná tí walɓay ɗambɛl ka̧n tûl a njuku. Í zoko gína a Gáŋmbây, mɛ̌ pé e ten hɛ̧ri̧ ka mú ɓil tirí̧ma too kɔ̧ kála, ka ten kɛrɛ a njukuri ka mú a ɓil law a kuriri kɔ̧ kála. A goló ge lé too, e ziŋ ɗéla a gel a Gáŋvbôn sé tûl péna niŋ a mɛ̌.

⁶Nyîn nírí̧, mi saɓay nɛ́ nǎŋ hí̧ wǎyri, sé tûl a Apoló kuu mǐ, ɓay a tɔ́ʼɔ wǎyri ŋgboro. Nǎŋnɔ́ mi zi ɓá, í mbɛl ka ŋgboro bɔʼɔséna ɓurú, táŋ tá tûl hɛ̧ ka ɗé ka̧n ɓil Mbété a Gáŋvbôn. Njuku a há̧na, ké zi ná hɔ̧́tûlé, a mbí mûn nɛ́ tɔ́ŋ fal a njuku mbêw, a yáw njuku a féké.

⁷A̧hí̧, tɔ́ʼɔ ɓá mɔ ndé njuku a ǎ̧wrí̧ lé? Hɛ̧ ka mɔ erú tooy, zi tí ɓá mɔ ziŋ a gel a Gáŋvbôn nyá lé? Dáy mí ɓá nǎŋ, ɓayhí̧rá̧ mɔ niŋ wélé ɓá báŋa mɔ zi ziŋ hɛ̧ké a gé lé yáy lé?

⁸Dáy i ziŋ hɛ̧ri̧ too ka i zi dá! I kaw ɓá njuku hɛ̧zíŋári̧ dá! I kaw ɓá mbây dáy ɓurú, rú zi tí ɓá mbây yá. Katína, wǎyri mí kaw ɓá mbây, sa a goló ɓá ɓurú kɔ́, rú kaw mbây kuu wǎyri!

⁹A kɛrɛ a mǐ, mi kó ɓá Gáŋvbôn, ɓá maná apotereri kaw kɔ́rɔ́ fal, ná kaw ɓá báŋa njukuri a kú ɓá ɓay ŋgbá kuriri ɓay a ínáké. Katína, rú tɛ̧́ hɛ̧ kona a tísiri, a aŋnzeri rá̧ a njukuri too.

¹⁰Rú kaw ɓá dɔ̂ʼɔ ɓay tûl a Kiris, dáy a wǎyri, i kaw ɓá njuku rɔ̧́na ka ŋgboro a kaw mbêw kuu Kiris, rú ŋgɛ́rɛ yá, dáy a wǎyri, i erú ka ŋgɛ́rɛ. Ɓurú, kú yáw rú, dáy a wǎyri, kú hɛʼɛ wǎyri!

¹¹Ka sénɛ́ ɓáy, rú kaw lá nzala rá̧ kpɔʼɔmbii, laa rína mbá rú. Kú kaw vbá rú, rú há̧ra̧ ɔ sâa,

¹²rú niŋ péna ka ŋgɛ́rɛ a ndɔ̂ʼɔ ɓurú, ɓay a ziŋ lâʼa a nzáʼa ɓurú. Gelka kú fára rúy, rú ɗí béla a Gáŋvbôn kɔ̧ tûl a kuriri. Kú ɓá rú tɔ́ʼɔsêe, rú ŋgá̧law a ɓurú,

¹³gelka kú sa ɓéké ɓay kɔ̧ tûl ɓurú, rú reka béla ɓay hí̧ kuriri. Kú kaw kó rú a ŋgɛŋnɛ́ ɓá báŋa tûl râw a tísiri, a kó rú ɓá báŋa a gázín njukuri.

¹⁴Mi zi ɗé hɛ̧ nɛ́rí̧ hí̧ wǎyri ɓay a mi ɓá sɔ̧rɔ̧ ka̧n nûn a wǎyri yá, dáy ɓay a tɔ́ʼɔ ŋgboro hí̧ wǎyri ɓá báŋa gun zína a mǐri̧.

¹⁵Wǎyri, mí ziŋ njukuri ka kaw tɔ́ʼɔ wǎyri hɛ̧ sé tûl a Kiris kumrá̧ké bôo rá̧ kɔ́, i zi tí ka bâa ɓá ŋgɛ̧́náké yá, i erú bâa ɓá mbêw yáŋ. Ɓayhí̧lé gelka mi ɓá Bélaɓay gírú wǎyri, mi tɛ̧́ bâa a wǎyri a ɓil káwa a wǎyri mbêw kuu Zezú Kiris.

¹⁶Nǎŋnɔ́, mi vú hí̧ wǎyri, í mbɛl bɔʼɔséna a mǐ.

¹⁷Ɓaykénɔ́, pé mi pé Timoté, gun zína a mǐ, ka erú ka law mbêw a ɓil láɓulaw hí̧ Gáŋmbây. Ké e gé toʼoro wǎyri sé tûl báŋ bɔʼɔséna a mǐ, kuu Zezú Kiris, ɓá báŋké ka mi tɔ́ʼɔ lá gelri too, a ɓil Egilizeri tooy.

¹⁸Njuku a fékéri a bazeŋ wǎyri hɔ̧́tûl a kuriri, a kɛrɛ ɓá mi tí gé gel a wǎyri mbaa.

¹⁹Dáy, Gáŋmbây mí zibɔʼɔkéy, zaa lé mi e gé gel a wǎyri. A goló, mi e tu ɓil ɓay sána a njuku kpútûl nɔ́rí̧, rá̧ hɛ̧ a kú ma ɓay niŋáké kɔ́.

²⁰Ɓayhí̧lé káwa Mbây a Pû a Gáŋvbôn, zi tí ɓá ka ŋgboro a ɓay yá, ɓá ka ŋgboro a kpɔ́ŋa.

²¹A̧hí̧ i ziy? Mi gé gel a wǎyri ka ndêe, malé mi gé, ka law zína rá̧ law a vónáké lé?