Read Capanahua 1Kɔrɛŋtiyɛ̧́ri̧ 5 Bible Online

1Kɔrɛŋtiyɛ̧́ri̧ 5 - Capanahua bible

1Kɔrɛŋtiyɛ̧́ri̧ 5

¹Kú lá njukuri sa magél too, ɓá ɓéké káwa e a bazeŋ a wǎyri. Ɓéké káwaké, kú zi ma ziŋ mára̧ké nɔ́ a bazeŋ a njukuri ka zi tu Gáŋvbôn nyáy yá! Kú sa katína ɓá njuku mbêw a bazeŋ a wǎyri, kaw niŋ dala kuu wûny a bâa a mɛ̌!

²Dáy wǎyri, i mbá ka hɔ̧́tûl, a zi tu ɓá, i e kaw ka sɔ̧rɔ̧ nyá, a njuku ka niŋ hɛ̧ nǎŋnɔ́, belɓá í ní nɛ́ a bazeŋ a wǎyri.

³A mǐ, mí zi tí a bazeŋ a wǎyri nûn ka nûn nyá, dáy mi e kuu wǎyri ka ŋgboro a Têm Pukí. Mi walɓayké kɔ̧ tûl a njuku nɔ́ dá, ɓá báŋa mi e a bazeŋ a wǎyri.

⁴Gelka wǎyri mí mára̧ ka rɛŋ a Gáŋmbây a manárí̧ Zezú, wǎyri kuu têm a mǐ, rá̧ ka ŋgboro a kpɔ́ŋa a Gáŋmbây a manárí̧ Zezú,

⁵ná ɓá mára̧ njuku nǎŋ, vbú ɓil ndɔ̂ʼɔ a Sata̧n, ɓay a hay mûn nɛ́ ké ziŋ ɓewa, ka têm mûn nɛ́ ké ziŋ pɛ̧́na, a ɓil nâm ka Gáŋmbây Zezú e regí!

⁶I zi tí ka ŋgboro hɔ̧́tûl a wǎyri yá! I zi tu ɓá, sôm haw tɛ̧́w yáŋ, ma héw húrú too yá lé?

⁷Í turu mûn a wǎyri, a í lú tâ̧w sôm haw a bazeŋ a wǎyri, rá̧ í kaw ɓá báŋa húrú a fékéké, ka sôm haw zi tí ɓilké yáy. I kaw ɓá húrú a féké dá, tí ka kú í Kiris, gun mbólé a Pâk a manárí̧ ɓá hɛ̧púnay.

⁸Nǎŋnɔ́, ná záymûn Pâk a manárí̧, táŋ tâ̧w sôm haw, táŋ sôm haw ɓéké rá̧ ɓéké káwa. Dáy ka biré táŋ sôm haw, a ɓil káwa a táŋáké rá̧ gbátké.

⁹Mi tí ɗé hí̧ wǎyri ɓá, í zi ná mára̧ káwa kuu njukuri ka kaw ɓil ɓéké káwa.

¹⁰Tí ɓá kuu njukuri too ka tísiri, ka kaw ɓil ɓéké káwa yá, malé kuu njuku ɓá law ka̧n tûl hɛ̧ a mbáŋa kuriri, malé kaw ɓá ríwari, malé kuu njuku hál ŋgálári yá. Mí ɓá nǎŋ, i zi kaw tísiri nɛ́ nyá.

¹¹Dáy hɛ̧ ka mi zi sa hí̧ wǎyri ɓá, í zi ná mára̧ káwa a wǎyri kuu njuku a há̧na, ka sa ɓá ké kaw ɓá njuku láɓulaw, ka e ɓil ɓéké káwa, ɓil haŋhɛ̧, ɓil hál ŋgálári, ɓil niŋ ŋgá̧má, ɓil távôn, malé ɓil riwa. Mára̧ njuku nǎŋnɔ́, í zi ná sɔ̧́lâʼa a wǎyri kuu mɛ̌!

¹²A̧hí̧ kó mí ɓá mi walɓay kɔ̧ tûl a njuku a kálari lé? Tí ɓá njukuri ka e a bazeŋ a wǎyri, pé i e walɓay kɔ̧ tûl a kuriri yá lé?

¹³Ɓayhí̧lé njukuri ka e a kála, Gáŋvbôn e walɓay kɔ̧ tûl a kuriri. I ní njuku ŋgbɔ́rɔ a bazeŋ a wǎyri.