Read Capanahua 1Kɔrɛŋtiyɛ̧́ri̧ 6 Bible Online

1Kɔrɛŋtiyɛ̧́ri̧ 6 - Capanahua bible

1Kɔrɛŋtiyɛ̧́ri̧ 6

¹Gelka njuku mbêw erú ka ɓay a bazeŋ a wǎyri kuu nyîn nɛ́ lé, ké mbí ɓayké sé kalmany hí̧ njuku walɓayri ka zi tu Gáŋvbôn nyáy, a pɔŋ gí kalmany hí̧ njuku a Gáŋvbônri̧, ɓayhí̧ lé?

²I zi tu ɓá njuku a Gáŋvbônri̧ e walɓay kɔ̧ tûl a njuku a tísiriri yá lé? Nǎŋnɔ́, mi ɓá wǎyri pé e walɓay ka̧n tûl a njukuri a tísiri, lé ɓay a tɛ̧́wké a bazeŋ a wǎyri, i zi ma wal ɓilké yá lé?

³I zi tu ɓá sêeké lé, ná e walɓay kɔ̧ tûl a aŋnzeri yá lé? Rá̧ pé ma ɓay a hɛ̧ a tísiri nɛ́ lé!

⁴Nǎŋnɔ́, i e ka ɓay kuu nyîn a wǎyri ɓay a hɛ̧ a tísiri nɛ́ lé, i sé mbí njuku walɓayri, njukuri ka Egilize zi tu kuriri yáy!

⁵Mi sa, ná ɓá hɛ̧ sɔ̧rɔ̧ hí̧ wǎyri. Njuku a há̧na zi tí a bazeŋ a wǎyri, ka kaw ɓá njuku a rɔ̧́náké, ka ma walɓay a bazeŋ a nyînrí̧ zi tí yá lé?

⁶Dáy i kó ɓá hɛ̧ a béláké ɓá nyîn a há̧na, ké ziŋ ɓay kuu nyîn nɛ́ lé, ké sé mbɛl a njuku walɓayri ka zi láɓulaw nyáy, ɓay a ké sé kalmany a nyîn nɛ́ hí̧ kuriri lé?

⁷Katína, ziŋ ɓay a bazeŋ a wǎyri kuu nyîn a wǎyri, tɔ́ʼɔ ɓá káwaké ná belyá hí̧ wǎyri. Ɓayhí̧rá̧, i zi ma ŋgá̧law a wǎyri sé tûl hɛ̧ a belyáké yáy lé? Ɓayhí̧rá̧, i zi ma pɔŋ njuku a fékéri naʼa hɛ̧ a wǎyri yáy lé?

⁸Dáy, ɓá wǎyri pé niŋ hɛ̧ belyá, pé a fa̧ hɛ̧ a mbáŋa a wǎyri, ka ɓá nyîn a wǎyri a ɓil láɓulaw.

⁹Dáy, i tu ɓá táŋáké ɓá, njukuri ka niŋ hɛ̧ a belyáké, gelkáwa a kuriri zi tí a ɓil Pû a Gáŋvbôn nyá. I zi ná rɔ́ʼɔ tûl a wǎyri: Njuku ɓéké káwari, njuku hál ŋgálári, njuku niŋ dalari, njuku niŋ dala kuu mbáŋa kuriri: Wɔ̧rɔ̧́njukuri kuu wɔ̧rɔ̧́njukuri,

¹⁰ríwari, njuku haŋhɛ̧ri̧, njuku távônri̧, njuku ŋgá̧mári̧ malé njuku buʼururi, kuriri too, kú tí ziŋ gelkáwa a ɓil Pû a Gáŋvbôn nyá!

¹¹Nǎŋnɔ́ pé ɓá péna ka njuku a há̧narí̧ a bazeŋ a wǎyri, kaw niŋáké ɗambɛl. Dáy, Gáŋvbôn turu wǎyri dá, ka ten wǎyri kaw ɓórí ɓay a mɛ̌, ka ɓá wǎyri kaw ɓá ndáráké a mbɛlɛ́, ka rɛŋ a Gáŋmbây Zezú Kiris, rá̧ ka ŋgboro a Têm a mɛ̌, Gáŋvbôn a manárí̧.

¹²Njuku a há̧narí̧ kaw sanáké ɓá: Mi erú ka ŋgboro niŋ hɛ̧ too ka mi ziy. Katína, tí ɓá hɛ̧ too pé ɓá hɛ̧ a béláké yá. Mi e sa ɓá: «Ŋgboro erú hí̧ mí too», dáy, mi zi ma pɔŋ mûn ní tɛ̧́ koy a hɛ̧ too yá.

¹³I kaw sanáké kɔ́ ɓá: «Lâʼa ɓá ɓala ɓil, a ɓil ɓá ɓala lâʼa.» Katína, dáy Gáŋvbôn e gbɛʼɛrɛ lâʼa kuu ɓil too. Dáy Gáŋvbôn zi mɔny mûn a njuku, ɓay a ɓéké káwa yá. Mûn, ɓá ɓala a Gáŋmbây, a Gáŋmbây, ɓá ɓala mûn.

¹⁴Dáy Gáŋvbôn ka toma Gáŋmbây a hûl, e toma manárí̧ kɔ́ a hûl, ka ŋgboro a kpɔ́ŋa a mɛ̌.

¹⁵I zi tu ɓá, mûn a wǎyri, ɓá pâmndɔ̂ʼɔ mûn a Kiris yá lé? Dáy, mi mbí pâmndɔ̂ʼɔ mûn a Kiris, ɓay a ɓá tɛ̧́ pâmndɔ̂ʼɔ mûn a wûny niŋ dala rú lé? Bɔʼɔ mbêw yá!

¹⁶Malé, i zi tu ɓá njuku ka niŋ dala kuu wûny niŋ dalay, tɛ̧́ hay mûn mbêw kuu mɛ̌ nyá lé? Ɓayhí̧lé kú ɗé ɓá: «Kuriri sére too, retɛ̧ hay mûn mbêw.»

¹⁷Dáy, njuku ka kaw mbêw kuu Gáŋmbây, tɛ̧́ hay mûn mbêw kuu mɛ̌ ka ŋgboro a Têm Pukí.

¹⁸I ŋgú ɓéké káwa! Ɓéké a ǎ̧wrí̧ too ka njuku niŋ, zi tí ɓil mûn nɛ́ nyá, dáy, njuku niŋ dala lé, ké niŋ ɓéké hí̧ mûn nɛ́.

¹⁹I zi tu ɓá, mûn a wǎyri ɓá vûn a Têm Pukí, Têm Pukí nɔ́ ka e a mûn a wǎyri, ka i ziŋ a gel a Gáŋvbôn nyá lé? Mûn a wǎyri, zi tí ɓá ɓala a wǎyri yá.

²⁰Gáŋvbôn zé wǎyri, ké pú lari ɓayké. Belɓá, i mbí mûn a wǎyri kaw ɓil niŋ péna a hɔ̧́na a Gáŋvbôn.