Read Capanahua 1Kɔrɛŋtiyɛ̧́ri̧ 7 Bible Online

1Kɔrɛŋtiyɛ̧́ri̧ 7 - Capanahua bible

1Kɔrɛŋtiyɛ̧́ri̧ 7

¹Ŋgɛŋnɛ́, ná tá sé tûl hɛ̧ri̧, ka i ɗé hí̧ mí a ɓil mbété a wǎyri. Belɓá wɔ̧rɔ̧́njuku, ké nyá wûny nyá.

²Dáy, ɓay a njuku ké zi ná niŋ dala lé, belɓá wɔ̧rɔ̧́njuku too, ké nyá wûny a mɛ̌, a wûnynjuku too, ké erú ka wɔ̧rɔ̧́ a mɛ̌.

³Wɔ̧rɔ̧́njuku, ké niŋ hɛ̧ niŋa wɔ̧rɔ̧́ hí̧ wûny a mɛ̌, a wûnynjuku kɔ́, ké niŋ hɛ̧ niŋa wûny hí̧ wɔ̧rɔ̧́ a mɛ̌.

⁴Mûn a wûnynjuku zi tí ɓá ɓala a mɛ̌ nyá, ɓá ɓala Wɔ̧rɔ̧́ a mɛ̌, nǎŋnɔ́ kɔ́, mûn a wɔ̧rɔ̧́njuku zi tí ɓá ɓala a mɛ̌ nyá, ɓá ɓala wûny a mɛ̌.

⁵I zi ná de mûn a wǎyri hí̧ há̧narí̧, ka mí zi tí ɓá a ɓil láhá̧narí̧ ɓay a nâm kpay, ɓay gɔ́ŋ Gáŋvbôn nyáy. Falké, i remara̧ mbêw, ɓay a í zi ná lé ɓil nzaʼa rɔ́ʼɔ a Sata̧n.

⁶Ɓay nɛ́ ka mi sa hí̧ wǎyri, zi tí ɓá sáŋna nyá, ná ɓá hɛ̧ ka ɓá i ɓá kɛrɛ a wǎyri ka̧n tûlkéy.

⁷Katína lé, mi zi ɓá njukuri too, kú kaw táŋ nyá wûny ɓá báŋa mǐ, dáy ge lé too, erú ka hɛ̧ ɓórí ɓórí ka Gáŋvbôn hí̧ nɛ́y, njuku a ǎ̧w e ka hɛ̧hí̧na ɓórí, njuku a ǎ̧y e ka hɛ̧hí̧na ɓórí.

⁸Dáy, a ɓîwri rá̧ wûnysêeri, bel mambá hí̧ wǎyri, ɓá i kaw ɓá ɓîw ɓá báŋa mǐ.

⁹Dáy, wǎyri mí zi ma ŋgbá tûl a wǎyri nyá lé, bel ndé ɓá i nyá wûny, malé i nyá wɔ̧rɔ̧́, ka tûl a kaw ka nzalaké a ɓil law a wǎyri.

¹⁰A njukuri ka nyá há̧narí̧, mi a sa hí̧ wǎyri, (ɓayké zi gí ka gel ní nyá, gí a gel a Gáŋmbây), ɓá: Wûnynjuku, ké zi ná ɗém há̧na kuu wɔ̧rɔ̧́ a mɛ̌,

¹¹rá̧ ké mí ɗém há̧na kuu wɔ̧rɔ̧́ a mɛ̌ lé, ké kaw nǎŋnɔ́ táŋ nyá wɔ̧rɔ̧́ a féké, a mí tí yá lé, ké reláhá̧na kuu wɔ̧rɔ̧́ a mɛ̌, a wɔ̧rɔ̧́njuku a há̧na, ké zi ná ní wûny a mɛ̌.

¹²A wǎy njuku a fékéri, mi sa ɓá (tí ɓá Gáŋmbây yá, ɓá mǐ): Njuku ka láɓulaw mí erú ka wûny ka zi láɓulaw yá, rá̧ wûnyké, mí zi ɓay a kaw kuu mɛ̌ lé, ké zi ná ní nɛ́.

¹³Nǎŋnɔ́ kɔ́, wûnynjuku ka láɓulaw, mí erú a wɔ̧rɔ̧́ ka zi láɓulaw yá, rá̧ wɔ̧rɔ̧́ké, mi zi ɓay a kaw kuu mɛ̌ lé, ké zi ná sáŋ nɛ́.

¹⁴Ɓayhí̧lé, wɔ̧rɔ̧́ ka zi láɓulaw yáy, kaw ɗɛ́ŋ kuu Gáŋvbôn, ka ŋgboro a káwa mbêw kuu wûny a mɛ̌ a ɓil láɓulaw, nǎŋnɔ́ kɔ́, wûny ka zi láɓulaw yáy, kaw ɗɛ́ŋ kuu Gáŋvbôn, ka ŋgboro a káwa mbêw kuu wɔ̧rɔ̧́ a mɛ̌ a ɓil láɓulaw. Mi zi tí nǎŋ nyáy, gun a wǎyri e kaw ɓá gun a táŋnyákéri, a tu ɓá kú kaw ɗɛ́ŋ kuu Gáŋvbôn.

¹⁵Dáy, njuku ka zi láɓulaw yá, mí zi ɓay a ɗém há̧na kuu njuku ka láɓulaw lé, ké ɗém. A goló mɔ̌ wɔ̧rɔ̧́ malé wûny ka láɓulaw, hɛ̧ a há̧na ka ŋgá̧ mɔ́ kuu mɛ̌ zi tí yá, ɓayhí̧lé Gáŋvbôn ɗí wǎyri, ɓá i kaw a ɓil gelkáwa a vónáké.

¹⁶Katína, mɔ̌ wûny ka láɓulaw, mɔ e niŋ a̧nírá̧ a tu ɓá, mɔ e pɛ̧́ wɔ̧rɔ̧́ a mɔ̌ lé? Malé mɔ̌ wɔ̧rɔ̧́ ka láɓulaw, mɔ e niŋ a̧nírá̧ a tu ɓá, mɔ e pɛ̧́ wûny a mɔ̌ lé?

¹⁷A féké ɓáy, njuku a sí̧ lé too, ké kaw ɓil báŋ káwa a mɛ̌, ɓá báŋké ka Gáŋvbôn ziŋ nɛ́, ka a ɗí nɛ́y. A nɔ́ pé ɓá sáŋna, ka mi hí̧ Egilizeri too.

¹⁸Gáŋvbôn, mí ɗí mɔ́, ka mɔ̌ mí ndá ganzá dáy, mɔ kaw ɓil ndá ganzá a mɔ̌. A ké mí ɗí mɔ́ ka mɔ pa̧n ndá ganzá yá ɓáy, mɔ́ kaw ɓil ndá ganzá yá a mɔ̌.

¹⁹Ndá ganzá, malé ndá ganzá yá, zi tí ka nɛ́rɛ̧ nyá, tɔ́ŋ sáŋna a Gáŋvbôn, pé erú ka nɛ́rɛ̧.

²⁰Belɓá njuku too, ké kaw ɓil báŋ káwa a mɛ̌, a ké erú rá̧ ka Gáŋvbôn ɗí nɛ́y.

²¹A Gáŋvbôn ɗí mɔ́y, mɔ kaw ɓá koy lé? Lawɔ́ ké zi ná lú ɓayké. Dáy, ŋgboro mí ŋgburu hí̧ mɔ́ ɓá mɔ́ tɛ̧́ ɓil koy lé, mɔ́ tɛ̧́.

²²Ɓayhí̧lé koy ka Gáŋmbây ɗí nɛ́, ɓá njuku ka tɛ̧́ a ɓil koy, ka rekaw ɓá njuku a Gáŋmbây, ɓá mbêwké kɔ́, njuku ka tí ɓá koy yáy, ka Kiris ɗí nɛ́, retɛ̧ koy a Kiris.

²³Gáŋvbôn zé wǎyri, ké pú lari ɓayké, nǎŋnɔ́, í zi ná retɛ̧ koy a njukuri.

²⁴Nyîn nírí̧, belɓá njuku too ké kaw a mbɛl a Gáŋvbôn ɓá báŋké nɔ́ a ké kaw, ka a ziŋ ɗína a Gáŋvbôn.

²⁵Ɓay ka kó ɓîwri, mi zi tí ka sáŋna a Gáŋmbây sé tûlké yá. Dáy mi saɓay ka mi kɛrɛ, ɓá báŋa njuku ka ma ɓay a njukuri kú mbílaw hí̧ nɛ́ ka ŋgboro béla a Gáŋmbây.

²⁶Ɓay tûl hɛ̧ yɔʼɔla a ŋgɛŋnɛ́, hɛ̧ ka mi kɛrɛ ɓá: Belɓá njukuri, kú kaw táŋ nyá há̧narí̧.

²⁷Mɔ erú ka wûny lé? Mɔ zi ná ɛ́ ŋgboro ɗém há̧na kuu mɛ̌. Mɔ tí ka wûny nyá lé? Mɔ́ zi ná ɛ́ ŋgboro nyá wûny.

²⁸Dáy, mɔ̌, mí nyá wûny, mɔ zi niŋ ɓéké yá, rá̧ gun a lɔŋɔ́ mí nyá wɔ̧rɔ̧́y, ké zi niŋ ɓéké yá. Nǎŋnɔ́, njukuri ka nyá há̧narí̧, kú e ri ɓil hɛ̧dɔ́ʼɔla a ɓil káwa a kuriri dát, ɓaykénɔ́, pé mi zi ɓá í lé ɓilké yá.

²⁹Nyîn nírí̧, mi sa hí̧ wǎyri, nâm zi ŋgɛ̧́ mbaa, tí ka ŋgɛŋnɛ́, belɓá njukuri ka erú ka wûny, kú kaw ɓá báŋa njukuri ka zi nyá wûny nyáy.

³⁰Njukuri ka kaw vúna, kú niŋ ɓá báŋa kú zi vú yá. A njukuri ka e a ɓil sáʼa, kú niŋ ɓá báŋa kú zi tí a ɓil sáʼa yá, ka njukuri ka zé hɛ̧, kú niŋ ɓá báŋa kú zi ziŋ hɛ̧ a kú zé yá.

³¹A njukuri, ka ziŋ tûl a kuriri ka hɛ̧zíŋa a tísiri nɛ́, kú niŋ ɓá báŋa kú zi ziŋ tûl a kuriri rú yá. Ɓayhí̧lé tísiri ɓá báŋké nɛ́ ka ná kóy, tí ɗí ɓǎŋ ɓáy mbaa.

³²Dáy, mi zi ɓá, í zi ná kaw ɓil hɛ̧dɔ́ʼɔla. Njuku ka zi nyá wûny nyáy, ɓá kɛrɛ mɛ̌ ka̧n tûl hɛ̧ a Gáŋmbây mbêw yáŋ, ka ɛ́ ŋgboro niŋ hɛ̧ ka Gáŋmbây ziy.

³³Dáy, njuku ka erú ka wûny, ɓá kɛrɛ a mɛ̌ ka̧n tûl hɛ̧ a tísiri, ka ɛ́ ŋgboro niŋ hɛ̧ ka wûny a mɛ̌ ziy.

³⁴Nǎŋnɔ́, káwa mɛ̌ wal sé tûl hɛ̧ sére. Ɓá mbêwké kɔ́, wûnynjuku malé gun a lɔŋɔ́, ka zi tí ka wɔ̧rɔ̧́ nyáy, ɓá kɛrɛ a mɛ̌ ka̧n tûl hɛ̧ a Gáŋmbây, ɓayhí̧lé ké ɛ́ ŋgboro kaw ɓá ɓay a Gáŋmbây, a ɓil péna a mɛ̌ rá̧ kɛrɛ a mɛ̌ too. Dáy, wûny ka erú ka wɔ̧rɔ̧́y, ɓá kɛrɛ a mɛ̌ ka̧n tûl hɛ̧ a tísiri, ka ɛ́ ŋgboro niŋ hɛ̧ ka wɔ̧rɔ̧́ a mɛ̌ ziy.

³⁵Mi saɓay nɛ́, ɓay a béla a wǎyri, a tí ɓá sáŋna a féké pé mi hí̧ wǎyri yá. Mi zi ɓá, i niŋ hɛ̧ ka bel ndé, a i kaw law mbêw a ɓil niŋ péna hí̧ Gáŋmbây.

³⁶Ŋgɛŋnɛ́, kaban njuku mí kɛrɛ ɓá, ké zi nyá wûny dala a mɛ̌ nyá lé, ké niŋ belyá ziŋ nɛ́, rá̧ nzala kaw kuu wûnynjuku mí ndé tûlé, rá̧ ké mí kɛrɛ ɓá, ké e nyá wûnyké lé, belbéla kú nyá há̧narí̧, ɓá báŋké a ké ziy, ké zi niŋ ɓéké yá.

³⁷Dáy kaban njuku, mí kɛrɛ a ɓil lawɛ́, a zína a mɛ̌, ɓá ké tí nyá wûny dala a mɛ̌ nyá, rá̧ ké mí ma ɓay a ŋgbá tûlé táŋ niŋ dala kuu wûny dala a mɛ̌y, ké niŋ belbéla.

³⁸Nǎŋnɔ́, njuku ka nyá wûny dala a mɛ̌ niŋ belbéla, a njuku, ka zi nya nyá kɔ́y, niŋ bel ndé.

³⁹Sáŋna a wûnynjuku ŋgá̧ wûnynjuku kuu wɔ̧rɔ̧́ a mɛ̌ dát, ka wɔ̧rɔ̧́ a mɛ̌ mí pa̧n ka ndísɛ̌ʼɛ ɓáy. Dáy wɔ̧rɔ̧́ a mɛ̌ mí ziŋ hûl dáy, ké e ka ŋgboro ɓay a ké nyá wɔ̧rɔ̧́ a féké a ké ziy, dáy belɓá a ɓil zína a Gáŋmbây.

⁴⁰Dáy a kɛrɛ a mǐ, ké e kaw a ɓil béla, a ké mí zi nyá wɔ̧rɔ̧́ nyáy. Dáy mí kɛrɛ mǐ kɔ́, mi erú ka Têm a Gáŋvbôn.