Read Capanahua 1Kɔrɛŋtiyɛ̧́ri̧ 8 Bible Online

1Kɔrɛŋtiyɛ̧́ri̧ 8 - Capanahua bible

1Kɔrɛŋtiyɛ̧́ri̧ 8

¹Ɓay kó hay, a kú niŋ hɛ̧púna rú̧ hí̧ vbônri̧: Katína, ná erú too ka hɛ̧túna, ɓá báŋké nɔ́ ka i sáy. Dáy hɛ̧túna hí̧ ɓá hɔ̧́tûl, a zína hí̧ ŋgɛ́rɛ a ɓil mára̧ a njuku láɓulaw.

²Njuku ka kɛrɛ ɓá ké erú ka hɛ̧túna mambáy, ké zi tu gbát hɛ̧túna yá ɓáy.

³Dáy, njuku ka zi Gáŋvbôn, mɛ̌ nɔ́, Gáŋvbôn tu nɛ́.

⁴Dáy, ɓay ka i vbíy ɓá: Njuku ma sɔ̧́ hay a hɛ̧púnari̧ a kú niŋ hí̧ vbônri̧ lé? Ná tu ɓá vbônri̧ zi tí ka nɛ́rɛ̧ nyá a tísiri, ná tu ɓá táŋáké ɓá Gáŋvbôn ɓá mbêw yáŋ.

⁵Katína, njuku a há̧narí̧ sa ɓá vbônri̧ erú a nûnalê rá̧ tísiri, ɓá gbátɓay hí̧ kuriri, ɓayhí̧lé «vbônri̧» rá̧ «gáŋmbâyri» erú ɓá ŋgɛ̧́náké,

⁶dáy a manárí̧, ná tu ɓá Gáŋvbôn ɓá mbêw yáŋ, ɓá Bâa ka mɔny hɛ̧ri̧ too, ka ná kaw ɓá ɓay a mɛ̌y. Rá̧ Gáŋmbây mbêw yáŋ, ɓá Zezú Kiris, ka hɛ̧ri̧ too ziŋ tɛ̧́na ka ŋgboro a mɛ̌, ka ná kaw ɓá ka ŋgboro a mɛ̌y.

⁷Dáy, njukuri too zi tu gbátɓay nɔ́ nyá. Njuku a há̧narí̧, a ɓil púhɛ̧ hí̧ vbônri̧ dát, ŋgɛŋnɛ́ ɓáy, kú sɔ̧́ hay a hɛ̧púna, ɓá báŋa hayké ɓá ɓala vbônri̧ katína. Nǎŋnɔ́, a kɛrɛ a kuriri zi kpú yá, kú ɓew mûn a kuriri ka ŋgboro a sɔ̧́ hayké.

⁸A tu ɓá, tí ɓá lâʼa pé ɓá nárí̧ sé mbɛl a Gáŋvbôn nyá. Ná zi sɔ̧́lâʼaké yá lé, hɛ̧ a há̧na ka e lú a gel a manárí̧ zi tí yá, dáy ná sɔ̧́lâʼaké lé, hɛ̧ a há̧na ka ná e ziŋ sé mbɛl zi tí yá kɔ́.

⁹Dáy, i kó rá̧, ɓá báŋ káwa a wǎyri, ké zi ná ɓá njuku a fékéri lé ɓil ɓékéhɛ̧, njukuri ka zi kpú a ɓil láɓulaw a kuriri yáy.

¹⁰Ɓayhí̧lé, njuku ka zi kpú a ɓil láɓulaw yá, mí kó mɔ́, mɔ̌ ka mɔ erú ka hɛ̧túna, kaw sɔ̧́lâʼa a ɓil vûn pú vbônri̧, lé tí hí̧ nɛ́ ŋgɛ́rɛ a ɓil lawɛ́, ɓay a ké sé sɔ̧́ hay a kú niŋ hɛ̧púna rú hí̧ vbônri̧ nyá lé?

¹¹Nǎŋnɔ́, ɓay a tûl hɛ̧túna a mɔ̌, njuku nɔ́ ka zi kpú a ɓil láɓulaw yáy, e ɓɔ́l ŋgboro a mɛ̌, mɛ̌ ka Kiris ziŋ hûl ɓay tûléy!

¹²A gel niŋ ɓékéhɛ̧ nǎŋ ziŋ nyîn a wǎyri, ka ŋgboro a ɓew law a kuriri ka zi kpú a ɓil láɓulaw yáy, i niŋ ɓéké ziŋ Kiris ka mûn nɛ́.

¹³Ɓaykénɔ́, pé lâʼa mí e ɓá nyîn ní, ka láɓulaw lé ɓil ɓékéhɛ̧ lé, belɓá mí sɔ̧́lâʼaké mbaa wɔm, ɓay a mí zi ná ɓá nyîn ní ɓɔ́l.