Read Capanahua 2 Kɔrɛŋtiyɛ̧́ri̧ 10 Bible Online

2 Kɔrɛŋtiyɛ̧́ri̧ 10 - Capanahua bible

2 Kɔrɛŋtiyɛ̧́ri̧ 10

¹Mǐ Pôl, mǐ a kú sa ɓá, mi vo mambá ka mǐ, mí e kuu wǎyri, a ɓay a mǐ ŋgɛ́rɛ mambá ka mǐ, mí zi tí kuu wǎyri yáy. Mi ɗí wǎyri mǐ ka mûn ní ka ŋgboro a vóna law rá̧ béla a Kiris,

²mi vú hí̧ wǎyri: Í zi ná há mí, mi niŋ hɛ̧ ka ŋgɛ́rɛ ka mi e gé bazeŋ a wǎyri kuu njuku a há̧narí̧, ɓayhí̧lé mi tí pɔŋ njukuri ka kaw kɛrɛ ɓá, rú niŋ hɛ̧ ka ŋgboro a hay mûn nyá.

³Katína, ná e a ɓil hay mûn, dáy ná zi rúbére ka ŋgboro a hay mûn nyá.

⁴Ɓayhí̧lé hɛ̧bére a ɓurúy, zi tí ɓá hɛ̧bére ka gí ka ŋgboro a njuku yá: Ɓá kpɔ́ŋa a hɛ̧bére a Gáŋvbôn, ɓay gbɛʼɛrɛ gel múna a njukuri. Nǎŋnɔ́ ka hɛ̧béreké nɔ́, rú gbɛʼɛrɛ kɛrɛ a belyákéri too,

⁵rú gbɛʼɛrɛ hɛ̧ri̧ too ka uru ka ŋgboro a hɔ̧́tûl ziŋ hɛ̧túna a Gáŋvbôn, a fere hɛ̧ kɛrɛ a njukuri too, ɓay a ɓá kuriri gí lá nzáʼa a Kiris.

⁶Rú kaw ɗɛ́ŋ ɓay a nzɛ́rɛ njukuri ka zi lá nzáʼa yá too, gelka lá nzáʼa a wǎyri, mí ma gelké ɓá béláké dáy.

⁷Í ɛ̧rɛ̧ ɓá fal hɛ̧ ɓǎŋ baa! Njuku mí tu ɓá ké kaw ɓá njuku a Kiris lé, ké ɓá ka̧n tûlé ɓá: Ɓurú kɔ́, rú kaw ɓá njuku a Kiris, ɓá báŋa mɛ̌.

⁸Ɓayhí̧lé, mi zi tí ka sɔ̧rɔ̧, ka mǐ, mí niŋ wélé tɛ̧́w sé tûl kpɔ́ŋa, ka Gáŋmbây hí̧ rú yá, kpɔ́ŋa, ɓay a niŋ rá̧ í hɔ̧́, a zi tí ɓá ɓay a gbɛʼɛrɛ wǎyri yá.

⁹Mi zi ɛ́ ŋgboro ɓá wɔ́w kɔ́ law a wǎyri yá, a ɓil mbété a mǐri̧ ka mi ɗé hí̧ wǎyri.

¹⁰Katína, njuku a há̧narí̧ sa ɓá: «Mbété a Pôl kpú a ŋgbɔ́rɔ mambá. Dáy, ké mi e a bazeŋ a manárí̧y, ké vo mambá, a ɓay sána a mɛ̌, ná ɓá báŋa hɛ̧ a ɓǎŋké.»

¹¹Dáy njuku ka saɓay nǎŋnɔ́, ké tu ɓá: Bɔʼɔséna a nɔ́ ka rú kaw ɓá ɗínáké ka a ɗé mbété hí̧ wǎyri, ɓá bɔʼɔséna a mbêwké nɔ́, pé rú e niŋáké a bazeŋ a wǎyri ka rú e gé ka̧nay.

¹²Katína, rú zi ma mbí mûn a ɓurú mambɛ̧́nɛ́ malé lé mûn a ɓurú kuu njukuri ka kó mûn a kuriri ɓá kú kaw ɓá gáŋnjukuri yá. Kú zi tí ka hɛ̧túna nyá, kú mɔny hɛ̧ lé mûn a kuriri ɓay a kuriri, a ɓá mûn a kuriri lé mbɛ̧́nɛ́ a bazeŋ a kuriri.

¹³Dáy a ɓurú, rú zi niŋ wélé a ɓurú tá tûl hɛ̧ léhɛ̧ too yá, rú niŋ ka̧ sélé gel péna ka Gáŋvbôn kúŋ hí̧ rú, ka a hí̧ rú ŋgboro ɓay rú sé ka̧ gel a wǎyri.

¹⁴Rú zi tá tûl séléké yá, ɓá báŋké nɔ́, ka ɓurú mí zi gí ka̧ gel a wǎyri yáy, dáy rú kaw ɓá titíla njukuri ka ka̧ gel a wǎyri ka Bélaɓay a Kiris.

¹⁵Nǎŋnɔ́, rú tí niŋ wélé tá tûl sélé a ɓurú sé tûl péna a njuku a fékéri ɓá báŋa ɓurú pé niŋ nyá. Dáy, rú kɛrɛ ɓá láɓulaw a wǎyri e hɔ̧́na, nǎŋnɔ́ rú e niŋ péna a hɔ̧́náké a bazeŋ a wǎyri, dáy a ɓil sélé péna a ɓurú ka Gáŋvbôn hí̧ rúy.

¹⁶Rú erú ka ŋgboro ka falké, ɓay a ɓá Bélaɓay ka̧ ɓil kaw a fékéri ka ɗɔ́ŋ wǎyri, táŋ niŋ wélé sé tûl péna a njuku a fékéri ka niŋ ka gel a kuriri.

¹⁷Dáy, kú ɗé ɓá: «Njuku, mí zi ɓay a niŋ wélé lé, ké niŋ wélé a mɛ̌ sé tûl hɛ̧ ka Gáŋmbây niŋ.»

¹⁸Katína lé, zi tí ɓá njuku ka kó mûn nɛ́ ɓá gáŋnjuku ka mûn nɛ́, pé Gáŋvbôn ɗél nɛ́ nyá, ɓá njuku ka Gáŋmbây ɗél nɛ́y.