Read Capanahua 2 Kɔrɛŋtiyɛ̧́ri̧ 13 Bible Online

2 Kɔrɛŋtiyɛ̧́ri̧ 13 - Capanahua bible

2 Kɔrɛŋtiyɛ̧́ri̧ 13

¹A bɔʼɔ a sáyké pé nɛ́, ka mi e sé gel a wǎyri. Ɓá báŋké a kú ɗé: «A ɓil wal ɓil ɓayri too, belɓá kú wal a fal lá nzáʼa a njukuri sére malé sáy.»

²Mi erú ka nzáʼa nzɛ́rɛ mbêw, ɓay a sa hí̧ njukuri ka niŋ ɓékéhɛ̧ í̧ŋásá̧ rá̧ njukuri too, mi tí sa dá, ka mi tí gé gel a wǎyri a bɔʼɔ sérekéy, dáy, mi resa ɓáy a ŋgɛŋnɛ́, ka mi zi tí a bazeŋ a wǎyri yáy: A géna fal, ka mi e gé gel a wǎyri, mi tí kósêe a njuku a há̧na mbêw yá.

³I zi ɓay a i tu ɓá Kiris saɓay ka ŋgboro a mǐ lé, i e ziŋáké. Kiris, zi kaw ɓá koʼora a gel a wǎyri yá, ké tɔ́ʼɔ kpɔ́ŋa a mɛ̌ a bazeŋ a wǎyri.

⁴Katína, gelka kú ɓara nɛ́ ka̧n tûl dii vbatay, ké koʼora, dáy ŋgɛŋnɛ́, ké kaw ka ndísɛ̌ʼɛ ka kpɔ́ŋa a Gáŋvbôn. Ɓurú kɔ́, rú koʼora a ɓil káwa mbêw kuu Kiris, dáy rú e tɔ́ʼɔ wǎyri, ɓá rú kaw ka ndísɛ̌ʼɛ kuu mɛ̌ a ɓil kpɔ́ŋa a Gáŋvbôn.

⁵I lélaw a wǎyri ka mûn a wǎyri, a i kó ka mûn a wǎyri, ka wǎyri mí e a ɓil láɓulaw. I zi tu ɓá Zezú Kiris e ka mûn a wǎyri yá lé? Mí zi tí nǎŋ nyáy, tɔ́ʼɔ ɓá lélawké zi sé yá.

⁶Dáy mi kɛrɛ ɓá, i e tu ɓá táŋáké, a ɓurú, lélawké sé ɓá béláké.

⁷Rú gɔ́ŋ Gáŋvbôn ɓay a í zi ná niŋ hɛ̧ a belyáké, zi tí ɓá, ɓay a tɔ́ʼɔ wǎyri ɓá lélaw a ɓurúké sé ma gelké yá, dáy ɓay a rú kó wǎyri niŋ péna a béláké, zi lé, lélaw a ɓurúké, ké sé yá, zi tí ka nɛ́rɛ̧ nyá.

⁸Ɓayhí̧lé, rú zi ma niŋ hɛ̧ há̧na kuu gbátɓay a Gáŋvbôn nyá, rú niŋ péna too, ɓay a gbátɓay mbɛ́ŋ.

⁹Rú erú ka mûnrína, ka rú e a ɓil koʼora, ka a wǎyri, i e ka ŋgɛ́rɛy. Hɛ̧ ka rú gɔ́ŋ Gáŋvbôn, ɓá í tɛ̧ béla a njukuri.

¹⁰Ɓaykénɔ́, pé mi ɗé hɛ̧ nɔ́rí̧ too hí̧ wǎyri, ka mi zi tí kuu wǎyri yáy, ɓay a mí zi ná gé bazeŋ a wǎyri, a gé ŋgbɔ́rɔ kuu wǎyri ka ŋgboro a kpɔ́ŋa ka Gáŋvbôn hí̧ mí, kpɔ́ŋáké, ɓá ɓay a niŋ rá̧ í hɔ̧́, a zi tí ɓá, ɓay a gbɛʼɛrɛ wǎyri yá.

¹¹Dáy a ŋgɛŋnɛ́ nyîn a mǐri̧, i kaw ka sáʼa, a í ɛ́ ŋgboro a béláké, a í kpúmûn a há̧narí̧, a í láhá̧narí̧, a í kaw a ɓil a vónáké, nǎŋnɔ́, Gáŋvbôn a zína rá̧ vónáké e kaw kuu wǎyri.

¹²Í nam há̧narí̧ mbêw mbêw, a í sí̧ŋ há̧narí̧ ɓá báŋa nyînrí̧. Njuku láɓulawri too nam wǎyri.

¹³Béla a Gáŋmbây a Zezú Kiris, Zína a Gáŋvbôn rá̧ mára̧ a Têm Pukí, kú kaw kuu wǎyri too!