Read Capanahua 2 Kɔrɛŋtiyɛ̧́ri̧ 2 Bible Online

2 Kɔrɛŋtiyɛ̧́ri̧ 2 - Capanahua bible

2 Kɔrɛŋtiyɛ̧́ri̧ 2

¹Nǎŋnɔ́ mi ŋgá̧nzáʼa ɓá mi tí resé gel a wǎyri mbaa, ɓay a mí zi ná yírí law a wǎyri ɓá féké ɓáy.

²Ɓayhí̧lé mǐ, mí yírí law a wǎyri dáy, a gé e hí̧ mí mûnrínay ɓáy, ɓá njuku ka mi yírí lawɛ́ lé?

³Ɓaykénɔ́ pé mi ɗé hí̧ wǎyri ɓá báŋké nɔ́ ka mi niŋ a ŋgɛŋnɛ́y, mi zi ɓá law ní ké zi ná gé yírí a gel a njukuri ka e gé hí̧ mí mûnrínay, ka mǐ, mi gé ká̧y. Ɓayhí̧lé mi tu ɓá, mí kaw ka mûnrína lé, wǎyri kɔ́, i kaw ka mûnrína.

⁴Katína, mi ɗé hí̧ wǎyri a ɓil tɔ́ʼɔsêe, lawyíra rá̧ ka mbii nûn ɓá ŋgɛ̧́náké, tí ɓá ɓay a ɓá hɛ́rɛ ka̧n law a wǎyri yá, ɓá ɓay a tɔ́ʼɔ zína a mǐ, hí̧ wǎyri.

⁵Njuku a há̧na, mí kaw ɓá njuku yírí law lé, tí ɓá mǐ, pé ké yírí law ní nyá, ké yírí law a wǎyri too. Dáy, tí ɓá wǎyri too katína nyá, njuku a há̧narí̧ a bazeŋ a wǎyri.

⁶Mára̧ njuku nɔ́, belɓá njukuri too kú nzáʼa ziŋ nɛ́;

⁷Ɓaykénɔ́, ŋgɛŋnɛ́ belɓá i vbá̧buma hí̧ nɛ́, a í hí̧ nɛ́ ŋgɛ́rɛ, ɓay a lawɛ́ ké zi ná yírí mambá, a hí̧ nɛ́ vomûn.

⁸Nǎŋnɔ́, mi vú hí̧ wǎyri, i tɔ́ʼɔ zína a wǎyri hí̧ nɛ́.

⁹Í kó, mi ɗé hí̧ wǎyri, ɓayhí̧lé: Mi zi ɓá, mi kó ɓá, i kaw dɛ́ŋ ɓay a í lá nzáʼa ní sé tûl hɛ̧ri̧ too ka mi sa hí̧ wǎyri lé.

¹⁰Gelka, i vbá̧buma hí̧ njukuy, mǐ kɔ́, mi vbá̧buma hí̧ nɛ́. Rá̧ mí ná ɓá mí vbá̧buma hí̧ njuku sé ŋgboro a hɛ̧ too ka mi e vbá̧buma serúy, mi e niŋ ɓay a wǎyri a mbɛl a Kiris,

¹¹rá̧lǒo ná zi ná pɔŋ Sata̧n, ké ndé tûl a manárí̧, ɓayhí̧lé ná tu kɛrɛ a mɛ̌ ɓá táŋáké.

¹²Gelka mi ka̧ tísiri a Torowás, ɓay a tɔ́ʼɔ Bélaɓay a Kiris, mi gé kó ɓá Gáŋmbây ŋgburu béla ŋgboro niŋ péna hí̧ mí a goló.

¹³Dáy, mi kaw ka law lúna ɓayhí̧lé, mi zi gé ziŋ nyîn a manárí̧ Tît a goló yá. Ɓaykénɔ́, pé mi gé pɔŋ njuku a Torowásri, pé a kála sé Maseduwa̧n.

¹⁴Dáy ɗéla hí̧ Gáŋvbôn, ka ɓá nárí̧ ri ɓil a njukuri ka e a ɓil ndéna a ŋgɛ́ra a Kiris. Ké niŋ ka ŋgboro a manárí̧, njukuri tu rɛŋ a Kiris magél too, ɓá báŋa ba̧ny yámbó ka fɔ̧ magél tooy.

¹⁵Katína, ná kaw hí̧ Gáŋvbôn ɓá báŋa béla ba̧ny yámbó a Kiris, ka bazeŋ a njukuri ka pɛ̧́y rá̧ a bazeŋ a njukuri ka e ɓɔ́l ndísɛ̌ʼɛ a kuriri.

¹⁶A gel a njuku a há̧narí̧, rú kaw ɓá ba̧ny hûl, ka ɓá njuku sé hûl, a gel a njuku a fékéri, rú kaw ɓá ba̧ny káwa a ndísɛ̌ʼɛ, ka hí̧ káwa a ndísɛ̌ʼɛ. Dáy a gé ma niŋ mára̧ péna nǎŋnɔ́ lé?

¹⁷Katína lé, ná zi kaw ɓá báŋa dawá njuku a fékéri, ka mbí ɓay a Gáŋvbôn tɛ̧́ péna lari yá, ná sa gbátɓay ka law mbêw, dáy ɓá ka ŋgboro a Gáŋvbôn pé ná saɓay ɓá báŋa njukupéna a Kiris, a mbɛl a Gáŋvbôn.