Read Capanahua 2 Kɔrɛŋtiyɛ̧́ri̧ 3 Bible Online

2 Kɔrɛŋtiyɛ̧́ri̧ 3 - Capanahua bible

2 Kɔrɛŋtiyɛ̧́ri̧ 3

¹Dáy, rú ɛ́ ŋgboro tɔ́ʼɔ mûn a ɓurú ka mûn a ɓurú ɓáy lé? Malé rú erú ka nzala ɓá báŋa a njuku fékéri, ɓay a tɔ́ʼɔ hí̧ wǎyri mbété hí̧nzáʼa sé tûl a ɓurú malé rú vbí wǎyri mbétéké ɓáy lé?

²Wǎyri pé i kaw ɓá mbété a ɓurú, a kú ɗé ka̧n ɓil law a ɓurú, ka njukuri too e túnáké, ka e kɛ̧́nákéy.

³Katína, i kaw ɓá mbété ka Kiris ka mûn nɛ́ ɗé, ka a pé rú gírúy. Mbétéké zi ɗé ka ŋgboro a hɛ̧ ɗéhɛ̧ a ndɔ̂ʼɔ a njuku yá, ɓá Têm a Gáŋvbôn a ndísɛ̌ʼɛ pé ɗéy, ké zi ɗé kɔ̧ haŋ saw yá, dáy ké ɗé kɔ̧ ɓil law a njukuri.

⁴Rú sa nǎŋnɔ́ ka ŋgboro a mbílaw ka ná erú a gel a Gáŋvbôn ka ŋgboro Kiris.

⁵Ɓayhí̧lé, rú zi tí ka kɛrɛ ɓá rú ma niŋ hɛ̧ há̧na ka ŋgɛ́rɛ a mûn a ɓurú nyá. Hɛ̧ ka rú ma niŋáké, gí a gel a Gáŋvbôn;

⁶Ɓá mɛ̌ pé hí̧ rú kpɔ́ŋa kaw ɓá njukupéna a ŋgá̧nzáʼa a ŋgɛŋkéri, ka zi gí ka ŋgboro a sáŋna ɗénáké yá, dáy ka ŋgboro a Têm Pukí. Ɓayhí̧lé sáŋna a ɗénáké, ɓá njuku sé hûl, a Têm Pukí, ɓá njuku sé káwa a ndísɛ̌ʼɛ.

⁷Dáy péna a sáŋna ka ɗé ka̧n haŋ saw, ka hí̧ hûl, mí erú ka hɔ̧́na ka táŋáké zi ɗiɓaŋ nyá, ka a de gun Izirayɛ́lri ɛ̧rɛ̧ nûn a Mɔyíze,

⁸a péna a Têm Pukí e hɔ̧́ a̧ní lé ?

⁹Dáy péna a sáŋna ka walɓay ŋgbá njukuri, ka a ɓá kuriri sé hûl, mí mbá ka hɔ̧́na, péna hí̧ káwa a ndáráké hí̧ njuku a mbɛl a Gáŋvbôn e hɔ̧́ a̧ní lé ?

¹⁰Nǎŋnɔ́ dáy, a ɓil kɛrɛké nɔ́, hɛ̧ ka hɔ̧́na a mɛ̌ táŋ a tâ̧wké, ɓɔ́l táŋa a mɛ̌ ɓay a tûl hɔ̧́na a féké ka hɔ̧́ ndé nɛ́y.

¹¹Katína, hɛ̧ ka zi ɗiɓaŋ nyá ka mbá ka hɔ̧́na, a hɛ̧ ka e ná dát, e hɔ̧́ a̧ní lé ?

¹²Ɓá ɓay ka rú erú mára̧ a kɛrɛ nǎŋ, pé rú mbá ka mbílaw.

¹³Rú zi niŋ ɓá báŋa Mɔyíze, ka ɓá hɛ̧ puru nûn nɛ́, ɓay a ké de gun Izirayɛ́lri kó kɔ́rɔ́ a hɔ̧́na ka táŋ a nûn nɛ́ nyá.

¹⁴Dáy, hɛ̧túna a kuriri e a ɓil tirí̧ma. Sé ka̧ sénɛ́, hɛ̧ pura mbêwké nɔ́, puru hɛ̧túna a kuriri, gelka kú kɛ̧́ mbété ŋgá̧nzáʼa a tâ̧wkéy. Zi lú yá, ɓayhí̧lé ka ŋgboro a Kiris, pé hɛ̧ puráké e lúnay.

¹⁵Ŋgɛŋnɛ́ kɔ́, sêe too, ka gun Izirayɛ́lri kɛ̧́ mbété a Mɔyíze, hɛ̧ puru hɛ̧túna a kuriri.

¹⁶Dáy, ɓá báŋké nɔ́ ka ɗéy: «Gelka njuku fere káwa a mɛ̌ sé ŋgboro a Gáŋmbây, hɛ̧ puráké lú.»

¹⁷A tu ɓá, a gelé, Gáŋmbây, zi ɓay a sa ɓá Têm Pukí, nǎŋnɔ́ gelka Têm a Gáŋmbây erúy, káwa koy zi tí rú yá.

¹⁸Dáy manárí̧ too, ka nûn a manárí̧ zi puru yáy, ná tɔ́ʼɔ hɔ̧́na a Gáŋmbây, a ná fere káwa a manárí̧, ɓay a kaw ɓá báŋa a Gáŋmbây, a ɓil hɔ̧́na gé ɓá mbɛl. A nɔ́ pé ɓá péna niŋa a Gáŋmbây, ka ɓá Têm.