Read Capanahua 2 Kɔrɛŋtiyɛ̧́ri̧ 4 Bible Online

2 Kɔrɛŋtiyɛ̧́ri̧ 4 - Capanahua bible

2 Kɔrɛŋtiyɛ̧́ri̧ 4

¹Gáŋvbôn, a ɓil béla a mɛ̌, hí̧ rú nzáʼapéna nɛ́, ɓayké nɔ́ pé rú zi hú mûn a ɓurú yá.

²Rú pɔŋ niŋ péna sɔ̧rɔ̧ a kú niŋ ɓá múnáké, rú zi rɔ́ʼɔ njuku a há̧na mbêw yá, rú zi fere túlɓay a Gáŋvbôn nyá. Dáy rú tɔ́ʼɔ gbátɓay hí̧ njukuri ɓá táŋáké, rú niŋ nǎŋnɔ́, ɓay a tɔ́ʼɔ hí̧ njukuri, ɓay a kú tu a ɓil law a kuriri ɓá, rú kaw ɓá njuku a ndárákéri a mbɛl a Gáŋvbôn.

³Dáy, Bélaɓay ka rú tɔ́ʼɔy, mí zi ná ɓá táŋáké yá lé, ké zi ná ɓá táŋáké yá hí̧ njukuri ka e ɓɔ́lay.

⁴Kú zi láɓulaw yá, ɓayhí̧lé Sata̧n, vbôn a tísiri nɛ́ râ̧w hɛ̧túna a kuriri, a de kuriri kó geltáŋa ka Bélaɓay a hɔ̧́na a Kiris tɔ́ʼɔy, mɛ̌ Kiris, ka kaw ɓá Têm a Gáŋvbôn ka mûn nɛ́y.

⁵Katína, a ɓil tɔ́ʼɔɓay a ɓurú, rú zi tɔ́ʼɔ sé tûl a ɓurú yá, dáy rú tɔ́ʼɔ Zezú Kiris, ɓá Gáŋmbây; a ɓurú lé, rú sa ɓá, rú kaw ɓá njukupéna a wǎyri, ɓay a Zezú.

⁶Gáŋvbôn tí sa í̧ŋásá̧ ɓá: «Geltáŋa, ké taʼa a ɓil tirí̧ma!» Katína, ɓá mɛ̌ kɔ́, pé taʼa hɔrɛ a mɛ̌ a ɓil law a ɓurú, ɓay a ké hí̧ rú hɛ̧túna a hɔ̧́na a Gáŋvbôn ka taʼa ka nûn a Kiris.

⁷Dáy, rú hol hɛ̧zíŋa a Têm a ɓil mûn a ɓurú ɓá báŋa ɓil íri a kú mbó ka siri pɔ̂ny, rá̧lǒo ŋgɛ́rɛ a kpɔ́ŋáké nɔ́, ké hí̧ Gáŋvbôn, a tí ɓá ké hí̧ ɓurú nyá.

⁸Tɔ́ʼɔsêeri ɓórí ɓórí zi tûl a ɓurú, dáy a zi ndɛʼɛrɛ ɓurú nyá, law a ɓurú kaw ɛ́ ɓay sêe too, dáy rú zi vomûn a ɓurú nyá.

⁹Kú ɓá rú tɔ́ʼɔsêe, dáy Gáŋvbôn zi sáŋ rú yá, kú ɓá rú vbú siri, dáy a zi í rú nyá.

¹⁰Rú hol a ɓil mûn a ɓurú sêe too, hûl a Zezú, rá̧lǒo kú kó ndísɛ̌ʼɛ a Zezú a ɓil mûn a ɓurú kɔ́.

¹¹A ɓil káwa a ndísɛ̌ʼɛ a ɓurú, rú pɛ̧rɛ̧ hûl dát ɓay tûl a Zezú, rá̧lǒo kú kó ndísɛ̌ʼɛ a Zezú a ɓil mûn hûl a ɓurú kɔ́.

¹²Nǎŋnɔ́, hûl kaw niŋ péna a ɓil mûn a ɓurú, ɓay a ndísɛ̌ʼɛ ké niŋ péna a ɓil mûn a wǎyri.

¹³Mbété sa ɓá: «Mi láɓulaw, ɓaykénɔ́ pé mi sáy.» Ɓurú kɔ́ a ɓil kɛrɛ a mbêwké nɔ́, rú láɓulaw, ɓaykénɔ́ pé rú sáy.

¹⁴Katína, rú tu ɓá Gáŋvbôn ka toma Gáŋmbây Zezú a hûl, e toma rú kɔ́ kuu Zezú, ka mára̧ ɓurú mbêw kuu wǎyri kɔ̧ mbɛlɛ́.

¹⁵Tɔ́ʼɔsêe nɔ́rí̧ too ka ka̧rú̧y, ɓá ɓay tûl a wǎyri, ka ŋgboro a nɔ́ rá̧, béla a Gáŋvbôn e wal ma njukuri gé ɓá mbɛl, a ŋgburu ŋgboro, zi awá ɓá ŋgɛ̧́náké ɓay tûl hɔ̧́na a Gáŋvbôn.

¹⁶Ɓaykénɔ́, pé rú zi vomûn a ɓurú yá. Katína, mí ɓá mûn a ɓurú, pé kaw ɓewa gé ɓá mbɛl, têm a ɓurú, kaw ɓá fékéké dát.

¹⁷Nǎŋ, tɔ́ʼɔsêeri ka ziŋ nárí̧ a ŋgɛŋnɛ́, manárí̧ mí ɓá lé béla a hɔ̧́ná ka ná dát, ka e ka nɛ́rɛ̧ mambáy ka kú mɔny zoko nárí̧, ná e kó ɓá tɔ́ʼɔsêe a manárí̧ a ŋgɛŋnɛ́, ɓá hɛ̧ a baaké.

¹⁸Ɓayhí̧lé rú zi ɓá kɛrɛ a ɓurú ka̧n tûl hɛ̧ ka nûn kó yá, rú ɓá kɛrɛ a ɓurú ka̧n tûl hɛ̧ ka nûn a manárí̧ zi kó yáy. Ɓayhí̧lé hɛ̧ ka nûn kóy, zi ɗiɓaŋ yá, dáy hɛ̧ ka nûn zi kó yáy, ná dát.