Read Capanahua 2 Kɔrɛŋtiyɛ̧́ri̧ 5 Bible Online

2 Kɔrɛŋtiyɛ̧́ri̧ 5 - Capanahua bible

2 Kɔrɛŋtiyɛ̧́ri̧ 5

¹Ná tu ɓá katína, ɓá gbáʼari ka ná kaw ɓilké a ŋgɛŋnɛ́ mí gbɛʼɛrɛ, zi ɓay a sa ɓá mûn a manárí̧ a tísiri, Gáŋvbôn mɔny zoko nárí̧ gáŋ vûn a nûnalê ka e ná dát, gel ka zi tí ɓá ndɔ̂ʼɔ a njuku pé mɔny nyáy.

²Dáy ná kaw vúmûn a manárí̧ a ŋgɛŋnɛ́, ɓayhí̧lé, kɛrɛ a manárí̧ too, ɓá ɛ́ ri vûn a manárí̧ a nûnalê,

³ɓayhí̧lé manárí̧ mí ziŋ ri ɓil vûn nɔ́y, mûn a manárí̧ tí kaw baa yá.

⁴Katína, nâm too ka ná e kaw a ɓil gbáʼari a tísiri nɛ́y, ná e vúmûn a manárí̧ ɓá báŋa hóla ka zi nárí̧. Nǎŋnɔ́, zi sa ɓá, ná zi ɓay a pɔŋ mûn a manárí̧ ɓála tísiri nɛ́ nyá, dáy ná zi ɓay a rí mûn a nûnalê rá̧lǒo mûn a ndísɛ̌ʼɛ ké ziŋ ta̧ mûn hûl.

⁵Ɓá mɛ̌ Gáŋvbôn pé mɔny nárí̧ ɓayké, ké hí̧ nárí̧ Têm a mɛ̌ ɓá báŋa hɛ̧ ŋgána a béla a ké mɔny zoko nárí̧.

⁶Dáy, ná mbá ka kpúmûn dát, a tu ɓá táŋáké ɓá gelka ná kaw a ɓil mûn a nɛ́y, ná kaw ɗí kuu Gáŋmbây,

⁷nǎŋnɔ́, ná séséna ka ŋgboro a láɓulaw, a zi tí ɓá ka ŋgboro a hɛ̧ ka nûn kó yá.

⁸Ná mbá ka kpúmûn, a zi ɓay a pɔŋ mûn a nɛ́, ɓay a sé kaw gbaŋa a Gáŋmbây.

⁹Ɓaykénɔ́ pé ná ɛ́ ŋgboro niŋ too, ɓay a niŋ hɛ̧ ka rí nɛ́y, a ɓil káwa a ɓil mûn a nɛ́, malé a ɓil pɔŋ mûn a nɛ́.

¹⁰Ɓayhí̧lé, ná e ew manárí̧ too a mbɛl a Kiris, ɓay a ké walɓay kɔ̧ tûl a manárí̧, a goló, njuku a sí̧ lé too e ziŋ kpáʼandɔ̂ʼɔ péna a mɛ̌, ka tûl hɛ̧ a béláké malé hɛ̧ a belyáké a ké niŋ a ɓil káwa a mɛ̌ ka tísiri nɛ́y.

¹¹Rú tu hɛ̧ ka zi ɓay a sa ɓá hɛʼɛ Gáŋmbây, nǎŋnɔ́, rú ɛ́ ŋgboro niŋ a njukuri kú tu hɛ̧ hɛʼɛké. Gáŋvbôn tu rú ɓá táŋáké, dáy mi kɛrɛ ɓá wǎyri kɔ́, i tu mǐ a ɓil law a wǎyri ɓá táŋáké.

¹²Rú zi ɓá rú gí tɔ́ʼɔ mûn a ɓurú ɓá a féké ɓáy a mbɛl a wǎyri mbaa, dáy rú zi ɓay a hí̧ wǎyri ŋgboro kaw ka lawrína sé tûl a ɓurú, nǎŋnɔ́, i e ziŋ ŋgboro rerú ka ɓay hí̧ njukuri ka ɗél mûn a kuriri sé tûl hɛ̧ a kála baay, ka zi tí ɓá hɛ̧ ka e a ɓil law yáy.

¹³Katína, rú mi tɛ̧́ dɔ̂ʼɔy, rú tɛ̧́ ɓay tûl a Gáŋvbôn. Dáy, rú mí kaw ɓá njuku a rɔ̧́nákéy, ɓá ɓay tûl a wǎyri.

¹⁴Ɓayhí̧lé, zína a Kiris ŋgbá law manárí̧, manárí̧ ka tu ɓá táŋáké ɓá njuku mbêw hú ɓay tûl a njukuri tooy, ka njukuri too hú kuu mɛ̌.

¹⁵Ké ziŋ hûl ɓay tûl a njukuri too rá̧lǒo njukuri too ka kaw ka ndísɛ̌ʼɛ, kú zi ná kaw ɓay tûl a kuriri, kú kaw ɓay a njuku ka hú, ka a retoma ka hûl ɓay tûl a kuriri.

¹⁶Ɓaykénɔ́ pé ŋgɛŋnɛ́, ná zi tu njuku a há̧na ka ŋgboro hay mûn mbaa. Dáy í̧ŋásá̧, manárí̧ mí tu Kiris ka ŋgboro a hay mûn, ŋgɛŋnɛ́, ná zi tu nɛ́ nǎŋnɔ́ mbaa.

¹⁷Njuku mí kaw mûn mbêw kuu Kiris lé, ké tɛ̧́ njuku a kú mɔny a ŋgɛŋ: Hɛ̧ a tâ̧wkéri too tá dá, hɛ̧ri̧ too tɛ̧́ a ŋgɛŋké.

¹⁸A nɔ́ too gí a gel a Gáŋvbôn ka ɓá láhá̧na gí bazeŋ a manárí̧ kuu mɛ̌ ka ŋgboro a Kiris, ka a hí̧ rú nzáʼapéna ɓá njuku a fékéri gí láhá̧na kuu mɛ̌y.

¹⁹Ɓayhí̧lé, ɓá Gáŋvbôn pé niŋ, pé a ɓá láhá̧na gí bazeŋ a njukuri too kuu mɛ̌, ka ŋgboro a Kiris, táŋ ɛ̧rɛ̧ ɓékéhɛ̧ a kuriri. Dáy ké hí̧ rú nzáʼapéna tɔ́ʼɔɓay sé tûl ɓay láhá̧naké.

²⁰Nǎŋnɔ́ dáy, rú kaw ɓá njuku nzáʼapéna[1] a Kiris, tɔ́ʼɔ ɛ́ŋ báŋa Gáŋvbôn ɗí wǎyri ka ŋgboro a ɓurú: Rú vú hí̧ wǎyri ka rɛŋ a Kiris, i láhá̧narí̧ kuu Gáŋvbôn.

²¹Kiris, zi tí ka ɓéké yá, dáy Gáŋvbôn ɓá ɓéké a manárí̧ too hol nɛ́, rá̧lǒo ka ŋgboro a mɛ̌, ná ziŋ tɛ̧́ njuku a ndárákéri a mbɛl a Gáŋvbôn.