Read Capanahua 2 Kɔrɛŋtiyɛ̧́ri̧ 6 Bible Online

2 Kɔrɛŋtiyɛ̧́ri̧ 6 - Capanahua bible

2 Kɔrɛŋtiyɛ̧́ri̧ 6

¹Nǎŋnɔ́, ɓá báŋké nɔ́ ka rú kaw ɓá mbáŋa péna a Gáŋvbôn, rú vú hí̧ wǎyri: I zi ná yáw béla a Gáŋvbôn, ka i ziŋ

²Ɓayhí̧lé Gáŋvbôn sa ɓá: «A ɓil nâm béla a mǐ, mi lá vúna a mɔ̌, a ɓil nâm pɛ̧́na, mi gí hí̧ndɔ̂ʼɔ hí̧ mɔ́.» Nǎŋnɔ́ ŋgɛŋnɛ́, ɓá nâm béla a Gáŋvbôn, ɓá nâm pɛ̧́na.

³Rú zi ɓá njuku ké yáw péna a ɓurú yá, ɓayké nɔ́, pé rú niŋ too, ɓay rú zi ná tɛ̧́ hɛ̧ ɓɛ̧na a njukuri.

⁴Rú ɛ́ a ɓil hɛ̧ri̧ too, ŋgboro tɔ́ʼɔ ɓá rú kaw ɓá gbát njukupéna a Gáŋvbônri̧: Rú ikilaw ɓá ŋgɛ́ráké a ɓil tɔ́ʼɔsêeri, a ɓil hɛ̧ a ŋgɛ́rɛ́kéri rá̧ a ɓil hɛ̧ri̧ ka hí̧ wɔ́w,

⁵a ɓil vbá̧na, a ɓil vûn sɛl. Kú uru njukuri kɔ̧ tûl a ɓurú, péna tá tûl ɓurú, kú de rú ná nâm, a de rú laʼa.

⁶Rú tɔ́ʼɔ ɓá rú kaw ɓá njukupéna a Gáŋvbônri̧, ka ŋgboro a bɔʼɔséna ɓá táŋáké, ka ŋgboro a hɛ̧túna, ka ŋgboro a ikilaw, ka ŋgboro a bélalaw, ka ŋgboro a Têm Pukí rá̧ ka ŋgboro a zína a law mbêw,

⁷ka ŋgboro tɔ́ʼɔ gbátɓay rá̧ ka ŋgboro a kpɔ́ŋa a Gáŋvbôn. Hɛ̧ rúbére a ɓurú rá̧ ŋgaŋ bére a ɓurú, ɓá niŋ hɛ̧ a ndáráké ka nûn a Gáŋvbôn.

⁸Njuku a há̧narí̧ hɔ̧́ rú, a fékéri yáw rú. Njuku a há̧narí̧ fára rú, a fékéri hɛʼɛ rú. Kú mbí rú ɓá báŋa njuku kúŋɓayri, a tu ɓá, rú kaw sa gbátɓay yá.

⁹Kú mbí rú ɓá báŋa kú zi tu rú yá, a tu ɓá, kú tu rú ɓá táŋáké yá, kú kó rú ɓá báŋa njukuri ka kaw ɗɛ́ŋ ɓay a hûl, a tu ɓá rú kaw ka ndísɛ̌ʼɛ yá. Kú ɓá rú tɔ́ʼɔsêe, a zi í rú yá;

¹⁰Kú yírí law a ɓurú, a tu ɓá rú kaw dát ka law sáʼa yá, kú mbí rú ɓá njuku fóyári, a tu ɓá rú ɓá njukuri ɓá ŋgɛ̧́náké tɛ̧́ njuku hɛ̧zíŋári̧ nyá, rú kaw ɓá báŋa njukuri ka zi tí ka hɛ̧ri̧ nyá, a tu ɓá rú e ka hɛ̧ri̧ too yá.

¹¹Rú saɓay hí̧ wǎyri ɓá táŋáké, wǎyri Kɔrɛŋtiyɛ̧́, mbáŋa a mǐri̧, rú ŋgburu law a ɓurú too hí̧ wǎyri.

¹²Rú zi de wǎyri zína a ɓurú yá, ɓá wǎyri pé tu law a wǎyri.

¹³Ɓaykénɔ́ pé mi saɓay hí̧ wǎyri ɓá báŋa bâa ka saɓay hí̧ gun a mɛ̌ri̧: Í tɔ́ʼɔ rú zína a wǎyri, a í ŋgburu law a wǎyri kɔ́ hí̧ rú!

¹⁴I zi ná hol zuk a mbêwké kuu njukuri ka zi láɓulaw yáy. A̧hí̧ ŋgba̧ra̧ hɛ̧ a ndáráké rá̧ hɛ̧ a belyáké lé? Malé a̧hí̧ ŋgba̧ra̧ geltáŋa rá̧ tírí̧ma lé?

¹⁵Ka ŋgboro a sí̧ rá̧ Kiris e láhá̧na kuu Zábolo lé? Malé a̧hí̧ e mára̧ njuku láɓulaw mbêw kuu njuku ka zi láɓulaw yáy lé?

¹⁶A̧hí̧, e ɓá vûn a Gáŋvbôn láhá̧na kuu vbônri̧ lé? Ɓayhí̧lé ná kaw ɓá vûn a Gáŋvbôn a ndísɛ̌ʼɛ, ɓá báŋké ka Gáŋvbôn sa ɓá: «Mi e kaw kuu kuriri, ka séséna kuu kuriri, mi e kaw ɓá Gáŋvbôn a kuriri, kú e kaw ɓá njuku a mǐri̧.»

¹⁷Ɓaykénɔ́ pé Gáŋmbây sa ɓá: «I tɛ̧́ a bazeŋ a kuriri, a i wal há̧narí̧ kuu kuriri. I zi ná ɗa hɛ̧ a táŋnyáké lé mǐ, mi e nyá wǎyri.

¹⁸Mi e kaw ɓá báŋa bâa a wǎyri, a wǎyri, i e kaw ɓá báŋa gun a mǐri̧ a wɔ̧rɔ̧́njukuri rá̧ wûnynjukuri, nǎŋnɔ́ pé Gáŋmbây ka ndé ka kpɔ́ŋa too, sáy.»