Read Capanahua 2 Kɔrɛŋtiyɛ̧́ri̧ 7 Bible Online

2 Kɔrɛŋtiyɛ̧́ri̧ 7 - Capanahua bible

2 Kɔrɛŋtiyɛ̧́ri̧ 7

¹Mbáŋa mǐri̧, ka mi zi mambáy, hí̧nzáʼa a Gáŋvbôn nɔ́rí̧ too, ɓá ɓala manárí̧ kɔ́. Ɓaykénɔ́, ná turu mûn a manárí̧ a lú ɓéké hɛ̧ri̧ too ka yírí mûn rá̧ law a manárí̧, a ná ɛ́ ŋgboro kaw ɓá táŋáké a ɓil hɛʼɛ a Gáŋvbôn.

²I mɔny gelkáwa a ɓil law a wǎyri hí̧ rú! Rú zi niŋ a ɓéké kuu njuku yá, rú zi ɓew láɓulaw a njuku a há̧na mbêw yá, rú zi sɔ̧́ ŋgɛ́ra a njuku yá.

³Mi zi saɓayké ɓay a ɓá ɓay ŋgbá wǎyri yá. Katína, ɓá báŋké ka mi tí sa ɗambɛl, i e a ɓil law a ɓurú dát, a ɓil hûl malé a ɓil káwa ndísɛ̌ʼɛ too.

⁴Mi erú ka mbílaw hɔ̧́ mambá sé ŋgboro a wǎyri rá̧ mûnrína mambá ɓay a wǎyri. A ɓil tɔ́ʼɔsêe a ɓurú too, mi mbá ka kpúmûn rá̧ mûnrína.

⁵Ɓayhí̧lé, gelka rú ka̧ tísiri a Maseduwa̧n, rú zi ɔʼɔ mûn a ɓurú yá. Rú ziŋ tɔ́ʼɔsêeri mára̧ké ɓórí ɓórí: Bére ka kála rá̧ wɔ́w a ɓil law a ɓurú.

⁶Dáy, Gáŋvbôn ka kaw hí̧ ŋgɛ́rɛ hí̧ njukuri ka ta̧y, volaw a ɓurú ka ka̧na a Tît.

⁷Tí ɓá ka̧na a Tît mbêw yáŋ pé volaw a ɓurú yá, ɓá ɓay a mɛ̌ sé ŋgboro a wǎyri kɔ́, ka i volawɛ́ mɛ̌ ka mûn nɛ́y. Ké saɓay a vúna a wǎyri mambá, ka i zi ɓay a rekó mí, ké saɓay a lawyíra a wǎyri rá̧ ɓay a mbí mûn a wǎyri ɓay a mǐ. Ɓaykénɔ́ pé mûnrína a mǐ hɔ̧́ mambáy.

⁸Katína, mbété ka mi ɗé hí̧ wǎyri, mí yírí law a wǎyri rá kɔ́, law ní zi sé mí sé tûlké nyá, rá̧ law ní mí sé mí kpay rá kɔ́, ɓá ɓay hɛ̧ ka mbétéké, yírí law a wǎyri nâm kpay yáŋ.

⁹Dáy a ŋgɛŋnɛ́, mi erú ka lawrína, tí ɓá ɓay hɛ̧ ka law a wǎyri yírí yá, ɓá ɓay hɛ̧ ka lawyíraké, fere káwa a wǎyri. Lawyíraké nɔ́, ná ɓá báŋké ka Gáŋvbôn ziy, rú zi niŋ hɛ̧ a belyáké kuu wǎyri yá.

¹⁰Ɓayhí̧lé, lawyíra ka sé ɓá báŋké ka Gáŋvbôn ziy, fere káwa a njuku, ka ɓá nɛ́ ziŋ pɛ̧́na, táŋ séna a law a njuku sé tûlké. Dáy, lawyíra ka njuku ziŋ ka ŋgboro a hɛ̧ a tísiri nɛ́y, ɓá njuku sé hûl.

¹¹I kó a ŋgɛŋnɛ́, hɛ̧ ka lawyíra a wǎyri hí̧ a ɓil zína a Gáŋvbôn ɓá: Ga mûn a ɓil niŋ péna, ŋgú hára, law séna, wɔ́w niŋ hɛ̧ a belyáké, zína ɓay kó mí, mbí mûn ɓay a niŋ péna, gamûn nzɛ́rɛ njuku ka niŋ ɓékéhɛ̧! A ɓilké nɔ́, i tɔ́ʼɔ ka ŋgboro a hɛ̧ niŋári̧ ɓórí ɓórí too, ɓá i zi tí a ɓil hɛ̧ niŋáké yá.

¹²Mǐ, mí ɗé mbété nɛ́ hí̧ wǎyri, zi tí ɓá ɓay tûl a njuku ka niŋ ɓékéhɛ̧ malé ɓay a njuku a kú niŋ ɓékéhɛ̧ké ziŋ nɛ́ nyá. Dáy ɓá ɓay í tɔ́ʼɔ ɓá táŋáké a mbɛl a Gáŋvbôn, mbí mûn a wǎyri ɓay a ɓurú.

¹³Ɓaykénɔ́ pé hɛ̧ niŋa a wǎyri, volaw a ɓurú. Rú zi ziŋ volaw mbêw yáŋ nyá, rú ziŋ lawrína mambá, ɓay tûl mûnrína a Tît sé tûl hɛ̧ ka i niŋ ka a volawɛ́y.

¹⁴Dáy mǐ, mí niŋ wélé ɓay tûl a wǎyri ka gbaŋ a Tît rá kɔ́, i zi ɓá sɔ̧rɔ̧ ka̧n nûn ní nyá. Ɓá báŋké nɔ́ ka rú sa gbátɓay hí̧ wǎyri dát, ɓá mbêwké kɔ́ wélé a wǎyri ka rú niŋ a mbɛl a Tît tɔ́ʼɔ ɓá gbátɓay.

¹⁵Nǎŋnɔ́ zína a Tît ɓay a wǎyri hɔ̧́ gé ɓá mbɛl, gelka, ké kɛrɛ lá nzaʼa a wǎyri rá̧ báŋké ka i nyá nɛ́ a ɓil wɔ́w rá̧ tɔ́ mûn.

¹⁶Mi erú ka mûnrína ɓay ɓá kɛrɛ a mǐ ka̧n tûl a wǎyri sé tûl hɛ̧ too.