Read Capanahua 2 Kɔrɛŋtiyɛ̧́ri̧ 9 Bible Online

2 Kɔrɛŋtiyɛ̧́ri̧ 9 - Capanahua bible

2 Kɔrɛŋtiyɛ̧́ri̧ 9

¹Ɓay hɛ̧ ka kó hí̧ndɔ̂ʼɔ hí̧ njuku láɓulawri ka Zerúzalɛ̂m, zi tí ka nɛ́rɛ̧ ɓá mí ɗé mbété hí̧ wǎyri sé tûlké yá.

²Mi tu béla law a wǎyri, mi niŋ wélé a wǎyri a mbɛl a njuku a Maseduwa̧nri̧, a sa hí̧ kuriri ɓá: «Nyîn a tísiri a Akayíri, kaw ɗɛ́ŋ ɓay a hí̧ hɛ̧ a ndɔ̂ʼɔ a kuriri mbimbɔ̂m mbêw dá.» Mbí mûn a wǎyri, hí̧ ŋgɛ́rɛ hí̧ Egilizeri ɓá ŋgɛ̧́náké.

³Ŋgɛŋnɛ́, mi pé nyîn a há̧narí̧ ɗambɛl, rá̧ wélé ka rú niŋ sé tûl a wǎyri, ké zi ná, ná baa: Mi zi ɓá í kaw ɗɛ́ŋ ɓá báŋké nɔ́ ka mi tí sáy.

⁴Katína, njuku a Maseduwa̧nri̧, mí gé kuu mǐ, rá̧ mí gé ziŋ wǎyri kaw ɗɛ́ŋ yáy, ɓay ka rú sa ɓá i kaw ɗɛ́ŋ nɔ́y, e reféré tɛ̧́ hɛ̧ sɔ̧rɔ̧ hí̧ rú, zi ɓay a sa ɓá wǎyri kɔ́ e ná ɓá hɛ̧ sɔ̧rɔ̧ hí̧ wǎyri!

⁵Ɓaykénɔ́ pé mi kɛrɛ ɓá, belɓá mí vú hí̧ nyîn nírí̧, kú gé ɗambɛl, a kú tí mára̧ hɛ̧ a ndɔ̂ʼɔ a wǎyri, ka i tí mɔny ka̧n. Nǎŋnɔ́, hɛ̧ a ndɔ̂ʼɔ a wǎyri e ná ɗɛ́ŋ, ka mi e gé ka̧nay, e tɔ́ʼɔ ɓá ka law zína pé i hí̧, a zi tí ɓá ka ŋgɛ́rɛ yá.

⁶Í kɛrɛ hɛ̧ nɛ́: Njuku ka rú hɛ̧pay tɛ̧́w, e lú hɛ̧pay tɛ̧́w, a njuku ka rú ɓá ŋgɛ̧́náké, e lú ɓá ŋgɛ̧́náké.

⁷Dáy, belɓá njuku mbêw mbêw too, ké hí̧ ɓá báŋké ka lawɛ́ ziy, táŋ hɛ́rɛ malé ka ŋgɛ́rɛ yá, ɓayhí̧lé Gáŋvbôn zi njuku ka hí̧ hɛ̧ ka law sáʼay.

⁸Nǎŋnɔ́, Gáŋvbôn e ka kpɔ́ŋa ɓay a hí̧ wǎyri mára̧ hɛ̧ a bélákéri too, rá̧lǒo hɛ̧ há̧na ké zi ná mbá wǎyri, a i ziŋ niŋ béla pénari̧ tooy.

⁹Ɓá báŋké ka ɗé ka̧n ɓil Mbété: «Ké wal hɛ̧zíŋa a mɛ̌ri̧ a hí̧ njuku fóyári, béla a mɛ̌ ná dát.»

¹⁰Gáŋvbôn, ka hí̧ mɛ̧rɛ̧ rá̧ hɛ̧lâʼa hí̧ njuku wâʼay, e hí̧ wǎyri mɛ̧rɛ̧ too ka i ziy, ka niŋ rá̧ ké hɔ̧́, ɓay a béla law a wǎyri, ké hí̧ lénákéri ɓá ŋgɛ̧́náké.

¹¹Gáŋvbôn, e ɓá wǎyri tɛ̧́ njuku hɛ̧zíŋári̧ sêe too, ɓay a i tɔ́ʼɔ béla law a wǎyri dát, nǎŋnɔ́, njukuri ɓá ŋgɛ̧́náké, e zi awá hí̧ Gáŋvbôn, ɓay a hí̧ndɔ̂ʼɔ a wǎyri, ka rú ɓá gé rú hí̧ kuriri.

¹²Ɓayhí̧lé péna ka i niŋ, zi nɛ́rɛ̧ ɓá njuku láɓulawri mbɛ́ŋ nyá, ké ŋgburu ŋgboro hí̧ njukuri ɓay a zi awá ɓá ŋgɛ̧́náké hí̧ Gáŋvbôn.

¹³A ɓil kó béla a pénáké nɔ́, njukuri ɓá ŋgɛ̧́náké e zi awá hí̧ Gáŋvbôn, ɓay a law mbêw a wǎyri a ɓil tɔ́ŋ Bélaɓay a Kiris, kú e hɔ̧́ Gáŋvbôn kɔ́ ɓay tûl béla law a wǎyri, a ɓil wal hɛ̧zíŋa a wǎyri kuu kuriri rá̧ kuu njukuri too.

¹⁴Kú e gɔ́ŋ Gáŋvbôn ɓay a wǎyri, ka tɔ́ʼɔ zína a kuriri ɓay tûl gáŋ béla ka Gáŋvbôn hí̧ wǎyri.

¹⁵Awá hí̧ Gáŋvbôn, ɓay tûl hɛ̧hí̧na a mɛ̌, ka hɛ̧ marú̧y zi tí yáy!