Read Capanahua Galátíyɛ̧́ri̧ 1 Bible Online

Galátíyɛ̧́ri̧ 1 - Capanahua bible

Galátíyɛ̧́ri̧ 1

¹Mǐ Pôl, apotere, tí ɓá ka ŋgboro a njukuri malé ka ŋgboro a njuku a há̧na nyá, ɓá ka ŋgboro a Zezú Kiris rá̧ Bâa a Gáŋvbôn, ka toma nɛ́ a ɓil a hûlri,

²rá̧ nyîn nírí̧ too ka mára̧ kuu mǐ, mí ɗé mbété nɛ́ hí̧ Egilizeri ka tísiri a Galátí, ɓay a sa hí̧ kuriri ɓá:

³Béla rá̧ a vónáké ké hí̧ wǎyri too ka ŋgboro a Bâa, Gáŋvbôn a manárí̧ rá̧ Gáŋmbây Zezú Kiris.

⁴Kiris hí̧ ndísɛ̌ʼɛ a mɛ̌, ɓay a pɛ̧́ nárí̧ a ɓil ɓéké a manárí̧, rá̧ a ké ten nárí̧ a ɓil ɓéké káwa a ŋgɛŋnɛ́, ɓá báŋké ka Gáŋvbôn, Bâa a manárí̧ ziy.

⁵Hɔ̧́na ké hí̧ Gáŋvbôn dát! Amɛn.

⁶Gáŋvbôn ɗí wǎyri ka ŋgboro a béla a Kiris, dáy mi kaw yér, ɓay a mi kó wǎyri fere ka̧ny ɓá gánáké hí̧ nɛ́, ɓay a tɔ́ŋ bélaɓay a féké.

⁷Katína, bélaɓay a féké zi tí yá, dáy njuku a há̧narí̧ erú, ka zi ɓay a zuʼuru káwa a wǎyri, a zi ɓay a fere Bélaɓay a Kiris.

⁸Dáy njuku a há̧na malé ɓurú ka mûn a ɓurú malé aŋnze a há̧na ka gí a nûnalê, mí gí tɔ́ʼɔ bélaɓay a féké ɓórí, ka zi tí ɓá Bélaɓay ka rú tɔ́ʼɔ hí̧ wǎyri yáy lé, hɛ̧hána a Gáŋvbôn ké kɔ̧ tûlé!

⁹Rú tí sa hí̧ wǎyri dá, dáy mí resa hí̧ wǎyri a ŋgɛŋnɛ́ ɓáy ɓá: Njuku a há̧na mí gí tɔ́ʼɔ bélaɓay a féké ɓórí, ka zi tí ɓá Bélaɓay ka i tí ziŋ nyá lé, hɛ̧hána a Gáŋvbôn ké kɔ̧ tûlé!

¹⁰Dáy a ŋgɛŋnɛ́, ɓá ɗéla a njukuri pé mi kaw ɛ́náké malé ɗéla a Gáŋvbôn lé? Mi ɛ́ ŋgboro niŋ hɛ̧ ka ri njukuri lé? Mǐ, mí ɛ́ ŋgboro niŋ hɛ̧ ka ri njukuriy ɓáy, mí tí kaw ɓá njukupéna a Kiris yá.

¹¹Mi sa hí̧ wǎyri nyîn nírí̧, a ɓil láɓulaw: Bélaɓay nɔ́ ka mi tɔ́ʼɔ, zi gí ka ŋgboro njuku yá.

¹²Ɓayhí̧lé, mi zi nyá malé mi zi mbɛl ka gél a njuku a há̧na nyá, ɓá Bélaɓay ka Zezú Kiris a mûn nɛ́ tɔ́ʼɔ hí̧ míy.

¹³I lá kú saɓay a mǐ a titíláké ka mi kaw tɔ́ŋ láɓulaw a Juyífri ɓáy. I tu báŋké ka mi ɓá njuku a Kirisri tɔ́ʼɔsêe ɓá ŋgɛ̧́náké, ka a ɛ́ ŋgboro tɛwrɛ kuriri.

¹⁴Mi ndé bárá hɔ̧́na mǐri̧ too a ɓil tɔ́ŋ láɓulaw a Juyífri, mi mbí mûn ndé kuriri too a ɓil tɔ́ŋ sáŋna a zîi a manárí̧.

¹⁵Dáy, Gáŋvbôn a ɓil bélalaw a mɛ̌, ten mí, a ɓá mí kaw ɓórí, tí a ɓil a mâa a mǐ rá pé ké mgbúŋ mí. Nǎŋnɔ́ Gáŋvbôn kó bel,

¹⁶ɓá ké tɔ́ʼɔ Gun a mɛ̌ ka ŋgboro a mǐ, rá̧ mí ziŋ tɔ́ʼɔ nɛ́ hí̧ njukuri ka zi tí ɓá Juyífri yáy. Mi zi sé vbí njuku a há̧na nzáʼa nzɛ́rɛ yá,

¹⁷nǎŋ kɔ́, mi zi sé Zerúzalɛ̂m, sé gél a njukuri ka tí kaw ɓá apotere ɗambɛl hí̧ mí nyá. Dáy mi uru a kála núnmbɛ̧́nɛ́ a goló, a sé tísiri a Arabí, a falké, mi regí Damas.

¹⁸Mbimbɔ̂m sáy a falké, pé mi uru sé Zerúzalɛ̂m, ɓay sé ziŋ há̧na kuu Píyɛ́r, dáy a gé kaw kuu mɛ̌ nâm bôo a ndíɓí.

¹⁹Mi zi kó apotere a féké yá, ɔ ɓá Ják nyîn a Gáŋmbây.

²⁰Hɛ̧ nɛ́ ka mi ɗé hí̧ wǎyri nɛ́y, mi sa a mbɛl a Gáŋvbôn, mi zi kúŋɓay yá.

²¹Falké, mi sé ɓil kaw a Siri rá̧ Silisí.

²²Mára̧ a njuku a Kirisri ka tísiri a Judé, zi kó mi bɔʼɔ mbêw yá ɓáy.

²³Kú lá kú sa ɓá: «Njuku ráy ka í̧ŋásá̧, ɓá nárí̧ tɔ́ʼɔsêe mambáy, ŋgɛŋnɛ́ ké kaw tɔ́ʼɔ ɓay láɓulaw ráy, a ké ɛ́ ŋgboro ɓewakéy.»

²⁴Dáy a kú ɗél Gáŋvbôn ɓay a mǐ.