Read Capanahua Galátíyɛ̧́ri̧ 2 Bible Online

Galátíyɛ̧́ri̧ 2 - Capanahua bible

Galátíyɛ̧́ri̧ 2

¹Mbimbɔ̂m bôo a nɛŋ a falké, mi uru a resé Zerúzalɛ̂m kuu Barnabas. Mi ɗa Tît sé kuu mǐ.

²Mi uru sé sá̧ a fal kó hɛ̧ ka Gáŋvbôn tɔ́ʼɔ hí̧ mí. Mi gé tɔ́ʼɔ Bélaɓay ka mí kaw tɔ́ʼɔ hí̧ njukuri ka zi tí ɓá Juyífri nyáy, a ɓil mára̧, ka mi ziŋ niŋ kuu gáŋnjukuri. Ɓayhí̧lé mi zi ɓá, péna a mǐ, ka mi tí niŋ malé ka mi kaw niŋáké, ké zi ná, ná ɓá péna a baaké.

³Dáy Tît ka sé kuu mǐ, ka ɓá njuku Girɛ́k, kú zi há nɛ́ ɓá ké ndá ganzá yá.

⁴Ɓéké nyîn a fékéri e a bazeŋ a manárí̧, a zi ɓay a kú ɓá nɛ́ ndá ganzá. Njuku nɔ́rí̧ gí ri bazeŋ a manárí̧, ɓay a kú kó káwa a manárí̧ ka zi tí ɓá koy a sáŋna mbaa, ka ná ziŋ ka ŋgboro a Zezú Kiris rá̧ kú ziŋ ɓá nárí̧ retɛ̧́ koy a sáŋna a Juyífri ɓá féké.

⁵Dáy rú zi pɔŋ ŋgboro kpay hí̧ kuriri yá, ɓay a koro gbát Bélaɓay hí̧ wǎyri.

⁶Dáy njukuri a kú kó kuriri ɓá gáŋnjuku, káwa a kuriri zi nɛ́rɛ̧ mǐ nyá: Ɓayhí̧lé Gáŋvbôn zi ɗém báŋ káwa a njukuri yá, nǎŋnɔ́ gáŋnjuku nɔ́rí̧, zi ɓá péna a féké kɔ̧ tûl péna a mǐ, a há mí ɓá mi niŋ nyá.

⁷Dáy kú kó ɓá, Gáŋvbôn hí̧ mí nzáʼapéna tɔ́ʼɔ Bélaɓay a mɛ̌ hí̧ njukuri ka zi tí ɓá Juyífri yáy, ɓá báŋké a ké hí̧ Píyɛ́r ɓá ké tɔ́ʼɔ hí̧ Juyífri.

⁸Ɓayhí̧lé Gáŋvbôn ɓá mí ɓá apotere a njukuri ka zi tí ɓá Juyífri yáy, ɓá báŋké a ké ɓá Píyɛ́r ɓá apotere a Juyífri.

⁹Ják, Píyɛ́r rá̧ Zâŋ, kuriri a kú kó kuriri ɓá gáŋnjuku a ɓil mára̧ a gun a Gáŋvbônri̧, gelka kú tu ɓá nzáʼapénaké, Gáŋvbôn pé hí̧ mí, kú nam[1] ɓurú, mǐ rá̧ Barnabas, ɓay a tɔ́ʼɔ ɓá, kú zibɔʼɔ péna a ɓurú. Nǎŋnɔ́ rú láhá̧narí̧, ɓá ɓurú, rú e sé niŋ péna kuu njukuri ka zi tí ɓá Juyífri yáy, a kuriri, kú e sé gel a Juyífri.

¹⁰Ɓay, a kú sa hí̧ rú ɓá, rú kɛrɛ njuku fóyári a ɓil Egilize a Zerúzalɛ̂m, ɓá hɛ̧ ka mi zi yɛʼɛrɛ niŋáké yáy.

¹¹Gelka Píyɛ́r gí ka̧ Aŋtiyós, mi gí ɗí hɛ́rɛ kuu mɛ̌ a mbɛl a njukuri, ɓayhí̧lé hɛ̧ a ké niŋ, zi belyá.

¹²Ɓayhí̧lé, ɗambɛl rá njukuri ka Ják pé kuriri kú ká̧y, Píyɛ́r sɔ̧́lâʼa mbêw kuu njukuri ka láɓulaw, ka zi tí ɓá Juyífri yáy. Dáy, gelka kú gí ká̧y, ké ré ka mûn nɛ́, a pɔŋ sɔ̧́lâʼa kuu kuriri, ɓayhí̧lé ké ŋgú wɔ́w a Juyífri.

¹³Njuku láɓulaw a fékéri ka ɓá Juyíf kɔ́y, reniŋ ɓá báŋké ka Píyɛ́r niŋ, nǎŋnɔ́ Barnabas pí relé ɓil péna niŋáké.

¹⁴Gelka mí kó ɓá bɔʼɔséna a mɛ̌ zi ndara ɓá báŋké ka gbátɓay a Bélaɓay tɔ́ʼɔ yáy, mi sa hí̧ Píyɛ́r ka nûn a njukuri too ɓá: «Mɔ̌, ka mɔ ɓá Juyíf, mɔ niŋ hɛ̧ ɓá báŋa njukuri ka zi tí ɓá Juyífri yáy, a zi niŋ hɛ̧ ɓá báŋa a Juyífri yá. Dáy ɓayhí̧rá̧ mɔ e há njukuri ka zi tí ɓá Juyífri yáy, ɓá kú niŋ hɛ̧ ɓá báŋa a Juyífri lé?»

¹⁵Manárí̧, kú mgbuŋ nárí̧ ɓá Juyífri, ná zi tí ɓá njukuri ka zi tí ɓá Juyífri yáy yá, ka zi tu sáŋna a Gáŋvbôn nyáy yá.

¹⁶Dáy ná tu ɓá, Gáŋvbôn kó njuku ɓá njuku a ndáráké, ɓá ka ŋgboro a láɓulaw a mɛ̌ hí̧ Zezú Kiris mbêw yáŋ, a zi tí ɓá, ɓay ka ké tɔ́ŋ sáŋna a Mɔyíze too yá. Ɓaykénɔ́ pé manárí̧ kɔ́, ná láɓulaw hí̧ Zezú Kiris rá̧ Gáŋvbôn ké kó manárí̧ ɓá njuku a ndáráké, ɓay tûl láɓulaw a manárí̧ hí̧ Kiris, a zi tí ɓá ka ŋgboro a tɔ́ŋ sáŋna a Mɔyíze yá. Ɓayhí̧lé, Gáŋvbôn zi kó njuku a há̧na ɓá njuku a ndáráké, ka ŋgboro a tɔ́ŋ sáŋna a Mɔyíze too yá.

¹⁷Dáy, manárí̧ mí ɛ́ ŋgboro kaw ɓá njuku a ndáráké ka ŋgboro a Kiris, tɔ́ʼɔ ɓá ná kaw ɓá ɓéké njukuri ɓá báŋa a njukuri ka zi tí ɓá Juyífri yáy, dáy zi ɓay a sa ɓá Kiris pé sɔʼɔrɔ nárí̧ sé ɓil niŋ ɓéké lé? Tí nǎŋ nyá!

¹⁸Katína, mǐ, mi rembó péna a sáŋna ka mí gbɛʼɛrɛ, retɔ́ʼɔ ɓá mǐ, mi kaw ɓá njuku ka zi tɔ́ŋ sáŋna nyáy.

¹⁹Ɓayhí̧lé, ɓay hɛ̧ ka kó sáŋnay, mi hú dá, ka ŋgboro hûl ka sáŋna ka mûn nɛ́ hí̧y, rá̧ ɓay a mi ziŋ káwa ɓay a Gáŋvbôn. Ɓay a Kiris, mi kaw ɓá njuku ka ziŋ hûl, ka tûl dii vbatay,

²⁰tɔ́ʼɔ ɓá, mǐ, mí kaw ka ndísɛ̌ʼɛy, zi tí ɓá mǐ pé kaw mbaa, ɓá Kiris pé kaw ka mûn ní. Ɓayhí̧lé, a ɓil káwa a mǐ a ŋgɛŋnɛ́, mi kaw a ɓil láɓulaw hí̧ Gun a Gáŋvbôn, ka zi mí, ka a hí̧ ndísɛ̌ʼɛ a mɛ̌ ɓay a mǐ.

²¹Mi tí sáŋ béla a Gáŋvbôn nyá. Ɓayhí̧lé, mí ɓá sáŋna, pé ɓá njuku kaw ɓá ndáráké a mbɛl a Gáŋvbôn lé, tɔ́ʼɔ ɓá Kiris hú ɓǎŋ baa.