Read Capanahua Galátíyɛ̧́ri̧ 5 Bible Online

Galátíyɛ̧́ri̧ 5 - Capanahua bible

Galátíyɛ̧́ri̧ 5

¹Kiris ten nárí̧ a ɓil koy, ɓay a ná ziŋ gbát kaw baa. Dáy, í ŋgbá ɓá béláké, a í zi ná répɔŋ mûn a wǎyri retɛ̧ koy ɓáy ɓá féké.

²Í lá! Mǐ Pól, mi sa hí̧ wǎyri ɓá: Wǎyri mí ndá ganzáy, Kiris zi tí ka nɛ́rɛ̧ hí̧ wǎyri mbaa.

³Mi re saɓay nɔ́ ɓáy bɔʼɔ mbêw hí̧ njuku too ka zi ɓay a ndá ganzáy: Belɓá ké tɔ́ŋ sáŋna too.

⁴Wǎyri ka ɛ́ ŋgboro ɓá Gáŋvbôn ké kó wǎyri ɓá njuku a ndáráké a mbɛlɛ́ ka ŋgboro a sáŋnay, káwa a wǎyri kuu Kiris, ɗém dá, i pɛ̧rɛ̧ béla ka Gáŋvbôn hí̧y kɔ́.

⁵A manárí̧, ná ɓá kɛra a manárí̧ kɔ̧ tûl a Gáŋvbôn ka e ɓá manárí̧ tɛ̧́ njuku a ndárákéri a mbɛlɛ́, ɓá hɛ̧ ka ná zoko ka ŋgboro a kpɔ́ŋa a Têm Pukí, ka niŋ péna ka ŋgboro a láɓulaw a manárí̧.

⁶Ɓayhí̧lé, a gel a njuku ka e mbêw kuu Zezú Kiris, ndá ganzá malé ndá ganzá yá lé, zi tí ka nɛ́rɛ̧ nyá, hɛ̧ ka e ka nɛ́rɛ̧y, ɓá tɔ́ʼɔ láɓulaw ka ŋgboro a zína.

⁷I tí ŋgúna ɓá béláké, dáy a gé ŋgá̧ ŋgboro hí̧ wǎyri, rá̧ a de wǎyri ŋgboro tɔ́ŋ gbátɓay lé?

⁸Hɛ̧ ka njukuri sa hí̧ wǎyri, ka i lá ka a zibɔʼɔkéy, zi gí ka ŋgboro a Gáŋvbôn, ka ɗí wǎyri yá.

⁹Ɓá báŋké a kú sáy: «Sôm haw kpay yáŋ, ma uru húrú too.»

¹⁰Dáy, Gáŋmbây hí̧ mí mbílaw sé tûl hɛ̧ ka kó wǎyri, ɓayhí̧lé mi tu, ɓá kɛrɛ a wǎyri, tí ná ɓórí kuu mǐ nyá. Dáy njuku too ka zuʼuru káwa a wǎyri, ké zi lé, ké ɓá gé, walɓay a Gáŋvbôn e ɗere kɔ̧ tûlé.

¹¹A mǐ, nyîn nírí̧, mí ɓá katína, mi kaw tɔ́ʼɔɓay sé tûl ndá ganzá ɓáy, ɓayhí̧rá̧ kú e ɓá mí tɔ́ʼɔ sêe ɓáy lé? Mí ɓá nǎŋ, tɔ́ʼɔɓay a hûl a Kiris ka tûl dii vbatay, tí ná ɓá hɛ̧ ka e ɓá njuku lé ɓáy mbaa.

¹²Njukuri ka zi ɓay a zuʼuru wǎyri, ɓay tûl ndá ganzáy: Kú mí zi lé, kú kúŋ mûn a kuriri too gefal.

¹³Dáy a wǎy, nyîn nírí̧, kú ɗí wǎyri tɛ̧́ a ɓil koy dá. Nǎŋnɔ́, tɛ̧́na a ɓil koy, zi tí ɓá ŋgboro niŋ hɛ̧ ka mûn a wǎyri ziy yá. Dáy í pɔŋ zína ké tɔ́ʼɔ ŋgboro hí̧ wǎyri, ɓay a í niŋ péna a bazeŋ a wǎyri hí̧ há̧narí̧.

¹⁴Ɓayhí̧lé sáŋna a Mɔyíze too, mára̧ a ɓil ɓay mbêw yáŋ: «Mɔ́ zi mbɔ́ŋnɔ́ ɓá báŋa mûn nɔ́.»

¹⁵Dáy, wǎyri mí núŋ há̧narí̧, ka sɔ̧́ há̧narí̧ ɓá báŋa a hɛ̧sâ̧ny a ɓil kpâay, í kó rá̧, ɓay í zi ná gbɛʼɛrɛ há̧narí̧ mbêw mbêw too.

¹⁶Dáy, ɓay ka mi zi ɓá mi sa hí̧ wǎyri ɓá: Í pɔŋ Têm Pukí ké tɔ́ʼɔ ŋgboro káwa hí̧ wǎyri, a goló i zi tɔ́ŋ hɛ̧ ka hay mûn a wǎyri ziy yá.

¹⁷Ɓayhí̧lé, hɛ̧ ka hay mûn a manárí̧ ziy, ná ɓórí kuu hɛ̧ ka Têm Pukí ziy, dáy hɛ̧ ka Têm Pukí ziy ná ɓórí kuu hɛ̧ ka hay mûn a manárí̧ ziy kɔ́, láhá̧na zi tí a bazeŋ kuriri yá. Ɓaykénɔ́ pé i zi ma niŋ hɛ̧ri̧ ka law a wǎyri ziy yá.

¹⁸Dáy, Têm Pukí mí tɔ́ʼɔ ŋgboro hí̧ wǎyri, a goló, i zi tí a bɔʼɔ a sáŋna mbaa.

¹⁹Ná tu hɛ̧ ka ɓá péna niŋa a hay mûn, ɓá: Ɓéké káwa, káwa a táŋnyáké rá̧ niŋ hɛ̧ táŋ ŋgboroké,

²⁰pû vbôn rá̧ péna nda̧m, fɔny há̧narí̧, nzáʼa há̧na rá̧ sɛ́rɛ, law hɛ́rɛ, niŋ kpere, wal há̧narí̧ rá̧ ɗém há̧narí̧;

²¹Ɓá law ka̧n tûl hɛ̧ri̧, távôn rá̧ sɔ̧́lâʼa táŋ ŋgboroké, rá̧ hɛ̧ a fékéri ka ɛ́ŋ rúy. Mi sa hí̧ wǎyri ɓáy, ɓá báŋké ka mí tí sáy hí̧ wǎyri, ɓá njuku niŋ hɛ̧ nǎŋ nɔ́rí̧, tí rí ɓil Pû a Gáŋvbôn nyá.

²²Dáy léna a Têm Pukí ɓá: Zína, lawrína, a vónáké, ŋgá̧law, bélalaw, béla, law mbêw,

²³pa̧ nzáʼa rá̧ ŋgbátûl. Sáŋna zi de hɛ̧ nɔ́rí̧ nyá!

²⁴Njukuri ka ɓá njuku a Zezú Kiris, kú ɓara ka̧n tûl dii vbatay, hay mûn a kuriri kuu ɓékéhɛ̧ kɛrɛ a kuriri.

²⁵Mí ɓá Têm Pukí pé hí̧ nárí̧ káwa a ndísɛ̌ʼɛ lé, belɓá ná pɔŋ nɛ́ kɔ́, ké tɔ́ʼɔ ŋgboro káwa hí̧ nárí̧.

²⁶Ná zi ná hɔ̧́tûl, a tíhá̧na a bazeŋ a manárí̧, malé ná ɓá law ka̧n tûl a há̧narí̧ nyá!