Read Capanahua Efɛziyɛ̧́ri̧ 6 Bible Online

Efɛziyɛ̧́ri̧ 6 - Capanahua bible

Efɛziyɛ̧́ri̧ 6

¹Gunri̧, í lá nzáʼa bâa rá̧ mâa a wǎyri ɓá báŋké ka Gáŋmbây ziy, a nɔ́ pé ɓá péna a ndáráké.

²«Mɔ́ hɛʼɛ bâa rá̧ mâa a mɔ̌», ɓá titíla sáŋna ka erú ka hí̧nzáʼa:

³«Rá̧lǒo mɔ́ ziŋ béla káwa, rá̧ nâm a mɔ̌ ké ŋgɛ̧́ a tísiri nɛ́.»

⁴A wǎy, bâari, í yírí law a gun a wǎyri ka ŋgboro a bɔʼɔséna a wǎyri yá. Dáy í koro kuriri, a í tɔ́ʼɔ kuriri ŋgboro, a í hí̧ kuriri nzáʼa nzɛ́rɛ ka ŋgboro a Gáŋmbây.

⁵Koyri, í lá nzáʼa a bákáwa a wǎyri ka tísiri nɛ́ táŋ hɔ̧́tûl, a í hɛʼɛ kuriri ka law mbêw, ɛ́ŋ ɓá í kaw niŋ hí̧ Kiris.

⁶Í zi ná niŋ péna ɓay a nûn a kuriri, ɓay ké ri kuriri; Í niŋ ɓá báŋa koy a Kirisri, ka niŋ hɛ̧ ka Gáŋvbôn zi a law mbêw.

⁷Í niŋ péna hí̧ bákáwa a wǎyri ka law a béláké, ɓá báŋa í kaw niŋ hí̧ Gáŋmbây ka mûn nɛ́, a tí ɓá hí̧ njukuri yá.

⁸Í tu ɓá, a ge lé too, koy malé njuku ka zi tí ɓá koy yáy, e ziŋ kpáʼandɔ̂ʼɔ péna a mɛ̌ a gel a Gáŋmbây ka ŋgboro a béla péna mɛ̌, a ké niŋ.

⁹A wǎy, bákáwari, í niŋ nǎŋ kuu koy a wǎyri, táŋ ɓá kuriri tɔ́ʼɔsêe. Í kɛrɛ ɓá wǎyri kɔ́, í erú, wǎyri kuu kuriri too, bákáwa a mbêwké a nûnalê, a ge lé njuku ka tá mbɛ̧́nɛ́ zi tí yá.

¹⁰Ŋgɛŋnɛ́, í ziŋ ŋgɛ́rɛ a wǎyri a ɓil káwa mbêw kuu Gáŋmbây rá̧ ɓil ŋgɛ́rɛ kpɔ́ŋa a mɛ̌ too.

¹¹Í fa̧ hɛ̧bére a Gáŋvbôn too kɔ̧ mûn a wǎyri, rá̧lǒo í ew ɓá kpúnáké a ɓil ɓékéhɛ̧ a Zábolo.

¹²Ɓayhí̧lé, zi tí ɓá kuu njukuri pé ná e rúbére kuu kuriri yá, ná e rúbére kuu lásarari, kuu kpɔ́ŋári̧ rá̧ kuu têmri̧ ka kaw mbây ka tísiri nɛ́ ka e a ɓil tirí̧ma, rá̧ kuu ɓéké têmri̧, ka kaw a bazeŋ a nûnalê rá̧ tísiri.

¹³Ɓaykénɔ́, í fa̧ hɛ̧bére a Gáŋvbôn too rá̧ í ma ew ɓá kpúnáké a ɓil nâm a belyáké ka e gínay, a mbɛl a njuku ŋgá̧na rá̧ í ma ew ɓá kpúnáké kɔ́ a fal rúbére ka̧ kɔ́rɔ́kéy.

¹⁴Í ew ɓá béláké: a í mbí gbátɓay ɓá hɔ́ʼɔ tûl gári, káwa a ndáráké ɓá lá bére ka ndi nzáʼa law.

¹⁵Í ndáʼa ɓá báŋa sabɔʼɔ, zína tɔ́ʼɔ Bélaɓay a vónáké.

¹⁶Í mbí sêe too láɓulaw ɓá ŋgáŋbére: Ka ŋgboro a ŋgáŋbéreké nɔ́ pé í e de gó a njuku ŋgá̧na ka e gí ka ŋgɛ́rɛ a mɛ̌ tooy.

¹⁷Ná mbí pɛ̧́na, ɓá goytûl wɛ̧̂ɛ rá̧ ɓay a Gáŋvbôn ɓá gá̧má a Têm Pukí.

¹⁸Í gɔ́ŋ Gáŋvbôn dát. Í vú, a í gɔ́ŋ Gáŋvbôn a wǎyri ka ŋgboro a Têm Pukí. Í ná nâm nyá, a í tɔ́ŋ gɔ́ŋ Gáŋvbôn ka law mbêw, a í gɔ́ŋ Gáŋvbôn ɓay tûl a njuku láɓulawri too.

¹⁹Í gɔ́ŋ Gáŋvbôn kɔ́ ɓay a mǐ, rá̧lǒo Gáŋvbôn ké ɓá ɓay a ndáráké a mɛ̌ ka̧n nzáʼa ní, ɓay a mí ziŋ ŋgɛ́rɛ ten hɛ̧ a múnáké a Bélaɓay a mɛ̌ táŋ wɔ́w.

²⁰A mi e a ɓil vûn sɛl nɛ́ too, mi kaw ɓá njuku nzáʼapéna a Bélaɓayké. Í gɔ́ŋ Gáŋvbôn a mí ziŋ ŋgɛ́rɛ tɔ́ʼɔɓayké táŋ wɔ́w ɓá báŋké nɔ́ ka mi e niŋáké.

²¹Tisík, nyîn a manárí̧ rá̧ gbát mbáŋa péna a mǐ a ɓil péna a Gáŋmbây, e gé hí̧ wǎyri nzáʼapéna ka kó káwa a mǐ, rá̧lǒo í tu hɛ̧ ka mi kaw niŋáké.

²²Ɓaykénɔ́ pé mí pé nɛ́ gé gel a wǎyri, ɓay a ké gé sa hí̧ wǎyri báŋ káwa ɓurú rá̧ ɓay a kpúmûn a wǎyri.

²³Bâa, Gáŋvbôn rá̧ Gáŋmbây a manárí̧ Zezú Kiris, kú hí̧ wǎyri a vónáké, zína rá̧ láɓulaw.

²⁴Béla a Gáŋvbôn ké kɔ̧ tûl a njukuri too ka zi Gáŋmbây a manárí̧ Zezú Kiris ka zína ka ma ɔ bɔʼɔ mbêw yáy.