Read Capanahua Filípiyɛ̧́ri̧ 1 Bible Online

Filípiyɛ̧́ri̧ 1 - Capanahua bible

Filípiyɛ̧́ri̧ 1

¹Mǐ Pôl rá̧ Timoté, njukupéna a Zezú Kirisri. Rú ɗé mbété nɛ́ hí̧ njuku a tísiri a Filípri too, ka ɓá njuku a Gáŋvbônri̧ ka ŋgboro a Zezú Kiris, hí̧ gáŋnjuku mára̧ a Egilizeri rá̧ diyákereri:

²Gáŋvbôn, Bâa a manárí̧ rá̧ Gáŋmbây Zezú Kiris, kú hí̧ wǎyri béla rá̧ a vónáké.

³Mi kaw zi awá hí̧ Gáŋvbôn sêe too ka mi kɛrɛ ɓay a wǎyri.

⁴Sêe too ka mi gɔ́ŋ Gáŋvbôn ɓay tûl a wǎyri, mi gɔ́ŋ ka sáʼa,

⁵ɓay tûl hí̧ndɔ̂ʼɔ a wǎyri, ka i hí̧ mí ɓay mí tɔ́ʼɔ Bélaɓay tí a títáʼa péna a mí ka̧ sénɛ́.

⁶Mi tu ɓá táŋáké ɓá: Gáŋvbôn, ka tí béla péna nɔ́ a bazeŋ a wǎyri, e niŋ pénáké ka̧ sêe kɔ́rɔ́ké, ka Zezú Kiris e regíy.

⁷Ná ɓá ndáráké ka mi erú ka kɛrɛ nǎŋ sé tûl a wǎyri too, ɓayhí̧lé i e a ɓil law ní, wǎyri ka i ziŋ ri ɓil béla a mbêwké nɔ́ kuu mǐ a ɓil káwa a mǐ, a ɓil vûn sɛl malé a ɓil rúbére ɓay tûl a Bélaɓay.

⁸Gáŋvbôn tu, ɓá mi sa gbátɓay: Mi zi wǎyri too ka law mbêw, ɓá báŋa Zezú Kiris.

⁹Hɛ̧ ka mi vbí Gáŋvbôn ɓay tûl a wǎyri ɓá: Zína a wǎyri ké hɔ̧́ gé ɓá mbɛl, a ké mbá ka gbát hɛ̧túna rá̧ lá ɓil hɛ̧ ɓá táŋáké,

¹⁰ɓay a í ma tu wal ɓil hɛ̧ a béláké rá̧ a belyáké. Nǎŋnɔ́ i kaw ɓá njuku a táŋákéri, ka njuku a há̧na tí sa ɓéké ɓay sé tûl a wǎyri yá, ka sêe ka Kiris e regí.

¹¹Í mbá ka péna a ndárákéri ka gí ka ŋgboro a Zezú Kiris, ɓay a hí̧ hɔ̧́na rá̧ ɗéla hí̧ Gáŋvbôn.

¹²Nyîn nírí̧, mi zi ɓá i tu ɓá hɛ̧ ka ziŋ mí, niŋ Bélaɓay a Gáŋmbây hɔ̧́ sé mbɛl.

¹³Nǎŋnɔ́ pé njukuri too ka e a ɓil pû a mbây tûlkaw, rá̧ njuku a kálari too tu ɓá táŋáké ɓá, ɓay tûl péna a Kiris, pé mi e a ɓil vûn sɛl.

¹⁴Káwa a mǐ a ɓil vûn sɛl, hí̧ njukuri ɓá ŋgɛ̧́náké mbílaw sé ŋgboro a Gáŋmbây, kú ziŋ ŋgɛ́rɛ gé ɓá mbɛl, ɓay a tɔ́ʼɔ ɓay a Gáŋvbôn táŋ wɔ́w.

¹⁵Katína, njuku a há̧narí̧ a bazeŋ a kuriri, tɔ́ʼɔɓay a Kiris, ka ŋgboro a sɛ́rɛ rá̧ ka ŋgboro a ɛ́ ɓay. Dáy njuku a fékéri tɔ́ʼɔɓay a Kiris, ka kɛrɛ a béláké.

¹⁶Kuriri nɔ́rí̧, kú niŋ ka ŋgboro a zína, a tu ɓá mi e a ɓil vûn sɛl ɓay tûl Bélaɓay ka mi tɔ́ʼɔy.

¹⁷Njuku a ǎ̧wrí̧, tɔ́ʼɔɓay a Kiris ka law sɛ́rɛ, kɛrɛ a kuriri zi ná ɓá táŋáké yá, kú zi ɓá tɔ́ʼɔsêe a mǐ a ɓil vûn sɛl ké gé ɓá mbɛl.

¹⁸A nɔ́ too zi tí ka nɛ́rɛ̧ nyá! Kɛrɛ a kuriri ké zi lé, ké ná ɓá béláké malé belyáké too, rɛŋ a Kiris tɔ́ʼɔ gé ɓá mbɛl, a nɔ́ pé hí̧ mí mûnrína dáy mi e ri mûn ní gé ɓá mbɛl,

¹⁹ɓayhí̧lé mi tu ɓá a nɔ́ too, kɔ́rɔ́ké mi e ziŋ tɛ̧́na, ɓay tûl gɔ́ŋ Gáŋvbôn a wǎyri, rá̧ hí̧ndɔ̂ʼɔ a Têm a Zezú Kiris.

²⁰Katína hɛ̧ ka mi zokoy, ka kɛrɛ a mǐ e ka tûlké mambáy, mi tí ziŋ sɔ̧rɔ̧ sé tûlké yá. Tí ka sénɛ́ malé dát lé, Kiris e ziŋ hɔ̧́na a ɓil mûn ní, mí zi lé, a ɓil káwa a ndísɛ̌ʼɛ a mǐ, malé a ɓil hûl a mǐ.

²¹Ɓayhí̧lé káwa a ndísɛ̌ʼɛ a mǐ, ɓá Kiris, hûl a gel ní, ɓá ziŋ béla.

²²Dáy, mí ná ɓá mi kaw ka ndísɛ̌ʼɛ, e hí̧ mí ŋgboro ɓáy, ɓay a niŋ péna a bélákéy, a goló, mi zi tu ɓala sí̧ a ɓilké nɔ́, mi e sá̧náké yá.

²³Kɛrɛ ɓay a mǐ wal sére: Mí zi ɓá mí hú, a sé kaw kuu Kiris, a nɔ́ pé mi zi mambáy;

²⁴Dáy ɓay tûl a wǎyri, bel mambá ɓá mí kaw a ɓil hay mûn ɓáy.

²⁵Ɓá báŋké ka mí tuy, mi e káwa ɓáy. Mi e kaw kuu wǎyri too, ɓay a hí̧ndɔ̂ʼɔ hí̧ wǎyri, a í hɔ̧́, a í mbá ka sáʼa a ɓil láɓulaw.

²⁶Nǎŋnɔ́, gelka mi e regí bazeŋ a wǎyri, i e mbá ka mûnrína, a ɓil káwa a wǎyri mbêw kuu Zezú Kiris, ɓay tûl ní.

²⁷Dáy, belɓá í sé bɔʼɔséna a béláké ɓá báŋké ka Bélaɓay a Kiris tɔ́ʼɔy. Nǎŋnɔ́, mǐ, mí ziŋ gé gel a wǎyri, malé, mí ziŋ géna nyáy, mí lá ɓá, í kaw mbêw a ɓil kɛrɛ a mbêwké, a rúbére mbêw ka law mbêw, ɓay a koro láɓulaw a wǎyri ka i ziŋ ka ŋgboro a Bélaɓay.

²⁸Í zi ná pɔŋ njuku ŋgá̧na a wǎyri kú ɓá wɔ́w kɔ̧ law a wǎyri, e ná ɓá ŋgána hí̧ kuriri ɓá kú e ka tûl ŋgboro ɓɔ́la, dáy a wǎyri, i e ka tûl ŋgboro pɛ̧́na, a nɔ́ too gí ka ŋgboro a Gáŋvbôn.

²⁹Ɓayhí̧lé Gáŋvbôn zi hí̧ wǎyri béla ɓay a láɓulaw hí̧ Kiris mbêw yáŋ nyá, dáy, ɓay a í tɔ́ʼɔsêe ɓay a mɛ̌ kɔ́.

³⁰Ŋgɛŋnɛ́, í ri ɓil bére a mbêwké nɔ́, ka í kó mí kaw runáké í̧ŋásá̧, ka mi kaw runáké ɓáy, ɓá báŋké nɔ́ ka í tuy.