Read Capanahua Filípiyɛ̧́ri̧ 2 Bible Online

Filípiyɛ̧́ri̧ 2 - Capanahua bible

Filípiyɛ̧́ri̧ 2

¹Káwa a wǎyri mbêw kuu Kiris, mí hí̧ wǎyri ŋgɛ́rɛ, zína a Kiris mí hí̧ wǎyri mûn kpúna, Têm Pukí mí ziŋ mára̧ wǎyri mbêw malé wǎyri, mí erú ka zína rá̧ bélalaw a bazeŋ a wǎyri lé?

²Í niŋ law ní ké mbá a lawrína, ka ŋgboro a láhá̧na ɓá béláké a bazeŋ a wǎyri, a ɓil zína mbêwké, a ɓil káwa a law a mbêwké rá̧ ɓil kɛrɛ a mbêwké.

³I zi ná niŋ hɛ̧ há̧na ka lé kpere, malé ka ŋgboro a hɔ̧́tûl. Dáy, ka ŋgboro a pɔtûl, í kó njuku a ǎ̧wrí̧, ɓá kú ndé wǎyri ka hɔ̧́na.

⁴Njuku a há̧na, ké zi ná ɛ́ ɓá béla a mɛ̌, dáy a ge lé too ké kɛrɛ béla a njuku a ǎ̧wrí̧ kɔ́.

⁵I erú a bazeŋ a wǎyri, kɛrɛ ka e a gel a Zezú Kiris:

⁶Mɛ̌ ka kaw ɓá Gáŋvbôn dát, ké zi ɛ́ káwa mambɛ̧́nɛ́ kuu Bâa a mɛ̌ Gáŋvbôn nyá,

⁷Dáy ké pɔŋ káwa a Gáŋvbôn a mɛ̌ too ka mûn nɛ́, a rembí káwa a koy. Ké gí tɛ̧́ njuku a bazeŋ a njukuri, njukuri tu nɛ́ ɓá gbát njuku.

⁸Ké pɔtûlé ka mûn nɛ́, ka kaw ɓil lá nzáʼa ka̧ hûl, hûl ka tûl dii vbatay[1]!

⁹Ɓaykénɔ́, pé Gáŋvbôn gbaŋ nɛ́ sé gelkáwa ka ndé ka hɔ̧́na, a hí̧ nɛ́ rɛŋ ka ndé rɛŋri̧ too ka hɔ̧́na.

¹⁰Ké zi ɓá, ɓay tûl rɛŋ a Zezú, njukuri a nûnalê, ka tísiri, rá̧ táʼa tísiri too, kú huku tísiri a mbɛlɛ́,

¹¹a nzáʼaɓayri too, kú tu ɓá Zezú Kiris, ɓá Gáŋmbây a kú hɔ̧́ Bâa, Gáŋvbôn!

¹²Nǎŋnɔ́ mbaŋa a mǐri̧ ka mi zi mambáy, ɓá báŋké nɔ́ ka i lá nzáʼa ní dát ka mi e kuu wǎyri ɓáy, í tɔ́ŋ lá nzáʼaké ɓáy a ŋgɛŋnɛ́ ka mi zi tí a bazeŋ wǎyri yá. Í niŋ péna ka tɔ́ʼɔ ɓá i pɛ̧́ dá; ɓá béláké ka wɔ́w rá̧ tɔ́ mûn.

¹³Ɓayhí̧lé ɓá Gáŋvbôn, pé ɓá ka̧n law a wǎyri zína rá̧ niŋ pénáké, ɓá báŋké a ké ziy.

¹⁴I niŋ péna too táŋ ŋgɔ̧ra, táŋ táhá̧narí̧,

¹⁵rá̧lǒo, í kaw ɓá táŋáké, ka njuku a há̧na tí sa ɓéké ɓay a há̧na sé tûl a wǎyri yáy. Í kaw ɓá Gun a Gáŋvbônri̧, táŋ hɛ̧ belyáké, a bazeŋ a njuku niŋ hɛ̧ belyákéri rá̧ ɓéké njukuri. Nǎŋnɔ́, í táʼa ɓá báŋa geltáŋa a bazeŋ a kuriri ka tísiri,

¹⁶ka ŋgboro a ɓá ɓay a ndísɛ̌ʼɛ gí bazeŋ a kuriri. Nǎŋnɔ́, mi e mbá a lawrína ɓay tûl a wǎyri, ka sêe ka Kiris e regí, ɓayhí̧lé péna a mǐri̧ rá̧ tɔ́ʼɔsêe a mǐri̧, zi tá ɓǎŋ baa yá!

¹⁷Há̧na, sêm mûn ní e féra ɓá báŋa vôn ka e kɔ̧ tûl hɛ̧púna a wǎyri rá̧ péna láɓulaw a wǎyri hí̧ Gáŋvbôn. Mí ɓá nǎŋ, mûn ní e rí mí mambá. Nǎŋnɔ́, mi e ri mûn ní kuu wǎyri too.

¹⁸Ɓá mbêwké, wǎyri kɔ́, i kaw ka sáʼa, a ri mûn a wǎyri kuu mǐ.

¹⁹Mi tu ɓá Gáŋmbây Zezú e zibɔʼɔké, zaa kpay nɛ́, mi e pé Timoté gé gel a wǎyri, rá̧lǒo mi ziŋ mûn kpúna, ka mǐ, mí lá sa̧a a wǎyri.

²⁰Ɓayhí̧lé tá Timoté dalé, njuku a há̧na ka ɓá kɛrɛ a mɛ̌ ka̧n tûl ní, ka a kɛrɛ wǎyri katína zi tí yá.

²¹Njuku a ǎ̧wrí̧ too, ɛ́ ɓá hɛ̧ a mbɛl a kuriri, a zi ɛ́ a Zezú Kiris yá.

²²Dáy a Timoté, i tu ɓá táŋáké, ké mbí mûn nɛ́, ka niŋ péna a Bélaɓay kuu mǐ ka law mbêw, ɓá báŋa gun kuu bâa a mɛ̌.

²³Nǎŋnɔ́, mi e pé nɛ́ gé gel a wǎyri, ka mǐ, mí kó káwa a mǐ ɓá béláké;

²⁴Dáy mi tu ɓá Gáŋmbây e zibɔʼɔkéy, zaa kpay nɛ́, mi e gé gel a wǎyri, mǐ ka mûn ní kɔ́.

²⁵Nǎŋnɔ́, mi kó belɓá mi répé nyîn a manárí̧ Epaforodít, mbáŋa péna a mǐ, a ɓil bére ɓay tûl a Bélaɓay, mɛ̌, ka i pé nɛ́ gí hí̧ndɔ̂ʼɔ hí̧ mí ka hɛ̧ri̧ ka mbá míy.

²⁶Ké zi ɓay a regé kó wǎyri too, lawɛ́ kɛrɛ ɓay mambá sé tûl a wǎyri, ɓay tûl záŋmá a mɛ̌ ka i láɓaykéy.

²⁷Katína, ké ná záŋmá a zi ɗɛ́ŋ ɓay a hûl. Dáy, Gáŋvbôn kósêe a mɛ̌, tí ɓá mɛ̌ hɛʼɛ nyá, mǐ kɔ́, ɓay a mǐ zi ná tɔ́ʼɔsêe mambá.

²⁸Ɓaykénɔ́, pé mi zi ɓay a pé nɛ́ ɓá gánáké gé, ɓay a í kó nɛ́, a í mbá a lawrína. Nǎŋnɔ́ mǐ kɔ́, mi tí tɔ́ʼɔsêe ɓá ŋgɛ̧́náké mbaa.

²⁹Nǎŋnɔ́, í nyá nɛ́ ka law sáʼa, ɓá báŋa nyîn a wǎyri ka ŋgboro a Gáŋmbây. Í hɔ̧́ mára̧ njuku nǎŋ nɔ́rí̧,

³⁰ɓayhí̧lé, ké zi ɗɛ́ŋ ka hûl ɓay tûl péna a Kiris: Zaa ké pɛ̧rɛ̧ mûn nɛ́, ɓay tûl hí̧ndɔ̂ʼɔ hí̧ mí a gel a wǎyri ka i zi ziŋ ɓá gírú hí̧ mí ka mûn a wǎyri nyáy.